ནང་ཁུལ་ཚོགས་འདུ་ཞིག་གིས་དྲངས་པའི་སེམས་ཚོར།

རྫ་རི་སྨུག་པོའི་མགུལ་ན་བརྗིད་ཅིང་འཕར་སྤྱང་གཉིས་ཀྱི་སྲོག་དབུགས་འཇོམས།།

ས་མཐའ་གནམ་མཐའ་མིག་གིས་སྲུང་ཞིང་ཁ་བ་ཅན་ལ་ཁ་འཛིན་མཛད།།

བཟོད་མེད་དཀའ་སྡུག་ཐོང་གིས་གཤགས་ཏེ་གངས་རི་མགོན་པོའི་ལ་རྒྱ་འཛིན།།

སྒང་དྲུག་རི་བོའི་སྒང་ན་འཚོ་བའི་བྲེ་སེར་འབྲོང་གི་གཏམ་རྒྱུད་རེད།།

དེ་རིང་ཁྱོད་ནི་ལས་དབང་ཉམ་ནས་གཡུང་མོ་ལུག་ལ་མི་འགྲན་མོད།།
སྦྲ་ནག་ཟུར་ནས་གཅིན་ཚྭ་ལྡག་ཅིང་ནང་ཁུལ་དམེ་བའི་ཁོག་དཔུང་མཐོ།།
སྣ་ཐག་འདོམ་གང་སྣེ་ལ་འཁྲིལ་ཏེ་ཕར་ཕར་འཐེན་ཅིང་ཚུར་ཚུར་འཁོར།།
ཕ་ཁུ་དམ་པའི་རྗེས་ཤུལ་མ་ཟིན་གཡག་རྒན་དྲེད་པོའི་གཏམ་རྒྱུད་རེད།།
   

གཞུང་ས་དགའ་ལྡན་ཕོ་བྲང་ཕྱིར་བསྡུའི་སྐོར་གྱི་མཆན་བུ་གསུམ།

ཤེས་རབ་ཟིན་བྲིས་སུ་བཏབ་པའི་མཆན་བུ་གསུམ། ཟིན་བྲིས་ངོ་མ་འདིར་འདུག
མཆན་དང་པོ།༽ རྒྱལ་བ་རིན་པོ་ཆེ་ཞེས་བོས་ན་ནོར་ས་འཆུགས་ས་གཏན་ནས་མེད་པ་རེད། གཞན་སྐྱབས་མགོན་རིན་པོ་ཆེ་ལྟ་བུ་ཞུས་ན་བོད་ཀྱི་ཡུལ་ལུང་བྱེ་བྲག་པ་རང་རང་གི་བླ་ཆེན་རྣམས་ལ་སྐྱབས་མགོན་རིན་པོ་ཆེ་ཞེས་ཞུ་སྲོལ་ཡོད་པས་སྐྱབས་མགོན་སུ་ཞེས་ད་དུང་དྲི་བ་སླེབས་ངེས་རེད། མདོར་ན་སྐྱབས་མགོན་ཏཱ་ལའི་བླ་མ་ཞེས་མ་བོས་བར་དུ་སྐྱབས་མགོན་རིན་པོ་ཆེ་གཅིག་པུ་བོས་ན་ནོར་ས་དང་འཆུགས་ས་ཡོད་པ་རེད།
རྒྱལ་བ་རིན་པོ་ཆེ་ཞེས་པའི་མཚན་འདི་ནི་ཕྱོགས་ཀྱི་རྒྱལ་ཕྲན་ག་གེ་མོས་ཆེ་བསྟོད་ལྟ་བུའི་ཕུལ་ཡོང་བ་མ་ཡིན་པར་བོད་རྒྱ་ཆེ་མི་མང་མ་གྲོས་གཅིག་གྱུར་གྱིས་བོས་པའི་གཅེས་མིང་ཞིག་ཡིན་པས་སེམས་ཁོང་གི་གུས་བཀུར་ངོ་མ་དེ་མཚོན་ཡོད་པ་རེད། མ་ཟད་འདི་ལ་ཆབ་སྲིད་དང་འབྲེལ་བ་མེད་པའི་གཅེས་མིང་གཅིག་ཡིན་པས་རྒྱལ་བ་རིན་པོ་ཆེའི་ཆབ་སྲིད་ཀྱི་སྐུ་དབང་ཕྱིར་བསྡུ་ཟིན་ནའང་མིག་ཚིག་འདི་ཉིད་དང་འབྲེལ་བའི་རྒྱལ་བ་རིན་པོ་ཆེ་ནི་བོད་མི་མང་གི་སེམས་ཁོངས་སུ་བླ་ཆེན་མི་ཆེན་སུས་ཀྱང་མགྲན་དུ་མེད་པར་ལྷམ་མེར་གནས་ངེས་རེད། ད་དུང་རྒྱལ་བ་ཀརྨ་པ་དང༌། རྒྱལ་བ་འཕགས་པ་ལྷ་ལྟ་བུ་ལ་མཚོན་ན་རྒྱལ་བ་ཞེས་པའི་མིང་གི་མཇུག་ཏུ་ཀརྨ་པ་དང་། འཕགས་པ་ལྷ་ལྟ་བུ་མ་བསྣན་ན་རྒྱལ་བ་ཀརྨ་པ་དང་འཕགས་པ་ལྷ་སོགས་གོ་མི་ནུས་རེད། རྒྱལ་བ་ཞེས་པའི་མཇུག་ཏུ་ཏཱ་ལའི་བླ་མ་ཞེས་མིང་ཚིག་དེ་ཉིད་བསྣན་མི་དགོས་པར་རྒྱལ་བ་རིན་པོ་ཆེ་ཞེས་པ་ཙམ་གྱིས་ཁོང་ཉིད་མ་གཏོགས་གང་ལ་ཡང་མིང་འདི་ཉིད་མི་འཇུག་པ་རེད། གནད་དོན་འདིས་ག་རེ་ག་རེ་གསལ་བཤད་བྱེད་ཀྱི་ཡོད་རེད་ཅེ་ན། བོད་རྒྱ་ཆེ་མི་མང་གི་སེམས་ཁོང་གི་ཉི་མ་གཅིག་པུ་དེ་ཁོང་ཉིད་ཡིན་པར་མཚོན་ཡོད་པ་རེད་བསམ།
གཞན་༸གོང་ས་མཆོག་ཟེར་བ་འདི་ནི་ཉིད་ཀྱིས་གསུངས་པ་ལྟར་རྒྱལ་དབང་ལྔ་པ་ཆེན་པོའི་སྐབས་སུ་འབོད་ཚིག་ཅིག་སྟེ་ཆབ་སྲིད་དང་འབྲེལ་བ་ཡོད་པར་མངོན། དེ་བཞིན་དུ་སྐུ་མདུན་ཞེས་པའི་མཚན་འདི་ཡང་ཆབ་སྲིད་དང་འབྲེལ་བ་ཅན་ཞིག་སྟེ། ངས་ནི་སྐྱབས་བཅོལ་དུ་མ་སླེབས་བར་དུ་ཐ་སྙད་འདི་ཉྀད་གཏན་ནས་གོ་མྱོང་། ཚིག་འདི་གཉིས་ཀྱང་ཆབ་སྲིད་དང་འབྲེལ་བའི་ཐ་སྙད་དེ་རྒྱལ་བ་རིན་པོ་ཆེ་གཅིག་པུའི་སྒེར་མིང་ཡིན་པ་འདྲ། ཡིད་བཞིན་ནོར་བུ་ཞེས་པའང་སྐྱབས་མགོན་རིན་པོ་ཆེ་ཞེས་པ་ལྟ་བུ་འཇུག་ས་མང་གི་རེད།
མཆན་བུ་གཉིས་པ།༽
གོང་ས་རྒྱལ་བ་རིན་པོ་ཆེས་ཐེངས་མ་མང་པོ་ཞིག་ལ་སེ་ར་དང་། དགའ་ལྡན་གཉིས་ཀར་ངའི་གཟིམ་ཆུང་ཡོད་ཀྱང་དེ་དག་གནས་ཚང་ལྟ་བུ་དང་། འབྲས་སྤུངས་སུ་ཡོད་པའི་དགའ་ལྡན་ཕོ་བྲང་དུ་སླེབས་ཚེ་ངའི་ནང་དུ་སླེབས་པ་ཡིན་ཞེས་གསུངས་ཡོད་པ་རེད། འདིས་ཅི་བསྟན་པ་རེད། ད་ལྟ་སྐུ་ཕྲེང་འདིས་བོད་ཀྱི་སྲིད་པྱོགས་དབང་ཚད་ཡོངས་རྫོགས་མང་གཙོའི་ལམ་ཐོན་པའི་དབུ་ཁྲིད་དང་། བོད་མི་མང་ལ་རྩིས་འབུལ་ཞུས་རྗེས་སྐུ་ཕྲེང་རྗེས་མ་རྣམས་སུ་འབྲས་སྤུངས་དགའ་ལྡན་ཕོ་བྲང་དུ་རིས་མེད་ཆོས་ཀྱི་རྒྱལ་པོའི་མཛད་འཕྲིན་བསྐྱངས་ནས་བཞུགས་འཆར་རེད། ཕོ་བྲང་འདི་ལ་མིང་གསར་པ་ངེས་པར་བཏགས་དགོས་དོན་གང་ཡང་ཡོད་མ་རེད། གཞུང་ས་ཞེས་པའི་སྲིད་ཕྱོགས་ཀྱི་གོ་བ་ཅན་དེ་དོར་ནས་དགའ་ལྡན་ཕོ་བྲང་ཞེས་བོས་ན་དེ་གས་མཐུས་པ་རེད། རིས་མེད་ཆོས་ཀྱི་གཞེངས་པ་ཙམ་གྱིས་ཆོས་ལུགས་སམ་གྲུབ་མཐའ་བྱེ་བྲག་པའི་མིང་ཟུར་དཀོག་དགོས་པ་མཐོང་གི་མེད། འབྲོག་པ་ནི་འབྲོག་པ་རང་ཡིན།
གལ་གནད་ཆེ་ཤོས་ཤིག་ལ། གོང་ས་མཆོག་གི་སྲིད་དབང་མི་མང་ལ་གནང་རྗེས་སུ་གཞུང་ས་དགའ་ལྡན་ཕོ་བྲང་དང་འབྲེལ་བའི་བོད་ཀྱི་རྒྱལ་རྟགས་དང་།་རྒྱལ་དར། རྒྱལ་གླུ་རྣམས་བསྒྱུར་བཅོས་དགོས་དང་མི་དགོས་ངེས་པར་བསམ་བློ་གཏོང་དགོས་པ་རེད། གལ་ཏེ་བསྒྱུར་བཅོས་དགོས་ན་ད་ཐེངས་བཅོས་དགོས་པ་ལས་ཕྱིས་སུ་དཀའ་ངལ་འཕར་མ་རེད། གལ་ཏེ་བཅསོ་མི་དགོས་ན་གཅོས་མི་དགོས་པའི་གནས་ལུགས་དང་བཅས་ཏེ་གྲོས་ཆོད་བརྟན་པོ་འཇོག་དགོས་པར་སེམས། ཡི་གེ་ནོར་ན་གོ་བས་འདོན་རོགས།
མཆན་བུ་གསུམ་པ།༽

