ཁ་སང་ཕྱི་ཟླ་༥་པའི་ཚེས་༡་རེས་གཟའ་ཉི་མ་ཉིན། ཨ་རི་སྲིད་འཛིན་ཨོ་བྷ་མས་མཚན་གུང་དུ་འཇིགས་སྐུལ་དྲག་སྤྱོད་པའི་གཏེ་བོ་བྷིན་ལ་དྷིན་བསད་པའི་གསལ་བསྒྲགས་བྱས། འཛམ་གླིང་གསར་ལམ་གང་སར་ཁྱབ་ཅིང་དཔྱད་གླེང་སྣ་ཚོགས་བྱས། ངས་གནད་དོན་གཉིས་ཀྱི་ཐོག་ནས་བལྟས་ན་ད་ཐེངས་ཨ་མེ་རི་ཁས་བྷིན་ལ་དྷིན་བསད་པའི་སྐོར་ནས་འཕྲ་འཕྲུལ་འདྲ་ཞིག་བྱེད་ཀྱིན་མེད་དམ་སྙམ།
དང་པོ་ནི། བྷིན་ལ་དྷིན་བསད་ཚར་ནས་ཕུང་པོ་ཨ་རབ་རྒྱ་མཚོ་ནང་དུ་གཡུག་ཟིན་པ་ཡིན་ཞེས་བརྗོད་པ་ཙམ་ལས་དངོས་སུ་འདྲ་པར་དང་གློག་བརྙན་གང་ཡང་དཔང་རྟགས་བསྟན་རྒྱུ་མེད་པ་རེད། ད་འོ་ན་སྐད་ཆ་དེ་ཡིད་ཆེས་བྱེད་ཐུབ་ཀི་རེད་དམ། ཟེར་ན་ཨ་རི་སྲིད་འཛིན་གྱིས་རྫུན་བརྫོ་ནས་འཛམ་གླིང་མི་མང་དང་། ལྷག་པར་ཨ་རི་མི་སེར་མགོ་སྐོར་གཏང་གི་མ་རེད། ད་ཡིན་ན་བྷིན་ལ་དྷིན་བསད་ཚར་རྒྱུ་རེད། ཟེར་ནས་ཡིད་ཆེས་བྱེད་དགོས་ཀྱིན་འདུག་པས་ང་ལ་བདེ་བོ་རང་མི་འདུག ང་ལ་དོགས་པ་ནི། བྷིན་ལ་དྷིན་ཁ་སང་གསོད་པ་ལས་འཛིན་བཟུང་བྱེད་རྒྱུ་དེ་གལ་ཆེན་ཡིན་ངེས་ཏེ། ཁོ་མེ་མདའ་ཁ་ཤས་བརྒྱབ་ནས་བསད་བཞག་ན་ཁོ་སྔོན་མ་༩།༡༡ གི་དོན་རྐྱེན་གྱི་གཏེ་བོ་ཡིན་མིན་ཁུངས་གསལ་པོ་ཆོད་མེད་པས་དེ་རིང་ནས་བཟུང་ཏེ་གནད་དོན་དེ་དག་འཇུ་ས་དང་། བཙལ་ས་མེད་པ་བྱེད་ཚར་བ་རེད། མ་ཟད་མ་འོངས་པ་ཨ་ལི་ཁ་ཏའི་འཇིགས་སྐུལ་ཚོགས་པས་ལས་འགུལ་དང་། གཏོར་རྒོལ་གང་ཞིག་ཏུ་དམིགས་འབེན་བཟུང་ཡོད་མེད་སོགས་ཀྱང་སྐད་ཆ་དྲི་ས་མེད་པ་བཟོ་ཚར་བ་རེད། དེས་ན། ངས་བྷིན་ལ་དྷིན་གསོད་པ་ལས་ཀྱང་བཟུང་བ་དེ་ནོམས་པ་ཆེ་བས་ན་ཨ་མེ་རི་ཁས་ནོམ་པ་ཆེ་བ་དེ་བྱས་མེད་དམ་སྙམ། རྒྱུ་མཚན་ནི་བསད་པའི་རོ་དང་། རྗེས་སུ་ཕུང་པོ་ཆུར་གཡུག་པ་སོགས་ཀྱི་སྐབས་སུ་དཔར་དང་གློག་བརྙན་སོགས་གང་ཡང་ཕྱི་ལོག་ཏུ་བསྟན་མེད་པ་དེ་རེད།
