མདའ་མོ་དོང་ལས་ཤོར་ཚུལ།

༄༅།། ཡན་ལག་དྲུག་ཅུའི་དབྱངས་རྟ་རིང་མོས་སྐལ་ལྡན་འགྲོ་བ་ལམ་སྣ་ཟིན།།
ལ་ཁའི་ལུག་རྫིའི་དྲུག་འགྱུར་སྙན་མོས་རི་དྭགས་ཤ་བ་གཤེད་མས་དཀྲོངས།།
འདོད་ལྡན་གཞོན་ནུའི་ཆགས་གཏམ་མངར་མོས་ན་ཆུང་བུ་མོ་གཡང་དུ་བརྫང་།།
ཁྱོད་ཀྱི་འདོད་པའི་གཏམ་ཡན་དེ་ཡིས་བདག་གིས་སེམས་ཁམས་ཆུ་བཞིན་གཞུར།།

མནན་ན་མི་ནོན་གྱེན་དུ་འཕྱུར་བ་ཉོན་མོངས་མེ་ཡི་གཤིས་ཀ་དང་།།
བཀག་ན་མི་ཁེགས་ཐུར་དུ་གཞུར་བ་འདོད་པའི་ཆུ་བོའི་དན་རྟགས་དང་།།
ཇི་ཙམ་སེམས་ཀྱང་མངར་ཁ་མི་རྫོགས་བརྩེ་དུངས་དམར་མོའི་གནས་ལུགས་སྟེ།།
འདི་དག་རྟེན་འབྲེལ་སྒྱུ་མའི་འཕྲུལ་གྱིས་དོན་གྱི་གཞིན་རས་མཚོན་ཚུལ་ལོ།།

ན་ཆུང་མཛེས་མའི་འཛུམ་མདངས་འདི་ནི་ཕོ་སེམས་བསླུ་བའི་གདོན་འཕྲུལ་སྟེ།།
རྨོངས་བྱེད་རེངས་བྱེད་རྨུགས་བྱེད་དང་ནི་བདུད་ཀྱི་ཞགས་པ་ལ་སོགས་པའི།།
དོན་གྱིས་ཟབ་པའི་བརྡ་ཆད་དུ་མས་ལིང་གྱིས་བཀབ་པའི་མེ་འོབས་འདིར།།
ཁ་ཕོ་ཅན་གྱི་ཕོ་རྒོད་སུ་ཡང་སྲིན་འབུ་བཞིན་དུ་ཉམས་རེ་ཆུང་།།

སེམས་ན་ལྷུངས་པའི་བུ་མོའི་ཆེད་དུ་ཁྲག་དང་མིག་ཆུའི་ལོ་རྒྱུས་ཡོད།།
སེང་ལྕམ་འབྲུག་མོའི་འཇོ་སྒེགས་དེ་ཡིས་ཧོར་གྱི་འབུམ་དམག་གླིང་ལ་དྲངས།།
གླིང་གི་གཅེས་ཕྲུག་ཧོར་གྱིས་དཀྲོངས་ཤིང་ཧོར་གྱི་རྒྱལ་བུ་གླིང་གིས་བསད།།
འབུམ་དམག་བཅུ་གཉིས་གཡུལ་དུ་ཤི་བས་དྭ་ཕྲུག་ཡུགས་མོས་ས་གཞི་ཁེངས།།

གཡག་ལ་སེར་པོ་རོ་ཡིས་འདན་ཞིང་རྨ་ཀླུང་རིང་མོ་ཁྲག་གིས་འུར།།
སྡེ་ཆེན་གཉིས་པོ་བརྩད་པའི་མཐའ་མ་འབྲོག་མོ་ལན་བུ་སིལ་བསླས་ཅན།།
ཐམས་ཅད་ཤི་བའི་ལོ་ཟླ་དེ་ལ་གུར་དཀར་ཚང་གིས་བག་སྟོན་བྱས།།
སྲིན་བུ་དང་མཚུངས་ཧོར་གྱི་རྒྱལ་པོ་སེང་ལྕམ་འདོམས་ཀྱི་མེ་ལ་ལྕེབས།།

ཇ་མཁར་རིང་མོའི་སྒྱིད་པུ་མཚམས་ན་ཕོ་ཡུགས་ལུས་པའི་ཇོ་རུ་བུ།།
བརྩེ་དུངས་དམར་མོའི་གཟི་ཁ་ཞིག་གིས་མི་གཅིག་རྟ་གཅིག་ཧོར་ལ་འཁྱམས།།
ཨེ་ཤ་ཡ་ཡི་དམག་ཆེན་འདི་ཉིད་མཛེས་མའི་འཛུམ་ལས་བྱུང་བ་དང་།།
འདི་ནི་ཕོ་སེམས་མོ་ཡིས་བསླུས་པའི་ཆགས་སྲེད་དམར་མོའི་ཆོ་འཕྲུལ་ལོ།།

ཡང་གཅིག་གསོན་དང་མེ་ཏོག་མ་ཁྱོད་དངོས་བྱུང་ལོ་རྒྱུས་འདི་ལྟར་ཡོད།།
གཞོན་ནུ་དོན་འགྲུབ་ས་འཚོའི་བྲང་ན་མངར་དགུ་ཞིམ་བཅུའི་བྲོ་བ་མྱོང་།།
དགེ་སློང་འཆར་ཀས་མཛེས་མ་མཐོང་ཚེ་ཤམ་ཐབས་ལྟེབས་སུལ་དབྲེ་བོ་བཟོས།
ར་མཱ་ཎ་ཡིས་སི་ཏཱའི་ཆེད་དུ་ལངྐའི་གྲོང་ཁྱེར་མེ་ལ་ཕུལ།།

སྲོང་བཙན་སྒོམ་པོས་བུ་མོའི་ཆེད་དུ་རྒྱ་ཡི་ཕ་མཁར་མདུང་གིས་དཀྲུགས།།
ཇིང་གིར་རྒྱལ་པོས་ལོ་གསུམ་གོང་ནས་ན་ཆུང་བུ་མོ་གདམ་གསེས་བྱས།།
ཚངས་དབྱངས་རྒྱ་མཚོ་གསེར་ཁྲི་འགྱིང་ཡང་གྲོང་འདབས་བུ་མོ་སྤྱན་ལ་ཐོགས།།
དགེ་འདུན་ཆོས་འཕེལ་ལྷོ་ལམ་རྒྱུད་དུ་དགེ་སློང་སྡོམ་པ་ཐེངས་དགུ་ཤོར།།

རྒྱལ་པོས་མིག་ལ་མཛེས་མ་ཐོགས་ན་རྒྱལ་སྲིད་འཁོར་བཅས་རྩྭ་ལྟར་དོར།།
གཅོད་པའི་མིག་ལ་བུ་མོ་ཟུགས་ན་རྐང་གླིང་ཌཱ་རུ་གཡང་དུ་བསྐྱུར།།
བླ་མའི་ལག་ལ་བུ་མོ་སླེབས་ན་ཆོས་གོས་རྒྱབ་ནས་ཕུད་ལོང་མེད།།
དགེ་སློང་སྙིང་ལ་མཛེས་མ་ཟུགས་ན་སྡོམ་པ་ཐལ་བ་བཞིན་དུ་འདོར།།

འདི་དག་བསམ་ན་བུ་ནི་བུ་མོས་སྣ་ལོ་བཞིན་དུ་གར་ཡང་ཁྲིད།།
རི་བོ་བསྒུལ་ཞིང་རྒྱ་མཚོ་དཀྲུགས་པའི་བྱུར་གྱི་སྣ་འདྲེན་གྱུར་པ་ཡི།།
འདོད་པའི་རྩལ་རྫོགས་སྨན་ཤར་མོ་འདི་མི་ཡི་ཡུལ་གྱི་རིན་ཆེན་དང་།།
ཕོ་ལུས་ཡོངས་ཀྱིས་ལོངས་སུ་སྤྱོད་འོས་འཆི་མེད་བདུད་རྩི་ཕུང་པོ་ལོ།།

ཁ་ཕྱོགས་ངེས་མེད་རླུང་ཡན་བཞིན་དུ་ཡར་གླིང་རྒྱལ་ཁམས་ཉུལ་བའི་དུས།།
གདོང་དམར་ཅན་གྱི་ཁྲག་ལས་ཆད་ཅིང་མི་ཡི་བྲན་དུ་འཚོ་བ་ཡི།།
ཕུན་ཚོགས་སྒེགས་མོའི་ཆགས་ཉམས་དེ་ཡིས་ཡིད་དབང་ཅུང་ཟད་གཡོས་པ་ན།།
ལས་བྲེལ་མེད་པའི་དུས་སྐབས་ཤིག་ཏུ་སྙན་མོ་དྲུག་འགྱུར་གླུ་རུ་གྱེར།། །།

མ་ལེ་ཤི་ཡ། (crystal crown hotel) ཆུ་ཤེལ་ཅོད་པཎ་གྱི་མགྲོན་ཁང་དུ།

མ་ན་ལི། མུན་ནག་གླིང་། manali

བླ་མའི་སྲིད་དབང་མཐོ་སྒང་འཇིག་རྟེན་དུ་མེད་ཅིང་།།
བཙན་པོའི་མངའ་དབང་བོད་ཀ་གཡག་དྲུག་ནས་མ་དར།།
ཡར་གླིང་ཁྱོན་ན་བཙན་རྒྱལ་སྟོབས་ཤུགས་ཀྱིས་བཟུང་ཞིང་།།
སུམ་གཉིས་ས་ཡི་ཁྱོན་འདི་ཡོམ་ཡོམ་དུ་བཟུང་བའི།།

ཤར་གྱི་རྒྱ་སྟག་སྐྱ་བོའི་ལས་དབང་ལ་ཟུར་བཏང་།།
ལྷོ་ཡི་གཡུ་འབྲུག་སྔོན་མོའི་སྦྲང་ཆར་ལ་ཚོད་འཛིན།།
ནུབ་ཀྱི་མཁའ་ལྡིང་རྒྱལ་པོའི་གཤོག་རྩལ་ལ་སྨ་འབེབས།།
བྱང་གི་སེང་གེ་དར་མའི་སྦར་ཁྱིམ་ལ་སྙད་འདོགས།།

ཕྱོགས་བཞིའི་རྒྱལ་པོ་དུ་མའི་སྲིད་དབང་གི་སྒྲོམ་ལ།།
མེ་ལྕེ་མཚུབས་པ་འདྲ་བའི་ཚ་བ་ལ་བདས་ཤིང་།།
ཆུ་ལོག་རྒྱུགས་པར་མཚུངས་པའི་གྲང་བ་ལ་གཏུགས་པ།།
ལ་འཕྲད་ལ་རུ་འཕྲད་པ་ལ་ཁ་ནས་བསད་པ།།

ལུང་འཕྲད་ལུང་ཏུ་འཕྲད་པ་ལུང་ཁུག་ཏུ་བཀུམས་པ།།
བློ་བུར་བར་དུ་བཅོད་པས་བདུད་པོ་རུ་བཏགས་པ།།
བདུད་ཡུལ་ཁ་རག་སྒོ་དགུའི་སྙིང་བཅུད་ན་འགྱིང་བའི།།
བདུད་པོ་རེ་ལྡེ་མགོ་ཡག་འཇིག་རྟེན་འདིའི་བདག་པོ།།

བདུད་མཁར་རྩེ་དགུའི་སྲིད་དབང་ཕྱོགས་མཐར་རུ་བསྲིངས་ས།།
སྣ་ཚོགས་ཤིང་ནགས་འཐུག་པོ་ལ་ལུང་ཀུན་སྒྲིབ་ནས།།
སོས་ཀའི་གྲིབ་སོ་ནག་པོ་སྲིབ་རི་ནས་གུག་འདྲ།།
ཟླ་འོད་མེད་པའི་མུན་ནག་ཤར་མཐའ་ནས་འཁྲིགས་འདྲ།།

སྣ་ལྔའི་ཤིང་འབྲས་ཉིན་སྲིབ་ཐང་མ་རུ་བརྡལ་ཞིང་།།
འབྲུ་དྲུག་སྙེམ་མའི་མགོ་ལྕོག་ལྡེམ་ལྡེམ་དུ་གཡོ་བའི།།
ཡར་གི་གངས་རི་དཀར་པོ་སྤྲིན་དཀར་གྱི་ཞྭ་ཅན།།
མ་གི་གཙང་ཆབ་ལྦུ་བ་ཆལ་ཆིལ་དུ་གཡོ་བའི།།

རང་བྱུང་མུ་ཟིའི་ཆུ་ཚན་གྲང་ནད་ཀུན་འཇོམས་པ།།
གོང་ནས་བརྡོལ་ཞིང་འགབ་ནས་ཐོལ་ཐོལ་དུ་ལུད་པ།།
ཕྱི་གླིང་མགྲོན་པོ་ལྗོངས་རྒྱུའི་ཡུལ་གྲུ་ཙམ་ཞིག་ལས།།
བདུད་ཡུལ་ཁ་རག་སྒོ་དགུ་སྦས་ལུང་རུ་ལུས་སོ།།

གྷོ་བའི་བྱེ་ཚན། goa beach

ལྷོ་ནས་ལྷོ་རུ་དལ་གྱིས་བཞུད་ན་ལྷོ་ཡི་མཐའ་ལ་ཐུག་རྒྱུ་ཡོད།།
ལྷོ་ཡི་ཟུར་ནས་གནམ་ས་འབྱར་བ་ཆུ་བུར་མིག་གིས་མཐོང་རྒྱུ་ཡོད།།
ལྷོ་ཡི་མཐའ་ལ་གྷོ་བ་ཞེས་པའི་མིང་གིས་ལྕིད་པའི་གྲོང་གཅིག་ཡོད།།
ལྷོ་མཐའ་བྱེ་མ་ཚ་དྲོད་དམར་མོ་རྐང་མར་འཕྱུར་བའི་དབལ་རླབས་ཡོད།།

ཆུ་རྡུལ་ཟེགས་མའི་ལྦུ་བ་དཀར་པོ་ཉི་མའི་མཐོངས་ལ་བཀབ་ནས་ཡོད།།
ཉི་མ་དམར་པོས་རྒྱ་མཚོ་འཐུང་ཞིང་རྒྱ་མཚོས་སྔོན་མོས་ཉི་མ་རྔུབས།།
གནམ་ས་འཐབ་པའི་གཡུལ་ཐག་མ་ཆོད་འགྲོ་ཀུན་རྔུལ་ཆུས་གཞུང་དུ་ཁྱེར།།
ཏ་ལའི་ལོ་མས་ཕྱོགས་མེད་མགྲོན་པོ་གྲིབ་བསིལ་སྣུམ་པོས་བསུ་མ་བྱེད།།

ཡུལ་གྱི་བུ་མོ་རྫ་མདོག་ཅན་དེས་ན་རིས་ཡ་ཡི་ཆང་རྒོད་དྲངས།།
ཕྱི་གླིང་ཕོ་མོ་གཅེར་བུ་སྐྱོབ་མེད་རི་དྭགས་ཕོ་མོའི་འགྲོ་འགྲོ་བྱེད།།
ཉ་སྦལ་སྡིག་སྲིན་ཁྲོབ་ཟ་ཁྲོབ་མུར་ར་ཡིས་ལོ་ཏོག་ཟ་བ་བཞིན།།
གཉུག་མར་གནས་པའི་ཡུལ་མི་དག་ནི་དེང་རབས་ཕྱོགས་ལ་མི་སྨོན་པར།།

ར་དང་བ་གླང་སྒོ་རུ་བཏགས་ཤིང་ཉ་དང་སྦལ་པ་ཆུ་ནས་ལེན།།
གྱོ་ཐོག་ཅན་གྱི་བསིལ་ཁང་མགྲམ་དུ་ཆུ་ཡི་ཆག་ཆག་ལེགས་པར་བཏབ།།
གཡས་འཁྱིལ་གཡོན་འཁྱིལ་དུང་དཀར་རིགས་དང་མུ་ཏིག་མགྲོན་བུ་ཉ་ཕྱིས་སོགས།།
ཆུ་ཡི་གཏིང་ནས་རླབས་ཀྱིས་བདས་པའི་འབུ་སྲིན་པགས་པའི་ཚོང་ཁྲོམ་བཀོད།།








ལས་དབང་དམར་པོའི་རླུང་གིས་བདས་པའི་གདོང་དམར་བོད་ཀྱི་ཚོང་པ་རྣམས།།
གསེར་དང་རྔུལ་གྱི་ལག་གདུབ་རྐང་གདུབ་མཛུབ་བཀྲིས་དོ་ཤལ་རྒྱན་སྣ་ཚོགས།།
ལྗོངས་རྒྱུ་བ་ལ་དམིགས་ཀྱིས་བཀར་ནས་སྣ་ཚོགས་རིན་ཆེན་ཐང་མལ་བརྡལ།།
ཇ་ཤ་གཉིས་ཀྱི་ཇ་ཁང་ནང་དུ་ཆང་དང་ཨ་རག་སྣོན་པ་བཏབ།།

ཞོ་དང་འོ་མ་ཟུར་ནས་ངོམ་ཞིང་ཉ་དང་འབུ་སོགས་གབ་ནས་བཙོང་།།
གླིང་བདུན་མགྲོན་པོ་འགྲམ་ཆུ་སྐྱུར་མོ་ཇ་མའི་བྲང་གཞུང་ཅུ་ཅུར་བཞུད།།
བཀྲ་ཤིས་བདེ་ལེགས་ལྷང་ལྷང་འབོད་ཅིང་སྣ་ལྔའི་རླུང་རྟ་གཡོ་བའི་ཚེ།།
གདོང་དམར་བ་ཡི་ཟུངས་ཁྲག་འདི་ཡིས་ང་ནི་རང་ལས་གཞན་མ་ཡིན།།

རྟ་ཕོའི་འཚེར་སྐད་སིང་སིང་གྲག་ཅིང་ཁྱི་ནག་ངར་མའི་ཟུག་སྐད་དང་།།
མ་སྲུ་མོ་སྨན་འདབས་ནས་བསུ་བའི་ཡུལ་གྱི་ཚོར་བ་ཁྱུག་ཁྱུག་དྲངས།།
ཁྱོད་ཉིད་མ་འདུག་ལྷོ་འདིར་སོང་དང་ཅི་ཡང་ཐོབ་ལ་ཅི་ཡང་ཤོར།།
ཐོབ་ཤོར་གཉིས་ཀྱི་བར་གསེང་དེ་ནས་མི་ཚེ་ཚོད་འགམ་ཐེངས་ཤིག་བྱོས།། །།

བྱ་རྒོད་སུག་པ།

རང་བྱུང་ཁམས་ཀྱི་གསང་བ་ཕྲ་མོའི་ཕྲ་མོ་དེ་དག་ནི་སངས་རྒྱས་ཉག་གཅིག་གིས་སྤྱོད་ཡུལ་ཙམ་ལས་ལྟ་ཅི། གཞན་གཟུགས་ཅན་རགས་པ་འདི་དག་ནི་ལ་བརྟག་དཔྱད་ཀྱིས་གཏན་ལ་འབེབས་མཁན་ནི་བོད་ཀྱི་མེས་པོ་གོང་མ་དེ་དག་ལས་སླ་མོ་ཞིག་མ་རེད། འཇིག་རྟེན་གྱི་ཡུལ་གྲུ་གཞན་དུ་མིང་ཡང་མི་གྲགས་ཤིང་བོད་ཡུལ་མཐོ་སྒང་ཁོ་ན་སྐྱེ་འཇིག་བྱེད་བཞིན་པའི་རང་བྱུང་ཁམས་ཀྱི་དངས་མའམ་བདུད་རྩི་འདི་དག་ནི་བོད་གངས་ཅན་པའི་སྔོན་བྱོན་དམ་པ་དེ་དག་གིས་ངོ་བོ་དང་། རྣམ་པ། བྱེད་ལས། བརྟག་ཐབས། རོ་ནུས་སོགས་ཆེས་ཞིབ་ཅིང་ཕྲ་བ་གཏན་ལ་ཕབ་ཡོད་པ་ཡིན། སྔོན་བྱོན་བོད་ཀྱི་མེས་པོ་དེ་དག་གི་འཇིག་རྟེན་འདི་ཡི་ཐོག་གི་ཚན་རིགས་པ་སྔ་ཤོས་དང་། ཞིབ་ཕྲ་ཆེ་ཤོས། ཆོས་ཐམས་ཅད་ཕན་ཚུན་ལྟོས་གྲུབ་ལ་ཁུངས་བཅོལ་བས་རིགས་པས་བརྟགས་བཟོད་པ་སོགས་ཚན་རིག་པ་ནང་གི་ཚན་རིག་པ་ནི་བོད་ཀྱི་སྔོན་བྱོན་མཁས་པ་གཡུ་ཐོག་ཡོན་ཏན་མགོན་པོ་སོགས་ཡིན་ཨང་སྙམ་པའི་བློ་འགོག་མེད་དུ་འཆར་གྱིན་འདུག ས་རྡོ་རྩི་ཤིང་རེ་རེ་ནས་གཏན་ལ་འབེབས་པའི་ལུགས་སྲོལ་འདི་བོད་ཡུལ་དུ་མ་གཏོགས་ཡུལ་གྲུ་གཞན་དུ་ལུགས་སྲོལ་འདི་དག་མེད་པ་འདྲ། ས་སྟེང་གི་གཟུགས་ཅན་གྱི་དངོས་པོ་རང་རང་ལ་བྱེད་ལས་ཕན་ནུས་ཐུན་མོང་མ་ཡིན་པ་རེ་ཡོད་པས་ན། ས་སྟེང་སྨན་མིན་ཅི་ཡང་ཡོད་མ་ཡིན།། ཅེས་སོགས་ཀྱི་བཀས་བཅད་གནང་ཡོད། གཟུགས་ཅན་གྱི་དངོས་པོ་དེ་ཐམས་ཅད་ཀྱི་ཐུན་མོང་མ་ཡིན་པའི་ངོ་བོ་སོགས་གཏན་ལ་མ་ཕབ་པ་ཕལ་ཆེར་མེད་པ་ལྟ་བུ་ཞིག་ཡོད་པ་རེད།
དེ་དག་ལས་བོད་ཡུལ་མཐོ་སྒང་དུ་སྐྱེས་པའི་བྱ་རྒོད་སུག་པ་ཞེས་པའི་མེ་ཏོག་འདི་ཉིད་ངོ་སྤྲོད་བྱེད་རྒྱུ་ཡིན། མིང་གི་རྣམ་གྲངས། བྱ་རྒོད་སུག་པ། རྒྱལ་པོ་ལ་ཐོད་ཅན། བྱང་གཡག་འདེལ་འབྱིན། ད་བྱིད་དཀར་པོ་སོགས་ཟེར། སྔ་མ་གཉིས་ནི་འདྲ་བ་རྒྱུ་མཚན་དུ་བྱས་ནས་བཏགས་པ་དང་། ཕྱི་མ་གཉིས་ནི་བྱེད་ལས་ཀྱི་ཆ་ནས་བཏགས། སྐྱེ་ཡུལ་ནི། བོད་མདོ་ཁམས་སྒང་གསུམ་མམ་སྒང་དྲུག་གི་ཕྱོགས་སམ། ཡང་ན་དེང་དུས་མདོ་དབུས་མཐོ་སྒང་གི་ཕྱོགས་དེར་དང་། མདོར་ན། མཚོ་ངོས་ནས་ཕྲག་འདོམ་༤༠༠༠ནས་༤༥༠༠།ཙམ་གྱིས་མཐོ་བའི་རྫ་རི་དང་བྲག་མཚམས། གངས་ཞོལ་སོགས་སུ་སྐྱེས་པ་ཡིན། སྐྱེ་དུས་ནི། ལོ་རེ་བོད་ཟླ་བདུན་པའི་འགོ་དེར་སྐྱེས་ཤིང་ཡུན་རིང་ཙམ་གནས་ཐུབ། འདི་ཉིད་ཚུལ་ཇི་ལྟར་དུ་ཡོད་པ་ནི་འདྲ་པར་ལས་ཤེས་ཐུབ་ནའང་སྔོན་བྱོན་མཁས་པས་མི་ནོར་བའི་གཟེར་འདི་ལྟར་བཏབ་ཡོད། དེ་ཡང་འཁྲུངས་དཔེ་ལས། ད་བྱིད་དཀར་པོ་ཞེས་བྱ་བ།། གངས་རི་མཐོན་པོའི་རྫ་ལས་སྐྱེ།། ལྷོག་པ་འདུལ་བའི་དར་ཡ་ཀན།། བྱ་རྒོད་སུག་པ་ཞེས་ཀྱང་བྱ།། སྡོང་བུ་ཁོང་སྟོང་རས་བལ་གྱོན།། སྐྱེ་ཚུལ་ཡུ་མོའི་སྲོལ་གོང་བཞིན།། རྩེ་ཟླུམས་མེ་ཏོག་ཅུང་ཟད་སྨུག། བྱ་རྒོད་རྫ་ལ་བབ་པ་འདྲ།། རོ་ནི་ཁ་ལ་ནུས་པ་བསིལ།། ལྷོག་པའི་ནད་རིགས་གང་ལ་ཡང་།། གཅིག་ཐང་ཁོང་བཏང་སྐྲངས་པ་ལ།། ཕྱི་ནས་འབྱར་བྱས་འཕྲལ་བདེ་སྟེར།། ཞེས་དང་། དགེ་བཤེས་དེའུ་དམར་ཚང་གིས་ཀྱང་། བྱ་རྒོད་སུག་པས་མགོ་རྨ་ལྷོག་རྒོད་འདུལ།། ཞེས་གསུངས་སོ།།
དེ་ལྟ་བུའི་བོད་ཀྱི་བདུད་རྩི་ཕོན་པོ་འདི་ཉིད་ཡུལ་ལུང་གཞན་དུ་ཡོད་ཚོད་མི་འདུག གལ་སྲིད་ཡུལ་གྲུ་གཞན་དུ་རིག་དངོས་འདི་ཉིད་མེད་ན་མིང་རང་སོར་བཞག་ནས་བྱ་རྒོད་སུག་པ་ཞེས་འབོད་པ་དང་དབྱིན་ཡིག་སོགས་སུ་བྲི་སྐབས་ཀྱང་བོད་མིང་འདི་ཉིད་སྒྲ་གདངས་གང་དང་ཐག་ཉེར་བསྟུན་ནས་བྲིས་ན་དགེ་མཚན་ཆེའམ་མཁས་པ་རྣམས་ཀྱི་དགོངས་པ་མཛོད་ཅིག

དབྱངས་གསལ་ཁྲོད་ཀྱི་མི་ལ།

ཀ་བ་བུམ་པར་ཁ་རྩོད་མ་བྱས་འཆི་ཆོས་ངོ་མ་ཞིག་གི་ཆེད།།
ཁ་བས་གཡོགས་པའི་གངས་ཀྱི་རི་སོགས་ཀུ་ཅོས་དབེན་པའི་བས་མཐའ་རུ།།
ག་འགྲོ་གདེངས་མེད་འདི་འགྲོ་དམིགས་མེད་རླུང་གིས་བདས་པའི་སྲིན་བལ་བཞིན།།
ང་འཛིན་སྤངས་པའི་ཁྱོད་ཀྱི་གཏམ་དེས་ང་ནི་དེ་རིང་ཡི་ག་འགགས།།

ཅ་དངོས་རྡོག་པོ་རུམ་ན་མེད་ཀྱང་ཕ་རྒོད་བླ་མའི་དྲུང་དུ་བསྙེགས།།
ཆ་རྒྱུས་མེད་པའི་མར་སྟོན་ལོ་ཙཱས་ཕྲུ་མ་སློག་པའི་ཟོལ་གྱིས་བསུས།།
ཇ་རྩམ་འཚོ་བ་གྲོང་ནས་བསླངས་ཏེ་སྒོ་གསུམ་བླ་མའི་དྲན་དུ་ཕུལ།།
ཉ་རྒྱས་ཟླ་བའི་དཔལ་ལ་འཁུ་བའི་དད་དང་ལྷག་བསམ་ཟོལ་མེད་ཀྱང་།།

ཏ་ལེན་ནང་དུ་འབུལ་བ་མེད་པས་དབང་གྲལ་ནང་ནས་དབང་སྐལ་བཅད།།
ཐ་དད་དབྱིབས་གཟུགས་མ་ངེས་པ་ཡི་གསས་མཁར་དགུ་ཡི་སྐྱ་རིས་བསྟན།།
ད་དུང་ཅི་མཛད་ལེགས་པར་མཐོང་བའི་ཚེ་རབས་སྔ་མའི་འབྲེལ་ཐག་ཅན།།
ན་ཚ་སྔུག་དགུ་ཁྱོད་ལ་ཕོད་པ་མར་ལོ་སྙིང་ཁམ་ཆེ་བ་ལ།།

པ་ལོ་ལན་བུས་རོ་སྟོད་ཁེབས་ཤིང་སྔོ་སྐྱ་གཅེར་བུ་སྐྱིལ་དཀྲུང་ཅན།།
ཕ་རོལ་རྔོན་པས་མིག་ལམ་ཤར་ཚེ་མི་འམ་འདྲེ་ཞེས་དཔྱངས་ཐག་འཛིན།།
བ་རི་ལོ་ཙཱའི་རྟོགས་པ་གནོན་པའི་ང་འོ་སྙམ་པའི་ང་རྒྱལ་ཅན།།
མ་སྲིང་སྔོན་ན་གཅེར་བུར་ཉལ་བའི་མི་ཡི་འགྲོ་སྟངས་ཐམས་ཅད་གཤིགས།།