དེང་སང་འབྲོག་པ་སྐོར་ཞིག་གིས་བགྲོ་གླེང་ལྷུག་པོ་བྱུང་བར་ཡི་རངས་དང་སྤོབས་པ་བྱེད་ཀྱིན་ཡོད། ཡང་བསྐྱར་ཕྲན་བུ་ཞུས་ན། རྒྱལ་དར་དང་། རྒྱལ་གླུ། རྒྱལ་རྟགས་གསུམ་པོ་དེ་མགོ་ག་ནས་བཙུགས་འདུག་གམ། བོད་གཞུང་དགའ་ལྡན་ཕོ་བྲང་གི་སྔོན་དུ་རྒྱལ་གླུ་དང་། རྒྱལ་རྟགས་སྐོར་གནས་ཚུལ་ཅི་འདྲ་རེད། དེའི་སྔོན་བོད་བཙན་པོའི་སྐབས་སུ་ཅི་འདྲ་རེད། བོད་བཙན་པོའི་སྐབས་སུ་རུ་སྡེ་རེ་ལ་དམག་དར་རེ་ཡོད་པ་ཡིག་ཆ་རྙིང་པ་རྣམས་སུ་གསལ་ཞིང་། ལྷག་པར་སུམ་པའི་སྟོང་ཁྱབ་བརྒྱ་ལྡན་གྱི་སྟོང་སྡེ་དྲུག་ཅུ་རྩ་གཅིག་གྱི་སྟོང་དཔོན་འགྲོ་རྒྱལ་མཚན་སེང་གེ་བྱ་བའི་རུ་དར་ལ་སེང་གེ་དཀར་པོ་གནམ་དུ་འགྲེངས་པ་ཞིག་ཡོད་པར་བཤད་ཅིང་། དེ་ལྟར་ན་ད་ལྟ་བོད་ཀྱི་རྒྱལ་དར་འདི་བོད་བཙན་པོའི་དུས་ཀྱི་རུ་དར་ཞིག་ལ་མཛེས་བཀོད་ཕྲན་བུ་བྱས་པ་འདྲ་བ་ཞིག་ཡོད་པས་ད་ཐེངས་བསྒྱུར་བཅོས་མ་བྱས་ཀྱང་ཆོག་པར་སྙམ། བཙན་པོ་སྐབས་སུ་དམག་གི་རུ་དར་བྱ་བ་ལས་བོད་རྒྱལ་ཁབ་ཀྱི་རྒྱལ་དར་ཟེར་བ་ཞིག་ཨེ་ཡོད་ན། གང་ལྟར་ང་ནི་རྒྱལ་དར་འདི་ལ་ཕོངས་སེམས་འདྲ་བ་ཞིག་འདུག་སྔོན་མ་ཞིག་ཏུ་རང་སྲིད་རང་སྐྱོང་གི་གནས་བབས་འོག་ཏུ་རྒྱ་ནག་གི་རྩ་ཁྲིམས་ཀྱི་སྒྲོམ་གཞིའི་ནང་དུ་འཛུལ་རྒྱུའི་སྲིད་ཇུས་བཤད་འོངས་སྐབས་བོད་དེ་རྒྱལ་ཁབ་ཅིག་ཡིན་པའི་ངོ་བོ་མཚོན་པའི་ཅ་ལག་འདི་དག་བློ་མི་ཐོངས་པ་འདྲ་བ་ཞིག་ཡོང་གིན་ཡོད།