གཉིས་པ་ནི། བྷིན་ལ་དྷིན་བསད་མ་ཐག་ཏུ་ཨ་སྒོར་གྱི་འཛའ་ཐང་ཤུགས་ཆེར་སྤར་བ་འདི་རེད། ཁྲོམ་རའི་ནང་དུ་ཨ་སྒོར་གྱི་འཛའ་ཐང་ལམ་སེང་སྤར་བ་འདིས་ཀྱང་ཨ་རི་དཔལ་འབྱོར་ཉམ་རྒུད་དུ་སོང་བ་དེ་དག་བྷིན་ལ་དྷིན་གྱིས་འཛམ་གླིང་དཔལ་འབྱོར་གྱི་ཐོག་ཁང་མཚེ་མ་གཏོར་བ་དེ་ཁོ་ན་ཐུག་པ་དང་། དེའི་རྩ་བ་བྷིན་ལ་དྷིན་ལ་ཐུག་པས་ཁོ་ཤི་མ་ཉིད་དུ་ཨ་སྒོར་གྱི་འཛའ་ཐང་འཕར་ཡོང་བ་འདིས་བྱིས་པ་མགོ་སྐོར་སྟངས་དང་མཚུངས་པར་མི་འདུག་གམ། ཨ་རི་བས་ཁ་སང་པ་ཀི་སི་ཐན་ནང་དུ་ལྐོག་འཛུལ་བྱས་པ་འདི་རྒྱལ་མཚམས་ལྐོག་བརྒལ་བྱས་པའི་ཉེས་པ་ཟེར་ན་ཉེས་པ་ཆུང་ཆུང་ཟིག་ཡིན་གྱི་མ་རེད། མ་ཟད། ཚེར་ཕུང་ཞིག་གིས་བྱིས་སྲོག་ཁེབས། བཤད་པ་བཞིན་པ་ཀི་སི་ཏན་རྒྱལ་ཁབ་ཅིག་གིས་མི་གཅིག་གིས་སྲོག་སྐྱོབས་མ་ཐུབ་པ་འདིས་པ་ཀི་སི་ཐན་གཞུང་ལ་ཁོང་ཁྲོ་དྲག་པོ་ཞིག་བསླངས་ཡོད་པ་རེད། ད་དུང་བྷིན་ལ་དྷིན་ལ་དགའ་བའི་ཁ་ཆེ་མི་མང་རྣམས་ཀྱིས་རྒོལ་ལན་དང་ཟིང་འུར་མི་ཡོང་བའི་ཆེད་དུ་ཡིན་གྲང་། རྒྱལ་སྤྱི་རང་བཞིན་གྱིས་དཔལ་འབྱོར་གྱི་དཀའ་ངལ་ལ་གདོང་ལེན་བྱེད་བཞིན་པའི་སྐབས་སུ་བྷིན་ལ་དྷིན་བསད་པ་འདིས་དཔལ་འབྱོར་གྱི་དཀའ་ངལ་ལ་ཕན་ཆེན་པོ་ཞིག་ཐོགས་ན་སུས་ཀྱང་དེ་ལ་རྙོག་གླེང་བཟོ་དཀའ་བའི་ཕྱིར། གནད་དོན་འདི་གཉིས་ལ་འགྲེལ་བཤད་ལེགས་པར་མ་བྱུང་བར་དུ་ཡིད་ཆེས་མི་ཐུབ་པའི་ཚོད་དུ་ཡོད་དོ།།