ཙ་ཏུར་དབལ་ལྡན་ལྷགས་རླུང་མདའ་མོས་ཕྱི་ཡི་གཟུགས་པོ་འཁྱག་ལ་སྦྱར།།
ཚ་ཚ་འུ་འུར་ནང་གི་གཏུམ་མོས་ཤེས་བྱའི་བུད་ཤིང་ཐུལ་ཐུལ་སྲེག།
ཛ་དྲག་འབྱུང་བཞི་སྣོལ་མའི་ཁྲོད་ནས་གཉུགས་མའི་རིག་པའི་ཁྱེ་འུ་དེས།།
ཝ་ལེར་ཆོས་ཀུན་རྗེན་པར་གཟིགས་པའི་ཀ་དག་གདོད་མའི་དབྱིངས་ལ་རོལ།།

ཞྭ་གོས་ལྷམ་གསུམ་གཅིག་ལྕོགས་གྱུར་པའི་ཀ་ཤཱིའི་རས་ཀྱི་ཆུན་པོ་དང་།།
ཟྭ་མའི་སྔོ་ཚོད་དེ་གཉིས་ཙམ་གྱིས་མི་ཚེ་རིང་མོ་འབུད་རྒྱག་གཏོང་།།
འ་ཅག་ཐོས་བསམ་སྒོམ་ལོ་འདི་དག་སྐྱིད་ཉལ་རྒྱགས་ཉལ་དེ་རིང་མཐོང་།།
ཡ་མཚན་ཁྱོད་ནི་མི་རུ་སྐྱེས་ཀྱང་མི་ཡི་གྲལ་ནས་བུད་པ་ཞིག།

རྭ་རྒྱན་རུས་རྒྱན་བརྗིད་ཉམས་མི་དགོས་མཁས་གྲུབ་སྟོང་གི་རྩེ་ན་འགྱིངས་།།
ལ་ལུང་ཕཌ་ཀྱིས་སྐོང་བ་མི་དགོས་ནང་གི་རྣམ་རྟོག་རྡུལ་དུ་བརླགས།།
ཤ་ཁྲག་ཚོགས་ཀྱིས་འཁོར་ལོ་མི་དགོས་མ་དང་མཁའ་འགྲོ་སྤྲིན་ལྟར་འདུ།།
ས་ཐིགས་རོལ་མོས་ཕེབས་བསུ་མི་དགོས་སྤྲིན་དཀར་བཞིན་དུ་མཁའ་ནས་བཞུད།།

ཧ་ལའི་དུག་ལ་སོ་འབྲད་བཞིན་དུ་ཤི་གསོན་དཀོར་ལ་འཇིགས་སྣང་བྱེད།།
ཨ་དོན་སྐྱེ་མེད་ཆོས་དབྱིངས་བདེ་བས་ལྟོ་གོས་གཏམ་གསུམ་གཅིག་ཏུ་འགགས།།
ཧ་ལམ་ཀ་ཕྲེང་འགྲིགས་ཙམ་བྱས་ཀྱི་ཁྱོད་ཀྱི་ལེགས་བྱས་རྒྱ་མཚོའི་རྡུལ།།
ཨ་སྔོན་ཕར་མཐའ་མི་དཔོག་ཇི་བཞིན་དེ་རིང་འདི་ཙམ་ཉེ་བར་བསྡུ།།

ཨི་ཡིག་བཞིན་དུ་མགོ་བོ་བཀུག་ནས་ཁྱོད་ཀྱི་རྣམ་ཐར་བསམ་པའི་ཚེ།།
ཨུ་ཚུགས་རྐྱང་པའི་རྟོག་བཟོ་མི་དགོས་མགོ་རུས་གཏིང་ནས་མིག་ཆུ་འཁྲུགས།།
ཨེ་མ་དེང་གི་བསྟན་འཛིན་ཁས་མཆེ་གླིང་བཞི་དཀོར་གྱིས་བསྐོར་བ་རྣམས།།
ཨོ་ལོ་རང་ཉིད་མགོ་སྐོར་ཙམ་ལས་ཅི་ཡང་མེད་པར་ཁྱོད་ཀྱིས་གྲུབ།། །།

ཤིང་སྤྲེལ་དཔྱིད་ཆོས་ཆེན་མོའི་ཚོགས་གྲལ་ནས། ༢༠༠༤། ༣། ༡༤ ཉིན།

༢༠༠༦་ལོའི་《རྩམ་པ་》དུས་དེབ་ཏུ་བཀོད་ཅིང་དེ་རིང་བསྐྱར་ཞུས་ཕྲན་ཙམ་བྱས།

གནམ་ས་གའུ་ཁ་སྦྱར།

ཉེ་བའི་ཆར་དེང་རབས་བོད་ཀྱི་རིགས་པ་སྨྲ་བ་འགའ་ཞིག་གིས་སྔོན་གྱི་དུས་སུ་ནུབ་ཕྱོགས་ཀྱི་བསམ་བློ་བ་དང་། རྟོག་དཔྱོད་ཅན་རྣམས་ཀྱིས་ས་ཡི་གོ་ལ་འདི་རིལ་རིལ་དང། ལེབ་ལེབ་ཇི་ལྟར་འདོད་པའི་གཏམ་ལས་འཕྲོས་ནས་འབེལ་གཏམ་དང་བགྲོ་གླེང་ལྷུགས་པོ། བར་བར་དུ་རྩོད་པ་ཚ་ངར་ཅན་ཡང་མང་དུ་གནང་བར་རྗེས་སུ་ཡི་རང་ཞུ།
དེ་རིང་གུས་པས་ང་ཚོ་སྒང་པ་བོད་ཀྱི་མེས་པོ་རྣམས་ཀྱིས་འཇིག་རྟེན་འདི་ཉིད་ཀྱི་དབྱིབས་དང་གྲུབ་ཚུལ་ཇི་ལྟར་ཡོད་པའི་སྐོར་ལའང་ཅུང་ཙམ་བསམ་བློ་གཏང་རིན་ཡོད་པར་བསམ། དེ་ལྟར་ཇི་ཡིན་གསལ་བའི་རང་རེའི་ལོ་རྒྱུས་ཁུངས་མ་དང་། བྱུང་རབས་དངོས་མ་དེ་དག་ནི་སྔ་དུས་སུ་བཙན་པོ་དཀྲོངས་པ་དང་། འབངས་གྱེན་ལོག ཉེ་དུས་སུ་རིག་གནས་གསར་བརྗེ་ཆེན་པོ་སོགས་ཀྱིས་གཏན་དུ་གྱེས་མཇལ་ཞུས་ཟིན། ད་ལྟ་བཞུགས་པའི་ཆོས་འབྱུང་དང་རྒྱལ་རབས་སུ་གྲགས་པ་ཕལ་མོ་ཆེ་ནི་སྟོན་པ་བཀའ་དྲིན་ཅན་གྱི་ཆོས་ཚུལ་ཇི་ལྟར་དར་བའི་ཚུལ་ལས་འཕྲོས་ནས་གླེང་བ་ཤ་སྟག་ཏུ་སོང་གཤིས་ཆེས་གདོད་མའི་དུས་ཀྱི་བོད་ཀྱི་བྱུང་རབས་དེ་དག་ས་འོག་གི་གཏེར་བཞིན་དུ་མི་གསལ་བར་གྱུར། འོན་ཀྱང་ད་ལྟ་ཆེས་ཉུང་ཤས་སུ་གྱུར་ཅིང་ཁ་མ་གང་ཞིང་། ཆ་མི་ཚང་བའི་གཏོ་ཆོག་དང་ཤོག་ཛར་དུམ་བུ་འགའ་ཡི་སྣེ་ལ་འཇུ་ནས་གཞན་གྱི་རིག་གཞུང་གྱིས་ཁ་མ་སྐོང་བའི་གདོད་མའི་བོད་རྒན་རྣམས་ཀྱི་བསམ་པའི་ཁྱེར་སོ་དང་། འདུ་ཤེས་འཛིན་སྟངས་དེ་དག་སློག་ཙམ་རེ་བྱས་ན་བསམ། དེ་ཡང་འཇིག་རྟེན་གྲུབ་ཚུལ་ནི། མུ་མེན་ཕྱཱ་ཡི་པྲ་ཕུད་ལས།
གནའ་སྔ་སྲིད་པའི་དང་པོ་ལ།།
ཞེ་སྔ་བསྐལ་པའི་ཐོག་མ་ལ།།
ཅི་ཡང་མེད་པའི་སྟོང་པ་ལས།།
ཅི་ཡང་མཁྱེན་པའི་འོད་ཅིག་བྱུང་།།
འོད་དེ་རབ་ཏུ་རྒྱས་པ་ལས།།
ཡེ་ཤེས་ལྷ་ཡི་ཐུགས་རྗེ་དང་།།
སྤྱི་མཐུན་སེམས་ཅན་བསོད་ནམས་ལས།།
ཕྱི་ནང་སྣོད་བཅུད་འཇིག་རྟེན་ཆགས།།ཞེས་དང།
རླངས་ཀྱི་པོ་ཏི་བསེ་རུ་ལས།
དམིགས་ནི་ཕ་ལ་དམིགས་ནི་མ།།
དེ་ན་བ་མོ་དཀར་ཙམ་སྲིད།།
བ་མོ་བཞུ་པས་ཟིལ་པར་སོང༌།།
ཟིལ་པ་འགྲིལ་བས་ཆུ་བོ་སོང༌།།
ཆུ་བོའི་ཁ་དོག་སྤྲིན་དུ་ཆགས།།
ཆུ་བོའི་ཐོག་ཏུ་རྡུལ་དུ་ཆགས།།
དེ་ལ་ས་ཆེན་ཁད་ཀྱིས་ཆགས།། ཞེས་དང་ཐོག་འདི་ཡིན་གྱི་ངོས་བཟུང་མེད་པར་ཐམས་ཅད་སྐྱ་ཧང་ཧང་དུ་ཡོད་པས་འོད་དང་། བ་མོ། ཟིལ་པ། ཆུ། སྤྲིན། དེ་ནས་ས་གཞི་སོགས་རིམ་གྱིས་ཆགས་པར་བཤད།
ད་འོ་ན་དེའི་དབྱིབས་གཟུགས་དེ་ཇི་ལྟར་རིལ་རིལ་དང་། ཡང་ན་ལེབ་ལེབ་ཏུ་ཡོད་སྙམ་ན། མེས་པོ་དེ་དག་གིས་འཇིག་རྟེན་འདི་ཉིད་རིལ་རིལ་ཡིན་པ་མ་ཟད་གའུ་ཁ་སྦྱོར་ཏེ། དཀྱིལ་དུ་རྒྱ་ཆེ་ཞིང་མཐོངས་ཡངས་པ། ཕྱོགས་བཞི་མཐའ་ནས་འབྱར་བ། མདོར་ན་མདོར་ན་འབྲོག་པའི་སྦྲ་ཕུབ་ལྟ་བུའི་དབྱིབས་གཟུགས་ཅན་ཞིག་གསུངས་ཡོད་པ་ཡིན་ཏེ། དེ་ཡང་ཡོ་ག་ལྷ་གྱེས་ཅན་ལས།
དང་པོ་བསྐལ་པ་བས་བསྐལ་སྲིད་པས་མ་སྲིད་ཙམ་ན། ཕྱ་ཡེ་མཁྱེན་ཆེན་པོ་བྱ་བ་གཅིག་སྲིད་པ་ས་ཡིས་བསྐོས་ཏེ་བྱུང་། དེ་ལས་ཁོ་མ་འགྲོ་རྗེའི་ལེགས་པའི་ཧོར་དྲུག་ཅེས་པ་གཅིག་སྲིད། དེའི་ཞལ་གྱིས་ངད་པ་སྤྱན་གྱིས་སྒྲོས་མ། དབུ་སྐྲ་ཕྱག་སོར་ཙམ་གཅིག་གནས་པ་སྟེ། གནམ་ས་ཆ་མ་ཕྱེད་ཀྱི་བར་དུ་ཕུས་བཏབ་པས། གནམ་ས་ཆ་ཕྱེད་དེ། གནམ་རིམ་པ་བཅུ་གསུམ་ནི་ཁང་རིམ་ཁང་དུ་ཡས་ཕུབ། ས་རིམ་པ་བཅུ་གསུམ་ནི་གདན་རིམ་གདན་དུ་མས་གཏིང། གནམ་ས་གའུ་ཁ་སྦྱོར་དེའི་ནང་དུ་འོད་དཀར་ནག་གཉིས་སྲིད། ཅེས་དེ་ལྟ་བུའི་གནམ་ས་གའུ་ཁ་སྦྱར་གྱི་ནང་དུ་བཅུད་ཀྱི་སེམས་ཅན་དེ་དག་རིམ་གྱིས་གྲུབ་པར་གསུངས་འདུག འབྲོག་པ་སྦྲ་གུར་གྱི་ནང་དུ་བསྡད་པ་ལྟར་ཕྱིའི་གནམ་ས་གཉིས་ཀྱང་མིག་གིས་ཆོད་མཚམས་ཤིག་ནས་འདབས་འབྱར་ནས་ཡོད་པ་བསམ་ཚུལ་འདི་ན་མ་སྨིན་པའི་འདོད་ཚུལ་ཞིག་སྟེ་འགྲིམ་འགྲུལ་ཉུང་ཞིང་ཁུག་དཀྱོག་ཏུ་བསྡོད་མཁན་དག་ལ་སྐྱེ་སྲིད་པའི་དོགས་པ་ཞིག་རེད་བསམ། འདི་དག་གི་སྐབས་སུ་ཕྱི་ལྕགས་རི་ཁོར་ཡུག་གིས་བསྐོར་བའི་དབུས་སུ་རི་ཡི་རྒྱལ་པོ་རི་རབ་ཟེར་བ་སོགས་ནི་མཐོང་རྒྱུ་མི་འདུག་པས་མཎྜལ་ལས་འབྱུང་བའི་ས་དབྱིབས་འདི་ནི་ཕྱིས་སུ་རྒྱ་གར་གྱི་འདོད་ཚུལ་ཡིན་པར་སྨོས་མེད་རེད། འོན་ཀྱང་དགེ་ཆོས་ཀྱི་《འཇིག་རྟེན་རིལ་མོའམ་ཟླུམ་པོ་》ཞེས་པའི་རྩོམ་གྱི་རྨང་གཞི་དང། རྟོག་དཔྱོད་ལ་འདེད་པའི་སྒོ་མོ་འདྲ་བ་དེ་ནི་ནུབ་ཕྱོགས་པའི་ཚན་རིག་པས་བརྙེད་པའི་གྲུབ་དོན་འཇིག་རྟེན་རིལ་རིལ་དེ་ལ་བརྟེན་པ་མ་གཏོགས་བོད་ཀྱི་ཆེས་རྙིང་མའི་གཞུང་ནས་འབྱུང་བའི་གནམ་ས་གའུ་ཁ་སྦྱར་གྱི་ལུགས་འདི་དག་ལ་བརྟེན་ཡོད་ཚོད་མི་འདུག་གོ

འབྲུག་ཆུ་རྫོང་དུ་རི་ལུད་པ།

ཁ་སང་ཕྱི་ཟླ་བརྒྱད་པའི་ཚེས་བརྒྱད་ཉིན་བོད་མདོ་སྨད་ཀན་ལྷོ་ཁུལ་གྱི་འབྲུག་ཆུ་རྫོང་དུ་རི་བོ་ལུད་ནས་རྫོང་མཁར་དེ་ཉིད་ཀྱི་ཕྱེད་གཤགས་བྱས་ནས་གྲོང་ཁྱེར་དེའི་མི་རྒྱུ་གཉིས་ལ་གོད་ཆག་ཚབས་ཆེན་ཐེབས་པའི་གནས་ཚུལ་གང་སར་ཁྱབ་ཡོད་པ་རེད། གསར་ལམ་ཁག་ཏུ་མི་ཤི་གྲངས་༡༢༧ཙམ་དང་། རྨས་མ་བརྒྱ་ཕྲག་ལས་བརྒལ་བ། གར་སོང་མེད་པའི་གྲངས་འབོར་སྟོང་ཕྲག་ལས་བརྒལ་ཚུལ་བཤད་བཞིན་པ་འདུག་པས་ཤི་བའི་གྲངས་ཀ་ཕལ་ཆེར་སྟོང་དུ་ལོན་ངེས་སྙམ། དེ་ནི་ངའི་ཚོད་དཔག་ཙམ་ཡིན་པས་ཁ་ངན་པ་མ་གསུང་རོགས། ཉིན་དེའི་ཕྱི་དྲོ་དེར་རྒྱ་ནག་གི་སྲིད་བློན་དབུན་ཇ་པུས་འབྲུག་ཆུ་རྫོང་དུ་དངོས་སུ་འབྱོར་ནས་ལས་དོན་བཀོད་སྒྲིག་དང་རྨས་མ་སོགས་ལ་འཚམས་འདྲི་བྱས་པར་གསར་ལམ་ཁག་ཏུ་བཤད། དེ་རིང་ནི་མྱུར་སྐྱོབས་དང་། གནས་སྤོ་རས་གུར་སོགས་གཞུང་ནས་མཐུན་རྐྱེན་འབྱོར་བཞིན་ཡོད་འདུག དེ་དང་མཚུངས་པར་བྱེས་ནས་ཀྱང་བཀའ་ཤག་གིས་ཐུགས་གསོ་འཚམས་འཕྲིན་དང་ཤི་བོ་ལ་བསྔོ་སྨོན་གནང་ཡོད་པ་རེད། ད་དུང་ཡང་འབྲེལ་ཡོད་རྣམ་པས་གསོན་པོ་རྣམས་ལ་རོགས་རམ་དང་འཚམས་འདྲི་ཤི་བོ་རྣམས་ལ་མ་ཎི་རེ་ཚ་འདོན་བྱེད་རྒྱུ་བརྗེད་མི་རུང་།
ད་ལོ་ང་ཚོ་བོད་མི་རྣམས་ཀྱི་མགོ་ལ་རང་བྱུང་ཁམས་ཀྱི་ཆག་སྒོ་ཆེན་པོ་ཡང་ཡང་འབྱུང་གིན་འདུག་པས་འདི་ཉིད་ཐན་ལྟས་ཤིག་གམ་ཡང་ན་གཞན་ཞིག དེ་སྔོན་ཁམས་སྐྱེ་དགུ་མདོ་རུ་ས་གཡོས་པའི་འཇིག་པ་དང་། ཁ་སང་ལ་དྭགས་སུ་གནམ་རལ་བའི་འཇིག་པ། དེ་རིང་འབྲུག་ཆུ་རུ་རི་ཉིལ་བའི་འཇིག་པ་འདི་དག་ཉམ་ཆུང་མི་རིགས་འདིའི་མགོ་ལ་ཚོགས་སྤུངས་སྤུངས་བྱེད་པ་འདི་ལས་རྒྱུ་འབྲས་ལ་འོས་སམ། ལྷ་དང་བླ་མའི་མངོན་ཤེས་ཀྱིས་གཟིགས་རྒྱུ་དང་། རྩིས་དང་མོ། པྲ་དང་ཇུ་ཐིག་སོགས་ཀྱིས་ང་ཚོས་འདི་དག་ལྟས་ཅི་ཞིག་ཡིན་པ་དཔྱད་པ་བྱེད་རིན་འདྲ་འདུག་གམ། ང་ནི་རྣམ་རྟོག་འདྲ་སློང་ཡོང་གིན་འདུག

ད་ཐེངས་རི་བོ་ལུད་པ་འདི་ལ་རྒྱུ་རྐྱེན་ཆེན་པོ་གསུམ་ལ་ངོས་འཛིན་བྱས་ཡོད་འདུག
༡༽ སྤྱིར་ན་འབྲུག་ཆུ་རྫོང་མཁར་ཉེ་འདབས་ཀྱི་ས་གཤིས་གྲུབ་སྟངས་ལ་འོག་གི་བྲག་རྡོ་རྣམས་བརྟན་པོ་མིན་པ་དང་།
༢༽ རྫོང་མཁར་འདི་ན་ནིང་བུན་ཁྲོན་ས་འགུལ་གྱིས་གནོད་ཐེབས་ས་ཁུལ་གཙོ་བོའི་གྲས་ཀྱི་གཅིག་ཡིན་པས། ས་འགུལ་བྱུང་བ་དེ་ལས་འབྲུག་ཆུ་རྫོང་མཁར་མཐའ་མཁོར་གྱི་རི་བོ་རྣམས་སྒུལ་ཟིན་པས་འོག་གི་བྲག་རྡོ་རྣམས་གས་ཆགས་ཤོར་བ་དང་། ས་འགུལ་གྱིས་གས་ཆག་གཏོང་བ་རྣམས་སླར་སོས་པ་ལ་ལོ་ངོ་གསུམ་ནས་ལྔ་བར་གྱི་དུས་ཡུན་དགོས་པས་ས་འགུལ་བྱུང་ནས་ལོ་ངོ་གཉིས་ལས་སོང་མེད་པས་སྲ་བརྟན་ཅན་དུ་གྱུར་མེད་པ་དང་།
༣༽ འབྲུག་ཆུ་ས་ཁུལ་ལ་ན་ནིང་གི་དུས་ཚིགས་བཞི་བ་ནས་ད་ལོའི་ལོ་སྟོད་བར་བསྟུད་མར་ཐན་པ་བྱུང་ནས། རྫོང་མཁར་མཐའ་འཁོར་གྱི་བྲག་ངོས་ལ་གས་སྲུབས་བྱུང་བའི་དབང་གིས་ཆར་ཆེན་འབབ་སྐབས་རི་ཉིལ་སླ་བ་དེ་རེད།
ཅེས་ས་གཤིས་རིག་པ་བ་རྣམས་ཀྱིས་དབྱེ་ཞིབ་བྱས་ཡོད་འདུག

གནས་མཆོག་ཁ་བ་དཀར་པོ།

གནས་མཆོག་ཁ་བ་དཀར་པོ་ནི། ཇི་སྐད་དུ། གླིང་གཞིའི་གླིང་མཆོག་འཛམ་བུ་གླིང་།། གནས་མཆོག་ཉི་ཤུ་རྩ་བཞི་ནས།། ལྷོ་མོན་ཚ་བ་རོང་གི་ཡུལ།། འཇང་བོད་གཉིས་ཀྱི་ས་མཚམས་ན།། གནས་མཆོག་ཁ་བ་དཀར་པོ་ནི།། ཞེས་ལྷོ་མོན་ཚ་བ་རོང་དུ་ཡོད་པར་བསྟན། མིའུ་འདྲ་ཆགས་ལས། ལྡོང་ལ་ང་ཆེ་བཅོ་བརྒྱད་ཡོད།། དབུས་ལ་རིང་མོ་ཚུན་ཆད་དང་།། ཚ་བའི་དིལ་དཀར་ཡན་ཆད་དུ།། ཞེས་པའི་ཚ་བའི་དིལ་དཀར་ཞེས་པ་དེ་ཡང་འདི་ཡིན་པར་བསམ། འགའ་ཞིག་གིས་བཤད་པ་ལྟར་ན་འདི་ལས་གཞན་པའི་དེང་དུས་ཡང་ཚ་བའི་དིལ་དཀར་ཟེར་བ་ཞིག་ཡོད་པར་བཤད། གང་ལྟར་མདོ་ཁམས་ཀྱི་ཆུ་བཞི་སྒང་དྲུག་ལས་རྒྱལ་མོ་དངུལ་ཆུ་དང། ཟླ་ཆུའམ་རྫ་ཆུ་གཉིས་ཀྱི་བར་དང་། སྒང་དྲུག་ལས་ཚ་བ་སྒང་གི་ཁོངས་སུ་གནས་པའི་གཡེར་གྲགས་ཅན་གྱི་གནམ་འདེགས་གངས་ཀྱི་རི་བོ་ཞིག་རེད། དེང་དུས་ཀྱི་དབང་དུ་བྱས་ན། ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་བདེ་ཆེན་རྫོང་དུ་ཡོད། རྒྱ་མཚོའི་ངོས་ནས་མེ་ཏྲར་༦༠༠༠ཡན་གྱི་གངས་ཀྱི་རི་བོ་དུ་མ་བསྟར་ཕྲེང་བསྒྲིགས་ནས་ཡོད་པའི་དབུས་སུ་ཀྲོང་ངེར་འགྱིངས། རྩེ་མོ་དུས་བཞིར་འགྱུར་བ་མེད་པར་གངས་དཀར་ཤེལ་གྱི་ཅོད་པཎ་སྔོ་བསངས་ནམ་མཁའི་དབྱིངས་སུ་ཟུག་ཅིང་། རི་སྐད་ལྗོན་ཤིང་སྣ་ཚོགས་ཀྱིས་སྤུད་པའི་ཤམ་བུ་གསོལ་བར་རི་དྭགས་དང་འདབ་ཆགས་དུ་མས་སྐད་སྙན་སྒྲོགས་ཅིང་བག་ཕེབས་གནས་པ། རི་མཐའ་འབྲུ་དྲུག་ཆུ་མའི་ཞིང་ཁ་ནས་འབྲས་བཟང་གཡུ་དུ་ཟ་བས་ཡུལ་མའི་རྒན་པོས་མཛུམ་མདངས་ལྷོད་པ་མེད་པར་གནས་པའི་མི་ཡུལ་གྱི་ཞིང་ཁམས་ཉམས་དགའ་བ་ཞིག་ཡིན། མཐོ་ཚད་ལ་རྒྱ་མཚོའི་ངོས་ནས་མེ་ཏྲར་རམ་ཡང་ན་ཕྲག་འདོམ་༦༧༤༠ཙམ་ཡོད་པ་རེད། ༡༩༨༧ཙམ་ནས་འཇའ་པན་དང་། ཨ་རི་སོགས་འཛམ་གླིང་ཤར་ནུབ་ཀྱི་གངས་འཛེགས་མཁས་པའི་ཚོགས་པ་མང་པོས་དེང་རབས་ཀྱི་ཡོ་བྱད་སྤྱད་ནས་རི་བོའི་འདིའི་རྩེར་མོར་འཛེགས་ཐབས་བྱས་ཀྱང་ལམ་འགྲོ་མེད་པའམ། ཡང་ན་རྐྱེན་ངན་གང་ཞིག་གིས་ད་བར་དུ་སུ་གང་ཡང་འཛེགས་མ་ཐུབ་པར་དེ་ཐམས་ཅད་ཕམ་ཉེས་སུ་གྱུར། ལྷག་པར་༡༩༩༣ལོ་ཟླ་༡ ཚེས་༣ཉིན་རྒྱ་ནག་དང་། འཇར་པན་གྱི་གངས་འཛེགས་རུ་ཁག་མི་སྣ་བཅུ་བདུན་ཅན་ཞིག་རི་བོ་འདི་ཡི་རྩེར་འཛེགས་སྐབས་ཆོ་འཁྲུལ་ཅི་ཞིག་གམ་ཡང་ན་ཆག་སྒོ་གང་ཞིག་གིས་གངས་འོག་ཏུ་ཁ་བ་བརྡིབས་པ་ལྟ་བུའི་སྣང་ཚུལ་བྱུང་ནས་འཆི་ལམ་དུ་དེད་སོང་བས་ཕུང་པོ་ཙམ་ཡང་ལག་སོན་མ་བྱུང་། དེ་ནས་བཟུང་འཛམ་གླིང་གང་སར་རི་བོ་འདི་ཉིད་སྔར་ལས་ལྷག་པའི་དོ་སྣང་དང་ཞེད་སྣང་སྐྱེས། རྒྱུ་མཚན་འདི་དག་ལ་བརྟེན་ནས་མང་ཁྲོད་དུ་གཏམ་རྒྱུད་དུ་འདི་ལྟར། ཇོ་མོ་གླང་མ་མཐོ་ཡང་གཞན་དབང་།། ཁ་བ་དཀར་པོ་དམའ་ཡང་རང་དབང་།། ཟེར། རི་བོ་ཇོ་མོ་གླང་མ་འཛམ་གླིང་ན་ཆེས་མཐོ་ཡང་རི་འཛེགས་པ་རྣམས་ཀྱིས་དབང་འོག་ཏུ་སོང་བ་དང་། ཁ་བ་དཀར་པོ་འདི་ནི་ཇོ་མོ་གླང་མ་འདི་ལ་ལྟོས་ན་དམའ་ནའང་རི་འཛེགས་པ་རྣམས་ཀྱིས་དབང་འོག་ཏུ་མ་སོང་བར་རང་དབང་དུ་གནས་པའི་སྡོམ་ཚིག་དེ་ཉིད་བཞག་པ་རེད་འདུག ཡུལ་མི་འགའ་ཞིག་གིས་ནི་རི་བོ་འདི་ལ་གནས་པའི་གཞི་བདག་དེ་ཕོ་རྒྱུད་དྲག་བཙན་ཅན་ཞིག་ཡིན་པས་རི་བོ་འདི་ལ་དོ་ཕོག་གཏང་མཁན་སུ་ཡང་ཡན་པོ་མི་གཏང་བ་དང་། ཇོ་མོ་གླང་མ་ནི་གཞི་བདག་མོ་རྒྱུད་ཡིན་པས་དེ་ལྟར་དྲག་བཙན་ཅན་ཞིག་མིན་པའི་རྒྱུ་མཚན་གྱིས་རེད་ཟེར། གང་ལྟར་མིག་སྔའི་གནས་ཚུལ་ནི་འདི་ལྟ་བུ་གྱུར། ཆོས་ཕྱོགས་ནས་བཤད་ན་གཞི་བདག་དྲག་རྩལ་ཅན་འདི་ཉིད་སྔོན་སློབ་དཔོན་པདྨ་འབྱུང་གནས་ཀྱིས་དམ་ལ་བཏགས་ནས་སངས་རྒྱས་ཀྱི་བསྟན་པ་སྐྱོང་བའི་སྲུང་མ་དང་། ཡུལ་ལུང་འདི་ཡི་དགྲ་ལྷ་ཞིག་ཏུ་མངའ་གསོལ་བར་གྲགས། དེ་བཞིན་རིས་སུ་མ་ཆད་པའི་དམ་པ་མང་པོས་ཞབས་ཀྱིས་བཅགས་ཤིང་བྱིན་གྱིས་བརླབས་པའི་གནས་རི་བྱིན་ཆེན་ཞིག་ཏུ་བརྩི། ལོ་རེ་བཞིན་དུ་བོད་ཡུལ་མདོ་དབུས་ཁམས་གསུམ་ནས་གནས་སྐོར་རྒྱུན་མི་ཆད་ཅིང་། ལྷག་པར་ལུག་ལོ་གང་ཡིན་ལ་གནས་འདི་ཉིད་ཀྱི་གཏེར་སྒོ་བྱེ་བའི་ལུགས་སྲོལ་ཡོད་པ་ལྟར་དད་ལྡན་གནས་སྐོར་བ་ཆུ་སྣ་ལུད་པ་བཞིན་དུ་རྒྱུན་མི་ཆད་ཅིང་བསངས་གཏོང་བ། གསུར་བསྔོ་བ། ཇོ་དར་སྒྲོན་པ། རླུང་རྟ་སྤུར་བ་སོགས་བྱེད་ཅིང་རང་རང་གིས་ལས་ལ་བཅོལ། རི་བོའི་འདི་ཡི་ཉེ་འགྲམ་དུ་གནས་པའི་ཡུལ་མི་རྣམས་ཀྱིས་རི་བོ་འདི་ལ་ཕོག་ཐུག་མ་ཤོར་བ་བསངས་གསོལ་སོགས་བྱས་ན་སྡོངས་གྲོགས་ཅི་བས་ཆེ་བར་བཤད་དོ།།