གཉིས་པ་རྒྱལ་གླུའི་སྐོར་འདི་རེད། འདི་ནི་ངེས་པར་བཅོས་དགོས་རྒྱུ་རེད། རྒྱལ་གླུ་དེའང་ད་ཐེངས་༸གོང་ས་མཆོག་ལ་གསོལ་འདེབས་ཞུས་ནས་ལོ་རྒྱུས་ཀྱི་དོན་སྙིང་ཅན་གྱི་རྒྱལ་གླུ་ཞིག་བརྩམས་བསྐུལ་ཞུ་དགོས་འདུག གཞན་ཟོམ་གདོང་རིན་པོ་ཆེ་གཙོས་པའི་མཁས་པ་རྣམས་ཀྱིས་རྒྱལ་གླུ་ཞིག་བརྩམས་ན་འགྲུབ་ངེས་ཀྱང་༸རྒྱལ་བ་རིན་པོ་ཆེས་བརྩོམས་ནགང་མཛད་ན་རིན་ཐང་ཅི་བས་ཆེ་ངེས་རེད། ཁྱེད་ཅག་གིས་བསམ་ན། རྒྱལ་གླུ་གསར་པ་བརྩོམ་དགོས་ན་བཅད་ལྷུག་གང་ཡིན་དང་། མང་ཉུང་། རྩོམ་གྱི་ཁ་ཕྱོགས་སམ་བརྗོད་བྱ་གང་ཞིག་ཏུ་གཞོལ་ས་རེད། དཔེར་ན། འདས་པའི་བོད་དང་། ཡང་ན་མ་འོངས་པའི་བོད། ཡང་ན་ད་ལྟའི་བོད་ཀྱི་གནས་བབས་དང་དཀའ་ངལ་སོགས་གང་ལ་ཁ་ཕྱོགས་དགོས་ངེས་སུ་འདུག་གཅིག་རྩོམས་དང་ལྟད་མོ་འོང་རྒྱུ་རེད།
གསུམ་པ་རྒྱལ་རྟགས་ཀྱི་སྐོར་རེད། དགའ་ལྡན་ཕོ་བྲང་གྱི་གོང་དུ་བོད་དུ་རྒྱལ་རྟགས་ཨེ་ཡོད་ན། སྤྱིར་ན་འཛམ་བུ་གླིང་གི་རྒྱལ་ཀབ་རེ་ལ་རྒྱལ་རྟགས་རེ་ཨེ་ཡོད་ན། དགའ་ལྡན་ཕོ་བྲང་གོང་དུ་རྒྱལ་རྟགས་མེད་ན་དགའ་ལྡན་ཕཽ་བྲང་གི་རྒྱལ་རྟགས་འདི་སུས་བཟོས་པ་ཞིག་རེད་འདུག འདིས་གང་ཞིག་དཔེ་འགེབས་བྱས་འདུག་གམ་རྒྱལ་རྟགས་ཟེར་བ་ཞིག་དགོས་པ་ག་འདྲ་བྱས་ནས་དྲན་འདུག གཞུང་ས་དགའ་ལྡན་ཕཽ་བྲང་གི་སྔོན་དུ་རྒྱལ་རྟགས་མེད་ན་ད་ཐེངས་ཀྱི་རྒྱལ་རྟགས་འདི་རྩ་བ་ནས་བརྗེ་སྤོར་བྱེད་རྒྱུ་དང་། ཡང་ན་ཡི་གེ་ཙམ་ཞིག་བསུབ་འཇུག་བྱེད་ནས་བསྐྱར་བཅོས་གནང་རྒྱུ་གང་རུང་ལས་མ་འདས་པ་རེད། རྒྱལ་དར་བཞིན་དུ་བོད་ཀྱི་རྒྱལ་རབས་གོང་མ་རྣམས་སུ་རྒྱལ་རྟགས་འདི་ཉིད་ཡོད་པའི་ཁུངས་འདྲ་བ་བརྙེད་ནས་བརྗེ་སྤོར་མི་དགོས་པ་གཏན་ཁེལ་བ་རེད་བསམ།
ངས་བལྟས་ན་འདི་དག་གི་ཕྱོགས་ཡོངས་སུ་བསམ་བློ་དང་། ཞིབ་འཇུག་ཅིག་དགོས་འདུག་བསམ། ཁྱོད་གཉིས་ཀྱི་གསུངས་པ་བཞིན་འདི་དག་བརྗེ་སྤོར་བྱེད་རྒྱུ་དཀའ་ཁག་ཡོད་པ་མངོན་གསལ་རེད། ད་རེས་རྒྱལ་ཁབ་གཅིག་གི་ངོ་བོ་བརྗེ་རྒྱུ་དེ་རེད། ངོ་བོ་བརྗེ་སྐབས་རྙིང་པ་དེ་བསྣུབས་ནས་གསར་པ་ཞིག་བརྗེ་དགོས་རྒྱུ་རེད། བཤད་སྟངས་དེ་ཅུང་ཟད་ཐལ་སོང་ངམ། ཡི་གེ་ནོར་ན་བཅོས་རོགས།

ཉི་ཧོང་དང་། སྐྱེ་དགུ་མདོ། དུམ་བུ་གསུམ་པ།

ད་གསུམ་པ་རོགས་སྐྱོར་རམ་བསྐྱར་འཛུགས་ཀྱི་སྐོར་འདི་རེད། སྲིད་འཛིན་ཧུའུ་ཅིན་ཐའོ་ཡིས། "སློབ་གྲྭ་གསར་པ་ཡོད་ལ། ཁྱིམ་གཞིས་གསར་པ་ཡོད།" ཟེར་ནས་སྐད་ཅིག་མ་གཅིག་ལ་ཁྱུག་ཁྱུག་ཏུ་སྒོ་ཕྱམ་གྱི་ངོས་སུ་བྲིས་ཡོད་པ་རེད། སློབ་ཕྲུག་ཕལ་མོ་ཆེ་རྒྱ་ཡུལ་དུ་བཞུད་ཟིན་པ་རེད། ཁྱིམ་གཞིས་གསར་པ་འདི་དངོས་གནས་དཀའ་ཁག་ཅན་ཞིག་ཏུ་གྱུར་ནས་མི་མང་དང་འགལ་ཟླ་ཆགས་བསྡད་ཡོད་པ་རེད། ཅིའི་ཕྱིར་མི་མང་དང་འགལ་སོང་བ་རེད་ཟེར་ན། མི་མང་ལག་ནས་ས་ཁང་ཞིང་གསུམ་གཞུང་བཞེས་བྱེད་ནས་གཞུང་གིས་བཀོད་སྒྲིག་བྱེད་དེ་མི་ཚང་རེ་ལ་ཁ་གང་གྲུ་བཞི་མ་བརྒྱད་རེ་ཅན་གྱི་ཁང་པ་རེ་བཀོད་སྒྲིག་བྱེད་རྒྱུ་ཡིན་ཟེར། མགོ་འདི་ནས་ཚར་སོང་བ་རེད། དེ་ལྟར་ན་བོད་ཀྱི་གསོན་ཉམས་ཅན་གྱི་གྲོང་ཁྱེར་ཞིག་བསྐྱར་འཛུགས་བྱེད་འདོད་མེད་པར་རྒྱ་གཏིང་གི་གྲོང་ཁྱེར་དེ་དག་པར་འགེབས་བྱེད་རྒྱུ་ཡིན་པ་མངོན་གསལ་རེད། དེ་ཡང་དུམ་བུ་དུམ་བུ་ཁྲག་ལིང་གྲིས་བཅད་པ་ལྟ་བུ་ ཐོག་བརྩེགས་དུ་མ་ཅན་གྱི་ཁང་ཕྲེང་མང་པོ་བསྟར་བསྒྲིགས་ནས་བཟོས་རྗེས་མི་མང་ལ་བགོ་བཤའ་བརྒྱག་རྒྱུ་ཡིན་སྐད། ཁང་པ་གྲུ་བཞི་ཁ་གང་མ་བརྒྱད་ཅན་འདི་རྒྱ་གཏིང་གི་མི་མང་ཕ་མ་གཉིས་བུ་ཕྲུག་གཉིས་སྟེ་ཁྱིམ་མི་བཞི་ཅན་ཞིག་བསམ་བློ་གཏོང་ནས་བཟོས་ཡོད་པ་འདྲ། འདི་ནི་འཆར་འགོད་པ་དེ་དག་གིས་བོད་ཀྱི་གོམས་གཤིས་དང་རིག་གཞུང་ལ་རྒྱུས་ལོན་ཏིལ་འབྲུ་ཙམ་ཡང་མེད་པ་དང་། ཡང་ན་བསམ་བཞིན་དུ་རྒྱ་ཡུལ་དུ་བསྒྱུར་རྒྱུའི་ཀུན་སློང་ངན་པ་ཞིག་ཡོད་པ་འདྲ། ད་དུང་རྒྱ་ཡི་འཚོ་བ་སྤྱོད་སྟངས་དང་བོད་ཡུལ་གྱི་འཚོ་བ་སྤྱོད་སྟངས་ལོག་ཁ་རེད། རྒྱ་ཡི་ཉིན་རེ་ཉིན་རེ་ཟ་རྒྱུ་བཏུང་རྒྱུ་གྲོ་འབྲས་དང་སྔོ་ཚལ་ཁྲོམ་ནས་ཉོ་བ་ལས་དོ་པོ་མང་པོ་ཁྱིམ་དུ་བརྩིགས་སྲོལ་མེད་ལ། བོད་པས་ལོ་གཅིག་ཙམ་འདེངས་ངེས་ཀྱི་གྲོ་འབྲས་སོགས་སྡེབས་གཅིག་ཏུ་ཉོས་ནས་ཁྱིམ་དུ་བརྩིགས་སྲོལ་ཡོད་པ་ཀུན་གྱིས་ཤེས་གསལ་ཡིན། ད་དུང་ཁྱིམ་གྱི་མི་གྲངས་ཀྱི་ཚོད་ནས་བཤད་ནའང་སྔོན་མ་འཆར་ལྡན་བུ་སྐྱེ་ཟེར་བའི་རྒྱ་ཡི་བཅའ་ཁྲིམས་དེ་ལག་སྟར་མ་བྱས་གོང་དེར་བོད་པ་བཟའ་མི་མང་ཤོས་བུ་ཕྲུག་བཅོ་བརྒྱད་ཕ་མ་གཉིས་དང་བསྡོམ་ན་མི་ཉི་ཤུ་ཐམ་པ་ཡོད་པའི་ཁྱིམ་ཚང་དེ་འདྲ་བ་ང་ཚོའི་རུ་སྡེ་ནང་དུ་ཡོད་པ་རེད། དཔེར་ན་བཟའ་མི་འདི་ལྟ་བུ་ཅན་ཞིག་གྲུ་བཞི་ཁ་གང་མ་བརྒྱད་ཅན་གྱི་ཁང་པ་ནང་དུ་ཇི་ལྟར་འདུག་ལོ་ཡོད་ན། ཅ་དངོས་རིགས་བཞག་ས་ཕར་བཞག་མི་ཉི་ཤུ་འདུག་ཡང་ལོ་རྒྱུ་མ་རེད། དེང་སང་ཁྲིམས་ཆད་ཁུར་བཞིན་དུ་བུ་ཕྲུག་བཞི་ལྔ་རེ་མེད་པའི་མི་ཚང་ཉུང་ཉུང་ཡིན་པས་ཁང་པ་འདི་ཧ་ཅང་ཆུང་སྐྱོན་ཡོད་པ་མ་ཡིན་ནམ། དེ་ཙམ་ག་ནས་ཚད། ཡུལ་ཕྱོགས་འདི་ལ་རྟ་མཛོ་སོགས་སྒོ་ཕྱུགས་རིགས་རྒྱུན་ལྡན་སྐྱེ་དགུ་གྲོང་ན་ཉར་མཁན་མི་ཚང་མང་པོ་ཞིག་ཡོད་ཅིང་། ལྷག་པར་བསྐོ་ཁྱི་དགྲ་གབ་ཟེར་བའི་ཁྱི་རིགས་འདིའི་ཕ་ཡུལ་གཙང་གསུམ་གྱི་མགོ་ཁུངས་འདི་ཉིད་ཡིན་པས་མི་ཚང་ཁ་ཤས་སྒོ་ཁྱི་བཅུ་ནས་ཉི་ཤུ་སོགས་ཡོད་ལ་སྒོ་ཁྱི་གཉིས་གསུམ་མེད་པ་ཧ་ལམ་དཀོན་པོ་རེད་འདུག ཐོག་བརྩེགས་ཤིན་ཏུ་མཐོ་བོ་ཅིག་གི་སྒང་དུ་རྟ་མཛོ་སོགས་ཕར་བཞག་བསྐོ་ཁྱི་ཙམ་ཡང་ཉར་ཐུབ་རྒྱུ་མ་རེད། དེང་སངས་སྤྱིའི་ཆ་ནས་ཆ་རྐྱེན་བཟང་དུ་སོང་བ་མཆོད་ཁང་ཟེར་བ་དང་། ཉལ་ཁང་། སྡོད་ཁང་། ཇ་ཁང་སོགས་སོ་སོར་མེད་ན་སྡོད་མི་ཤེས་པ་ལྟ་བུ་རེད། གཞན་རྒྱ་མི་ལས་ཀ་བྱེད་མཁན་ཡོང་བ་རྣམས་ཀྱི་བྱེད་སྟངས་ལྟ་བུ་ཀ་ཏོ་ར་གཅིག་གི་ནང་དུ་ཉིན་མོ་གྲོ་བརྫི་ས་མཚན་མོ་གཅིན་པ་གཏོང་ས་ལྟ་བུ་བྱས་ནས་ཧ་ཅང་གི་སྟབས་བདེ་དང་། ཤིན་ཏུ་བསྡུས་པའི་འཚོ་བ་ཞིག་བསྐྱེལ་ན་ཅི་ཤེས། ཡང་ན་ཉེ་འཁོར་ཆ་ཚང་ས་འོག་ཏུ་ཤི་བའི་མི་རྒན་ཁེར་རྐྱང་ལྟ་བུ་ལ་ཕན་ཐོག་ཡོད་ངེས་ཅན་ལས་མི་མང་བྱིངས་ལ་ནི་ཕན་ཐོག་མེད་པ་མངོན་གསལ་རེད། རྒྱུ་མཚན་དེ་དག་འདྲ་བའི་ཐོག་ནས་ཡུལ་ཤུལ་མི་མང་གིས་འུ་ཐུག་ཐབས་ཟད་ཀྱིས་ངོ་རྒོལ་བྱེད་བཞིན་ཡོད་པ་རེད་མ་གཏོགས་རྒྱས་སྤྲོས་དང་། བག་མེད་རྩེད་འཇོའི་ཆ་རྐྱེན་མ་ཚང་བ་ཟེར་ནས་ངོ་རྒོལ་ཐང་ཉལ་བྱེད་ཀི་ཡོད་མ་རེད།