ག་ས་ནག་འཁྱོག

དེང་དུས་དར་ཁྱབ་ཆེའི་བོད་ཡིག་ཚགས་པར་དང་། དྲ་རྒྱ་ཁག་གི་ནང་དུ་ག་དང་ས་གཉིས་བསྡུས་པའི་ཡིག་གཟུགས་དེའི་ཚབ་ཏུ་ད་ལོག་དང་ཏ་ལོག་གང་རུང་ཞིག་བེད་སྤྱད་ནས་ནོར་འཁྲུལ་ཤོར་གྱིན་འདུག ནོར་བ་དེ་ཡང་རྒྱུན་ལྡན་ལྟ་བུ་ཞིག་ཏུ་གྱུར་ནས་གླེང་སློང་མཁན་ཙམ་ཡང་མི་འདུག མ་ཟད་སྔོན་ཞིག་ཏུ་བོད་ཀྱི་བང་ཆེན་གསར་ཤོག་གི་བོད་ཀྱི་སྐད་ཡིག་ཅེས་པའི་ལེ་ཚན་དུ། ག་ས་གཉིས་བསྡུས་པའི་ཡིག་གཟུགས་འདི་ཏ་ལོག་མ་རེད་ད་ལོག་རེད་ཅེས་པའི་རྩོམ་ཐུང་ཞིག་ཀྱང་སྤེལ་འདུག་པ་དྲན། འོན་ཀྱང་གསར་ཤོག་དེ་ཉིད་འདོན་ཐེངས་ཀྱི་གྲངས་ཀ་མ་དྲན་པས་དགོངས་འགལ་མེད་པར་ཞུ།
ག་ས་གཉིས་བསྡུས་པའི་ཡིག་གཟུགས་འདི་ལ་མདོ་ཁམས་ཀྱི་ཡུལ་དུ། "ག་ས་ནག་འཁྱོག་"ཅེས་འབོད། ག་ས་ནག་འཁྱོག་གི་བྱུང་རིམ་འདྲ་བོ་ནི། སྔོན་མ་པར་བརྐོ་བའི་ལག་རྩལ་འདི་ཉིད་མ་དར་བའི་སྔོན་དེར་ཡིག་གཟུགས་ཚང་མ་ལག་པས་འབྲི་དགོས་པས་བཀའ་འགྱུར་དང་། བསྟན་འགྱུར་ལྟར་བུ་ལག་པས་འབྲི་བའི་སྐབས་སུ་བསྐུང་ཡིག་འབྲི་རྒྱུ་ལ་འབད་བརྩོན་བྱས་ཡོད་པ་རེད། དེ་ཡང་ཤོག་བུ་བསྲི་ཚགས་དང་། འབྲི་མགྱོགས་པ་བཅས་ཀྱི་དགོས་པ་ཡོད་པས་གང་མང་བསྡུས་ཐབས་བྱས་པ་རེད། གནས་སྟངས་དེ་ལྟར་བུའི་དབང་གིས་རྗེས་འཇུག་ག་ཡི་འོག་ཏུ་ཡང་འཇུག་ས་དེ་ཉིད་འདོགས་པའི་སྲོལ་ཞིག་ཆགས་པ་རེད། དཔེར་ན་སོགྶ་ལྟར་བུ།


༼ག་ས་གཉིས་ནག་འཁྱོག་ཏུ་འགྱུར་བཞིན་པའི་རྣམ་པ་དང་། གྱུར་ཟིན་པའི་རྣམ་པ།༽
དེ་ཡང་རིམ་བཞིན་དབུ་མེད་འབྲི་བའི་སྐབས་སུ་ཡང་དབུ་ཅན་དེ་ལ་དཔེ་འགེབས་བྱས་ནས་རྗེས་འཇུག་ག་ཡི་འོག་ཏུ་ས་བཏགས་པའི་ལུགས་སྲོལ་དེ་ཉིད་རིམ་གྱིས་ཡིག་གཟུགས་འགྱུར་ནས་ག་ས་ནག་འཁྱོག་ཏུ་གྱུར་པ་རེད། ག་ས་ནག་འཁྱོག་འདི་ཉིད་དབུ་ཅན་ལས་དབུ་མེད་དུ་མཐོང་རྒྱུ་མང་བ་ཡོད་པ་དང་། མིང་འདི་ཡང་དབུ་མེད་ཀྱི་ག་ས་གཉིས་བསྡུས་པའི་ཡིག་གཟུགས་ནག་འཁྱོག་འདི་ལ་ཐོག་མར་བཏགས་པར་བསམས། ཡིག་གཟུགས་འདི་ཉིད་དུ་དབུ་ཅན་དུ་བྲི་བའི་སྐབས་སུ་ཡང་གཟུགས་དམིགས་བསལ་བ་ཞིག་ཡོད་པ་ལས་ཏ་ལོག་དང་ད་ལོག་གང་ཡང་མ་རེད། ཏ་ལོག་དང་མི་འདྲ་བ་ནི་དཔུང་རྔ་འོག་ཏུ་ཐོན་མེད་པ་དང་། ད་ལོག་དང་མི་འདྲ་བ་ནི་རྐང་པ་ནང་དུ་གུག་ཡོད་པ་བཅས་ཀྱི་ཁྱད་པར་ཡོད།
སྤྱིར་ན་ཏ་ལོག་དང་ད་ལོག་འདི་དག་རྒྱ་གར་གྱི་བརྡ་ཆད་ཡིན་པས་བོད་ཡིག་གི་རྗེས་མཇུག་ཏུ་སྨྲ་ན་ལུང་རིགས་ཀྱིས་ཕྱེ་མར་འཐག་པར་འགྱུར་རོ། ། རྒྱུ་མཚན་དེ་ལྟར་བས་ན་སྔར་ནས་ཡོད་པའི་ཡིག་གཟུགས་འདི་ཉིད་གློག་ཀླད་དུ་མ་འབྱོར་བར་དུ་ག་ས་གཉིས་བསྡུ་མི་དགོས་པ་བྱེད་རྒྱུ་དང་། ག་ས་ནག་འཁྱོག་འདི་ཉིད་མྱུར་བ་ཉིད་དུ་རོ་ལངས་རྒྱག་ཐུབ་པའི་སྐྱབས་འཇུག་དང་སྨོན་ལམ་ཞུ་རྒྱུ་ཡིན།

བྲོས།

ཆགས་སྡང་མདུང་སོ་རྣོ་བ་སྲིད་ཀྱི་ཁབ།།
འཇིགས་ནས་ཐུབ་པ་ཆེན་པོ་ནགས་སུ་བྲོས།།

དགྲ་འདུལ་གཉེན་སྐྱོང་འདི་སྣང་སོ་ཚིས་ལ།།
འཇིགས་ནས་མི་ལ་རས་པ་གངས་སུ་བྲོས།།

ཏཱ་མིང་རྒྱལ་པོའི་གསེར་གྱི་མགྲོན་ཤོག་ལ།།
འཇིགས་ནས་ཙོང་ཁ་པ་དེ་རི་ལ་བྲོས།།

གཏིང་དུ་གནག་པའི་སྲིད་ཀྱི་ཡོ་ལངས་ལ།།
ཆོས་པ་ཕལ་ཆེར་དབེན་པའི་གནས་སུ་བྲོས།།

དེ་ལྟར་བྲོས་པའི་རྣམ་ཐར་མཐོང་བའི་ཚེ།།
བྲོས་པར་འདོད་ཀྱང་གར་བྲོས་འདི་བྲོས་མེད།།

བོད་ཀྱི་གཅན་གཟན། ༢༽དྲེད་མོང་། Tibetan Bear 熊

དྲེད་མོང་། ཤ་གཟན་གྱི་སྲོག་ཆགས་སྟོབས་ཆེན་ཞིག་ཡིན་ནོ།། མིང་གི་རྣམ་གྲངས་ལ་ས་སློག་དང༌། སྦར་ཁོ། རྔ་ཡུ་མ་སོགས་སོ།། འདི་ནི་བྱང་རོང་གཉིས་ཀ་དང་བོད་ཡུལ་སྟོད་སྨད་བར་གསུམ་གང་སར་ཡོད་པའི་གཅན་གཟན་དཀོན་གྲས་ཀྱི་རིགས་སུ་གཏོགས། ཁེར་རྐྱང་དང༌། ཡང་ན་མ་བུ་རེ་ཟུང་དང་ལྷན་དུ་ཡོད། སྤུ་མདོག་ཕལ་མོ་ཆེར་རག་པ་དང༌། ཁམས་ནག རག་པ་སོག་དཀར་ཅན། རག་དཀར། ཁྲ་བོ་སོགས་ཅི་རིགས་སུ་ཡོད། ཁ་ཟས་ཀྱི་གཙོ་བོ་སེམས་ཅན་ཆུང་ཚགས་ཀྱི་རིགས་དང༌། སྒོ་ཟོག་ར་ལུག་སོགས་ཀྱི་སྟེང་དུ་ཡང་ལྷས་ར་ནང་དུ་མཆོངས་ཡོང་བ་ཡིན། རྒྱུན་དུ་རི་ལ་གནས་ཤིང་བྱི་བ་དང༌། འབུ་སྲིན་སོགས་ཀྱི་ཚང་སོགས་སློགས་ནས་དེ་དག་ཟ་བ་ཡིན་ཅིང་དེ་དག་ཚང་སློགས་སྐབས་སྲོག་ཆགས་དེ་དག་གཟུགས་པོ་ཆུང་བས་གང་སར་བྲོས་ཤོར་ནས་མང་པོ་ཟ་ཐུབ་གི་མེད། གནས་ཚུལ་དེ་ཝ་སྦྲེ་སོགས་ཀྱིས་ཤེས་ནས་རྒྱུན་དུ་ཝ་སྦྲེ་སོགས་དྲེད་མོང་གི་རྗེས་སུ་འབྲངས་ཤིང་དྲེད་མོང་གི་ཚང་སློགས་སྐབས་ཁོང་ཚོས་བྱི་བ་སོགས་སྲོག་ཆག་ཆུང་ཚགས་མང་པོ་ཟ་རྒྱུ་རྙེད་གི་ཡོད། དེ་ཡི་དབང་གིས་ཝ་སྦྲེ་མཐོང་སྐབས་ཡུལ་མི་རྣམས་ཀྱིས་དེའི་ཕྱོགས་དེར་དྲེད་མོང་ཡོད་པའི་ཚོད་དཔག་བྱེད་པ་ཡིན་ནོ།
མི་རྣམས་དྲེད་མོང་ལ་སྐྲག་གི་ཡོད་ལ་དེའི་རྒྱུ་མཚན་ནི་དྲེད་མོང་འཁྲིས་སུ་སླེབས་སྐབས་ཁོ་རང་སྔངས་སྐྲག་གིས་མི་ཡི་སྟེང་དུ་མཆོངས་ཡོང་བ་དང༌། ཁོ་རང་ནི་མི་ལས་སྟོབས་ཤུགས་ཆེ་བས་རྒྱུན་དུ་མི་དང་དྲེད་མོང་གཉིས་དྲེད་མོང་ལ་རྒྱལ་ཁ་ཐོབ་ཀྱི་ཡོད། འོན་ཀྱང་ཁོས་མི་མཐོང་ཚད་ཁ་ཟས་སུ་མཐོང་ནས་རྗེས་སྙེགས་བྱེད་ཀྱིན་མེད་པས་རྒྱང་རིང་ནས་དྲེད་མོང་མཐོང་བ་ན་ཀི་ཤར་བྱས་ན་ཕྱི་ལྟས་བྱེད་བཞིན་དུ་བྲོས་འགྲོ་བ་ཡིན། གལ་སྲིད་དྲེད་མོང་གིས་མི་ཞིག་དེད་པ་ཡིན་ན་དེའི་སྐབས་སུ་གྱེན་དུ་མི་བྲོས་པར་ཐུར་དུ་བྲོས་དགོས་པའི་རིགས་པ་རྙེད་ཡོད། དེའི་རྒྱུ་མཚན་ནི་དྲེད་མོང་གི་པགས་པ་ལྷུག་པོ་ཡིན་པས་ཐུར་དུ་རྒྱུགས་པའི་ཚེ་ཁོག་སྟོད་ཀྱི་པགས་པ་ཡོངས་རྫོགས་མགོར་ལུད་ནས་འགྲོ་ལམ་མཐོང་གི་མེད། སྐབས་དེ་དང་བསྟུན་ནས་བྲོས་ན་ཐར་འགྲོ་བ་ཡིན། གྱེན་དུ་བྲོས་ན་དེ་ལས་ལྡོག་པས་མྱུར་བ་ཉིད་དུ་རྗེས་ཟིན་ངེས་ཡིན། གལ་སྲིད་རྗེས་ཟིན་པ་ཡིན་ན་སྟོབས་ཤུགས་ཤིན་ཏུ་ཆེ་བས་མི་དང་བསྡུར་རན་མེད་པ་རེད། འོན་ཀྱང་དཔའ་སྙིང་ཅན་འབྲོག་པའི་ཕོ་སར་འགས་དྲེད་མང་ཞོན་ནས་ལ་ལུང་མང་པོ་རྒྱུགས་སུ་བཅུག་ནས་མཐར་དྲེད་མོང་ཕམ་བཅུག་པའི་བྱུང་རབས་ཡང་ཡོད་པ་རེད།
ཡིན་ནའང་འཁྱག་དྲེད་ཞེས་དྲེད་མོང་དམིགས་བསལ་བ་ཞིག་ཡོད་པས་དེ་ནི་མི་ཟོག་སུ་ཐུག་ཀྱི་སྟེང་དུ་ཤོར་ཡོང་བ་ཡིན་ལ་དེ་ནི་སེམས་པ་བདེ་བོ་མེད་པའི་རྒྱུ་མཚན་གྱིས་ཡིན། དེ་ལ་ཡུལ་མིས་དྲེད་སྨྱོན་དང་། ཡང་ན་འཁྱག་དྲེད་ཅེས་མིང་དུ་བཏགས་ཡོད། འཁྱག་དྲེད་ཅེས་འབོད་དོན་ནི། དགུན་ཁ་ས་ཆུ་འཁྱག་གིས་སྡོམ་པའི་སྐབས་སུ་ཉལ་མ་ཐུབ་པའི་དྲེད་མོང་ཡིན་པས་དེ་ལྟར་གྲགས། སྤྱིར་ན་དྲེད་མོང་ནི་དགུན་དུས་སུ་ས་ཆུ་འཁྱག་པས་སྡོམ་པའི་སྐབས་སུ་ཁོ་རང་ཡང་མལ་སྟན་དྲོན་པོ་ཞིག་ཏུ་ཉལ་འགྲོ་བ་ཡིན་ལ་སྐབས་དེ་དག་ཏུ་གཉིད་སད་པ་དང་ཁོ་རང་རང་བཞིན་གྱིས་ཉལ་མ་ཐུབ་པར་གང་སར་ཤོར་ཡོང་བའང་འགའ་ཞིག་ཡོད་པ་ཡིན། དོན་དུ་དེ་དག་དྲེད་སྨྱོན་དུ་བཏགས་པས་ཆོག གནའ་དུས་སུ་བོད་ཡུལ་གྱི་ས་ཆ་གྲང་ངར་ཆེ་བའི་ཡུལ་གྱི་མི་རྒན་རྒོན་དང༌། ཡང་ན་ཅུང་ཙམ་འབྱོར་པ་ཅན་རྣམས་ཀྱིས་དྲེད་མོང་གི་པགས་ལ་གདན་དུ་གཏིང་བའི་སྲོལ་ཡོད་པ་ཡིན། དྲེད་མོང་གི་པགས་པ་འདི་ལ་དྲོད་ཚད་ཆེ་བས་གྲང་བའི་ནད་གཞི་དང༌། མཁལ་རྐེད་སོགས་ལ་ཕན་གྱི་ཡོད་པར་ཤེས། ངག་རྒྱུན་དུ། དྲེད་སྔས། གྲུམ་གཏིང༌། ཟེར་བ་ཡང་འབྱུང་བ་ཡིན། དྲེད་ལྤགས་ནི་དྲོད་ཡིན་པས་གདན་དུ་གཏིང་བ་དང༌། གྲུམ་ལྤགས་ནི་བསིལ་བའི་རང་བཞིན་ཡིན་པས་མགོ་དང་མིག་ནད་སོགས་ལ་ཕན་པས་དེ་སྐད་ལག་ལེན་དུ་ཡོད། གསར་བུ་ངར་ཤ་ཅན་འགའ་ཞིག་གིས་དྲེད་སྟན་ཞིག་ལེན་དུ་འགྲོ་གི་ཡིན་ཞེས་བསྒྲགས་ཏེ་སྟ་རེ་ཙམ་ཞིག་ཁུར་ནས་དྲེད་མོང་བཙལ་ནས་ལ་ལུང་གང་སར་འགྲོ་ནས་དྲེད་གདན་གཏིང་མཁན་ཡང་ཡོད་པ་བཅས་སོ།།

བོད་ཀྱི་གཅན་གཟན། ༡༽གྲུམ་རྒྱ་མོ། (badger)

གྲུམ་པ། ཡང་ན་གྲུམ་རྒྱ་མོ། འོ་འཐུང་ཤ་གཟན་གྱི་རིགས་དང༌། སྲེ་མོང་དང༌། ཏི་ལོ་སོགས་རིགས་མཐུན་པར་བཤད། གཟུགས་པོ་ཅུང་ཆུང་ལ། མིག་ཀོང་ནག་པོ། གདོང་དང་སྣའི་གཡས་གཡོན་གཉིས་ནས་གྭ་ཕྲ་མོ་ཅན། སྤུ་མཐུག་ཙམ་ཡོད་པ། རྐང་པ་ཐུང་ཞིང་ཕོ་བ་སར་དྲུད་ལ་ཁད་པ། སྤུ་རྩེ་ནག་ལ་སྤུ་རྟིང་དཀར་པོ། སྤུ་འདིས་ཐང་ག་འབྲི་བྱེད་སོགས་སུ་བཀོལ་རྒྱུ་པིར་བཟོ་ཆོག ཨ་ཧྥི་རི་ཀ་སོགས་ཡུལ་ལུང་གཞན་གྱི་གྲུམ་པ་རྣམས་ཅུང་ཙམ་ཆེ་བ་དང་། གདོང་གི་རི་མོ་རྣམས་ཀྱང་ཞིང་ཆེ་བ་ཡིན། བོད་ཀྱི་གྲུམ་པ་ནི། བོད་ཡུལ་གྱི་ས་ཁད་ཅུང་དམའ་ས་དག་ན་མཐོང་རྒྱུ་ཡོད། རྒྱུན་དུ་ནགས་ཚལ་དང༌། གྲོག་རོང༌། བྲག་སྐྱིབས་སོགས་ལ་གནས་བཅའ། རི་བོང་དང་བྱི་བ་སོགས་སེམས་ཅན་ཆུང་ཙག་རིགས་གསོད་པ་དང༌། འབུ་སྲིན་རིགས་ཀྱི་ཚང་སློགས་ནས་ཟ། ཕྲུ་གུ་བདུན་བརྒྱད་ཙམ་ཐེངས་ཅིག་དུ་སྐྱེ་ཐུབ། འདི་ནི་གཟུགས་པོ་ཆུང་ཡང་ཞེ་སྡང་ཆེན་པོ་ཅན་ཞིག་ཡིན། སྒོ་ཁྱི་དཀྱུས་མ་རྣམས་དང་རྒོལ་འཛིང་བྱེད། བོད་ཀྱི་གཏམ་དཔེར། "ཁྱི་གཅིག་གྲུམ་གཅིག་ཐུག་ན་གྲུམ། ཁྱི་གཉིས་གྲུམ་གཅིག་ཐུག་ན་འདྲ། ཁྱི་གསུམ་གྲུམ་གཅིག་ཐུག་ན་ཁྱི།" ཞེས་ཁྱི་གསུམ་མེད་ན་ཡ་ལན་མི་ཐུབ་པའི་བཤད་རྒྱུན་ཡོད། ཁྱི་སྤྱང་སོགས་གནོད་པ་བྱེད་མཁན་མཐོང་ན་ཕྱིར་བྲོས་མེད་ཅིང་འཆི་གསོན་ལ་མི་ལྟོས་པར་དམར་འཛིང་བྱེད་ནས་རང་སྲོག་བསྐྱལ་ཡོང༌། དངོས་སུ་དམར་འཛིང་སྐབས་གཟུགས་པོ་ཆུང་བས་ཁོ་ལག་གིས་མི་འདངས་བར་ནམ་རྒྱུན་བོད་ཀྱི་ཡུལ་དུ་གྲུམ་པ་ཁྱི་ཡིས་བསད་པ་མཐོང་རྒྱུ་ཡོད་པ་ཡིན། མདོར་ན་ཁོ་ནི་གླེན་པ་དཔའ་སྙིང་ཅན་ཞིག་རེད།
དགུན་དུས་སུ་རྩྭ་སྟན་གཏིང་ནས་ཉལ། དེའི་སྐབས་སུ་ཁོ་ལ་དཀའ་ངལ་ཞིག་ཡོད་པ་ནི། ཆུ་མཐུང་དུ་འགྲོ་བའི་གནས་ཚུལ་འདི་རེད། དགུན་དུས་སུ་གྲུམ་པ་གང་འོས་ཞིག་ཚང་དེའི་ནང་ནས་ཆུ་ལེན་དུ་ཡོང་བ་ཡིན། ཁོ་རང་ཆུ་ཁར་སླེབས་རྗེས་ཆུ་ཡི་ནང་དུ་འགྲེ་ལྡོག་བྱེད། དགུན་དུས་སུ་གནམ་གཤིས་ཧ་ཅང་གྲང་བས་ཅུང་ཙམ་ནས་འཁེང་འགྲོ། དེ་ནས་ཁོ་རང་ཚང་དུ་ཕྱིར་ལོག་རྗེས་བཟའ་ཟླ་བུ་ཕྲུག་སོགས་ཀྱིས་ཁོ་ཡི་སྤུ་རྣམས་འཇིབ་ལྡག་བྱེད་ནས་སྐོམ་དུ་བྱེད་སྲོལ་ཡོད་པར་བཤད། དེ་ལྟར་ཉིན་ཞག་ལྔ་དྲུག་གི་མཚམས་ནས་སླར་ཡང་ཆུ་ལེན་དུ་ཡོང་དགོས། ཁྱད་འཚར་བ་ཞིག་ལ་ཁོ་རང་ལམ་བུ་གཅིག་ཁོ་ན་རྒྱུད་དེ་འགྲོ་བས་རྩྭ་རྣམས་འཇག་ནས་ཆུ་རྒྱུད་ནས་ཁོ་རང་ཚང་གི་བར་དུ་ལམ་ཐིག་སྐུད་འདྲ་བ་ཞིག་འཐེན་ཡོང༌། འདིས་སྡུག་བསྔལ་ཤིན་ཏུ་མྱོང་རབས་ཡོད། བོད་ཀྱི་གཏམ་དཔེར། "དགུན་ཟླ་གསུམ་གྲུམ་པའི་ཆུ་ལེན་སྡུག དབྱར་ཟླ་གསུམ་གནའ་བའི་སོ་པ་སྡུག" ཅེས་གྲགས་སོ།།
འདི་ཡི་པགས་པས་སྨན་ཁུག་སོགས་ཀྱི་ཁ་ཁེབས་དང༌། གྲུམ་དར་ཞེས་རྟ་ཡི་རྔོག་མ་ལ་དར་ཟབ་སོགས་ཀྱིས་བརྒྱན་ནས་གྲུམ་ལྤགས་དུམ་བུ་བཏགས་སྲོལ་ཡོད། དགོས་པ་ནི། "གྲུམ་པ་རྒྱ་མོས་མྱི་ཁ་ཁེགས།" ཞེས་བཤད་སྲོལ་ཡོད་ཀྱང་དོན་ངོ་མ་ནི། བསིལ་བའི་རང་བཞིན་ཡིན་པས་རྟ་རྒྱུགས་ཀྱི་སྐབས་སུ་ཚ་དྲོད་འཕར་ནས་འགྱེལ་འགྲོ་བ་དེ་འདྲ་མི་ཡོང་བའི་ཆེད་དུ་འདོགས་ཀྱི་ཡོད་པ་རེད། གཞན་ཡང༌། "གྲུམ་སྔས། དྲེད་གཏིང༌།" ཞེས་གྲུམ་ལྤགས་ནི་བསིལ་བའི་རང་བཞིན་ཡིན་པས་མགོ་སྔས་བྱས་ན་མིག་ནད་དང༌། མགོ་གཟེར་སོགས་ལ་ཕན་པར་བཤད་ཅིང་ལག་ལེན་དེ་ལྟར་ཡོད་དོ། །

ནུས་པ་ནི་སེམས་ལ་ཡོད།། སྟོབས་ལྡན་རྣམས་བཟོད་སྒོམ་ཐུབ།།

ནུ༷ས་པ༷་ནི༷་ངོ་མ་སེ༷མས་ཉིད་ལ༷་ཡོ༷ད་པས།། སྟོ༷བས་ལྡ༷ན་གྱི་ལས་རྣ༷མས་བཟོ༷ད་སྒོ༷མ་ནི་ཐུ༷བ་ཟེར།། ཡ་ཐོད་ན་༸རྒྱལ་བ་ཏིག་ཏིག་ཏུ་འཛིན་ཅིང་།། ཡ་ཁོག་ན་བོད་པ་ལྷེམ་ལྷེམ་དུ་ཉར་བ།། གཟུགས་པོ་ན་བོད་ཡིག་ཁྱུག་ཁྱུག་ཏུ་འཁྱུགས་ཤིང་།། དཔུང་པ་ན་དབྱངས་གསལ་ཁྲིག་ཁྲིག་ཏུ་ངོམ་པའི།། མ་འདྲིས་པའི་མཛའ་བོ་(puyol)ཕུ་ཡོལ་དུ་འབོད་པ།། འཇིག་རྟེན་གྱི་བུམ་པའི་འགྲན་བསྡུར་གྱི་དབུས་ན།། གཡས་ཕྱོགས་ཀྱི་མི་ལ་གྲུ་མདུང་འདྲ་རྒྱག་ཅིང་།། གཡོན་ཕྱོགས་གྱི་མི་ལ་སྦར་ཤད་འདྲ་བྱེད་ཅིང་།། འཇར་མན་པའི་རྩེད་འགྲན་དོམ་ཚོགས་ཀྱི་ཁྲོད་ནས།། ཁྱོད་ཉིད་ནི་རལ་བ་ཉིལ་ཉིལ་དུ་གསིག་པའི།། སེང་གེ་ནི་དར་མའི་མཆོང་སྟབས་ཤིག་ངོམ་ཞིང་།། རྡོག་ཐོ་དེ་མ་གཞུས་མགོ་ཐོ་དེ་གཞུས་ནས།། གྲུ་གུ་དེ་ཤེད་ཀྱིས་ནང་རོལ་དུ་བརྫངས་པས།། དོན་གྱིས་ནི་བུམ་པ་དེ་ག་རང་བླངས་སོང་།། ཤ་རུས་ཀྱི་འབྲེལ་ལམ་གདོད་མ་ནས་མེད་ཅིང་།། ཤར་ནུབ་ཀྱི་འཚོ་བ་དཔག་ཚད་ཀྱིས་ཆོད་ཀྱང་།། ཁྱོད་ཉིད་ཀྱིས་ང་ཚོར་དུངས་ཞེན་འདྲ་ཡོད་ན།། ང་ཡི་ནི་ཚོར་བ་ཁྱོད་ཉིད་ལ་འཁྱུད་འགྲོ།