མགོ་རྒྱ་ནག་གི་སྲིད་འཛིན་ཝུན་ཅ་པའོ་ནས་བཟུང་ས་གནས་ཏང་གི་དྲུང་ཆེའི་བར་གྱི་མགོ་བྱེད་ཚང་མས་མང་ཚོགས་ཀྱི་འདོད་བློ་མཐུན་པ་ཞིག་ཏུ་བྱེད་དགོས་ཞེས་ཁ་ན་ན་བར་དུ་བཤད་བཞིན་ཡོད་ཀྱང་དོན་ངོ་མའི་བྱེད་སྟངས་འདི་ལྟར་རེད། 

དཔེར་ན་ཉེ་ཆར་ཟླ་བཞི་པའི་ཚེས་པ་གཅིག་ནས་བསྟུད་མར་ཞུ་གཏུགས་བྱེད་མཁན་གྱི་གྲས་སུ་ཡོད་པའི་ཆུ་ཁ་ཀརྨ་ཟེར་བ་ཚོང་པ་ཞིག་གཙོན་འཇུག་བྱས་སོང་བ་བཤད། གལ་སྲིད་བདེན་པ་ཡིན་ན་ཆུ་ཁའི་ཀརྨ་ཁོང་གི་ཕ་མེས་ཡང་མེས་ནས་སྐྱེ་དགུ་མདོ་རུ་གནས་བཅས་པའི་མི་ཚང་རྙིང་པ་ཞིག་རེད། གནའ་དཔེར། མི་མིང་ས་ལ་ཐོགས། ས་མིང་མི་ལ་ཐོགས། ཟེར་བ་ལྟར་སྐྱེ་དགུའི་མདོའི་བྱ་ཆུ་ཟེར་བའི་ཆུ་ཁ་ན་གཏན་དུ་གནས་པས་ཆུ་ཁ་ཚང་ཞེས་ཐོགས་པ་རེད། དུས་ཟིང་སྔོན་ནས་འབྲོག་ཕྱོགས་ནས་འོངས་བའི་བརྡལ་པ་རྣམས་ཀྱི་འབབ་ཚུགས་དང་གནས་ཚང་གཡར་ས་ཡིན་འདུག་པས་མི་ཚང་ཡ་རབས་དང་། ཁྱིམ་ཚང་རྙིང་པ་ཞིག་རེད། དུས་རབས་གསར་པའི་ནང་དུའང་ཕ་མ་བཟང་པོའི་བུ་རྒྱུད་ཟེར་བ་ལྟར་ཚོང་ལས་བྱས་ནས་འབྱོར་ལྡན་ཞིག་སྟེ། སྐྱེ་དགུ་མདོ་རུ་དྲི་མི་དགོས་པར་མི་མང་པོ་ཞིག་གིས་ཤེས་ངེས་རེད། ན་ནིང་ཆག་སྒོ་དེའི་རྐྱེན་བྱས་ནས་ད་ལོ་ས་ཞིང་ཁང་པ་ཆ་ཚང་རྒྱ་གཞུང་གིས་འཕྲོག་བཅོམ་གྱི་གནས་སུ་ལྷུངས་པས་ཁོ་རང་དང་གནས་བབ་མཚུངས་པའི་མི་མང་གི་མངོན་འདོད་དེ་དག་དང་། དྲང་བདེན་དང་། སྐད་ཤུགས་ཆེན་པོས་བོས་ཏེ་གཞི་རིམ་མི་མང་སྣེ་ཁྲིད་པས་དེ་རིང་ཁྲིམས་དོང་གང་ཞིག་འགྲིམས་སོང་སྐད། ཡུལ་མི་ཕལ་མོ་ཆེ་གནས་བབས་དེ་དང་གཅིག་མཚུངས་སུ་ཡོད་པ་རེད། ཆུ་ཁའི་ཀརྨ་ལྟ་བུ་ས་ཞིང་དེ་ཉིད་གཞུང་གིས་འཕྲོག་སོང་ནའང་འདུག་ས་དང་། འཛུལ་ས་ཞིག་ཐབས་ཤེས་བྱེད་མི་ཐུབ་མཁན་མིན་ནའང་། ད་ཐེངས་གཞུང་གི་བྱེད་སྟངས་འདི་དག་གི་ནང་དུ། ཁྱོད་ཕར་རྒྱུགས། ང་འདུག་དགོས་ཟེར་བའི་གོ་བ་ཞིག་རྙེད་ཡོད་འདུག དེ་ལྟར་གཉུགས་མར་གནས་པའི་མི་རིགས་འདི་ཡིས་ནམ་ཡང་བཟོད་དཀའ་བ་ཞིག་ཡིན་སྟེ། དཔེར་ན་གྲོང་འདབས་ཀྱི་ཁྱི་ལྡོམ་ཞིག་ཡིན་ནའང་། ཁོ་རང་ཉལ་ས་དེ་ནས་རྒྱང་འདེད་བྱས་ན་ངུ་ཆོམ་དང་བཅས་ཏེ་ཉྭ་ལ་འཇུ་ངེས་རེད། དཔེ་དེ་བཞིན་དུ་ད་རེས་ཡུལ་ཤུལ་མི་མང་རྣམས་དངོས་ནས་འུ་ཐུགས་ཐབས་ཟད་ཡོད་པ་འདྲ། མི་མང་རྣམས་ན་ནིང་ལས་ད་ལོ་ངོ་མདངས་གནག་རུ་འགྲོ་གི་ཡོད་པ་དང་། ན་ནིང་ལས་ད་ལོ་སེམས་ཁམས་སྡུག་གིས་ནོན་པར་བཤད།

དཔེར་ན་ཉི་ཧོང་གིས་ལྟ་སྐོར་བ་དང་། གསར་འགོད་པ། རོགས་སྐྱོར་བྱེད་མཁན་སོགས་ནར་གཏོང་བྱེད་ཏེ་ཕྱི་གསལ་ནང་གསལ་བྱེད་བཞིན་འདུག་པས་བསྐྱར་འཛུགས་ཀྱི་སྐབས་སུའང་མང་ཚོགས་ཀྱི་སེམས་ཁམས་མི་གསོད་པའི་ཡིད་ཆེས་བྱེད་ཆོག་པ་འདྲ།

ཉི་ཧོང་དང་། སྐྱེ་དགུ་མདོ། དུམ་བུ་གཉིས་པ།

༼འདྲ་པར་འདི་ཨ་རིའི་དམག་གིས་ཉི་ཧོང་དུ་རོགས་སྐྱོར་བྱེད་ཚུལ་རེད། ༽


དེ་རྗེས་སྐྱེ་དགུ་མདོ་རུ་ས་འགུལ་རྗེས་ཀྱི་མྱུར་སྐྱོབ་ཀྱི་སྐོར་འདི་རེད། ལས་རིམ་འདིའི་ཁྲོད་དུ་སྔ་ཕྱི་བར་གསུམ་མིའི་ཚེ་སྲོག་མྱུར་སྐྱོབས་ཀྱི་ལས་ཀ་འདི་ལས་གལ་འགངས་ཆེ་བའི་ལས་ཀ་ཞིག་མེད་པ་དང་། ལས་ཀ་འདི་ཤུལ་དུ་ལྷག་པའི་ས་གནས་མི་མང་རྣམས་སེམས་ཁ་གང་བ་ཞིག་དང་། འཛམ་གླིང་མི་མང་སུས་བལྟས་ནའང་འདོད་བློ་ཁེངས་པ་ཞིག་བྱུང་མེད་པ་རེད། ལས་ཀ་འདི་ལམ་ལྷོངས་མ་བྱུང་བ་དེ་ག་རང་གིས་ས་འགུལ་ཁྲོད་ཀྱི་ལས་ཀ་འདི་ལ་འདོད་མོས་མེད་པ་དང་། སེམས་ཁ་མ་གང་བ། དོགས་པ་བྱེད་དགོས་བྱུང་བ་སོགས་གྲ་མ་འགྲིག་པ་ཐམས་ཅད་ཀྱི་རྩ་བ་འདི་ནས་བསླངས་ཡོད་པ་རེད།


སྤྱིར་བཏང་ད་རེས་ཡུལ་ཤུལ་མི་མང་གི་རེ་བ་ཆེན་པོ་ཞིག་བྱས་ཡོད་པ་རེད། རྒྱུ་མཚན་ནི། འཛམ་གླིང་འདིའི་ཐོག་ཏུ་ཀྲུང་གོ་ཡར་དར་གྱི་དུས་རབས་ཡིན་པའི་ཁབ་འགྲོ་འབིགས་འགྲོ་སྔ་དགུང་བར་གསུམ་དུ་གློག་བརྙན་དང་། ཚགས་པར། ཆེན་པོ་རྣམས་ཀྱི་གཏམ་བཤད་སོགས་གང་ལ་ཉན་ན་འཇིག་རྟེན་འདིའི་ཐོག་ཏུ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ལས་ལྷག་པའི་རྒྱལ་ཁབ་གཅིག་ཀྱང་མེད་པར་དངོས་ཤུགས་རྒྱུད་གསུམ་ནས་ཁྱབ་བསྒྲགས་དང་། འཛམ་གླིང་གི་སྣེ་ཁྲིད་མྱོང་བའི་ཨ་རི་ནི་རྒས་ཤིང་འཁོག་འགྲོ་ཡི་ཡོད་པ་དང་། དེ་མཚུངས་ནུབ་ཕྱོགས་ཀྱི་རྒྱལ་ཁབ་ཕལ་ཆེར་ཉམས་དམས་འགྲོ་མུས་དང་། ཤར་ནས་ཉི་ཧོང་ཚུན་ཆད་རང་ཁ་རང་སོས་ཙམ་ལས་ཅི་ཡང་མེད་པས་ད་ནི་འཛམ་གླིང་འདི་ཀྲུང་གོས་སྣེ་ཁྲིད་བཞིན་ཡོད་པའི་གནས་ཚུལ་ཁོ་ན་འུད་སྒྲོགས་བྱེད་བཞིན་ཡོད་པས་ཡིད་ཆེས་ཆེན་པོ་བཅངས་ཡོད་པ་རེད། དོན་དངོས་ལ་བྱེད་སྟངས་ལས་སྟངས་འདི་ལྟར་རེད། དེ་ལྟར་འཇིག་རྟེན་ན་འགྲན་ཟླ་དང་བྲལ་བའི་སྟོབས་ཆེན་རྒྱལ་ཁབ་ཅིག་ཡིན་ན་རང་གི་མི་སེར་ས་འོག་ཏུ་མནན་དུས་དབུགས་གིས་འདེངས་ལ་མ་འདེངས་བའི་དམག་མི་འགའ་ཞིག་གཏང་བ་ཙམ་མ་ཡིན་པར་ཐད་འཕུར་གནམ་གྲུ་བྱ་ཁྱུ་འཕུར་འཕུར་བྱེད་ཅིང་དེང་རབས་ཀྱི་ལག་ཆ་བེད་སྤྱད་ནས་ཞིག་རོའི་འོག་ནས་མི་སེར་རྣམས་འཕྲལ་མ་ཉིད་དུ་སྲོག་སྐྱོབ་དགོས་རྒྱུ་མ་རེད་དམ། དེང་སང་ས་གནས་རྫོང་དཔོན་ཙམ་ཞིག་དང་། ཡང་ན་དམག་སྡེ་ག་གེ་མོའི་རུ་དཔོན་ཙམ་ཞིག་ཕྱོགས་བསྐྱོད་བྱེད་པ་ལའང་ཐད་འཕུར་གནམ་གྲུ་བཀོལ་བཞིན་ཡོད་པ་ཡར་ཐོན་ཅན་གྱི་རྒྱལ་ཁབ་ནང་དུ་རྒྱུན་ལྡན་གྱི་འཚོ་བ་སྤྱོད་སྟངས་ཙམ་སྟེ། འབྲོག་པས་རྟ་དང་སྣ་ལོ་ཞོན་པ་ལྟ་བུ་རེད། གང་ལྟར་གནམ་གྲུ་ནང་དུ་ཡོང་ན་ཆེ་རྒྱུ་དང་། རླངས་འཁོར་ནང་དུ་ཡོང་ན་ཆུང་རྒྱུ་གང་ཡང་མེད་ཀྱང་འདི་གཉིས་ལ་མགྱོགས་དལ་གྱི་ཁྱད་པར་ཡོད་པ་རེད། ངས་བཤད་འདོད་པ་ནི། དུས་ཚོད་རིང་པོ་འགོར་ན་ས་འོག་ཏུ་གནས་པའི་མི་སེར་རྣམས་ཚེ་སྲོག་གི་སྒུགས་ཀྱིན་མེད་པས་ཆེས་མགྱོགས་མྱུར་ཅན་གྱི་བྱེད་ཐབས་དེ་བེད་སྤྱད་དགོས་པ་རེད། སྲིད་བློན་ཝུན་གྱིས། མིག་མཐའ་འཆིལ་མས་སྐོར་ཞིང་། "རེ་བ་ཕྲན་ཙམ་ཞིག་ཡོད་ནའང་མིའི་ཚེ་སྲོག་སྐྱོབ་རྒྱུ་གཙོ་འདོན་བྱེད་དགོས།" ཟེར་བ་སོགས་ནི་གནས་སྐབས་ཚོར་འདུ་རགས་པ་ཙམ་ཞིག་ལས་ཁོ་རང་གི་གྲིབ་གཟུགས་དང་ལྷན་ཅིག་ཏུ་ཡལ་སོང་བ་ལག་ལེན་དངོས་ཀྱི་ཁྲོད་ནས་གསལ་ཡོད་པ་རེད།


༢༠༠༨ལོར་རྒྱ་ནག་ཝུན་ཁྲུན་དུ་ས་འགུལ་བྱུང་རྗེས་དམག་སྡེ་འབོར་ཆེན་གཏོང་བ་དང་། ཐད་འཕུར་གནམ་གྲུ་ཐད་འབབ་བྱས་པ་ལ་བསམ་ནའང་བོད་རིགས་ས་ཁུལ་གྱི་གོད་ཆག་འདི་ལ་མཐོང་ཆེན་དང་དོ་སྣང་དེ་ཙམ་བྱས་མེད་པ་ཇེ་གསལ་རེད་ལ་ཡང་ན་མི་རིགས་དབྱེ་འབྱེད་བྱས་ནས་བསམ་བཞིན་དུ་ང་ཚོ་ལ་མྱུར་སྐྱོབ་མ་བྱས་པ་རེད།