གངས་རིན་པོ་ཆེ་དང་། དེའི་འདྲ་མཚུངས།

ཆེས་གདོད་མའི་དུས་སྟེ་གླིང་བདུན་ཅན་གྱི་འཇིག་རྟེན་འདི་ཉིད་ཡོངས་སུ་མ་གྲུབ་པའི་སྔོན་དེར། རྒྱ་གར་གྱི་ས་དབྱིབས་གྲུ་གསུམ་སོག་པ་འདྲ་བ་དེ་ཉིད་ས་གཞི་ཆེན་མོ་ལས་ཟུར་དུ་གྱེས། བོད་ཡུལ་གྱིས་གཙོས་པའི་ཡར་གླིང་གི་ཡུལ་གྲུ་ཕལ་མོ་ཆེར་དྲོ་ཚད་ཆེ་ཞིང་ཤིང་ནག་འབོར་ཆེན་ཅན་གྱི་ཚ་བའི་ནགས་ཀླུང་ཞིག་ཏུ་གྲུབ་པ་མདོ་དབུས་མཐོ་སྒང་ནས་རྙེད་པའི་གླང་ཆེན་གྱི་འགྱུར་རྡོ་དང་། ཧི་མ་ལ་ཡའི་རིའིརྩེ་མོ་ནས་རྙེད་པའི་ཉ་ཕྱིས་དང་འགྲོན་བུ་དག་གིས་དཔང་པོར་བྱེད། དེ་ལྟར་བུའི་ཁོར་ཡུག་མཐིང་མདོག་ཅན་དེ་ཡང་གཏན་དུ་སྡོད་ཐུབ་པ་ཞིག་མ་ཡིན་པས་ས་གཞིའི་སྒུལ་ཤུགས་ཀྱིས་ཡོ་འཁྱམས་རབ་དང་རིམ་པར་སོང་བའི་མཐར། འཇིག་རྟེན་ན་གྲགས་པ་ཅན་གྱི་གངས་ཀྱི་རི་བོ་ཞིག་རྒྱ་བོད་གཉིས་ཀྱི་བར་དུ་གསུན་གཙིར་གྱིས་གྱེན་དུ་བསླངས། གངས་རི་དེ་ཡི་ཕ་རོལ་རྒྱ་གར་ཡུལ་དུ་དུས་བཞིར་དབྱེ་བ་དེ་ཙམ་མེད་པར་ཚ་བས་ནོན་པ་ཙམ་ལས་འགྱུར་བ་ཆེར་མ་བྱུང་ཀྱང་། གངས་རི་དེ་ཡི་ཚུར་རོལ་བོད་གངས་ཅན་ལྗོངས་ན་ས་ཡི་འགྱུར་ལྡོག་ཆེན་པོ་འདིས་གནམ་གཤིས་ལའང་འགྱུར་བ་ཆེན་པོ་ཐེབས་ནས་ཆར་ཆུ་ཉུང་ཞིང་། གངས་དང་སད་ཀྱི་དུས་འགོ་ཚུགས། དེའི་དབང་གིས་ཚ་བའི་ཡུལ་གྱི་སྲོག་ཆགས་སྤུ་མེད་པ། རློན་པ་དེ་དག་ཞིག་པའི་ཤུལ་དུ་རྐྱང་འབྲོང་སོགས་ཀྱིས་གར་འཁྲབ་པ་སོགས་སྣོད་བཅུད་གཉིས་ཀ་ལ་གངས་ཀྱི་རི་རྒྱུད་འདི་ཡིས་ཤུགས་རྐྱེན་ཕོག འོ་ན་གངས་རི་དེ་གང་ཡིན་སྙམ་ན། དེ་ནི་གངས་རིན་པོ་ཆེ་དང། རི་ཡི་རྒྱལ་པོ། དབུས་ཀྱི་རི་བོ་མཆོག་རབ། གངས་ཏི་སེ། ཀཻ་ལ་ཤ་སོགས་སུ་འབོད་པ་འདི་རེད། འདི་ནི་འཇིག་རྟེན་གྱི་ཆོས་ལུགས་རྙིང་པ་ཡོངས་ཀྱི་འགོ་ཁུངས་ལྟར་བུ་དང་། ལྷ་དབང་ཕྱུག་ཆེན་པོ། དཔལ་འཁོར་ལོ་བདེ་མཆོག བོན་སྟོན་པ་གཤེན་རབ་སོགས་རང་རང་གི་ལུགས་ཀྱི་ལྷ་ཆེན་པོ་དང་། ཀླུ་ཆེན་པོ་དག་གི་གནས་ཡུལ་དང་། ཕོ་བྲང་སོགས་ཀྱང་ཡིན། མདོ་སྡེ་འགའ་ཞིག་དུ་སྟོན་པ་ཤཱཀྱ་ཐུབ་པའང་གནས་འདིར་ཕེབས་པར་གསུངས། ཆེན་པོ་དེ་དག་གི་རྗེས་སུ་འབྲངས་བའི་འབུ་གྲོགས་མ་འདྲ་བའི་སྐྱེ་བོ་གྲངས་ཀྱིས་མི་ལངས་པར་གནས་འདིར་འགྲོ་ཞིང་། གནས་འདིར་སྡོད། གནས་འདིར་མཆོད། འགའ་ཞིག་གནས་འདིར་བཀའ་ཐུབ་ཀྱིས་རང་སྲོག་བསྐྱལ། དེ་འདྲ་བའི་གནས་རྩ་ཆེན་ཞིག་ཏུ་བརྩི།

དེ་རིང་། འདི་ན་རང་ཉིད་ཀྱི་མིག་ཟུང་མ་གཏོགས་གང་ལའང་ཡིད་མི་ཆེས་པའི་སྐྱེ་བོ་འགའ་ཞིག་ལྷགས། དགུང་ནས་མར་བལྟས་པས་རི་བོ་འདི་ཉིད་གཏིང་དུ་མར་ཐིམ་སོང་བའི་སྣང་བ་འཁོར་ཞིང་མཐའ་འཁོར་གྱི་འོབས་དོང་དེ་ཉིད་པར་བླངས། རྒྱ་གར་ཧིནྡྷུ་བ་རྣམས་ཀྱིས་མཆོད་ཡུལ་དབང་ཕྱུག་གི་ལིངྒ་དང་དབྱིབས་གཟུགས་མཚུངས་པར་ཤེས། ཁོང་ཅག་གིས་གནས་འདིར་གུས་བཀུར་ཆེ་བའི་ཞེ་ཕུགས་ཀྱང་རྟོགས། དེ་ལྟར་འོབས་སུ་ལྷུང་བས་མཐོ་ཚད་ལ་སྨིས་༦༧༡༤ཙམ་ལས་མེད་པས་རི་ཡི་རྒྱལ་པོ་སོགས་ཀྱི་ཐ་སྙད་ཀྱང་མི་འདོགས། དེ་ལྟར་གཏིང་དུ་ནུབ་འགྲོ་བ་ལའང་ཉེ་འཁོར་ཞིག་ནས་སྐྱེས་སྟོབས་དང་ཚར་སྟོབས་ཅན་གྱི་རི་བོ་འགའ་ཞིག་གྱེན་དུ་ལངས་པས་དེ་དག་གི་རྗེས་མ་ཟིན་པས་རང་ཉིད་རི་རྒྱལ་གྱི་མིང་དེ་ཡང་དེ་ཉིན་ནས་སུ་ལ་དབང་མི་ཤེས་པར་གྱུར། ཟུར་ནས་རྒྱང་ཤེལ་གྱིས་བལྟས་པས་གདོང་ཟུར་རྣམས་ལྷགས་རླུང་གིས་བརྡར་བ་རྩེ་མོ་མྱི་རྒན་གྱི་པུས་མོ་ལྟར་བུ་དེ་ཡི་པར་ཞིག་བླངས་སྟེ་རི་བོ་ཆེས་རྙིང་པ་ཞིག་ཡིན་པར་ཁུངས་བསྐྱེལ། གངས་ཤུད་རིང་པོ་ཙམ་ཡང་རྒྱུགས་ས་མེད་པས་འདྲ་པར་འགའ་ཞིག་བླངས་ནས་དབུགས་རིང་འཐེན་བཞིན་རི་བོ་ཇོ་མོ་གླང་མའི་ཕྱོགས་སུ་ཆས་སོང་།།
༢༠༡༠/༠༡/༢༠ ཉིན་བྲིས་ཀྱང་དེ་རིང་འདིར་བསྐྱར་བཀོད་བྱས།

སྟོད་འགག་གི་བྱུང་རབས།

ཉེ་བའི་ཆར་འགའ་ཞིག་གིས་སྟོད་འགག་འདི་ཉིད་དམག་གི་གོ་ཁྲབ་རྩབ་ཧྲལ་ཞིག་ཡིན་པའི་བཤད་ཡམ་རིང་པོ་ཞིག་བྱས་བྱུང་བས་ཀུ་རེ་ཡིན་ནམ་སྙམ་ཡང་། སྙིང་ནས་བཤད་ཀྱིན་འདུག་པས་ལོག་རྟོག་དེ་དག་ལྡོག་པའི་ཆེད་དུ་སྔོན་གྱི་ཕ་མེས་རྣམས་ཀྱི་བཤད་རྒྱུན་དང་ལྷན་དུ་གསལ་བཤད་ཐུང་ངུ་འདི་སྤེལ་དགོས་བྱུང་།



༡༽སྟོད་འགག་གི་བྱུང་རབས་ནི། ཞྭ་སེར་ཅོད་པཎ་འཆང་བའི་ཆ་ལུགས་དང་། ཡོ་བྱད་འགའ་ཞིག་གི་རྒྱུ་མཚན་ཉུང་ངུར་གླེང་བ།࿊ ཞེས་པ་ལས། སྔོན་དུས་རྒྱ་ནག་གི་ཡུལ་གྲུ་ཞན་ཟིན་བྱ་བའི་ཡུལ་དེའི་རྒྱལ་པོ་བུད་མེད་ཀྱིས་བྱེད་པས་རྒྱལ་མོ་དེས་ནང་པ་ལ་དད་ཅིང་། ཡུལ་དེར་རབ་ཏུ་བྱུང་བ་མང་དུ་ཡོད་པ་ཡིན་འདུག་པས། ཟླ་རེ་བཞིན་རབ་བྱུང་རྒྱལ་མོའི་ཕོ་བྲང་དུ་གསོད་སྙོམས་ལ་གདན་འདྲེན་བྱེད་ཅིང་སྙེན་བཀུར་བཟང་པོ་ཕུལ། སངས་རྒྱས་ཀྱི་རབ་བྱུང་ཡོད་ཚད་ལ་གཟེངས་བསྟོད་མཛད་པར་གྲགས་ལ། སྐབས་ཤིག་རྒྱལ་མོས་ཁྱོད་བནྡེ་རྣམས་ཀྱི་གོས་ཅི་ཡང་མེད་པར་ཤ་རྗེན་པར་མཐོང་བས། ངེད་འདོད་ཆགས་སྐྱེ་བར་འདུག་པས། ཤམ་ཐབ་དང་ཆོས་གོས་གཉིས་སྦྲེལ་ལ་ཚེམ་པའམ་ཤ་མི་མཐོང་བར་གྱིས་ཤིག་གསུངས་པའི་ལུང་བྱུང་བས། དེ་ནས་བཟུང་རབ་བྱུང་རྣམས་ཀྱིས་སྟོད་གཡོག་བྱེད་ཅིང་སྣ་ཚོགས་གྱོན་པའི་རྒྱུ་མཚན་བོད་དུ་དར་བས། འདུལ་འཛིན་ཆེན་པོ་དེ་དག་རྣམས་ཀྱིས་ད་ལྟའི་སྟོད་འགག་འདི་བཞིན་མཛད་ནས་བཞེས་པ་ཡིན་ཞེས་ཐོས་སོ།། ཞེས་གསུངས།
འདིའི་ནང་གི་སྒྲུང་གཏམ་འདྲ་བོ་ཞིག་འདུག་པ་འདི་ཐམས་ཅད་བདེན་པ་ཡིན་མིན་མི་ཤེས་ཀྱང་མཁན་ཆེན་བོ་དྷི་ས་ཏྭ་བོད་ལ་ཕེབས་ནས་སད་མི་མི་བདུན་རབ་ཏུ་བྱུང་སྐབས་ཁོང་གི་དགེ་ཕྲུག་གསར་པ་བདུན་པོ་དེས་ཀྱང་མཁན་ཆེན་དང་མཐུན་པར་ན་བཟའ་བཞེས་ནས་ཡོད་ཀྱི་རེད་མ་གཏོགས་དམག་གི་གོ་ཁྲབ་མཐུན་པར་གྱོན་དགོས་པའི་རྒྱུ་མཚན་མ་རྙེད།
རྒྱ་གར་གྱི་གནམ་གཤིས་ཚ་བས་སྟོད་གོས་མེད་ཀྱང་གཟན་སོགས་ཀྱིས་མཐུས་ནའང་ཁོག་སྟོད་དམར་ཧྲེང་དུ་ཕྱིར་ལ་སྟོན་མི་ཆོག་པ་རེད། དེའི་དགག་བྱ་ནི་འདི་ནས་འབྱུང་བ་ལྟར་རྒྱའི་སྦྱིན་བདག་མ་ལྟ་བུ་འགའ་ཞིག་ཆགས་པ་འཕར་ཉེས་ཡོད་པའི་རྒྱུ་མཚན་གྱིས་རེད། སྤྱིར་ན་བུ་རྣམས་ཀྱི་དཔུང་པའི་ཤ་རྒོད་དང་། བྲང་གི་རྒྱ་སྒོ་འདི་དག་གིས་བུད་མེད་རྣམས་ལ་ཆགས་པའི་རྒྱུ་བྱེད་ཀྱིན་ཡོད་ཚོད་འདུག དེས་ན་གནད་འགག་དེའི་དབང་གིས་ད་ལྟའི་བར་དུ་རྒྱ་གར་དང་། ཤྲིར་ལིང་ཀ་དང་། ཐའི་ལན་སོགས་ཀྱི་རབ་བྱུང་རྣམས་ཀྱིས་སྟོད་འགག་མེད་ཀྱང་གཟན་གྱིས་ཁོག་སྟོད་དམ་པོ་སྡོམ་ནས་དམ་ཚིག་དེ་དག་རྒྱུན་སྐྱོང་བཞིན་པ་རེད། བོད་ཀྱི་ཡུལ་ལ་ནི་གནའ་གཤིས་གྲང་བས་སྟོད་འགག་འདི་བྱུང་བ་སེམས།

༢༽སྟོད་འགག་གི་དབྱིབས་དང་དེའི་མཚོན་དོན་ནི། དེ་ཉིད་ལས། དེ་ལ་འགག་ཐུང་གི་དབྱིབས་ནི། འཆི་བདག་གི་མགོ་ལྤགས་ཀྱི་དབྱིབས་ཏེ། དེ་བགོས་པས་ནི། འཆི་བདག་གི་མཆེ་བ་དང་ཁ་ནང་དུ་ཆུད་པའི་དབྱིབས་ཀྱིས་མྱུར་དུ་འཆི་བདག་གི་ཁར་འགྲོ་བ་བར་བསམ་སྟེ། འཆི་བ་མི་རྟག་པ་དྲན་པའི་ཆེད་དུ་ཡིན། དེ་ནི་མདོ་ལས། རྗེས་ཀུན་ལས་བ་གླང་གི་རྗེས་མཆོག་དང་། འདུ་ཤེས་ཀུན་གྱི་ནང་མི་རྟག་པའི་འདུ་ཤེས་མཆོག་གོ་གསུངས་པ་སོགས་སྤྱིར་ཆོས་འོང་མི་འོང་། བྱེད་མི་བྱེད། མི་རྟག་པ་དྲན་པ་ལ་རག་ལས་པ་རྒྱ་བོད་མཁས་གྲུབ་ཀུན་གྱིས་གསུངས་པ་ལྟར། འདི་ནི་འཆི་བ་རྗེས་སུ་དྲན་པའི་ཕྱིར་དགོས་པ་ཆེ། དེ་ལ་མཆེ་བ་གཉིས་དང་རྣ་བ་སོགས་མཚོན། ཞེས་གསུངས། དེ་ལ་སྟོད་འགག་གི་རྣ་བ་གཉིས་པོ་འདི་ནི་འཆི་བདག་རྣ་བ་དང་། མདུན་དུ་གྱེན་དུ་བསླངས་པའི་རས་ཤར་མོ་འདི་གཉིས་ཀྱིས་འཆི་བདག་གི་མཆེ་བ་མཚོན་པ་ཡིན་འདུག འདི་ནི་གཙོ་བོ་དབྱིབས་གཟུགས་ཀྱིས་མཚོན་ཚུལ་ཡིན་པར་འདྲ།
༣༽ཡང་མཚོན་སྟངས་གཞན་ཞིག་ནི། དེ་ཉིད་ལས། རྟ་མཆོག་རྣ་རྒྱན་སོགས་རྒྱན་དྲུག་ཀྱང་དམ་པ་ཞིག་གིས་མཛད་ཟེར། རྒྱན་དྲུག་ནི། ༡༽གླང་ཆེན་མཆེའི་རྒྱན། ༢༽བུམ་པའི་མགུལ་རྒྱན། ༣༽གཡུ་འབྲུག་མཐའ་རྒྱན། ༤༽རྨ་བྱའི་སྒྲོ་རྒྱན། ༥༽སེང་གེའི་དཔུང་རྒྱན། ༦༽རྟ་མཆོག་རྣ་རྒྱན་ཏེ་དྲུག་ཡིན། འདི་དག་ནི་གཞི་ཡི་སྟེང་དུ་ལྷན་ཐབས་ཀྱིས་གླན་པའི་ཚེམས་དྲུབ་སྟེ། གཙོ་བོ་ཁ་དོག་ཀྱི་མཚོན་སྟངས་ཡིན་པར་སེམས། འདྲ་པར་འདི་ནང་དུ་མཐོང་བཞིན་པ་འདི་དག་རེ་རེ་ལ་མཚོན་དོན་འདྲ་བཤད་རྒྱུ་འདུག་ཀྱང་ངེས་གཏན་ཆེར་མི་འདུག
༤༽སྟོད་འགག་གི་འགྱུར་བ། ང་ཚོའི་ཕ་ཡུལ་ན་ང་བརྒྱད་ལོ་དུས་ཟིང་སྔོན་དང་། དེ་རྗེས་བསྟན་པ་བསྐྱར་དར་གྱི་སྐབས་སུ་དེང་དུས་གྲྭ་ས་ཁག་དང་བཤད་གྲྭ་ཁག་ཏུ་གྱོན་བཞིན་པའི་སྟོད་འགག་འདི་གྱོན་སྲོལ་མེད། སྟོད་འགག་ཆ་ཚང་དམར་སེར་རྒྱན་དྲུག་ཡིན། དེ་ལ་འབྱོར་བ་ཆེ་ཆུང་གིས་རྒྱས་བསྡུས་ཀྱི་ཁྱད་པར་ཕྲན་བུ་ཡོང་། དེའི་རྗེས་མདོ་དབུས་ཁམས་གསུམ་གྱི་དགོན་པ་ཕན་ཚུན་བར་དང་། གཞིས་བྱེས་ཕན་ཚུན་བར་དུ་འབྲེལ་བ་བྱུང་བས་སྟོད་འགག་སོགས་དགེ་འདུན་པའི་གྱོན་ཆས་ཚང་མ་ལ་འགྱུར་བ་ཕྱིན་པ་རེད། དེའི་སྔོན་དུ་སེར་འགག་ཟེར་བ་དང་། དམར་འགག་ཟེར་བ་འདི་དག་མིང་ཡང་མི་གྲགས། དམར་སེར་རྒྱན་དྲུག་འདི་ལ་འགག་རིང་དང་། འགག་ཐུང་གཉིས་ཡོད། སྟོད་ནས་དེ་གཉིས་ལ་ཁྱད་པ་མེད། འོན་ཀྱང་ཕྲུག་དང་། ཡང་ན་ལུག་ལྤགས་སོགས་ཀྱི་སྨད་ཤམ་མཉམ་དུ་འབྱར་བ་དེ་ལ་འགག་རིང་ཟེར། འདི་ནི་རྒྱུན་གོས་ཡིན། འགག་ཐུང་འདི་རྒྱ་སེར་སོགས་ཀྱིས་བྱས་པ་འདི་གཟབ་འཆོར་གྱི་སྐབས་སུ་གྱོན་རྒྱུ་ཡིན། དེང་དུས་བོད་ཀྱི་དགོན་སྡེ་ཕལ་མོ་ཆེར་རས་ཀྱི་སྟོད་འགག་འདི་དག་ལས་རྒྱ་སེར་ལས་བྱས་པ་འདི་ནི་དགེ་བསྐོས་དང་། བླ་ཆེན་རེ་གཉིས་ཀྱིས་བེད་སྤྱོད་བྱེད་པ་ཙམ་ལས་གཏན་དུ་ནུབ་པའི་ཕྱོགས་སུ་གཞོལ་བར་སྣང་ནའང་འགྱོད་པ་ཅི། འདི་དམག་གི་གོ་ཆ་ལས་བྱུང་ཟེར་བ་ནི་རྟོག་པ་འཆར་ཡན་གྱི་སྒྲོ་བཏགས་པ་ཙམ་ཞིག་ལས་དོན་ལ་འབབ་རྒྱུ་ཡོད་པར་མི་སེམས། །

࿊རོང་ཐ་ཆོས་འབྱོར་ལྷུན་འགྲུབ་ཀྱི་གསུང་འབུམ་ཁ་པར་བཞུགས།

འཛམ་གླིང་རྐང་ཕོལ་བུམ་པའི་འགྲན་བསྡུར།

༡༽གླེང་སློང་བ། ཁ་སང་ཟླ་༦པའི་ཚེས་༡༡ཉིན་ནས་༢༠༡༠ལོའི་འཛམ་གླིང་རྐང་ཕོལ་བུམ་པའི་འགྲན་བསྡུར་དེ་ཨ་ཧྥི་རི་ཀའི་གླིང་ཆེན་དུ་འགོ་ཚུགས་ཡོད། དེ་ཡང་ཡུལ་དེའི་དབུ་ཁྲིད་དམ་པ་ནེསནམནྜལ་གཙོས་པའི་གནད་ཡོད་མི་སྣ་དུ་མ་ཞིག་གིས་འགྲོན་འབོད་དང་རྩོད་ལེན་མང་པོ་ཞིག་བྱས་པའི་འབྲས་བུ་ཞིག་རེད། ཡུལ་དེའི་སྲིད་འབྱོར་རིག་གསུམ་གོང་འཕེལ་དུ་འགྲོ་བཞིན་ཡོད་པའི་དཔང་རྟགས་ཤིག་དང་ལོ་རྒྱུས་ཀྱི་དཀྱོགས་མཚམས་ཤིག་ཡིན་པའི་ངོས་འཛིན་ཡང་བྱེད་བཞིན་ཡོད་འདུག སྐབས་དེར་གླུ་པ་གྲགས་ཅན་(K'NAAN)ཀ་ནན་གྱིས་༼གཡོ་བའི་དར་ཆ་༽ཞེས་པའི་ཞི་བདེ་དང་རང་དབང་མཚོན་པའི་གླུ་དབྱངས་ཀྱིས་འཇིག་རྟེན་གྱིས་ཁྱོན་དགའ་འབོད་བྱས་ཡོད་པ་རེད། དེ་ནས་ད་བར་དུ་རྒྱལ་ཁབ་སོ་སོའི་ངར་ཤུགས་ཆེན་པོའི་འཇིག་རྟེན་གྱི་བུམ་པ་དེ་ཉིད་རྩོད་འགྲན་བྱས་ཤིང་འཛམ་གླིང་གི་མི་གྲངས་དུར་ཕྱུར་མང་པོ་སྐྱིད་སྡུག་གི་ཚོར་སྣང་མི་འདྲ་བ་རེ་སྦྱིན་བཞིན་པ་ཡིན་པས་སྒུལ་ཤུགས་འདིས་གླིང་ཆེན་འདི་ཡོམ་ཡོམ་དུ་གཡོ་ཞིང་འགུལ། ཐོབ་ཐང་དང་རེ་བ་གང་ཡང་མེད་པའི་གདོང་དམར་བའི་མྱི་རྟིང་ཞིག་གི་ངོས་ནས་འདིའི་སྐོར་ལ་བསམ་གཞིག་ཅིག་གིས་བོད་པ་ཚང་གི་རྩེད་མོ་འདིའི་ཐ་སྙད་འདོག་སྟངས་ལ་བགྲོ་གླེང་བྱེད་འདོད་བྱུང་།
༢༽ཐ་སྙད་འདོགས་སྟངས། བོད་ཡུལ་སྟོད་སྨད་ཀྱི་བར་དང་། བོད་ཕྱི་ནང་གཉིས་ཀྱི་བར་སོགས་སུ་ཕོ་ལོང་འདི་ལ་མིང་གི་འབོད་ཚུལ་མི་འདྲ་བ་དུ་མ་ཡོད་པ་ཡིན། ཁམས་ཕྱོགས་ཀྱི་ཡུལ་གྲུ་ཕལ་མོར་ཆེར་(ball)ལ་གྲུ་གུ་ཞེས་འབོད་པ་ཡིན་ལ་དེ་ཡང་གྲུ་གུ་ཞེས་པའི་དོན་ནི་སྐུད་པའི་དོག་པ་ལ་ཟེར་བ་ཡིན། དཔེར་ན་རྒྱུ་བལ་ལས་བྱས་པའི་གྲུ་གུ་ལ་བལ་གྲུག་དང་། དེ་བཞིན་དུ་རྩིད་གྲུག་དང་ཁུལ་གྲུག་སོགས་སོ། མིང་ཚིག་འདི་ཉིད་དོན་ལ་ཆེས་འབྱོར་བ་ཞིག་ཡིན། དེང་རབས་ཀྱི་བཟོ་ལས་མ་དར་བའི་གོང་གི་ཕོ་ལོང་ཕལ་ཆེར་སྐུད་པ་ལས་བཟོས་པའི་གྲུ་གུ་ཡིན་པ་རེད། དཔེར་ན་གནའ་དུས་དུ་བོད་ཀྱི་བཙན་པོའི་སྐུ་བློན་དང་། ཐང་རྒྱལ་རབས་ཀྱི་བློན་ཆེན་གྱི་བར་དུ་རྩེས་མྱོང་བའི་གྲུ་གུ་དེ་ནི་བལ་སོགས་ཀྱིས་སྐུད་པའི་དོག་པ་ཞིག་ཡིན་ངེས་ལ་ཐེ་ཚོམས་མི་དགོས་སྙམ་མོ།
ཨ་མདོ་ཕྱོགས་ནས་ལྒང་ལི་ཞེས་འབོད་ཀྱིན་ཡོད། དེ་ཡང་གོ་དོན་ཅན་ཞིག་རེད། ལྒང་པ་ཞེས་པ་མི་ཕྱུགས་སོགས་སྲོག་ཆགས་ཀྱི་གཅིན་པ་གསོག་ས་དེ་ལ་ལྒང་པ་ཞེས་དང་མིང་བསྡུས་ན་གཅིན་ལྒང་ཞེས་འབྲི་ཆོག དེ་དང་མཚུངས་པའི་དབུགས་ཀྱིས་བཀང་ཆོག་པའི་(ball)རིགས་འདི་ལ་ལྒང་པ་ཞེས་བཏགས་པ་དོན་ལ་གནས། འདྲ་བར་རྒྱུ་མཚན་གྱིས་བཏགས།
དབུས་གཙང་ཕྱོགས་ནས་སྤོ་ལེས་དང་། ཡང་ན་སྤོ་ལོ། པོ་ལོ་སོགས་ཅི་རིགས་སུ་འབྲི། འདི་ནི་པུ་ལུ་ཞེས་པའི་མིང་ཚིག་གི་ཟུར་ཆག་གི་སྐད་རེད། པུ་ལུ་ནི་དངོས་རྫས་རིལ་བུ་སྤུས་ལེགས་ཀྱི་རིགས་ལ་གོ་བ་ཡིན་ཏེ། དཔེར་ན་མར་དཀར་གྱི་རིལ་བུ་ལ་མར་དཀར་པུ་ལུ་དང་། ཨ་སྣུམ་པུ་ལུ་སོགས་སུ་འབོད་པ་བཞིན་ནོ།། ཡང་ན་ཕོ་ལོང་གི་ཟུར་ཉམས་པའི་སྒྲ་གདངས་ཤིག་ཡིན་སྲིད། གང་ལྟར་ཁ་སྐད་ཀྱི་འབོད་སྟངས་ཤིག་རེད། དེང་སང་བྱེས་ཀྱི་ཚགས་པར་སོགས་ཀྱི་ནང་རྐང་རྩེད་སྤོ་ལོ་ལྟ་བུ་རྒྱུགས་ཆེ་བ་དང་། གཞིས་ཀྱི་དྲ་རྒྱ་སོགས་སུ་རྐང་གྲུག་རྩེད་མོ་ལྟ་བུ་འབོད་པ་མང་། དེ་ལྟར་བོད་མདོ་དབུས་ཁམས་གསུམ་སུ་དངོས་པོ་གཅིག་ལ་འབོད་ཚུལ་ཁ་འཐོར་དགུ་འཐོར་ཡིན་ལ་བོད་གཞིས་བྱེས་གཉིས་སུའང་བརྗོད་སྟངས་ཕར་རྒྱབ་ཚུར་རྒྱབ་ཡིན།
༣༽གཅིག་གྱུར་གྱི་ཐ་སྙད་འཚོལ་བ། ད་འོ་ན་ང་ཚོ་བོད་པ་ཚང་ལ་རྩེད་རིགས་འདི་ཉིད་གོ་ནུས་པའི་ཐ་སྙད་ཞིག་གཏན་ནས་མེད་ན་གསར་དུ་འདོགས་དགོས་ལ་གལ་ཏེ་ཡོད་ན་དེ་ཉིད་འབོད་དགོས། བཀའ་འགྱུར་དང་བསྟན་འགྱུར་སོགས་བོད་ཀྱི་སྤྱི་སྐད་དེ་དག་གི་ནང་དུ་ཐ་སྙད་དེ་ཡོད་མེད་བཙལ་དགོས། གུས་པས་བསམ་ན་བཀའ་བསྟན་གྱི་ཁྲོད་ན་བཞུགས་པའི་ཕོ་ལོང་ཞེས་པའི་ཐ་སྙད་འདི་ལོ་ངོ་སྟོང་ཕྲག་ལྷག་གི་གོང་ནས་བོད་རང་གི་སྐད་བརྡ་རྣལ་མ་ཞིག་རེད། རྒྱ་གཞུང་རྙིང་པ་རྣམས་སུ་དར་གྱི་ཕོ་ལོང་ཞེས་དང་། རྗེའི་ལམ་རིམ་ཆེན་མོ་ཆེན་མོ་སོགས་བོད་རྩོམ་གཡེར་པོ་ཆེ་དག་གི་ནང་དུའང་དེ་བཞིན་དུ་དར་གྱི་ཕོ་ལོང་ས་ལ་བརྡབས་པ་ཞེས་ལྷོད་ཀྱིས་འཕར་བའི་དཔེ་རུ་གསལ་ཡོད། ཕོ་ལོང་གི་གོ་དོན་ནི། སྐུད་པ་དང་དར་རམ་རས་སོགས་ལ་མདུད་པ་བོར་ཏེ་རྡོག་པོ་གཤིག་དཀའ་བ་ཞིག་བཟོ་ནས་ཐང་ལ་བརྡབ་ན་འཕར་བའི་རང་བཞིན་ཅན་ཞིག་ཡིན་པས་རྩེད་ཆས་སུ་རུང་བ་ཞིག་ཡིན། འདི་ཉིད་བཟོ་སྟངས་དམིགས་གསལ་བ་ཞིག་ཡོད་པ་འདྲ་སྟེ། ཕོ་ལོང་མདུད་དམ། ཡང་ན་གྲུ་གུ་མདུད་པ་ཞེས་དམིགས་བསལ་གྱི་མདུད་པ་ཇེ་དམ་དུ་འགྲོ་བ་ལས་ལྷོད་དུ་འགྲོ་རྒྱུ་མེད་པའི་མདུད་སྟངས་ཤིག་ད་ལྟ་མདོ་ཁམས་ཕྱོགས་སུ་མདུད་རྒྱུ་ཡོད། དེ་ལྟར་ང་ཚོས་ཐ་སྙད་ཚད་ལྡན་ཞིག་ཡོད་ཀྱང་ང་ཚོས་དེ་ཉིད་དོན་ལ་གཅིག་གྱུར་གྱིས་བཀོལ་ཐུབ་མེད། ད་ནས་ང་ཚོས་ཐ་སྙད་འདི་དོན་ལ་འབྱོར་ཚེ་ང་ཚོས་ཐ་སྙད་འདི་བཀོལ་སྤྱོད་རྣལ་མ་ཞིག་བྱེད་དགོས་ངེས་སུ་གྱུར། དེ་ཡང་མི་ཚང་མས་བཀོལ་སྤྱོད་བྱེད་དགོས། མི་ཁ་ཤས་ཞིག་གིས་བོས་ཀྱང་ཕན་ཐོགས་མེད། འབོད་སྟངས་དེའང་དྲ་རྒྱ་དང་གསར་འགྱུར་རླུང་འཕྲིན་སོགས་དེང་རབས་བརྡ་འཕྲིན་གྱི་ལམ་ནས་རྟག་པར་གཅིག་གྱུར་གྱིས་བོས་ན་མི་མང་བྱིངས་ཀྱང་ནམ་ཞིག་དེའི་རྗེས་སུ་འབྲངས་བ་གདོན་མི་ཟའོ། དེ་ནས་ང་ཚོ་ཐ་སྙད་དེ་གཏན་འབེབས་ཐུབ་པ་རེད་ལ་བཤད་ཚུལ་གཞན་ཞིག་བྱས་ན་ང་ཚོའི་བཀའ་བསྟན་གྱི་ཁྲོད་ན་བཞུགས་པའི་ཐ་སྙད་ཅིག་སྤྱི་ཚོགས་སུ་བེད་སྤྱོད་ཐུབ་པ་རེད་ལ་ཐ་སྙད་དེ་སྲུང་སྐྱོབ་ཐུབ་པ་རེད། དེ་ཡང་རྒྱུན་དུ་སྐད་ཡིག་གཅིག་གྱུར་དགོས་ཀྱི་འདུག་ཅེས་སྐད་ཅོར་འབྱིན་པ་ཙམ་གྱིས་གར་ཡང་མི་སླེབས་ཤིང་གནད་འགག་འདི་ལྟ་བུའི་དངོས་པོ་རིགས་གཅིག་ལ་གཅིག་གྱུར་གྱི་འབོད་སྟངས་ཀྱི་ལམ་ཁ་ཞིག་རྙེད་ན་དེའི་ཡན་ལག་དང་ཉིང་ལག་དེ་དང་འབྲེལ་བའི་ཐ་སྙད་བརྒྱ་ཕྲག་དུ་མ་གཅིག་གྱུར་བྱེད་ཐུབ་པ་ཡིན། དཔེར་ན་(foot ball)ལྟ་བུ་ལ་རྐང་རྩེད་ཕོ་ལོང་དང་། མིང་བསྡུས་ན་རྐང་ཕོལ་སོགས་ཀྱང་རུང་། དེས་རིགས་བསྒྲེས་ནས་རྐང་ཕོལ་ཐང་། རྐང་ཕོལ་གྱི་རུ་དཔོན། རྐང་ཕོལ་གྱི་སློབ་དཔོན་སོགས་ཀྱིས་མཚོན་ནོ།། གཞན་ཡང་ཕོ་ལོང་ཞེས་པའི་མིང་ཚིགས་འདི་ཉིད་བཀོལ་ན་ཕོ་ལོང་དང་འབྲེལ་བའི་རྩེད་རིགས་མང་པོ་ཞིག་གི་ཐ་སྙད་གཅིག་གྱུར་དུ་ཡོང་བར་ངེས་ཏེ་ཐ་སྙད་འདི་ཁྱབ་ཁོངས་ཧ་ཅང་ཡངས་པས་སོ། དེ་ཡང་དཔེར་ན། (golf ball )རྒྱང་གཡུག་ཕོ་ལོང་།(bowling ball )རྦབ་རྡོ་ཕོ་ལོང་། (base ball ) གྲྭར་རྩེད་ཕོ་ལོང་། (rugby ball)འཇོང་གཟུགས་ཕོ་ལོང་། (Cricket ball)དབྱུགས་རྩེད་ཕོ་ལོང་། (water ball) ཆུ་རྩེད་ཕོ་ལོང་། (tennis ball)བར་ཆོད་ཕོ་ལོང་། (basket ball)ལག་རྩེད་ཕོ་ལོང་། (foot ball) རྐང་རྩེད་ཕོ་ལོང་། (polo)རྟ་རྩེད་ཕོ་ལོང་། མདོར་ན་དབྱིན་ཡིག་ནང་གི་(polo)དང་། (ball) སོགས་ཆ་ཚང་བོད་ཡིག་ཕོ་ལོང་ཞེས་པ་འདིའི་ཁོངས་སུ་བསྡུ་ཐུབ་པ་ཡིན།འོན་ཀྱང་བྱེ་བྲག་ཏུ་ཕྱེས་ན་འདི་དག་ཐམས་ཅད་ལ་རང་རང་གི་ཁྱད་ཆོས་དང་བྱུང་རབས་རེ་ཡོད་པ་ཡིན་པས་མིང་གི་འགོར་དེ་ལྟ་བུའི་ཁྱད་ཆོས་རེ་བླ་ཐབས་སུ་བསྣན་ན་སོ་སོ་མ་འདྲེས་པ་གོ་དོན་ཡང་བདེ་བླག་ཏུ་སྟེར་ཐུབ་པ་ཡིན། ༼དབྱིན་བོད་ཤན་སྦྱར་གྱི་མིང་ཚིག་འདི་དག་ནི་དཔྱད་གཞི་ཙམ་ལས་ངེས་གཏན་ཅི་ཡང་མེད།༽
༤༽ མིང་ཚིག་གི་འབྱུང་ཁུངས། འགའ་ཞིག་གིས་(polo)ཞེས་པའི་མིང་ཚིག་གི་འབྱུང་ཁུངས་དེ་བོད་སྐད་ཀྱི་པུ་ལུ་ཞེས་པ་ཡིན་ཚུལ་བྲིས་འདུག་ནའང་བདེན་ཁ་སྟེར་དཀའ་སྟེ་པུ་ལུ་ཞེས་པ་ནི་ལུང་ཚན་འགའ་ཞིག་ཏུ་དངོས་པོ་རིལ་རིལ་ཞིག་བསྟན་པ་ཙམ་ལས་ས་ལ་བརྡབས་ན་འཕར་ཡོང་བ་སོགས་ཕོ་ལོང་གི་གོ་དོན་བསྟན་སྟངས་མེད་ཅིང་། བོད་སྤྱི་ལ་ཁྱབ་པའི་ཐ་སྙད་ཅིག་ཀྱང་མ་རེད། གུས་པས་བསམ་ན་དབྱིན་ཡིག་གི་(polo)འདི་བོད་ཡིག་ཕོ་ལོང་གི་སྒྲ་གདངས་ལྟར་བྲིས་པ་ཞིག་རེད་བསམ། དེ་ཡང་བོད་ཡུལ་ནས་དར་བའི་རྟ་རྩེད་ཕོ་ལོང་འདི་རྒྱ་ནག་དང་། དེ་ནས་ཏ་ཟིག་གམ་ཡང་ན་(iran)ཨི་རེན་སོགས་རིམ་གྱིས་ཤར་ནས་ནུབ་ཏུ་དར་བའི་སྐབས་སུ་ཐ་སྙད་དེ་ཡང་གཟུགས་དང་གྲིབ་མ་བཞིན་དུ་ལྷན་ཅིག་ཏུ་འབྱོར། འོན་ཀྱང་དེ་དབྱིན་ཡིག་སོགས་མི་རིགས་གཞན་གྱི་སྐད་ཀྱི་ཐོག་ཏུ་བྲི་སྐབས་སུ་(polo)ཕོ་ལོ་ཞེས་རྗེས་མཇུག་གི་ང་སྒྲ་གསལ་པོ་མ་བྱུང་ཡང་མིང་གཞི་ལ་འགྱུར་བ་གང་ཡང་སོང་མེད་པར་སེམས། དེ་ནས་འཛམ་གླིང་གང་སར་རྩེད་རིགས་འདི་དར་སྲོལ་ཆེན་པོ་བྱུང་ནས་དེང་སང་རྒྱལ་སྤྱི་རང་བཞིན་ཅན་གྱི་རྩེད་རིགས་ཤིག་ཏུ་གྱུར་ཟིན་ནའང་ཐ་སྙད་དེ་བོད་ཀྱི་སྒྲ་གདངས་དེ་ག་རང་དུ་གནས་ཡོད་པ་ཡིན།
༥༽རྟ་རྩེད་ཕོ་ལོང་གི་བྱུང་རབས། རྩེད་མོ་འདི་ཉིད་ཆེས་ཐོག་མར་དར་བའི་ཡུལ་ནི་བོད་གངས་ཅན་གྱི་ལྗོངས་སུ་བྱུང་བ་ཡིན་ཏེ། རྩེད་རིགས་འདི་ཉིད་ཀྱི་ཐ་སྙད་འདི་ཉིད་བོད་མིང་ཡིན་པས་སོ། དཔེར་ན་བོད་ཡུལ་གྱི་བླ་མ་དང་། གཡག རྩམ་པ་སོགས་འཛམ་གླིང་མི་རིགས་གཞན་གྱིས་ཀྱང་མིང་དེ་ག་རང་དུ་འབོད་པ་འདིས་དངོས་པོ་དེ་ཐོག་མར་ཡུལ་དེ་ནས་བྱུང་བ་དང་། ཡང་ན་ཡུལ་ཕྱོགས་དེ་ན་མ་གཏོགས་གཞན་དུ་མེད་པའི་ངོས་འཛིན་བྱས་ན་མི་རུང་བ་མེད་པ་ལྟ་བུ་ཡིན། ཕྱི་ལོ་སྔོན་གྱི་དུས་རབས་ལྔ་པའི་ནང་ཙམ་དུ་ཨི་རན་གྱི་ལུང་པ་བྱུང་བ་བཤད་པ་བདེན་ན་དེའི་སྔོན་ཙམ་ཞིག་ཏུ་བོད་ཡུལ་དུ་དར་ཡོད་པར་ཡིན་སྟེ། རྩེད་རིགས་འདིའི་ཐོག་མའི་འབྱུང་ཁུངས་བོད་ཡིན་པས་སོ། རྩེད་མོ་འདི་འདྲ་བ་ཞིག་ཡོང་བའི་རྒྱུ་མཚན་ནི་རྟ་ཐོག་ནས་རལ་གྲི་དང་། མདུང་སོགས་ཀྱིས་ཕ་རོལ་པོ་ཆམ་ལ་ཕོབ་ཐུབ་པའི་དམག་སྦྱངས་ལྟ་བུ་ཞིག་གོང་རིམ་བཙན་པོ་ཡབ་ཡུམ་ལ་གཟིགས་འབུལ་ཕུལ་བ་དང་། དམའ་རིམ་གྱི་སྤྱི་ཚོགས་ནང་དུ་དཔའ་ངོམ་སོགས་བྱས་པས་རིམ་གྱིས་དམངས་ཁྲོད་དུ་སྲོལ་རྒྱུན་གྱི་རྩེད་མོའི་ཚུལ་དུ་ལུས་པ་ཡིན་སྲིད། དེ་ཡང་དང་ཐོག་དབྱུགས་པ་འདི་དག་གྲི་མདུང་དང་། རིལ་རིལ་དེ་དགྲ་བོ་གཡུལ་དུ་བསད་པའི་མགོ་བོ་སོགས་ཡིན་མི་སྲིད་པའི་ངེས་པ་ཅི་ཡོད། གནའ་དུས་སུ་ཕ་རོལ་པོ་གཡུལ་དུ་སོད་པའི་སྐབས་སུ་དཔའ་རྟགས་ལྟ་བུ་མགོ་བོ་བཅད་ནས་ཁུར་འགྲོ་བའི་ལུས་སྲོལ་ཡོད་པ་ཡིན་ལ་མགོ་ལག་གོང་ལེན་ཞེས་རྟ་ཐོག་ནས་མགོ་ལག་ལེན་པའི་སྐད་ཆ་ཞིག་གླིང་སྒྲུང་ཚུན་ཆད་དུ་ཡོད་པ་ཡིན།དེང་གི་དུས་ཀྱང་མདོ་ཁམས་ཕྱོགས་སུ་རྟ་ཐོག་ནས་མེ་མདའ་འཕེན་པ་དང་། གྲི་གཡུག་པ། མདུང་བཙུགས་པ་སོགས་ཀྱི་རྟ་ཐོག་རྩེད་མོ་མང་པོ་ཞིག་ཡོད་པ་འདི་དག་གནའ་དུས་སུ་བོད་བཙན་པོའི་དུས་ཀྱི་ཡར་གླིང་ནང་དྲག་འདུལ་བྱེད་མཁན་བྷོད་དམག་བཙན་རྒྱལ་རིང་ལུགས་ཀྱི་དམག་རྩལ་ཞིག་ཤུལ་དུ་ལུས་པ་སེམས་སོ། དེ་ནས་རིམ་གྱིས་བོད་དམག་གི་རྩལ་སྦྱོང་དེ་ཉིད་ཐང་གོང་མ་སོགས་རྒྱ་ནག་གི་ཡུལ་དུ་དར་བ་སེམས།

༼འདིའི་ནང་དུ་བོད་ཀྱི་བློན་ཆེན་ཞང་བཙན་ཏོ་ལགས་ཀྱི་འདྲ་རིས་འདུག་གམ།༽
དེ་ཡང་ཕྱི་ལོ་༧༠༩ལོའི་ཟླ་བ་བཅུ་གཅིག་པའི་ནང་བོད་ཀྱི་བཙན་པོ་མེས་ཨག་ཚོམ་གྱི་དུས་བོད་ཀྱི་བློན་ཆེན་ཞང་བཙན་ཏོ་རྒྱ་ནག་གོང་མའི་སྲས་མོ་བོད་ཀྱི་བཙན་པོའི་གནའ་མ་བསུ་བར་སོང་སྐབས་རྒྱ་ནག་ཕྱོགས་ནས་གོང་མ་ཀྲུང་ཙུང་གི་སྐྱེད་ཚལ་དུ་རྟ་རྩེད་ཕོ་ལོང་གི་རྩེད་མོ་བཀོད་སྒྲིག་བྱས་ནས་གོང་མ་རང་ཉིད་ཀྱང་རྒྱ་བོད་ཀྱི་བློན་ཆེན་བར་གྱི་རྩེད་འགྲན་དེ་རུ་བལྟ་བ་སླེབས་པར་(ཐང་ཡིག་རྙིང་མའི་)ནང་གསལ་བ་ལྟར་ཡིན། དེ་ཡང་རྒྱ་ནག་གི་རྩེད་མོ་དེ་ལྟར་བཤམས་དགོས་དོན་ཡང་རྩེད་རིགས་དེ་ཉིད་ཐོག་མར་བོད་ནས་དར་བས་བོད་ཀྱི་བློན་ཆེན་རྣམས་རྩེད་མོ་དེ་ལ་བྱང་ཆ་ཡོད་པ་དང་། དགའ་མོས་ཡོད་པའི་རྒྱུ་མཚན་གྱིས་བཀོད་སྒྲིག་བྱས་པ་ཡིན། དེ་ནས་བོད་ཀྱི་འདབས་འབྲེལ་བའི་ཡུལ་གྲུ་ཁག་ནས་རིམ་གྱིས་དར་ནས་ཨ་རབ་ཀྱི་ཡུལ་དུ་མཆེད་ཀྱང་རྩེད་མོའི་ལམ་ལུགས་དང་རྩེད་སྟངས་ཀྱི་རྣམ་གྲངས་སོགས་ལ་འགྱུར་བ་སོང་ཡོད་ངེས་ནའང་ཐ་སྙད་དེ་མ་འགྱུར་བར་བོད་སྐད་ཀྱི་ཕོ་ལོང་ཞེས་པ་དེ་ག་རང་དུ་གནས་པ་རེད། དེང་སང་བོད་ཀྱི་རྟ་རྩེད་ཕོ་ལོང་ཐ་སྙད་དང་བཅས་པ་འཛམ་གླིང་ཡོངས་ལ་ཁྱབ་ཟིན་པ་ཡིན་ནོ།།

ཨོ་བྷ་མ་ངེད་གཉིས་ཟ་ཁང་དུ་སོང་བ།

ང་ཁ་སང་ཟླ་བ་༦པའི་ཚེས་༢༣ཉིན་ཨ་རིའི་ཕོ་བྲང་དཀར་པོ་ནང་དུ་ཨོ་བྷ་མ་དང་ཐུག་ནས་སྐད་ཅ་ཡུན་རིང་བཤད། ཉིན་རྒྱབ་ཆུ་ཚོད་བཞི་པ་ཙམ་དུ་ཕྱིན་ཀྱང་ཉིན་གུང་གསོལ་ཚིགས་ཟོས་མེད། དེ་ནས་ང་གཉིས་རྒྱུ་སྨད་ནས་ཚ་ཤར་འདྲ་བ་འགའ་ཞིག་བྱུང་ནའང་སྐད་ཅ་དེ་དག་སྙན་དྲག་ནས་གཞན་གང་ལའང་བསམ་བློ་གཏང་རྒྱུ་མ་བྱུང་། དེ་ནས་ངེད་གཉིས་མར་སྒོ་བུད་རྗེས་ཉིན་གུང་གསོལ་ཚིགས་གྲ་སྒྲིགས་ལེགས་པར་བྱས་པའི་ཕོ་བྲང་དཀར་པོའི་ཚོམས་ཆེན་ཞིག་མིག་ལ་བསྟན་ཀྱང་། ཨོ་བྷ་མས། "ང་གཉིས་དེ་རིང་སྐྱིད་པོ་ཞིག་འཆམ་དགོས། སྔ་མ་ང་ནམ་རྒྱུན་འགྲོ་སའི་ཟ་ཁང་ཞིག་ཡོད་དེར་འགྲོ "ཟེར། དེ་ནས་མི་ཚོགས་མང་བའི་ལམ་འགག་དེ་དག་གཡས་གཞག་གཡོན་བསྐྱུར་བྱས་ནས་(hamburger)ཧེམ་བག་གི་ཟ་ཁང་ཆུང་ཆུང་ཞིག་གི་ནང་དུ་འཛུལ། དེར་ཡོད་ཀྱི་ཞབས་ཕྱི་རྣམས་བྱ་ཕོ་གཟན་ལ་རུབ་པ་ལྟར་ཐམས་ཅད་འདུས་བྱུང་། ཅུང་ཞིག་ནས་གཡང་ས་ཉམས་ང་བ་སླེབས་པ་ལྟར་ཐམས་ཅད་ཕྱིར་བསྐྱེད་བྱས་ནས་རང་རང་གི་ལས་གནས་སུ་བྲོས། དེ་ནས་ཟ་ཁང་གི་སྦྱིན་བདག་དེས། "རྣམ་པ་གཉིས་གུས་བསུ་ཞུ། གསོལ་ཚིགས་ཅི་ཞིག་མཆོད་རྒྱུ།" ཨོ་བྷ་མས་ང་ལ་མིག་གིས་བལྟས་ནས། "ཁྱོད་ཀྱི་ཅི་ཞིག་ཟ་རྒྱུ།" ཟེར་བཞིན་འབའ་ཁུག་གྲུ་གང་ཅན་ཞིག་གློ་ལས་བླངས། དེ་ནས་ངས། "ངས་བག་ལེབས་སུམ་བརྩེགས་ཅན་དེ་ཟ་རྒྱུ་ཡིན། འོ་ན། ཁྱོད་ཀྱི་ཅི་ཞིག་ཟ་རྒྱུ་ཡིན།" ཞེས་དྲིས་ཤིང་དངུལ་ལོ་སྦར་མོ་གང་རུམ་ལས་བླངས། ཨོ་བྷ་མས། "ངས་བག་ལེབ་ལྔ་བརྩེགས་ཅན་དེ་ཟ་རྒྱུ་ཡིན།" ཟེར། དེ་ནས་ངས། "ཡ་སྒོར་མོ་འདི་ན་ཡོད་"བཤད། ཨོ་བྷ་མས། "ང་ཡིན།" ངས། "ང་ཡིན།" ཨོ་བྷ་མས། "ང་ཡིན།" ངས། "ང་ཡིན་"བཤད་ཞོར་ངེད་གཉིས་འབུད་རྒྱག་ཕྲན་བུ་བྱུང་བས་ཨོ་བྷ་མའི་སྐུ་སྲུང་འགའ་ཞིག་སླེབས་ནས་ངེད་གཉིས་སོ་སོར་རྐུབ་བཀྱགས་རེའི་ཐོག་ཏུ་བཞག དེ་ནས་ཅུང་མ་འགོར་བར་ཟ་ཁང་གི་སྦྱིན་བདག་དེས་ངེད་གཉིས་ཀྱི་དྲུང་དུ་བག་ལེབ་དགུ་བརྩེགས་ཅན་རེ་ཁུར་ནས་"རྣམ་པ་གཉིས་འདིར་སླེབས་པ་ཐུགས་རྗེ་ཆེ།"ཟེར་བཞིན་ཕྱིར་བསྐྱེད་བྱས་སོང་། ཨོ་བྷ་མ་ངེད་གཉིས་སྔ་མ་ངོ་མི་ཤེས་ནའང་འདི་ལྟར་འདྲིས་བདེ་འགྲོགས་བདེ་ཞིག་རེད། དངོས་གནས་སྐྱིད་པོ་བྱུང་། བྱས་ན་ཡང་སྙིང་ང་སུ་ཡིན་ཁྱོད་ཀྱིས་ཤེས་སམ། ང་སུ་ཡིན་མ་ཤེས་ན་ཨུ་རུ་སུའི་སྲིད་འཛིན་༼Dmitry Medvedev ༽གྷྲིམིཏྲིས་ མེཝིདེཝི་ཡིན།