གནས་ཚུལ་དེ་ཙམ་མ་ཡིན་པར་གྲྭ་པ་རྣམས་ཀྱིས་ལྟོགས་སྐོམ་དང་། ཉིན་མཚན་ལ་མ་ལྟོས་པར་མྱུར་སྐྱོབས་ཐོག་མར་མགོ་བཙུགས་ཤིང་། བར་དུ་ཤུགས་རྒྱོབས། ཐ་མ་མཇུག་བསྡུ་ལོངས་མེད་པར་དམག་གིས་རྒྱངས་འདེད་བྱས་ནས་བཙན་ཐབས་ཀྱི་རང་རང་གི་དགོན་པར་སྤྲད་ཡོད་པ་དང་། ད་དུང་ཤི་བའི་གྲངས་འབོར་བཅོག་ཐབས་དང་། རྨས་མ་མྱུར་སྐྱོབས་བྱས་པའི་གྲངས་འབོར་སྤར་སྣོན་བྱས་པ་སོགས་མི་ཤི་ཁྱིམ་སྟོང་གི་སྡུག་བསྔལ་བཟོད་དཀའ་བ་འདི་འདྲ་བའི་ནང་དུ་ད་དུང་དེ་ཙམ་ཤི་ཡོད་པ་མ་རེད། གྲྭ་པ་རྣམས་ཀྱི་འུར་བརྒྱབ་པ་རེད། ཟེར་བ་ལྟ་བུ་ཤུལ་ལུས་མི་མང་གི་སེམས་ནང་ལ་རྨ་ཁ་ཆེན་པོ་བཟོས་ཡོད་པ་རེད། ད་ལྟ་ཤི་བའི་གྲངས་འབོར་ཚོད་རྩིས་བྱེད་དུ་ཡོད་པ་ལུང་པ་འདི་ནག་འཇོམས་སུ་མ་སོང་བ་དེ་ནི་གྲྭ་པ་འདི་ཚོས་བཀའ་དྲིན་རེད། ཐོག་མར་རྫ་སེར་ཤུལ་དགོན་པ་ས་འགུལ་བྱུང་ནས་ཆུ་ཚོད་འགའ་ཞིག་གི་རྗེས་སུ་གནོད་ཐེབས་ཀྱི་གནས་འདིར་སླེབས་ཤིང་མྱུར་སྐྱོབས་ཀྱི་མགོ་འཛུགས་ཡོད་པ་རེད་ལ་འདི་ནི་ཡུལ་ཤུལ་མི་མང་གི་ཚེ་སྲོག་ལ་ལག་པ་འཆང་མཁན་ཐོག་མ་དེ་ཆགས་ཡོད་པས་ཡུལ་འདི་མི་མང་གི་སེམས་ཁོང་ན་ལྷམ་མེར་གསལ་ཡོད་པ་རེད།


དཔེར་ན་ཉི་ཧོང་ལྟ་བུ་མཚོན་ན་ས་འགུལ་དང་། ཆུ་རླབས་ཤོར་ནས་གནོད་འཚེ་ཕོག་པའི་རྫོང་ཁག་གཉིས་ཀྱི་ནང་དུ་མི་གྲངས་ག་ཚོད་ཡོད་པ་དང། དེ་ལས་ཕུང་པོ་ག་ཚོད་ལག་སོན་བྱུང་བ། དེ་ལས་གཞན་པ་བོར་བརླག་སོང་བ་སོགས་གསལ་གསལ་ཐིང་ཐིང་ཉིན་རེ་ནས་ཉིན་རེ་གྲངས་འདྲེན་བྱེད་བཞིན་ཡོད་པ་རེད། གཞུང་གིས་མ་དངུལ་གཏོང་ནས་ཁྲོམ་རའི་ཅ་དངོས་རྣམས་སྔར་རྒྱུན་བཞིན་དུ་བེད་སྤྱོད་ཐུབ་པ་སོགས་མི་མང་གི་འཚོ་ལ་རོགས་སྐྱོར་ཚད་མེད་བྱས་པ་དང་། གཞན་ཨ་རི་སོགས་ཡར་ཐོན་གྱི་རྒྱལ་ཁབ་རྣམས་ཀྱི་རོགས་སྐྱོར་རུ་ཁག་རྣམས་དང་ལེན་དང་། རྒྱལ་སྤྱི་གསར་འགོད་པ་སོགས་རང་དབང་གིས་སྐོར་བསྐྱོད་བྱས་ནས་ལས་ཀ་ཕྱི་ནང་བར་གསུམ་དུ་ཁ་གསལ་གཏིང་གསལ་བཟོས་པས་མི་མང་རྣམས་སུ་ལའང་ཁག་འདེད་དང་ལེ་གདའ་བྱེད་ས་མེད་པ་རེད། ན་ནིང་ཡུལ་ཤུལ་དུ་རྒྱལ་སྤྱིའི་གསར་འགོད་པ་དང་། མྱུར་སྐྱོབས་རོགས་ཚོགས་སོགས་སྐོར་བསྐྱོད་བྱེད་མ་བཅུག་པར་རང་གིས་ཀྱང་མ་འཇོན་གཞན་ལའང་བྱེད་དུ་མ་བཅུགས་ནས་ཡུལ་ཤུལ་བ་ལ་དཀའ་སྡུག་ལྡབ་འགྱུར་གྱི་ཇེ་ལྕི་ལ་བཏང་ཡོད་པ་རེད།


དཔེར་ན་ད་རེས་ཉི་ཧོང་གི་ས་འགུལ་གྱི་གནོད་འཚེ་འདི་འདྲ་བ་ཅིག་ཡུལ་ཤུལ་སོགས་བོད་ཀྱི་ལུང་པ་ག་གེ་མོ་ཞིག་ཏུ་བྱུང་བ་ཡིན་ན་དེ་ག་རང་ཡུལ་དེ་ཉིད་ནག་འཇོམས་སུ་གཏོང་འགྲོ་བ་ལས་ཕལ་ཆེར་གཅིག་ཀྱང་སྲོག་སྐྱོབས་ཐུབ་རྒྱུ་མ་རེད། ས་འགུལ་གྱི་ཁང་པ་རྡིབས་པ་འདི་ཙམ་གྱིས་སྐྱེ་དགུ་གྲོང་གི་ཡུལ་མི་བརྒྱ་ཆ་སུམ་ཅུ་ཙམ་ཞིག་ཕལ་ཆེར་སྲོག་སྐྱོན་བྱུང་བ་ཡིན་ན་དེའི་སྟེང་སུ་མཚོ་སྐྱོམས་པ། དེ་ནས་ཉིང་རྡུལ་གས་འཐོར་གྱིས་མེ་སྐྱོན་བྱུང་བ་སོགས་འཇིག་པ་གཅིག་མཐུད་གཉིས་མཐུད་དུ་བྱུང་ན་དུ་ཙམ་བྲོས་ཐར་ཡོང་བ་ང་ཚོས་སྔོན་དཔག་བྱེད་ཐུབ་ངེས་རེད། དེ་ལྟར་བལྟས་ན་རྒྱལ་ཁབ་གང་ཞིག་སྔོན་ཐོན་ཡིན་པ་དང་། གང་ཞིག་ཏུ་མི་སེར་རང་དབང་དང་དྲངས་བདེན་གྱིས་འཚོ་བཞིན་པ་ང་ཚོས་རྟོགས་ཐུབ་ངེས་རེད།