མཛངས་མ་སྒྲོལ་དཀར་མཚོ།

སྒྲོལ་དཀར་མཚོ། བོད་ཤིང་སྟག་ཕྱི་ལོ་༡༩༧༤ལོར་ཁམས་རག་ཤུལ་ཡུལ་དུ་ཡབ་ལྷ་རྒྱ་རི་འཇམ་སེང་སྤྲུལ་སྐུ་དང་། མ་ཁྱུང་བཟའ་སྒྲོན་ཡག་གཉིས་ཀྱི་རྒྱུད་དུ་མིང་པོ་ལྔ་ཡི་སྲིང་མོར་སྐྱེས། ཆུང་ངུའི་དུས་སུ་ནོར་ལུག་གི་རྗེས་སུ་འབྲངས་ཤིང་ཀ་མད་སུམ་ཅུ་ལའང་མིག་ཞགས་འགའ་རེ་བརྐྱངས། དེ་ནས་རིམ་གྱིས་ལྷ་རྒྱ་རི་འཇམ་སེང་སྤྲུལ་སྐུ་རྫོང་དང་རིམ་པས་ཡུལ་ཤུལ་ཁུལ་མི་དམངས་སྲིད་གཞུང་གི་ཁུལ་གཙོ་གཞོན་པ་སོགས་ཀྱི་དཔོན་ས་སླེབས་པས་སློབ་གྲྭ་འགྲོ་བའི་གོ་སྐབས་བྱུང་ཞིང་སློབ་མཐར་ཕྱིན། དེ་ནས་ཡུལ་ཤུལ་ཁུལ་གྱི་སྦྲགས་སྲིད་ཅུའུ་ལ་ལས་ཀ་བགོས་ནས་ཟླ་ཕོག་སོགས་མཐོ་བོ་ཡོད། མོ་རང་ནི་རྒྱབ་ཀྱི་ཕ་ཁུ་མཐོ་བ་དང་། མོ་རང་སྐྱེས་གཟུགས་ལེགས་པ། ཁ་གསལ་ཞིང་ཁོག་ཡངས་པ། ཉེ་རིང་སུ་ལ་ཐུགས་ཀྱང་སྐད་ཅ་དྲང་མོར་བཤད་པ་སོགས་ཡ་རབ་དྲ་མའི་ལུགས་སུ་འཛོམས་པའི་སྨན་ཤར་ཞིག་ཏུ་གྱུར། དེའི་ཚེ་ཡུལ་དེའི་དཀོར་རྫས་གད་སྙིགས་བཞིན་སྤུངས་པའི་སྤྲུལ་མིང་ཅན་དང་། དམར་ཡག་སྟག་གི་སྙིང་ཁམས་ཅན་གྱི་ཕོ་རྒོད། ནོར་ལོངས་སྤྱོད་ཀླུ་དང་མཉམ་པའི་ཕྱུག་པོ་སོགས་ཆེ་དགུ་གཉན་བཅུ་དུ་མ་ཞིག་གིས་གནའ་མ་བསླངས་ནའང་ལས་དང་བསྐོས་པ་ལྟ་བུས་སུ་ལའང་ཡ་ལན་མ་བྱས་པར་ཐག་རིང་གོ་འཇོ་ཡུལ་ནས་གསར་དུ་གཟི་ཚོང་ཞིག་གི་ཆེད་དུ་རང་ཁྱིམ་དུ་ཡོང་པའི་ཚོང་པ་ཀརྨ་བསམ་འགྲུབ་དང་རིམ་གྱིས་བརྩེ་བ་ཟུགས་ནས་གཤིག་མི་ཐུབ་པར་གྱུར། དེ་ནས་ཚོང་པ་ཀརྨ་བསམ་འགྲུབ་དང་འགྲོགས་ནས་རྒྱ་ཁབ་ཕྱི་ནང་དུ་མ་སོང་། སྔ་ཕྱི་བུ་མོ་གཉིས་སྐྱེས། ཀརྨས་སྐྱེ་དགུ་མདོ་རུ"ཆུ་བོ་རྨ་འབྲི་རྫ་གསུམ་གྱི་སྐྱེས་ཁམས་ཁོར་ཡུག་སྲུང་སྐྱོབས་ཚོགས་པ་"བཙུགས་པའི་སྐབས་མོ་རང་གི་ཕ་ཁུ་སོགས་ཀྱིས་ནུས་ཤུགས་གལ་ཆེན་གཏོན། ཀརྨ་ནི་རང་ཁྱིམ་དུ་སྡོད་པའི་དུས་ཚོད་ཆེས་ཉུང་ཞིང་བུ་མོ་གཉིས་ཀྱང་རང་ཉིད་གཅིག་པུས་གཉོར་སྐྱོང་བྱེད་དགོས་སོགས་དཀའ་ཁག་བྱུང་བའི་སྐབས་སུ་མོ་རང་ལ་བློ་དཀར་བའི་ཉེ་འབྲེལ་སོགས་ཀྱིས་ཀརྨ་ལ་འཁང་ར་འདྲ་བྱས་ན་མོས་ཀརྨའི་ཕྱོགས་སུ་ལངས་རྐྱང་བྱེད་ཅིང་མདོར་ན་མོ་ཡིས་རང་གི་མཛའ་བོ་བཅང་པའི་བརྩེ་དུངས་ལ་ནམ་ཡང་དྲི་མ་མེད། དེའི་སྐོར་མོ་རང་གི་ཉེ་ཆར་ཟླ་དྲུག་པའི་ཚེས་༢༡ཉིན་བྲིས་པའི་(སྙིང་གཏམ་)དུམ་བུ་དེའི་ནང་དུ་སྡོམ་ཚིག་བཞག་ཡོད་པ་ནི་འདི་ལྟར"ཁོང་རང་རྒྱུན་དུ་ཁྱིམ་དུ་མ་བཞུགས་པ་དང་། ཁོང་གི་རྒྱུ་དང་ནུས་ཤུགས་ཡོད་ཚད་རིག་གནས་དང་ཁོར་ཡུག་སྲུང་སྐྱོབ་ལ་ཕུལ་ཡང་རུང་། ངའི་སེམས་ནང་དུ་ཆེས་བརྩེ་ཤོས་ཀྱི་མི་དེ་ཡིན། "ཞེས་སེམས་ཁོང་གི་སྙིང་གཏམ་མིག་ཆུ་ལ་བསྲེས་ཡོད་པ་ལྟར་རོ།།
དེ་ནས་ལོ་ཤས་གོང་ནས་ཀརྨའི་ལས་ཀ་དང་བསྟུན་ཏེ་མོ་རང་གཞུང་གི་ལས་ཀ་བསྐྱུར་ནས་རྒྱ་ནག་ཁྲིན་ཏུའུ་གྲོང་ཁྱེར་དུ་གནས་སྤོས་ཤིང་དེར་གཞིས་ཆགས་ཡོད། ཉེའི་ཆར་ཀརྨ་བཙོན་དུ་ཚུད་རྗེས་སུ་སེམས་པ་མི་བདེ་བ་དང་། ལུས་ཀྱི་ཤ་སྐམ་པ་སོགས་ལུས་སེམས་གཉིས་ལ་དཀའ་ངལ་མང་པོ་འཕྲད་བཞིན་ཡོད་འདུག་ཀྱང་ཧུ་ཤུ་དང་། བྲང་བརྡུང་གཅིག་པུ་མ་བྱས་པར་༼སྙིང་གཏམ་༽ཞེས་པའི་རྩོམ་ཐུང་ཞིག་བྲིས་ནས་འཛམ་གླིང་ཁྱོན་ལ་གསལ་བཤད་རྣལ་མ་ཞིག་བྱས་ཡོད་པ་རེད། དེའི་ནང་དུ་རང་གི་ཁྱོ་བོ་ལ་གདེངས་འཇོག་འདི་ལྟར་བྱས་འདུག"ང་རང་ཆུང་མ་ཞིག་གིས་རང་གི་ཟླ་བོ་ལ་དག་སེལ་བྱེད་པར་ཡང་སྙིང་གཞན་གྱིས་བློ་ཁ་ཇི་ཙམ་གཏོད་མིན་ཧ་གོ་གི་མེད། འོན་ཀྱང་ཆ་རྒྱུས་ཡོད་མཁན་ཚང་མས་ངའི་ཟླ་བོ་ལ་བཅངས་པའི་ཡིད་ཆེས་དེས་ང་རང་སེམས་འགུལ་ཐེབས་ལ་གདེང་ཚོད་ཞིག་ཀྱང་རྙེད་བྱུང་། གཟི་ཡི་རྒྱལ་པོ་དང་། ཁོར་ཡུག་སྲུང་སྐྱོབ་པ། དགེ་རྩ་སྒྲུབ་མཁན། ཕུལ་བྱུང་ཚོང་པ། ངལ་རྩོལ་དཔེ་བཟང་སོགས་སྨིག་སྒྱུ་ལྟ་བུའི་མཚན་སྙན་དེ་དག་ཡོངས་སུ་དོར་ན་ཡང་། ངའི་ཟླ་བོ་ནི་ཕྱི་གསལ་ནང་གསལ་གྱི་མི་ཞིག་དང་། མི་ཐམས་ཅད་ཀྱིས་དགའ་པོ་བྱེད་སའི་ཡ་རབས་གཞུང་དྲང་ཞིག་ཡིན་པ་མ་ཚད། ཁོང་རང་རྒྱུན་དུ་ཁྱིམ་དུ་མ་བཞུགས་པ་དང་། ཁོང་གི་རྒྱུ་དང་ནུས་ཤུགས་ཡོད་ཚད་རིག་གནས་དང་ཁོར་ཡུག་སྲུང་སྐྱོབ་ལ་ཕུལ་ཡང་རུང་། ངའི་སེམས་ནང་དུ་ཆེས་བརྩེ་ཤོས་ཀྱི་མི་དེ་ཡིན། ང་རང་ཆུང་མ་ཞིག་དང་མ་ཡུམ་ཞིག་གི་ཚོད་ནས་སྐྱོ་གདུང་གཞན་ཞིག་མྱོང་བཞིན་ཡོད་མོད། ང་རང་གིས་འདི་ལྟ་བུའི་སྒེར་སེམས་མེད་པའི་མི་ཞིག་ལ་རྒྱབ་སྐྱོར་བྱེད་རྒྱུ་བྱུང་བ་ནི་རང་ཉིད་ཀྱི་ལས་སྐལ་བཟང་པོ་ཡིན་པར་ཚོར་བཞིན་ཡོད།"ཅེས་གསལ་འདུག་ཅིང་བསམ་པའི་ཁྱེར་སོ་དང་། རྩོམ་གྱི་སྒྱུ་རྩལ། དོན་གྱི་འབབ་སོ་སོགས་གང་ལ་བསམ་ཀྱང་ཡ་རབ་མཛངས་མའི་སྐད་ཆ་ཤ་སྟག་བཤད་འདུག་པས་༼མཛངས་མ་སྒྲོལ་དཀར་མཚོ།༽ཞེས་སེམས་གཏིང་ནས་མངོན་པར་བསྟོད་དོ།།
ནགས་ཤོད་རིགས་རལ་གྱིས་བོད་བསྒྱུར་བྱས་པའི་སྒྲོན་དཀར་མཚོའི་རྩོམ་ཡིག་ཀློག་འདོད་ན་དྲ་ཐག་འདིར་འདུག
http://www.khabdha.org/?p=9837

ཡུལ་གྲོང་གི་དོགས་གཅོད།

འདི་ནི་ཉེ་བའི་ཆར་སྐྱེ་དགུ་མདོར་ས་འགུལ་བརྒྱབ་རྗེས་ཙམ་དུ་འཇམ་དབྱངས་ནོར་བུས་བྲིས་པའི་"ང་ཡི་སྙིང་དབུས་ཀྱི་སྐྱེ་རྒུ་མདོ"ཞེས་པའི་དབྱིན་ཡིག་གི་ཆེད་རྩོམ་ལ་ལེགས་སྤེལ་ལམ་ཡང་ན་བསེད་དཀྲོལ་ལྟ་བུ་མཆན་བཏབ་པ་ཞིག་ཡིན་ནའང་། འདིས་ཡུལ་ལུང་འདི་རྒྱུས་མེད་རྣམས་ལ་ཕན་པ་རེ་འབྱུང་རེས་འདི་ན་ཉར་ཚགས་སུ་བྱས་པ་ཡིན།

མཁས་དབང་འཇམ་དབྱངས་ནོར་བུ་ལགས། སྐྱེ་དགུ་མདོ་ཡི་ལོ་རྒྱུས་བསྡུ་བསྒྲིགས་བྱས་པར་ཐུགས་རྗེ་ཆེ། གུས་པ་ནི་དབྱིན་ཇི་ཡག་པོ་ཤེས་མཁན་ཞིག་མིན་པས་ནམ་རྒྱུན་དབྱིན་ཡིག་གི་དྲ་རྒྱ་རྣམས་སུ་ཉུལ་བ་དགའ་བོ་མེད། འོན་ཀྱང་སྐུ་ཉིད་ཀྱིས་སྐྱེ་དགུ་མདོ་ཡི་གནས་ཚུལ་ཞིག་བྲིས་འདུག་པ་ཐོས་པས་ཆེད་དུ་འདིར་ཡོང་བ་ཡིན། གནས་ཚུལ་ཕལ་མོ་ཆེ་ཁ་གསལ་པོ་དང་། ཁུངས་བཙན་པོ་ཞིག་ཡོད་བཟོ་འདུག དེའི་ནང་ནས་དོགས་གནས་འགའ་ཞིག་འདུག་པས་གསལ་བཤད་བྱེད་འདོད་བྱུང་བས་དགོངས་འགལ་མེད་པར་མཛོད།
༡༽ཡུལ་ཤུལ་གྱི་ཐད་དུ། ཡུལ་ལུང་འདིར་ཆེས་སྔ་མོ་ཞིག་ཏུ་ལྡོང་རག་མ་རྒྱལ་མཚན་བྱ་བ་ལ་བུ་གསུམ་སྟེ། ཡུལ་རིས་དང་། རག་རིས། དགེ་རིས་གསུམ་བྱུང་བས་ཕ་ཡིས་ཡུལ་ལུང་གསུམ་གྱི་དཔོན་པོར་བསྐོས་པར་གྲགས། དེ་དག་གི་ཤུལ་དུ་ཡུལ་ཤུལ་དང་། རག་ཤུལ། དགེ་ཤུལ་བཅས་ལུང་པ་བྱེ་བྲག་པ་གསུམ་གྱི་མིང་དུ་གྱུར། འདི་དག་གི་ལྡོང་ཤུལ་ཆེན་བཅོ་བརྒྱད་ཀྱི་གྲས་ནས་ཡིན་པ་རེད། ད་དུང་འདི་ལ་བཤད་ཚུལ་མི་མཐུན་པ་ཕྲན་བུ་ཡོད་ཀྱང་སྤུན་གསུམ་གྱི་རྗེས་ཤུལ་ཡིན་པ་ཁ་གཅིག་མཐུན་ཡིན། ཡུལ་ཤུལ་ཐོག་མར་ཡུལ་ཤུལ་ལིང་ཚེ་དྲུག་ཅེས་པའི་ཚོ་པ་ཆུང་ཆུང་དྲུག་ཅན་གྱི་སྤྱི་མིང་ཙམ་ཡིན། དེ་ནས་ཕྱིས་སུ་༡༩༥༡ལོར་སྐྱེ་དགུ་མདོ་འདིར་བོད་རིགས་རང་སྐྱོང་གི་ཁུལ་གྱི་སྲིད་གཞུང་འཛུགས་སྐབས་ཡུལ་ཤུལ་གྱི་མིང་དེ་ཉིད་ཁུལ་ཡོངས་ཀྱི་མིང་དུ་འཕོས་པ་རེད། སྒ་སྐྱ་ལོ་སེང་ལྕམ་འབྲུག་མོ་དང་། སྒ་ཚ་ཞང་ལྡན་མ་བྱང་ཁྲ་སོགས་གླིང་སྒྲུང་ནང་གི་མི་སྣ་གཡེར་པོ་ཆེ་མང་པོ་ཞིག་འདི་ནས་བྱུང་བ་ཡིན་ནའང་ཡུལ་ཤུལ་ཞེས་པ་གླིང་གེ་སར་གྱི་ཕ་ཡུལ་གྱི་ཤུལ་ཡིན་པ་གོ་མྱོང་མེད།
༢༽ནང་ཆེན་གྱི་ཐད་དུ། ནང་ཆེན་ཞེས་པའི་ནང་དེ་དམངས་ཁྲོད་དུ་ནང་བློན་ཆེན་པོར་འགྲེལ་སྲོལ་ཡོད་ཀྱང་དོན་ངོ་ནི་ནང་སོ་ཆེ་ཆུང་གཉིས་བྱུང་བའི་ཆེ་བ་དེའི་མིང་རེད། ནང་སོ་ནི་སྔར་བོད་བཙན་པོའི་སྐབས་སུ་ནང་གི་ཁབ་སྲུང་བའི་དམག་དཔོན་གྱི་མིང་དང་། དེ་ནས་རིམ་གྱིས་བོད་ཀྱི་མངའ་ཐང་ཉམ་ཞིང་དམག་གི་ལས་ཀ་ཤོར་རྗེས་བླ་བྲང་དང་། ཡང་ན་ཕྱག་མཛོད་སོགས་ལའང་འཇུག་པ་རེད། མདོར་ན་སྡེ་པ་ནང་ཁུལ་དུ་བཀོད་འདོམས་བྱེད་པའི་དབང་ཚད་ཅན་ཞིག་ལ་སྔ་ཕྱི་བར་གསུམ་དུ་གོ་བ་རེད། འགྲོ་མགོན་ཏི་ཤྲི་རས་པ་དགོངས་པ་རྫོགས་རྗེས་བུ་སློབ་རྣམས་ཀྱིས་བླ་མའི་སྐུ་གདུང་བཞུགས་ས་སྐུ་འབུམ་རྩ་བའམ་སྐུ་འབུམ་དགོན་པ་ཞེས་པར་བཞེངས། དེ་ནས་དགོན་པ་དེར་ནང་སོ་ལྷ་ཁང་ཆེན་མོ་བྱ་བ་བཞེངས་པ་ནས་ནང་སོ་ཞེས་པའི་མིང་འདི་བྱུང་བ་རེད། དེའི་སྐབས་སུ་ནང་སོ་གཅིག་མ་གཏོགས་མེད་པས་ཆེ་ཅུང་གི་སྐད་ཅ་མེད་པ་རེད། དེའི་རྗེས་སུ་ནང་སོ་འདི་ལས་ཆུང་བ་ཞིག་བྱུང་བས་གདོད་ནང་སོ་ཆེ་ཆུང་བྱུང་བ་རེད། ཕྱིས་སུ་བསྡུས་མིང་དུ་ནང་ཆེན་ཞེས་བོས་པ་ཙམ་ལས་ནང་བློན་ཆེན་མོའི་གོ་དོན་དང་། ལྷག་པར་རྒྱ་ནག་གི་ནང་བློན་ཆེན་མོའི་གོ་དོན་དེ་ལས་ཀྱང་ཡོད་པ་མ་རེད།
༣༽རྒྱ་ནག་མ་ཎི། འདི་ནི་ཁམས་ཆབ་མདོར་འཁྲུངས་པའི་བྱ་གཏང་རྒྱལ་ཁམས་པ་རྟོགས་ལྡན་བྱང་ཆུབ་འཕགས་དབང་བྱ་བ་རྒྱ་གར་དང་། རྒྱ་ནག་ལྷག་པར་རི་བོ་རྩེ་ལྔ་ཡུན་རིང་བཞུགས་རྗེས་གནས་འདིར་བྱོན་པས་རྒྱ་ནག་རྟོགས་ལྡན་གྲགས། རྒྱ་ནག་རྟོགས་ལྡན་འདི་ནི་དཀར་དགེ་གཉིས་ཟུང་འབྲེལ་གྱིས་ཉམས་ལེན་གནང་མཁན་ཞིག་ཡིན། ཕྱི་ལོ་༡༧༡༥ལོར་རྡོ་ཨ་དཀར་གྱི་ངོས་སུ་བརྐོས་པའི་མ་ཎི་འགའ་ཞིག་བཞག་ནས་"ནམ་ཞིག་ཕར་ཕྱོགས་ནས་རྟ་པ་མདུང་བཟུང་འགྲོ་སྐབས་ཚུར་ཕྱོགས་ནས་མི་མཐོང་བར་རྒྱས་ངེས་ཡིན་"ཞེས་ལུང་བསྟན། དེ་ནས་ལོ་རེ་ནས་ཇེ་རྒྱས་སུ་སོང་། རིག་གསར་སྐབས་གཏོར་སྐྱོན་ཆེ། འོན་ཀྱང་གཏན་མེད་བཟོ་མ་ཐུབ། ༨༠ནང་དུ་རྒྱ་ནག་སྤྲུལ་སྐུ་སྐུ་ཕྲེང་དྲུག་པས་བསྐྱར་གསོ་འགོ་བཙུགས། དེ་རིང་དེ་ཙམ་ཡིན། ནོར་ན་བཅོས་རོགས།

ཨ་ཕ་མགྱོགས་པོ་ཤོག ང་ཚོས་སྒུག་ཚད་མི་འདུག

ཀརྨ་བསམ་འགྲུབ་ལགས། ཁ་སང་ལོ་མ་སར་གོང་ནས་བཀག་ཉར་བྱས་ཡོད་འདུག་ཅིང་ཤུལ་དུ་ལུས་པའི་བཟའ་ཟླ་དང་བུ་མོ་གཉིས་ཀྱིས་ལོ་སར་ལ་ཨ་ཕ་སྒུགས་ཡོད་འདུག ལོ་སར་ལ་ནང་ལ་ལོག་མ་ཐུབ་པས་བུ་མོ་གཉིས་ཀྱིས་ཁ་སང་དྲུག་གཅིག་བྱིས་པའི་དུས་ཆེན་ཉིན་མོ་ཨ་ཕ་སྒུགས་ནས་བསྡད་ཡོད་འདུག འོན་ཀྱང་དེ་ལས་ལྡོག་ནས་དྲུག་ཅིག་དུས་ཆེན་ཉིན་ཨ་ཕ་ཀརྨ་བསམ་འགྲུབ་ཤིན་ཅང་གི་རྫོང་མཁར་ཞིག་ཏུ་ཁྲིམས་ར་འཚོགས་ནས་ཁྲིམས་ཐག་གཅོད་རྒྱུ་གསལ་བསྒྲགས་བྱས་ཡོད་འདུག་ཀྱང་དོན་རྐྱེན་གང་ཞིག་ལ་བརྟེན་ནས་ཁྲིམས་ཐག་ཀྱང་ཆོད་ཡོད་མི་འདུག་ལ་བུ་མོ་གཉིས་ཀྱི་འདོད་པ་ལྟར་རང་ཁྱིམ་ལའང་ལོག་ཐུབ་ཡོད་མི་འདུག བྱིས་པ་ཆུང་ཆུང་འདི་གཉིས་ཀྱིས་དུས་ཆེན་དང་གུང་གསེང་རེའི་སྐབས་སུ་དུས་ཆད་བྱས་ནས་རང་གི་ཨ་ཕ་དེ་ནང་ལ་སླེབས་རྒྱུར་བསྒུགས་ནས་འདུག་གོ།

བཙན་པོའི་ཆབ་འབངས་དུར་དུ་ཉལ་བའི་ཟིན་ཐོ། འབྲས་མོ་ལྗོངས།

བཙན་པོའི་བང་སོ་ལྷ་ལྡན་གྲོང་ཁྱེར་ནས།། ལྷོ་ནུབ་ཕྱོགས་དེར་སྤྱི་ལེ་ལྔ་བརྒྱའི་སར།།

མཐིང་མདོག་རི་ལུང་བྱང་གི་ཕྱོགས་སུ་ཟུག །གནམ་འདེགས་རི་བོ་སྤྲིན་གྱི་ཐོར་ཅོག་བཅིངས།།

ཉིན་སྲིབ་རི་གཉིས་དར་མདུང་བསླངས་པ་བཞིན།། རྫ་ཆབ་ཟིལ་མའི་ལྦུ་དཀར་མཁའ་ནས་འཐོར།།

སྣ་ཚོགས་ལྗོན་ཤིང་ཆར་སྤྲིན་འཐིབས་པ་བཞིན།། འབྲས་བུ་སྣ་ལྔ་སྤྲ་དང་སྤྲེ་འུས་རྩེ།།

དོམ་ནག་སྨྱོན་པས་ཁ་ཤ་ཤ་བ་འཇོམས།། དུག་སྦྲུལ་ཁ་རླངས་ལྗོན་པའི་རྩེ་ནས་འབྱིན།།

འདི་ནི་སྔ་མོ་ཨོ་རྒྱན་སྦས་ཡུལ་སྟེ།། མི་མིན་ལྷ་འདྲེ་སྤྲིན་ལྟར་འདུ་བ་ལས།།

རྐང་གཉིས་མི་ཡི་རྒྱུ་ལམ་མེད་པར་བཤད།། འོན་ཀྱང་དད་དམ་འཐུག་པའི་སྐྱེ་བོ་འགས།།

གུ་རུ་ཞབས་ཀྱིས་བཅགས་པའི་གནས་མཆོག་འདིར།། དུས་བཞིར་གནས་བསྐོར་རྒྱུན་མ་ཆད་པ་ཡིས།།

ངེས་མེད་གནས་ནས་མི་ཚོགས་ཆུ་ལྟར་ལུད།། དེ་ནས་བློ་དང་རིགས་རྒྱུད་བཟང་བ་ཞིག།

མང་མོས་དཔོན་དུ་བཀུར་བའི་བློ་རྩེ་མཐུན།། ཁམས་པ་ཨ་ཡུ་ལྡོང་ཞེས་བྱ་བ་ཡིས།།

ཡུལ་འདིའི་བདག་དབང་ཡོངས་སུ་བཟུང་བའི་རྗེས།། འབྲས་ལྗོངས་རྒྱལ་པོ་རྒྱལ་ཁབ་ཞེས་བྱ་བྱུང་།།

དེ་ལྟར་དཔོན་འབངས་ལམ་ལུགས་དར་ནས་བཟུང་།། ཆོས་དང་རིག་གཞུང་བསམ་པའི་དཔལ་ཡོན་རྣམས།།

གདོང་དམར་བོད་ཀྱི་ལུགས་བཟང་རྒྱུན་འཛིན་བྱས།། འོན་ཀྱང་ཡུན་རིང་ཟུར་དུ་ལྷགས་པའི་མཐུས།།

སྐད་དང་གོམས་གཤིས་འགྱུར་བ་ཕྲན་བུ་བྱུང་།། ཡུལ་ཕྱོགས་འདི་ཡི་རྒྱལ་པོའི་མཆིས་བྲང་ཡང་།།

ལྷ་ལྡན་ཞིང་ནས་སྐུ་དྲག་སྲས་མོ་ཞིག། དྲག་འདེམས་བྱས་ནས་བཙུན་མོར་བྱས་སྐད་ལོ།།

སྲིབ་ཀྱི་ཕྱོགས་དེར་སྒང་ཏོག་གྲོང་ཁྱེར་ནི།། དེང་རབས་ལུགས་ཀྱིས་ཚོང་ཟོང་གནམ་དུ་འཕྱོ།།

རྒྱ་གར་གྲོང་ཁྱེར་གཞན་དང་མི་འདྲ་བར།། ཟས་གོས་སྤྱོད་ལམ་ཁ་བ་ཅན་དང་ཉེ།།

ཁོར་ཡུག་ཀུན་དུ་བག་ཕེབས་ཉམས་དགའ་ཞིང་།། དེང་དུས་རྒྱ་བལ་མི་རིགས་གྲངས་མང་བས།།

བོད་ཀྱི་རིག་གཞུང་ཆུ་ཡི་ཟླ་བ་བཞིན།། རང་ཚུགས་མི་ཐུབ་དགུང་དུ་ཡལ་ལ་ཉེ།།

ཡུལ་ལུགས་འདྲེས་མའི་སྤྱོད་པ་ཁྱད་མཚར་བ།། གཉེན་སྒྲིག་མཛད་སྒོ་ཉིན་དེར་ཁྱོ་བོ་ཉིད།།

ཞྭ་ལྷམ་མེད་པར་གོས་རྐྱང་སྔོན་དུ་འགྲོ།། མོ་ཡི་ཕྱོགས་ནས་ཟྭ་ལྡུམ་ལོ་འདབས་ཀྱིས།།

གང་བྱུང་བྲབ་ནས་རྒྱབ་ནས་འབུད་རྒྱག་བྱེད།། བུ་མོར་བརྩེ་བ་ཟབ་མིན་འཇལ་སྐད་ལོ།།

ད་དུང་ཐུན་མིན་གོམས་གཤིས་ཐན་ཐུན་འགའ།། ཡོད་ཀྱང་ཞིབ་ཕྲ་ལྗོངས་འདིར་སོང་ན་ཤེས།། །།

སེམས་འཕྲིན་དམར་དམར་དང་། ཞལ་འདེབས་ཏིག་ཏིག

༄༅།། ཤ་རུས་གཅིག་པའི་སྤུན་ཟླ་བོད་མདོ་ཁམས་སྐྱེ་རྒུ་མདོའི་སེར་སྐྱ་མི་མང་ཡོངས་ཀྱི་སྙན་ལམ་དུ། ཆེད་ཞུ། ཕྱི་ལོ་༢༠༡༠ཟླ་༤ཚེས་༡༤རེས་གཟའ་ལྷག་པའི་ཞོགས་པ་ཕྱག་ཚོད་༧།༣༠ཡས་མས་ཙམ་ལ་བོད་མདོ་ཁམས་སྐྱེ་རྒུ་མདོར་ས་ཡོམ་གྱི་གོད་ཆག་ཕོག་པའི་ཡིད་སྐྱོ་བའི་གནས་ཚུལ་ཐོན་པར་བློ་ཕམ་ཚད་མེད་བྱུང་ཞིང་། ཉིན་དེ་ནས་བཟུང་འདི་རྒྱ་གར་ལྷོ་ཕྱོགས་མཁས་མང་བློ་གསལ་གླིང་གྲྭ་ཚང་ནས་ཉིན་ལྟར་སྨོན་ལམ་དང་མཆོག་གསུམ་ལ་གསོལ་འདེབས་ཞུས་པ་མ་ཟད། ཕྱི་ཚེས་༢༠ཉིན་བདུན་ཚིགས་དང་པོ་ཁེལ་བ་གྲྭ་ཚང་ནས་གོ་སྒྲིག་འོག་དབུ་བཞུགས་སྐྱབས་རྗེ་ཤར་པ་ཆོས་རྗེ་རིན་པོ་ཆེ་མཆོག་དང་། མཁན་ལས་ཟུར་རྣམ་པ། སྐྱབས་རྗེ་གླིང་མཆོག་སྤྲུལ་རིན་པོ་ཆེ་མཆོག་གིས་དབུས་པའི་རྒྱལ་སྲས་བླ་སྤྲུལ་ཁག བཀའ་རབ་འབྱམས་དགེ་བའི་བཤེས་གཉེན་དང་། དགེ་འདུན་འདུས་པ་རྒྱ་མཚོ་བཅས་ནས་སྨོན་ལམ་མཆོད་འབུལ་རྒྱས་པ་ཞིག་འཚོགས་ཏེ་མཆོག་གསུམ་རྒྱལ་བ་རྒྱ་མཚོར་གདུང་ཤུགས་དྲག་པོས་གསོལ་འདེབས་དང་། གཞིས་བཞུགས་སྤུན་ཟླ་ཉེ་འབྲེལ་རྣམས་ལ་གདུང་སེམས་མཉམ་སྐྱེད་དང་། ཐུགས་གསོའི་འཚམས་ཞུ། རྨས་མ་རྣམས་མྱུར་དུ་སྐུ་གཟུགས་བདེ་ཐང་ཡོང་བ་དང་། རྐྱེན་འདས་སུ་གྱུར་པ་རྣམས་ཚེ་རབས་ཕྲེང་བར་བྱས་བསགས་སྡིག་ལྟུང་ཐམས་ཅད་བྱང་ཞིང་དག་ནས་དལ་རྟེན་རིམ་རྒྱུད་འཕགས་མཆོག་ཕྱག་ན་པདྨོས་རྗེས་སུ་བཟུང་སྟེ་བླ་མེད་རྫོགས་བྱང་མྱུར་དུ་ཐོབ་པའི་ཡིད་སྨོན་དང་། གྲྭ་ཚང་ནས་གོད་ཆག་ཕོག་ཡུལ་ཉམ་ཐག་མི་མང་རྣམས་ཀྱི་ཆེད་ཞལ་འདེབས་ཧིན་སྒོར་སུམ་འབུམ་དང་། ཁམས་ཚན་ཉེར་ལྔའི་དགེ་འདུན་པ་རྣམས་ནས་ཞལ་འདེབས་ཧིན་སྒོར་ཆིག་འབུམ་དྲུག་ཁྲི་དྲུག་སྟོང་བརྒྱ་མེད་ལྔ་བཅུ་ང་ལྔ་བཅས་བསྡོམ་པས་ཧིན་སྒོར་བཞི་འབུམ་དྲུག་ཁྲི་དྲུག་སྟོང་བརྒྱ་མེད་ལྔ་བཅུ་ང་ལྔ་ཐམ་པ་ཕུལ་ཡོད་པ་ལགས་ན་ཉམ་ཐག་མི་མང་གི་ལག་ཏུ་སོན་ཐུབ་པའི་རེ་བ་བཅས། རྒྱ་གར་ལྷོ་ཕྱོགས་དཔལ་ལྡན་འབྲས་སྤུངས་མཁས་མང་བློ་གསལ་གླིང་བྱེ་བའི་གྲྭ་ཚང་ནས། ཕྱི་ལོ་༢༠༡༠ཟླ་ ༤་ཚེས་ ༢༤་ཉིན།
འདི་ནི་སྐབས་འདིར་བྱེས་ཀྱི་གདན་ས་ཁག་གིས་གཞིས་ལུས་སྤུན་ཟླ་རྣམས་ལ་གདུང་སེམས་མཉམ་སྐྱེད་བྱས་པའི་ཟུར་གཅིག་རྩལ་འདོན་བྱས་པ་ཙམ་ལས་གཞན་དཔལ་ལྡན་བཀྲ་ཤིས་སྒོ་མང་གྲྭ་ཚང་། དགའ་ལྡན་ཤར་བྱང་གཉིས་སོགས་ཀྱིས་ཧིན་སྒོར་སུམ་འབུམ་རེ་བཅས་ཀྱི་ཞལ་འདེབས་དང་། ཤི་བོ་རྣམས་ལ་དམིགས་བསལ་གྱིས་བསྔོ་སྨོན་ཟབ་རྒྱས་གནད་སྨིན་ཞུས་ཡོད་པ་ཀུན་གྱིས་ཤེས་གསལ་ལྟར་ལགས་པས་འདིར་འགོད་པའི་ངལ་བ་མ་བྱས།

ཀརྨ་བསམ་འགྲུབ་དང་གླེང་མོལ་དུམ་བུ་གཉིས།

ཀརྨ་བསམ་འགྲུབ་དང་གླེང་མོལ། དུམ་བུ་དང་པོ།

ཁོ་ནི་ནམ་རྒྱུན་ལས་ཀ་མང་ཙམ་དང་། དྲིལ་སྒྲགས་ཉུང་ཙམ་གནང་མཁན་གྱི་གྲས་ཤིག་རེད། ངོ་ཤེས་ལ་མ་ཤེས་ལ་དེ་དག་ལ་སྤོམ་པོར་སྡོད་པ་ལས་སྐད་ཅ་མང་པོ་མི་བཤད་མཁན་དང་། དེ་ནས་ག་ལེར་སོང་ནས་བོད་ཀྱི་ཆོས་དང་རིག་གཞུང་ལ་དོ་སྣང་ཆེན་པོ་གནང་མཁན་ཞིག་འདུག
དེ་ཡང་ཕྱི་ལོ་༡༩༩༧ལོའི་དབྱར་ཀ་དེར་ང་དང་གྲོགས་པོ་འགའ་ཞིག ཀརྨ་བསམ་འགྲུབ་བཅས་སྐྱེ་དགུ་མདོའི་མི་ཚང་ཕྱུག་པོ་ཞིག་གི་ནང་དུ་དགུང་ཟས་རོལ་ནས་སྐད་ཅ་བཤད་དེ་ནམ་ཕྱེད་བར་དུ་བསྡད། སྐད་ཅ་ཆ་བ་ཆོབ་བེ་མང་པོ་ཞིག་བཤད་མཐར་བོད་ཀྱི་མཁས་པ་དང་ལོ་ཙཱ་བའི་སྐོར་ནས་འཕྲོས་ཏེ་དགེ་འདུན་ཆོས་འཕེལ་གྱི་བར་དུ་བྱུང་ཞིང་མཐའ་མ་དགེ་ཆོས་ཀྱི་ཀླུ་སྒྲུབ་དགོང་རྒྱན་གྱི་མཆོད་བརྗོད་ཚིགས་བཅད་དང་པོ་དེ་ངག་ནས་སྐྱོར་བྱུང་། ་་་་་་་་་་།། འཇིགས་རུང་འཁོར་བའི་དགྲ་ཆེན་སྐྱོབ་པའི་གྲོགས་སུ་ཤེས་ལྡན་སུ་ཡིས་བཀུར། ། ཞེས་པ་འདི་དག་ལ་བརྟེན་ནས་དགེ་ཆོས་ཀྱིས་སངས་རྒྱས་ལ་དད་པ་ཡོད་མེད་དང་། ཁོ་ལ་ཆོས་ལུགས་ཡོད་མེད་སོགས་ཀྱི་བཤད་ཡོམ་མང་པོ་དེང་སང་ཡོད་ཀྱང་དེ་དག་གིས་དགེ་ཆོས་ཀྱི་རྣམ་ཐར་ངོ་མ་དེ་མ་རྟོགས་པ་རེད་ཟེར། ཤེར་རྒྱམ་གྱིས་བྲིས་པའི་དགེ་ཆོས་རྣམ་ཐར་དེ་དག་བཤད་བྱུང་ལ་ཕལ་མོ་ཆེ་ཁོ་ཡི་བློ་ལ་ངེས་ཡོད་པ་འདྲ། དགེ་འདུན་ཆོས་འཕེལ་ལ་གདེངས་འཇོག་ཡག་པོ་བྱད་ཀྱིན་འདུག དེ་ནས་ངས་༼བླ་མའི་རྒྱལ་ཁབ་ནུབ་པ་༽ཞེས་པའི་དེབ་ནང་ལ་དགེ་ཆོས་ཀྱི་སྐོར་ལ་གནས་ཚུལ་གསར་པ་མང་པོ་ཡོད་པ་ལས་ལྷག་པར་དུད་ནག་འཐེན་གྱིན་ཡོད་པ་དང་། འཇར་མན་ན་ཙི་ཚོགས་པ་ལའང་ཡིད་སྨོན་ཡོད་ཚུལ་བྲིས་ཡོད་རབས་བཤད། ང་ཚོ་རྩོད་པའི་ཟོལ་འདྲ་བས་ནམ་གུང་བར་དུ་བསྐྱལ།
འདི་ནི་ཀརྨ་བསམ་འགྲུབ་དང་སྐད་ཅ་བཤད་པ་དང་པོ་དེ་རེད།

ཀརྨ་བསམ་འགྲུབ་དང་གླེང་མོལ། དུམ་བུ་གཉིས་པ།

དེ་ནས་ལོ་ཤས་རྗེས་སུ་མི་ཚོགས་ཤིན་ཏུ་མང་བའི་ཟ་ཁང་ཞིག་གི་སྒོ་འགྲམ་ནས་གློ་བུར་དུ་ཀརྨ་བསམ་འགྲུབ་ལགས་གདོང་ཐུགས་རྒྱབ། བཀྲ་ཤིས་བདེ་ལེགས། ཞེས་ཕན་ཚུན་འབོད་བཞིན་གུས་བསུ་བྱས། དེ་ནས་ཁོ་རང་ལ་རོགས་པ་འགའ་ཞིག་འདུག་པ་ཁྱོད་ཅག་སྔོན་ནས་སོང་དང་ང་ག་ལེར་སླེབས་ཡོང་ཟེར་ནས་ཁོང་ཚོ་སྔོན་དུ་བཏང་། དེ་ནས་ང་གཉིས་ཟ་ཁང་དེའི་ནང་དུ་འཛུལ་ནས་སིལ་ཏོག་ཁུ་བ་རེ་མངགས་ནས་གླེང་མོལ་རིང་ཙམ་བྱས།
ང་གཉིས་གཞིས་བྱེས་གཉིས་དང་ལྷག་པར་བྱེས་ཀྱི་དགོན་སྡེ་ཁག་གི་སློབ་གཉེར་བྱེད་སྟངས་ཐོག་ཏུ་བབས། ངས། ས་སྐྱའི་བཤད་གྲྭ་ཁག་དང་། དགེ་ལུགས་ཀྱི་གྲྭ་ས་ཁག་ཏུ་སློབ་ཡུན་གྱི་རིང་ཚད་སོགས་བཤད། ཀརྨས། དེ་ལྟར་ན་སློབ་ཡུན་རིང་དྲག་པས་སྤྱི་ཚོགས་སུ་ཞབས་འདེབས་སྒྲུབ་པའི་གོ་སྐབས་ནམ་ཞིག་རྙེད་སྲིད། ཟེར། རྒྱ་ནག་ལྟ་བུ་ཆ་མཚོན་ན་དེང་སང་སློབ་སྦྱོང་གི་ཅ་རྐྱེན་བཟང་དུ་སོང་བས་གནའ་དུས་སུ་ལོ་གཉིས་རེའི་སློབ་ཚན་དེང་སང་ལོ་རེ་ཙམ་ལ་སྦྱོང་ཐུབ་ཀྱི་ཡོད་ལུགས་བཤད་ཀྱིན་འདུག་པས་གདན་ས་ཁག་གི་སློབ་ཡུན་ཧ་ཅང་རིང་དྲག་ཟེར། ད་འོ་ན་དེ་ལྟར་མི་ལོ་ཉི་ཤུ་ཡར་ནང་དུ་སློབ་སྦྱོང་བྱས་པའི་འབྲས་བུ་མི་རིགས་དང་རྒྱལ་ཁབ་ཡང་ན་འཇིག་རྟེན་ཡོངས་ལ་ཕན་པའི་ལག་རྗེས་ཅན་སུ་ཡོད་དམ། ཟེར། དེང་སང་ཚོང་པ་ཡིན་ནའང་འདྲ། མཁས་པ་ཡིནའང་འདྲ། མི་སྣ་སྐད་གྲགས་ཅན་དག་གིས་ཚོང་ཅིག་བརྒྱབ་ནའང་རང་གི་རྒྱལ་ཁབ་ལ་ཁྲལ་ག་ཚོད་འབུལ་ཐུབ་ཀྱི་འདུག ཡང་ན་འཇིག་རྟེན་སྤྱི་ལ་ཞབས་འདེབས་ག་འདྲ་སྒྲུབ་ཐུབ་པ་སོགས་ལ་བསམ་བློ་གཏོང་གི་འདུག དེས་ན་གདན་ས་ཁག་ཏུ་འདུ་ཤེས་འཛིན་སྟངས་ག་འདྲ་འདུག་ཟེར། དེ་ལྟར་ཕན་ཚུན་གླེང་མོལ་གྱི་སྐབས་སུ་ཁ་པར་ཞིག་འབྱོར་ནས་ངེད་གཉིས་བྲལ་དགོས་པ་བཟོས།
སྔར་མ་དགུང་ཟས་ཤིག་མཉམ་དུ་ཟོས་ཤིང་རྩོད་པ་ཕྲན་བུ་བྱས་པ་ཙམ་ལས་འགྲོགས་འདྲིས་ཧ་ཅང་མི་ཆེ། དེ་རིང་ངེད་གཉིས་མ་གཏོགས་མེད་པས་ཁ་རྩོད་འདྲའང་མ་བྱས། དེ་ནི་ངེད་གཉིས་གླེང་མོལ་གཉིས་པ་དེ་རེད་ལ་ཐ་མ་དེའང་རེད། གླེང་མོལ་གསུམ་པ་དེ་ཞི་བདེ་དང་ལྷིང་འཇགས་ཤིག་ཏུ་ཡོང་བར་སྨོན། འདི་དག་དངོས་བྱུང་གི་ལོ་རྒྱུས་ཤིག་ཡིན་པས་མི་ཡི་སེམས་ཁམས་སོགས་མཚོན་པ་བྱེད་ཐུབ་པར་སེམས།
འདི་ཤེས་རབ་ལགས་ཀྱི་ཟིན་བྲིས་ལ་མཆན་བཏབ་པ་ཞིག་ཡིན་ཀྱང་དྲན་བསྐུལ་ཡག་པོ་འདྲ་བྱུང་བས་རང་གི་ཡིག་ཚགས་སུ་ཉར་བ་ཡིན།

ཁོར་ཡུག་དང་། སྲུང་སྐྱོབ་པ།

ཀརྨ་བསམ་འགྲུབ། ཕྱི་ལོ་༡༩༩༤ཙམ་དུ་སྒ་སྐྱེ་རྒུ་མདོ་རུ་ལོ་རེ་བཞིན་དུ་ཚོགས་སྲོལ་ཡོད་པའི་ཡུལ་ཤུལ་རྟ་རྒྱུགས་འགྲན་ཚོགས་ཀྱི་ལྟད་པོ་བལྟ་བ་དང་མཉམ་དུ་གཟི་དང་དབྱར་རྩྭ་དགུན་འབུ་སོགས་ཀྱི་ཉོ་ཚོང་གི་ཆེད་དུ་ཡུལ་ཤུལ་དུ་ཐོག་མར་འབྱོར་བ་རེད། དེ་ནས་བཟུང་ལོ་རེ་བཞིན་དབྱར་དུས་སུ་ཡུལ་ཤུལ་རྩྭ་ཐང་དུ་ཚོང་སོགས་ཅི་ཞིག་གི་ཆེད་དུ་ཡང་ཡང་སླེབས། མཐར་རྒྱ་རི་འཇམ་སེང་སྤྲུལ་སྐུའི་སྲས་མོ་སྒྲོལ་དཀར་མཚོ་དང་གཉེན་བསྒྲིགས་ནས་ཡུན་རིང་ཙམ་བསྡད།
༼ཀརྨ་བསམ་འགྲུབ་དང་ཁོང་གི་བཟའ་ཟླ་སྒྲོལ་དཀར་མཚོ་གཉིས། ༡༩༩༨ལོ།༠༧། ༢༨ཉིན། སྐྱེ་དགུ་མདོ་ནས།༽

འཇིག་རྟེན་གྱི་སྤྱི་གཙུག་ཏུ་གྲགས་པའི་མཐོ་སྒང་གི་ཞིང་ཁམས་འདིས་ཁོ་ཡི་ཡིད་དབང་ཡོངས་སུ་འཕྲོག དེ་ནས་ཕྱི་ལོ་༢༠༠༠ལོར་དང་བླངས་ཀྱིས་ཆུ་བོ་རྨ་འབྲི་རྫ་གསུམ་གྱི་སྐྱེས་ཁམས་ཁོར་ཡུག་སྲུང་སྐྱོབ་ཚོགས་པ་ཟེར་བ་སྒ་སྐྱེ་དགུ་མདོ་རུ་བཙུགས།
སྤྱིར་ན་ཆུ་བོ་རྨ་རྫ་འབྲི་གསུམ་གྱི་མགོ་ཁུངས་འདི་ནི་གསེར་ལ་སོགས་པ་རིན་པོ་ཆེས་ས་འོག་ཡོངས་སུ་གཏམས་པ། གཙོས་དང་རྐྱང་འབྲོང་ལ་སོགས་པའི་ས་ཁ་ཡོངས་སུ་ཁྱབ་པའི་གདོད་མའི་འཇིག་རྟེན་ཉམས་དགའ་བ་ཞིག་ཡིན་པས་འདི་ནི་སྲུང་སྐྱོབ་འོས་པ་དང་དེ་ཡང་ཁ་ཚ་དགོས་གཏུགས་སུ་གྱུར་ཡོད། འོན་ཀྱང་ལྷ་དར་ས་འདྲེ་རྒོད་ཟེར་བ་ལྟར་གནས་འདི་དག་ཏུ་ས་ལ་རིགས་དང་རྒྱ་རིགས་སོགས་ཀྱི་རྔོན་པ་དང་ཇག་པས་ས་འོག་གི་གཏེར་ཁ་དང་། ས་ཁའི་རི་དྭགས་མ་ལུས་པ་རྩ་མེད་གཏོང་བཞིན་པ་རེད། དེ་ཙམ་མ་ཟད་ཉེ་འཁོར་གྱི་འབྲོག་པའི་ནང་དུ་ཇག་པ་ཤོར་ནས་ཁྱིམ་སྤུགས་ནས་འོ་ཞོ་དང་ཆུར་མར་སོགས་གང་བྱུང་ཟ་ཁུར་བྱེད་པ་དང་། སྒོ་ནས་གཡག་ལུག་གསོན་པོ་ནས་གྲི་སྟར་གྱིས་ཤ་བཀོག་པ་སོགས་བྱས་ནས་མི་ལ་བརྙས་བཅོས་ཚོད་མེད་བྱས་པ་གྲགས། ཡུལ་མི་རྣམས་ཀྱིས་གདོང་ལེན་ནན་པོ་བྱས་ནས་༡༩༩༦ལོར་ཨ་ཆེན་གངས་རྒྱབ་ཏུ་འབྲི་སྟོད་རྫོང་གི་རྫོང་དཔོན་གཞོན་པ། ཁོར་ཡུག་སྲུང་སྐྱོབ་མཁན། བོད་རིགས་དཔའ་བོ་རྗེས་བཟང་བསོད་ནམས་དར་རྒྱས་རྔོན་ཇག་དང་གདོང་གཏུག་དམར་འཛིང་བྱས་ནས་རང་བྱུང་ཁོར་ཡུག་སྲུང་སྐྱོབ་ཀྱི་ཆེད་དུ་རང་སྲོག་ཤོར་ནས་ལོ་ཤས་ལས་སོང་མེད་པས་ཁོར་ཡུག་སྲུང་སྐྱོབ་ཀྱི་ལས་འགུལ་འདི་ཤིན་ཏུ་རྙོག་འཛིང་ཅན་ཞིག་ཡིན་པས་ལས་སླ་བོར་ལག་པ་འཆང་ཕོད་མཁན་མེད་པ་ཡིན། སྐབས་རེ་ཡུལ་ཤུལ་ཁུལ་གྱི་དྲག་དམག་དྲངས་ནས་གདོང་ལེན་བྱེད་དགོས་བྱུང་བ་དང་། ད་དུང་ཡང་ཇག་རྐུན་དམིགས་མེད་དུ་གཏོང་ཐུབ་མེད་པ་རེད།
འོན་ཀྱང་ཀརྨ་བསམ་འགྲུབ་ནས་རྙོག་འཛིང་དེ་དག་ལ་ཇི་མི་སྙམ་པར་ཆུ་བོ་རྨ་འབྲི་རྫ་གསུམ་འབྱུང་ཁུངས་ཀྱི་ཁོར་ཡུག་སྲུང་སྐྱོབ་ཚོགས་པ་ཟེར་བ་དངོས་སུ་སྒ་སྐྱེ་མདོ་རུ་བཙུགས་པ་ནས་བཟུང་ཨ་ཆེན་གངས་རྒྱབ་དང་། རྨ་འབྲི་རྫ་གསུམ་གྱི་ཆུ་མགོའི་སྦུགས། གཞན་ཡང་སོག་པོའི་སྐད་དུ་ཁེ་ཁེ་ཞི་ལི་རུ་འབོད་པའི་བྱང་ཐང་དེ་དག་བསྐོར་བསྐྱོད་དུ་མ་བྱས་ནས་ཁོར་ཡུག་ཉམས་ཞིབ་དང་ལྟ་སྲུང་ཡང་ཡང་བྱས་ཤིང་གསེར་སོགས་གཏེར་ཁ་བསྔོགས་པ་དང་། གཙོས་སོགས་རི་དྭགས་སྲུང་སྐྱོབ་ཀྱི་ཐད་ལ་ནུས་པ་གལ་ཆེན་གཏོན་ཡོད་པ་རེད། དེ་ལྟར་ལོ་ངོ་དུ་མའི་རིང་དུ་ཁོར་ཡུག་སྲུང་སྐྱོབ་ཀྱི་ལས་ཀ་བསྒྲུབས། དེ་ནས་རིམ་གྱི་ཁོར་ཡུག་སྲུང་སྐྱོབ་ཀྱི་ཚོགས་པ་འདི་ཡུལ་ཤུལ་ཁུལ་ས་གནས་རིམ་པའི་གནས་བབ་ནས་ཞིང་ཆེན་རིམ་པའི་ས་ཚིགས་སུ་འཕུར་ལྡིང་བྱས་ནས་གནས་ཡུལ་ཟི་ལིང་གྲོང་ཁྱེར་དུ་སྤོས། མཚོ་སྔོན་ཞིང་ཆེན་ཆུ་བོ་རྨ་འབྲི་རྫ་གསུམ་འབྱུང་ཁུངས་ཀྱི་སྐྱེས་ཁམས་ཁོར་ཡུག་སྲུང་སྐྱོབ་ཚོགས་པ་མིང་ཐོག་ཏུ་ཐོད་བརྒལ་བྱས། ཀརྨ་བསམ་འགྲུབ་ཀྱིས་ཚོགས་པ་དེའི་ཚོགས་གཞོན་གྱི་མགན་བླངས་ནས་ད་བར་དུ་ཆུ་བོ་རྨ་འབྲི་རྫ་གསུམ་གཙོས་པའི་མདོ་དབུས་མཐོ་སྒང་ཆེན་མོའི་སྐྱེས་ཁམས་སྲུང་སྐྱོབ་བྱེད་བཞིན་པ་ཡིན།

གཞན་ཡང་ཁོང་གིས་བོད་བཙན་པོའི་དུས་ཀྱི་བྲག་བརྐོས་ཡི་གེ་དང་ལྷ་སྐུ་བཞུགས་པའི་འབིས་རྣམ་པར་སྣང་འཛད་རིག་དངོས་སྲུང་སྐྱོབ་དང་ཉམས་ཞིབ་སོགས་ཕྱག་ལས་མང་པོ་ཞོར་དུ་གནང་བ་བཅས།


༼འབིས་ཁོག་ཏུ་ཡོད་པའི་བོད་བཙན་པོའི་དུས་སུ་བརྐོས་པའི་བཟང་སྤྱོད་ཞིབ་འཇུག་བྱེད་བཞིན་པ། ཀརྨ་བསམ་འགྲུབ།༽
ཁོང་ནི་མི་གཤིས་བརླིང་ཤིང་སྐྱེས་སྟོབས་ཀྱི་ཤེས་རབ་ཆེ་བ། བོད་ཀྱི་སྲོལ་རྒྱུན་གྱི་རིག་གཞུང་ལ་དགའ་མོས་དང་དོ་སྣང་ཅན། འཇིག་རྟེན་སྤྱི་ཡོངས་ལ་དོ་ཁུར་དང་སེམས་ཤུགས་ཅན། མེས་པོའི་གནའ་རྫས་དང་རིག་དངོས་ལ་དང་བ་ཅན། རི་སྐྱེས་སྲོག་ཆགས་དང་ཁོར་ཡུག་ལ་བསླད་མེད་ཀྱི་བརྩེ་སེམས་ཅན་ཞིག་རེད།
གནས་ཚུལ་འདི་དག་གི་ཁོར་ཡུག་སྲུང་སྐྱོབ་པ་ཀརྨ་བསམ་འགྲུབ་ཀྱིས་ཡུལ་ཤུལ་ཁུལ་གྱི་ཁོར་ཡུག་ལ་སྲུང་སྐྱོབ་བྱས་པའི་དྲན་ཐོ་རགས་བསྡུས་ཙམ་ཞིག་བྲིས་པ་ཡིན། ཉེ་བའི་ཆར་ཁོང་ཉིད་བཙོན་དུ་ཚུད་པའི་གནས་ཚུལ་ཐོས་པས་སེམས་ཕམ་དང་སྦྲགས་མི་རིང་བར་བཙོན་གྲོལ་ཐོབ་ནས་སྔར་གྱི་ལས་ཀ་བཟང་པོ་དེ་དག་རྒྱུན་མཐུད་པའི་སྨོན་ལམ་ཞུ།

འབྱུང་བ་ལ་བསམ་ཤེས་མེད་ཀྱང་། ཕུ་ནུ་ལ་བརྩེ་སེམས་ཡོད།

ཉི་འོད་ཕོག་པའི་གངས་ཀྱི་རི་བོ་དུང་གི་མཆོད་རྟེན་བསྒྲིགས་པ་བཞིན།།
སྟོད་ཀྱི་མཐོ་སྒང་ཁི་ཁི་ཞི་ལི་ཟླ་བའི་གྲོང་གི་འབབ་ཚུགས་བཞིན།།
སྨད་ཀྱི་སྲིད་པའི་ནགས་ཀློང་དེ་དག་ཆར་སྤྲིན་ནག་པོ་འཐིབ་པ་བཞིན།།
རྨ་རྫ་འབྲི་གསུམ་ལྦུ་དཀར་ཟེགས་མ་མུ་ཏིག་དོ་ཤལ་ཆད་པ་བཞིན།།

ཆུ་འཛིན་མཐོང་གི་སྒྱོགས་ཆེན་སྡོངས་ར་དགུང་ནས་ཐུར་དུ་ཟུགས་པ་བཞིན།།
མེ་ཏོག་སྐྱོམ་པའི་དཔའ་ཐང་ཕྱུག་མོ་མཚོ་མོ་རླུང་གིས་སྒུལ་བ་བཞིན།།
ཆུ་གཉིས་འཕྲད་པས་ས་ཡི་ལིང་ཚེ་ནོར་བུ་དགའ་འཁྱིལ་འཁོར་བ་བཞིན།།
གནའ་བོའི་གོམས་གཤིས་ལྷུར་རུ་བླངས་པས་ཤམ་བྷ་ལ་ཡི་གྲོང་ཁྱེར་བཞིན།།

འབྲོག་ཁྱི་དར་མ་ངར་སྒྲ་སྒྲོགས་པས་སྟག་དང་གཟིག་གི་ཕ་ས་བཞིན།།
དབྱར་རྩྭ་དགུན་འབུ་སྐྱེས་སྟོབས་ཆེ་བས་ཉོ་ཚོང་ཡུར་ཆུ་རྒྱུགས་པ་བཞིན།།
ཟོག་ལུག་དཀར་ནག་འཕེལ་ཁ་དར་བས་ཤ་མར་རྫ་རྡོ་ཉིལ་བ་བཞིན།།
གྲོ་འབྲས་ནས་ཀྱི་ཞིང་ས་གཤིན་པས་འབྲུ་རིགས་ཆུ་སྣ་ལུད་པ་བཞིན།།

མི་རིགས་མང་པོ་ཞི་བདེ་འཚོ་བས་རྒྱ་མཚོ་ཁུགས་ཀྱི་བྱ་ཁྱུ་བཞིན།།
དེ་ནི་ང་ཡི་དྲན་པའི་ངོས་ཀྱི་སྒ་ཡི་སྐྱེ་དགུ་མདོ་ཆེན་རེད།།
དུས་རབས་འདི་ཡི་གོང་འོག་གཉིས་སུ་གཏོར་བཅོམ་བམ་ཁ་རྩིག་པ་བཞིན།།
རི་སྐྱེས་སྲོག་ཆགས་ཆམས་ལ་ཕབ་ནས་མགོ་རུས་གྲམ་རྡོ་སྤུངས་པ་བཞིན།།

ས་འོག་གཏེར་ཁ་རྨང་ནས་དྲུས་པས་མར་སྐོག་འདབས་སུ་བོར་བ་བཞིན།།
ས་སྟེང་ནགས་ཚལ་སྡེབ་གཅོད་བྱས་པས་ཤིང་དུམ་རྭ་ཅོ་སྤུངས་པ་བཞིན།།
འབྲི་ཆུ་མགོ་ནས་གསེར་ནག་བརྐོས་པས་གོད་རོ་ཁྱི་ཡིས་ཟོས་པ་བཞིན།།
དབྱར་རྩྭ་དགུན་འབུ་འབོར་ཆེན་བརྐོས་པས་ཤ་རྙིང་སྦྲང་བུས་འཛིང་བ་བཞིན།།

དེ་ལྟར་ཁོར་ཡུག་ཡུན་གྱིས་གཏོར་བ་སྤྲེ་འུས་རྩེད་མོ་རྩེ་བ་བཞིན།།
ས་གཡང་ཕྱུག་མོ་དགྲ་རུ་ལངས་ནས་གངས་རྒན་ཐོང་ཁ་བརྒལ་བ་བཞིན།།
སད་དང་ཐན་པ་གཅིག་རྒྱབ་གཅིག་ལངས་མདའ་མོ་དོང་ནས་ཤོར་བ་བཞིན།།
ལྷག་པར་ལོ་འདི་ཁ་ཆར་མེད་པར་ཤོག་གུ་ཐང་ལ་བཀོད་པ་བཞིན།།

བཞི་པའི་བཅུ་བཞི་མ་ཤར་གོང་ནས་ཐལ་ནག་ཆར་པ་བབས་པ་བཞིན།།
བྱ་བྱིའུ་རྣམས་ཀྱིས་སྔ་སད་ལྟ་བུས་ཅ་ཅོ་ཡོས་ཁྲ་བརྔོ་བ་བཞིན།།
འོན་ཀྱང་དེ་དག་སུས་ཀྱང་མ་ཤེས་རྨུ་གབ་ནག་པོ་ཕབ་པ་བཞིན།།
ཡ་གིར་བླ་མ་མངོན་ཤེས་མེད་པར་གཡག་རྒན་ཐག་པས་དཀྱིགས་པ་བཞིན།།

མ་གིར་མོ་མ་མོ་ལུང་མེད་པར་ཁྱི་རྒན་སྒྲོ་བར་བླུགས་པ་བཞིན།།
ཡུལ་ལྷ་གཞི་བདག་སྡོང་གྲོགས་མེད་པར་གསོ་ཕག་ཚང་ལ་ཉལ་བ་བཞིན།།
ཆོས་སྐྱོང་སྲུང་མ་ཁ་འཛིན་མེད་པར་འཕྱི་བ་ཁུང་ལ་འཛུལ་བ་བཞིན།།
ས་སྲིན་འདྲེ་མོ་ཡོམ་ཡོམ་གཡོས་ནས་ཤ་འོད་དྲག་པོ་རྒྱུགས་པ་བཞིན།།

ཤར་ནུབ་རི་བོ་གོར་གོར་འཁོར་ནས་རྡོ་ཡི་འཆི་གུ་སྐོར་བ་བཞིན།།
རྣོ་ལྕགས་སྦྲེལ་མའི་ཐོག་ཁང་དེ་དག་མ་ཎི་འཁོར་ལོ་སྐོར་བ་བཞིན།།
གཡའ་མ་སྔོན་མོ་ལེབ་རྩིག་ཅན་དེ་ཤོ་མོ་ཐང་ལ་བརྡབས་པ་བཞིན།།
ཨར་འདམ་ཕག་གི་ཁྲབ་རྩིག་ཅན་དེ་བྱིའུ་ཚང་གཡག་གིས་རྫིས་པ་བཞིན།།

ཀ་བ་གདུང་མ་ཐོད་གཏུགས་ཅན་དེ་རི་དྭགས་རྒྱ་རྙི་བཙུགས་པ་བཞིན།།
ཤིན་ཏུ་དྲག་པོའི་ཡུན་ཐུང་ཞིག་ལ་བདུད་ཀྱི་ཆོ་འཕྲུལ་བསྟན་པ་བཞིན།།
ཚག་ཚག་ཆོམ་ཆོམ་འཇིགས་པའི་སྒྲ་ཡིས་གནམ་ས་རལ་བ་བྱེད་པ་བཞིན།།
ཁམ་ནག་ཐལ་ཞགས་དགུང་དུ་འཕྱུར་ནས་ཉི་ཟླ་གཟའ་ཡིས་ཟོས་པ་བཞིན།།

ཇ་ཡུན་ཞིག་ཏུ་ཐམས་ཅད་ཅག་གེར་མགོ་བོ་ཀ་བ་བརྡབས་པ་བཞིན།།
རིང་ཞིག་རྗེས་ནས་མཐའ་དབུས་མེད་པར་སྐྱུང་ཚང་འུར་རྡོ་ཕོག་པ་བཞིན།།
ཨ་ན་ཨ་ཚའི་ཚེ་སྲོག་འབོད་པས་སྙིང་གི་སྣེ་ནས་གཏོགས་པ་བཞིན།།
ཐམས་ཅད་སྐྱབས་མེད་བྲེད་ཤ་ཐོན་ཞིང་ཕྱོགས་ཀུན་ཁྱི་ཡིས་ཉུལ་བ་བཞིན།།

དེ་ནས་རིམ་གྱིས་ཇ་ཡུན་རྗེས་སུ་གློ་བུར་ཆུ་སྣ་ལུད་པ་བཞིན།།
སེར་ཤུལ་དགོན་པའི་སེར་དམག་དེ་དག་མཚམས་སྤྲིན་རླུང་གིས་བདས་པ་བཞིན།།
ངུར་སྨྲིག་མདངས་ལྡན་དགེ་འདུན་དེ་དག་གུར་གུམ་ནགས་ཀློང་གཡོ་བ་བཞིན།།
མི་སྲོག་དམར་མོ་ཐང་ལས་བླངས་ནས་སླར་ཡང་ལག་ཏུ་སྤྲད་པ་བཞིན།།

དབལ་ཤུལ་ལ་སོགས་ཤུལ་ཆེན་བཅོ་བརྒྱད་གླག་ནག་གཟན་ལ་བཅུམ་པ་བཞིན།།
ཀིརྟི་དགོན་སོགས་འབྲོག་དགོན་རྣམས་ཀྱིས་དཀོར་རྫས་ཆུ་སྣ་དྲངས་པ་བཞིན།།
མདོ་སྨད་ཡུལ་ནས་བཟའ་བཅའ་བཏུང་བ་རི་བོ་སྣ་ནས་གཅོད་པ་བཞིན།།
མདོ་སྟོད་ཡུལ་ནས་ཉེར་མཁོ་དགོས་དགུ་ཆུ་བོའི་སྣ་ནས་གཅུ་བ་བཞིན།།

དབུས་གཙང་ཁུལ་ནས་འཚམས་འཕྲིན་དམར་མོ་མཚོ་ལ་ཁ་བ་བབས་པ་བཞིན།།
མདོ་དབུས་ཁམས་གསུམ་སེམས་དང་སེམས་པ་ལག་པར་ལག་པ་བཞག་པ་བཞིན།།
ཧུའུ་དང་ཝུན་སོགས་གང་དྲག་གང་གཉན་བྱ་རྒོད་རོ་ཐོག་གཞུར་བ་བཞིན།།
དེ་རིང་འདི་བྱོས་སང་ཉིན་དེ་བྱེད་བང་རིམ་རྡོ་སྐས་བརྩིགས་པ་བཞིན།།

འོན་ཀྱང་དེ་དག་འཕྲལ་དུ་ཕན་པ་རྨ་ལ་ཁྱི་ཚིལ་བྱུགས་པ་བཞིན།།
དེ་ཚེ་བྱེས་ཀྱི་བོད་རིགས་ཡོངས་ཀྱིས་སེམས་པ་འཁྱགས་པ་འབྱར་བ་བཞིན།།
གོང་ས་མཆོག་གི་གཟིགས་པ་མི་གཡོལ་རྒྱ་མཚོ་ཆེན་པོའི་རྦ་རླབས་བཞིན།།
ཆག་སྒོ་བྱུང་བའི་སྐར་ཆ་གཉིས་ནས་འཚམས་འཕྲིན་མར་ཁུ་འཕྱུར་བ་བཞིན།།

བཀའ་སྤྱི་གཉིས་པོས་ཅི་བྱེད་མེད་པ་བ་ལུ་ཉུངས་མས་གནངས་བ་བཞིན།།
ཆོས་རྒྱུད་ཡོངས་ཀྱིས་དཔེ་ཁྲིད་བཞག་ནས་མ་ཎི་རླུང་དམར་འུར་བ་བཞིན།།
གདན་ས་གསུམ་གྱིས་རྩོད་མཚམས་བཞག་ནས་རྫོབ་སྐད་བོང་བུ་ངུ་བ་བཞིན།།
ཤུལ་ལུས་ཉམས་ཆུང་སེམས་ཁམས་ཡངས་མོ་དོང་ལས་ཤོར་བའི་མདའ་མོ་བཞིན།།

མེ་ཏོག་བབས་པའི་ལྷ་སྐལ་ཕྱོགས་སུ་སྨྲེ་ངག་དར་ལྕོག་ལྡེབ་པ་བཞིན།།
ཁྱོད་ཉིད་ཁོ་ན་ང་ལ་དགོས་ཞེས་མིག་ཆུ་ཕྲེང་ཐག་ཆད་པ་བཞིན།།
དེ་ལྟར་ཉིན་ཞག་ཟླ་ལ་བསྒུགས་པས་སྟན་ལ་ཚེར་མ་ཟུགས་པ་བཞིན།།
ཐམས་ཅད་འདུག་གཟོད་ཡེ་ནས་མེད་པར་ལྕགས་སྲེག་ཐོག་གི་གྲོག་མ་བཞིན།།

ཞབས་ཟུང་འཁོར་ལོ་བསྒྱུར་ངེས་ཟེར་ནས་ཁུ་བྱུག་གནམ་ཆུ་སྒུག་པ་བཞིན།།
ཤི་བོ་ཁྲི་ཡིས་མིག་ཟུང་སྔོན་མོ་མགོན་པོ་ཁྱོད་ལ་བལྟ་བ་བཞིན།།
དེ་ལྟར་སྡུག་བསྔལ་སེལ་བ་མེད་པར་བདུན་ཚིགས་བདུན་དེ་རྫོགས་ནས་ཐལ།།

འབྲོག་ཐང་དུ་ས་གཡོས་པའི་འཇིག་པ།

དེ་རིང་ནི། བོད་མདོ་ཁམས་ཡུལ་ཤུལ་ཁུལ་དུ་ས་གཡོ་བའི་འཇིགས་པས་མི་མང་ཁྲི་ཕྲག་ལས་བརྒལ་བའི་ཚེ་སྲོག་འཆི་བདག་གཤེན་རྗེ་རྒྱལ་པོའི་ཁ་སྒོར་དེད་རྗེས་ཤུལ་དུ་ལུས་པའི་བོད་རིགས་སྤུན་ཟླ་མང་པོ་སྡུག་བསྔལ་གྱི་དོང་དུ་ལྷུངས་ནས་གཤིན་པོ་དེ་དག་གི་བདུན་ཚིགས་གསུམ་པ་དེ་བརྩི་་སྲུང་བྱེད་བཞིན་པ་རེད།
འོན་ཀྱང་ད་དུང་གནས་ཚུལ་འགའ་ཞིག་རབ་རིབ་དང་། མག་མོག་ཞིག་ལས་གསལ་ཁ་མེད་པས་ཤུལ་ལུས་འགའ་ཞིག་ལ་དཀའ་ངལ་གང་མང་མྱོང་བཞིན་ཡོད་པ་རེད། དེ་ཡང་ད་ཐེངས་ཀྱི་ཡུལ་ཤུལ་ས་ཁུལ་གྱི་ས་འགུལ་གྱི་གནོད་པ་འདི་སྒ་སྐྱེ་དགུ་མདོ་ཙམ་མ་ཡིན་པར་དེའི་ཉེ་འཁོར་གྱི་འབྲོག་སྡེ་མང་པོ་ཞིག་ལ་གནོད་སྐྱོན་གཏོང་ཡོད་པ་རེད། དཔེར་ན་སྒ་སྐྱེ་དགུ་མདོ་ཡི་ལྷོ་ཕྱོགས་སུ་ཡོད་པའི་ཁྲ་འགུ་དགོན་པ་དང་། ནུབ་ཕྱོགས་སུ་ཡོད་པའི་སྐར་མདའ་སྡེ་པ། རོང་པོ་སྡེ་པ། རྗེས་བཟང་སྡེ་པ་སོགས་འབྲོག་པའི་ས་ཁུལ་མང་པོའི་མི་ཟོག་གཉིས་ལ་ཤི་རྨས་ཚབས་ཆེན་ཕོག་འདུག མ་ཟད་ས་ཁུལ་དེ་དག་ལ་གསར་ལམ་ཁག་ཏུ་ཁྱབ་སྒྲགས་མེད་པས་རོགས་སྐྱོར་དང་། རྒུད་སྐྱོབས་ཀྱང་ཧ་ཅང་ཉུང་ཉུང་ལས་རག་མེད་པས་དཀའ་ཚེགས་ཅི་བས་ཆེ་བ་རེད། འབྲོག་ཁུལ་གྱི་ཁང་པ་ཕལ་མོ་ཆེར་བརྡིབས་ཟིན་ཞིང་། ས་གས་པ་དང་། རི་ཉིལ་བ་སོགས་སྣོད་བཅུད་གཉིས་ལ་གོད་ཆག་ཚབས་ཆེན་ཐེབས་ཡོད་འདུག ད་ཐེངས་ཀྱི་ས་འགུལ་མགོ་རག་ཤུལ་སྟོད་ཀྱི་ས་ནས་ཚུགས་ཤིང་། མཇུག་སྐྱེ་དགུ་གྲོང་གི་ཤར་ཕྱོགས་ཙམ་ནས་བསྡུས་ཤིང་ལྟེ་བ་ངོ་མ་དེ་ནི་གནས་འདི་དག་ཏུ་ངོས་འཛིན་བྱེད་བཞིན་ཡོད་འདུག

སྒ་རྭ་ཉག་དགོན་པའི་གོད་ཆག

ད་ཐེངས་ཀྱི་ས་ཡོམ་གྱི་ཆག་སྒོ་འདིས་སྒ་སྐྱེ་དགུ་མདོ་གཙོས་པའི་གྲོང་དང་གྲོང་ཁྱེར། དགོན་སྡེ། ལྷ་ཁང། འབྲོག་ས་སོགས་ཁུལ་དེའི་མི་རྒྱུ་གཉིས་ཀྱི་འབྱུང་ཁུངས་ཡོངས་ལ་གོད་ཆག་ཧ་ཅང་ཚབས་ཆེན་ཕོག་ཡོད་པ་ནི་གསལ་བཤད་མ་དགོས་པ་ཞིག་རེད། དེའི་ནང་གི་སྒ་རྭ་ཉག་དགོན་ཕུན་ཚོགས་ཐེག་ཆེན་གླིང་གི་དགོན་ས་གསར་པ་དེར་གཏོར་སྐྱོན་ཚབས་ཆེན་ཐེབས་ནས་གྱོང་གུད་ཧ་ཅང་ཆེན་པོ་ཕོག་ཡོད་པ་རེད། དེ་ཡང་སྒ་རྭ་ཉག་དགོན་པ་འདི་ནི་མདོ་ཁམས་སྒ་པའི་ཡུལ་གྱི་ལོ་རྒྱུས་ཧ་ཅང་རིང་བའི་དགེ་ལུགས་དགོན་པ་ཞིག་རེད། ཕྱི་ལོ་༡༩༥༨ལོར་རྒྱ་དམག་དང་གདོང་གཏུགས་བྱས་ནས་དགེ་འདུན་པ་དང་ཡུལ་མི་མཉམ་རུབ་ཀྱིས་མི་མང་བཅིང་དཀྲོལ་དམག་དང་ཉིན་ཞག་དུ་མ་འཐབ་འཛིང་བྱས་ནས་ཕན་ཚུན་ཤི་རྨས་ཚབས་ཆེན་ཕོག་ཅིང་མཐར་རྒྱ་དམག་གིས་མེ་སྒྱོགས་བརྒྱབས་ནས་དགོན་པའི་དགེ་འདུན་རྟེན་གསུམ་དང་བཅས་པ་ཐལ་བར་བསྒྱུར་བ་རེད། ཡུལ་ཕྱོགས་འདི་ནས་རྒྱ་དམག་དང་འཐབ་འཛིང་བྱེད་ཆེ་ཤོས་ཀྱི་དགོན་པ་ཞིག་རེད་ལ་ཕན་ཚུན་ཤི་རྨས་བྱུང་ཆེ་ཤོས་ཤིག་ཀྱང་རེད། དེ་ནས་དགོན་པ་སྐྱར་གསོ་ཆོག་པའི་སྲིད་ཇུས་བྱུང་བ་ནས་དགོན་པ་འདི་ཉིད་སླར་གསོ་བྱས་ཤིང་དེའང་སྔར་གྱི་དགོན་ཤུལ་དུ་རྒྱ་བོད་འཐབ་འཁྲུགས་བྱས་པས་མི་མང་ཤི་བའི་དུར་ས་སོང་བ་དང། མེ་སྒྱོགས་ཀྱིས་གཏོར་སོང་བས་བསྐྱར་གསོ་ཤིན་ཏུ་དཀའ་བས་སྔར་གྱི་དགོན་ཤུལ་དེའི་ཉེ་བའི་རི་ངོས་ཤིག་ཏུ་སླར་གསོ་དབེན་ཙམ་བྱས།
༼དེང་དུས་དགོན་པ།༽
དེ་ཡང་གནས་དེར་འགྲིམ་འགྲུལ་གྱི་ཆ་རྐྱེན་ཞན་པ་དང་། དགོན་ས་བདེ་མོ་ཞིག་ཀྱང་མེད་པས་དགོན་པའི་མཆོད་གཞིས་རོང་པོ་སྡེ་པའི་ནང་དུ་སྤོ་རྩིས་ཀྱིས་ད་བར་དུ་མི་ལོ་དུ་མའི་རིང་དུ་དགོན་པ་གསར་བཞེངས་བྱས་ཤིང་དེ་རིང་གི་བར་དུ་དགོན་པའི་ཚོགས་ཆེན་འདུ་ཁང་དང་། ཕྱག་མཛོད་ཁང་། གྲྭ་ཤག མཚན་ཉིད་གྲྭ་ཚང་གི་འདུ་ཁང་སོགས་འགའ་ཞིག་གྲུབ་ཅིང་འགའ་ཞིག་བཟོ་བཞིན་པའི་སྐབས་འདིར་འདི་ལྟར་གཏོར་བཤིག་ཐེབས་པ་རེད།

༼འདི་ནི་སྒ་རྭ་ཉག་དགོན་པའི་འབྱུང་འགྱུར་གྱི་དགོན་པ་དེ་རེད་ལ། ད་ལྟ་བཟོ་བཞིན་པ་དེའང་རེད། ༽
ད་ཐེངས་ཀྱི་ས་ཡོམ་འདི་ཐོག་མར་མགོ་ཚུགས་ས་རག་ཤུལ་འབྲོག་སྡེ་ནས་ཡིན་པ་ཨ་རི་དང་། རྒྱ་ནག་གཉིས་ཀས་བཤད་པ་བཞིན་ཡིན་འདུག་ཅིང་། རག་ཤུལ་དང་འདབས་འབྲེལ་བའི་རོང་པོ་སྡེ་པ་་དང་། རྗེས་བཟང་སྡེ་པ་སོགས་འབྲོག་ས་མང་པོ་ཞིག་གི་མི་རྒྱུ་གཉིས་ལ་གོད་ཆག་ཚབས་ཆེན་ཐེབས་འདུག འོན་ཀྱང་ལུང་པ་ཁུག་དཀྱོག་ཏུ་སོང་བ་དང། འབྲོག་ས་ཡིན་པ་སོགས་གང་ལྟར་གསར་འགྱུར་རྒྱུད་ལམ་ཁག་དུ་རྒྱ་བོད་གཉིས་ཀས་དོ་སྣང་ཆེར་མ་བྱུང་ཞིང་སྐྱོབས་གསོ་དང། རོགས་རམ་སོགས་ཀྱང་ཧ་ཅང་གི་ཉུང་ཉུང་མ་གཏོགས་རེག་གི་མེད་པ་རེད།
༼ས་འགུལ་གྱིས་གནོད་འཚེ་ཕོག་རྗེས་ཀྱི་པར།༽
སྐབས་འདིར་རོང་པོ་སྡེ་པའི་ནང་དུ་ཡོད་པའི་སྒ་རྭ་ཉག་དགོན་གསར་པ་འདིའི་གཡས་གཡོན་ནས་ས་གས་པདང་། རི་ཉིལ་བ་སོགས་ཀྱིས་གཏོར་སྐྱོན་ཚབས་ཆེན་ཕོག་པ་དང་ཉེ་འཁོར་གྱི་འབྲོག་པའི་མཆོད་སྡེ་མང་པོ་ཤི་རྨས་བཟོས་འདུག་ལ་ཁང་པ་ཕལ་མོ་ཆེར་རྡིབ་འདུག་ཅིང་རོང་པོ་སྡེ་བ་ནས་མི་གྲངས་༡༥༠ཡན་དུ་གྲོངས་ཡོད་འདུག སྒ་རྭ་ཉག་དགོན་པའི་ཁྲི་པ་ཁམས་མགྱོགས་རིན་པོ་ཆེས་སྐྱེ་དགུ་མདོ་གཙོས་པའི་ཡུལ་མི་གོད་ཆག་ཕོག་ཡོངས་ལ་གཟིགས་སྐོར་མཛད་ཅིང་རྒྱ་སྒོར་ཁྲི་ཉིས་བརྒྱ་ལྷག་གི་རོགས་རམ་གནང་ཡོད་འདུག ཁོང་ནི་དགོན་པ་འདིའི་བདག་པོ་རེད་ལ་དགོན་པ་གསར་པ་འདི་ལ་ནང་གི་རྒྱུ་ཆ་དང་། ཕྱི་ཡི་བཀོད་པ་སོགས་བོད་གཞིས་བྱེས་གཉིས་སུ་ལེགས་ཆ་བླངས་ཤིང་འགྲོ་སོང་ཧ་ཅང་ཤུགས་ཆེར་གཏོང་ནས་གསར་བཟོ་བྱེད་བཞིན་ཡོད་འདུག དེ་ཡང་དགོན་པ་འདི་ཉིད་མ་འོངས་པ་བོད་ཡུལ་སྟོད་སྨད་གང་ནས་འོངས་ཀྱང་ཆོག་པའི་མཚན་ཉིད་གཙོས་པའི་ནང་པའི་ཆོས་ཀྱི་བཤད་སྒྲུབ་གཉིས་ཀྱི་བསྟི་གནས་ཤིག་ཏུ་བསྒྱུར་རྒྱུ་དམིགས་ཡོད་འདུག

ས་མཐའི་ཡུལ་ཤུལ་བས་གཤིན་པོའི་བདུན་ཚིགས་བརྩི་སྲུང་བྱས་པ།

དེ་རིང་མདོ་ཁམས་ཡུལ་ཤུལ་བ་རང་བྱུང་གི་རྐྱེན་ངན་བྱུང་ནས་ཉིན་གྲངས་བདུན་པ་དང་། ཕྱི་མིག་གཅེར་བཞིན་བཞུད་སོང་བའི་འདས་པོ་དེ་དག་གི་བདུན་ཚིགས་དང་པོ་དེ་རེད། དུས་ཚིགས་འདི་བོད་རྒྱུད་ནང་བསྟན་ཉམས་ལེན་བྱེད་མཁན་དག་གི་དབང་དུ་བྱས་ན་གལ་འགངས་ཆེ་བའི་ཉི་མ་ཞིག་རེད།
དེ་རིང་རྣམ་ཤེས་ཁྲི་སྟོང་མང་པོ་དེ་དག་ལ་ང་ཚོས་གྱེས་མཇལ་ཞུ་དགོས་ལ་མ་བཅོས་པའི་འཛུམ་ཆུང་མདུན་དུ་བསུས་ནས་ག་ལེར་ཕེབས་ཞེས་ཞུ་དགོས། དེས་ན་དེ་རིང་འཛམ་གླིང་གང་སར་འཁོད་པའི་བོད་རིགས་སྤྱི་དང་། ལྷག་པར་ཡུལ་ཤུལ་བ་དེ་དག་གིས་གཤིན་པོ་དེ་དག་ལ་བཀའ་སྡེ་སྡོད་གསུམ་གྱིས་སྐྱེལ་མ་བྱེད་བཞིན་ཡོད་ལ་ལམ་ཕ་རོལ་ཏུ་ཕྱིན་པ་དྲུག་གིས་རྫོང་བ་བྱེད་བཞིན་པ་ཡིན། ད་དུང་སེམས་ཁོང་གི་མུན་པ་ཟབ་ས་ནས་སྣང་གསལ་གྱི་མར་མེ་རེ་སྦར་ཡོད་ལ་ཕྱི་མིག་གི་འཁྲེང་ཞེན་རེ་རེ་ལ་མ་ཎི་དྲུག་འགྱུར་གྱིས་ངག་རྟ་རེ་རེ་དྲངས་ཡོད། དེ་ལྟར་དུ་འདི་ན་གཞན་དབང་གི་ལུང་པར་གནས་པའི་ཡུལ་ཤུལ་བ་དེ་དག་གིས་ནམ་ཕྱེད་བར་དུ་གཞུད་ཟིན་པའི་ཕ་མ་སྤུན་མཆེད་རེ་རེའི་འཛུམ་མདངས་ཡིད་ལ་ཤར་བཞིན་དུ་སྨོན་ལམ་དྲི་མ་མེད་པས་རྫོང་བ་བྱས་སོང་། །

ཁྲ་འགུ་དགོན་པའི་ཆགས་འཇིག

ཁྲ་འགུ་དགོན་པ་ནི། མིང་གཞན་ཁྲ་འགུ་བཀྲ་ཤིས་བཤད་སྒྲུབ་ཆོས་འཁོར་གླིང་ཟེར། སྐྱེ་དགུ་གྲོང་ནས་ལྷོ་ཕྱོགས་སུ་སྤྱི་ལེ་བཅུ་ཙམ་གྱི་སར་གནས་པའི་དཔལ་ལྡན་དྭགས་པོ་བཀའ་བརྒྱུད་པའི་རིང་ལུགས་འཛིན་པའི་དགོན་སྡེ་རྙིང་པ་ཞིག་རེད། སྤྱིར་ན་དགོན་པ་འདི་དུས་ཟིང་སྔོན་དུ་བླ་མ་བཞི་སྟེ། ཁྲ་ལེགས་སྐྱབས་མགོན་དང་། ཁྲ་འགུ་སྤྲུལ་སྐུ། ཟུར་རུ་སྤྲུལ་སྐུ། བློ་གྲོས་ཉི་མ་བཅས་དང། གྲྭ་པ་༣༥༨ སྐོར་ཞིག་ཡོོད་པ་གསལ། དེང་དུས་སུ་དགོན་པ་འདི་ལ་གྲྭ་གྲངས་སུམ་བརྒྱ་མ་ཟིན་ཙམ་ཞིག་ཡོད་པ་དང་། བླ་མ་ཁྲ་འགུ་སྤྲུལ་སྐུ་རྒྱ་གར་སོགས་སུ་བཞུགས་ཤིང་ཕྱི་ཡི་རྒྱལ་ཁབ་དུ་མ་ཞབས་ཀྱིས་བཅགས་ཤིང་དགོན་པ་འདིའི་ཡན་ལག་ལྟ་བུ་མཁན་ཆེན་ཁྲ་འགུ་རིན་པོ་ཆེས་བཏབ་གནང་མཛད་པའི་རྒྱ་གར་ཝ་ར་ཎསི་དང། བལ་ཡུལ་མཆོད་རྟེན་འགྲམ་སོགས་སུ་དགོན་པ་དུ་མ་ཡོད་པ་ཡིན། ད་ཐེང་ས་འགུལ་འདིས་གོད་ཆག་ཧ་ཅང་ཚབས་ཆེན་ཕོག་སའི་དགོན་པ་དེ་རེད།

ས་འགུལ་མ་བྱུང་གོང་གྲྭ་བཙུན་ཉིས་བརྒྱ་དང་དྲུག་ཅུ་ཡོད་ཅིང་། ས་འགུལ་ཁྲོད་ནས་གྲྭ་བཙུན་སོ་གཅིག་ཚེ་ལས་འདས་པ་དང་། གྲྭ་བཙུན་ཉེར་བདུན་ལ་རྨས་སྐྱོན་ཚབས་ཆེན་ཐེབས་ཡོད་པ་རེད། མཚོ་སྔོན་མགོ་ལོག་བོད་རིགས་རང་སྐྱོང་ཁུལ་དར་ལག་རྫོང་ནས་ཡོང་བའི་སྨན་བཅོས་རུ་ཁག་གིས་རྨས་ཕོག་པའི་གྲྭ་བཙུན་རྣམས་ལ་སྨན་བཅོས་བྱེད་བཞིན་ཡོད་ལ། གཞན་ཡང་གྲྭ་བཙུན་ལྔ་ད་རུང་གར་སོང་རྙེད་མེད་ཅེས་མཚོ་སྔོན་བོད་ཡིག་གསར་འགྱུར་གྱི་ནང་དུ་བཀོད་འདུག



ས་ཡོམ་གྱི་གོད་ཆག་བྱུང་བའི་ཕྱི་ཉིན་ནས་ཕྱི་རྒྱལ་དུ་བཞུགས་པའི་ཁྲ་འགུ་རིན་པོ་ཆེས་དགོན་པ་དང་། མི་མང་ལ་འཚམས་འདྲི་དང་། དད་ལྡན་རྣམས་ལ་དགོན་པ་བསྐྱར་གཞེངས་ཀྱི་མཐུན་རྐྱེན་སྦྱར་བར་འབོད་སྐུལ་གནང་ཡོད་འདུག
བོད་ནང་དུ་གསར་འགྱུར་ཁག་ཏུ་དགོན་པའི་མིང་དང་། ཆོས་བརྒྱུད་སོགས་ལོག་པ་ཁོ་ན་བཀོད་འདུག་པས་ཆེད་དུ་བྲིས་པ་ཡིན།
དྲ་ཐག་འདི་དག་ལ་གཟིགས་རོགས།

http://www.youtube.com/watch?v=OZfCMgH_n8w&feature=player_embedded
http://zw.tibetculture.net/news_1/update/201004/t20100422_569411.htm