ཉི་ཧོང་དང་། སྐྱེ་དགུ་མདོ། དུམ་བུ་དང་པོ།

ཕྱི་ཟླ་༤་པའི་ཚེས་༣ ཉིན་སྐྱེ་དགུ་མདོའི་བདེ་སྡུག་ཞུ་འབོད་བྱེད་མཁན་གྱི་མི་སེར་རྣམས་བདེ་འཇགས་མི་སྣས་ས་གནས་གང་ཞིག་ཏུ་དབོར་འདྲེན་བྱས་ནས་ལས་འགུལ་དེ་བཙན་ཤེད་ཀྱིས་མཚམས་བཅད་ཡོད་པ་རེད། ད་ལྟའི་སྐབས་སུ་མི་སེར་རྣམས་གནས་བབ་ག་འདྲ་ཞིག་གི་འོག་ཏུ་ཡོད་མེད་སུས་ཀྱང་མི་ཤེས་པའི་ཚོད་དུ་ཡོད་འདུག སུ་ཞིག་ལ་རྟ་ལྕག་གཞུ་གིན་ཡོད་དམ། སུ་ཞིག་ལས་ཁྲག་བཞུར་བཞིན་ཡོད་དམ། ཡང་སྙིང་མི་མང་འདི་དག་གིས་ནག་ཉེས་གང་ཞིག་བསགས་ནས་ཁྲིམས་འོག་ཏུ་ལྷུང་སོང་བ་ཡིན་ནམ། རང་གི་ས་ཞིང་རང་ལ་མི་དབང་བའི་ང་རང་སུ་ཞིག་གི་མི་སེར་རེད། སུ་ཞིག་གིས་ཡུལ་མི་རེད། རྫོགས་མི་ཚར་བའི་དྲི་བ་འདི་དག་ཤུལ་དུ་ལྷག་པ་རྣམས་ཀྱིས་སེམས་ངོ་ན་ཡོམ་ཡོམ་དུ་གཡོ་བཞིན་ཡོད་པ་རེད། འདི་ལྟར་བསམ་ན་ཕྱི་ཡི་དཔལ་འབྱོར་དང་ནང་སེམས་ཁམས་དང་འབྲེལ་བའི་བཟང་སྤྱོད་ཚང་མ་ཡར་རྒྱས་དེང་རབས་ཅན་དུ་མངོན་གྱུར་ཟིན་པའི་རྒྱལ་ཁབ་རྣམས་ལ་ཡིད་སྨོན་གཏིང་ནས་ཤོར་འགྲོ་གི་འདུག དཔེར་ན་ཉེའི་ཆར་ཉི་ཧོང་དུ་ས་འགུལ་ཆུ་ཤོར་གྱི་གོད་ཆག་ཁྲོད་གི་གནས་ཚུལ་དང་། ན་ནིང་སྐྱེ་དགུ་མདོ་རུ་ས་འགུལ་གྱི་གནས་ཚུལ་བྱུང་བའི་བར་གྱི་ཧེ་བག་རྣམས་ཡིད་ལ་འགོག་མེད་དུ་འཆར་ཡོང་བ་ཞིག་རེད།
༡༽ ཐོག་མར་ན་ནིང་སྐྱེ་དགུ་མདོ་རུ་ཞོགས་པའི་དུས་ཚོད་ལྔ་པའི་སྐོར་དུ་ས་འགུལ་ཤུགས་ཆེར་བྱུང་ནའང་སྡོད་མཁར་རྡིབས་པ་དང་མི་ཤི་གོད་ཆག་གི་གནས་ཚུལ་མ་བྱུང་བ་རེད། དེ་ནས་ཆུ་ཚོད་བདུན་དང་སྐར་མ་བཞི་བཅུ་ཙམ་ནས་ས་འགུལ་ཤུགས་ཚད་ཆེ་བ་དེ་རྒྱབ་ནས་སྣོད་བཅུད་གཉིས་ཀ་ནག་གོར་རེ་བཟོས་སོང་བ་རེད། དེའི་བར་དུ་ཆུ་ཚོད་གཉིས་ཙམ་གྱི་དུས་ཚོད་ཡོད་པས་ཡར་རྒྱས་ཅན་གྱི་རྒྱལ་ཁབ་ཅིག་ཡིན་ན་མི་མང་ལ་སྔོན་བརྡ་བཏང་ངེས་རེད། གལ་སྲིད་སྔོན་བརྡ་བཏང་ན་ཞི་བའི་མི་སེར་མང་པོའི་ཚེ་སྲོག་ཤོར་ཡོད་པ་མ་རེད། དེ་ནས་ས་འགུལ་རྒྱབ་ཟིན་རྗེས་སུའང་ཅི་བྱེད་དང་འདི་དགོས་ཀྱི་སློབ་སྟོན་རྩ་བ་ནས་མེད་པར་ད་དུང་རྟགས་དཔྱད་ཡེ་ནས་མེད་པར་"ཁྲ་འགུའི་ཆུ་མཛོད་ཤོར་གི་འདུག་"ཟེར་ནས་མི་མང་ཟང་ཟིང་འུ་འུར་ཏུ་བཟོས་ནས་ཁང་ཞིག་འོག་ཏུ་མནན་ནས་ཡོད་པ་རྣམས་ཀྱང་སྐྱོབས་ལོངས་མེད་པར་ལ་འུར་རི་མགོར་བྲོས་པའི་བརྡ་ལོག་སྤྲད་དེ་མི་སེར་མང་པོའི་ཚེ་སྲོག་གཡང་ཁ་རུ་དེད་སོང་བ་རེད། འདི་ཐམས་ཅད་རྒྱལ་ཁབ་ལ་ཡར་རྒྱས་མེད་པ་དང་། ཚན་རིག་གི་ཤེས་ཚད་ཧ་ཅང་གི་དམའ་བོ་ཡིན་པ། རང་བྱུང་གི་འཇིགས་པ་ལས་སྐྱོབས་པའི་གྲ་སྒྲིག་ཏིལ་འབྲུ་ཙམ་ཡང་མེད་པར་བསྟན་ཡོད་པ་རེད། ད་དུང་ས་འགུལ་རྗེས་ཀྱི་ཆུ་མཛོད་ཤོར་ཡོང་བའི་བརྡ་ལན་སྤྲད་སྟངས་འདི་ལ་བསམ་བཞིན་དུ་བྱས་པ་རེད་ཅེས་བཤད་མི་ཤེས་ནའང་བརྟག་དཔྱད་མེད་པར་ཧོལ་རྒྱུགས་བྱས་པ་དེས་མིའི་ཚེ་སྲོག་གི་རིན་ཐང་ལ་རྩིས་མེད་གཏོང་བ་མངོན་གསལ་རེད།

ཉི་ཧོང་ལ་མཚོན་ན་ས་འགུལ་དང་། མཚོ་རླབས་མ་ཡོང་པའི་སྔོན་ནས་ས་འགུལ་ཡོང་ངེས་པས་མི་མང་རྣམས་ལེ་དབར་ཉི་ཤུ་ཚུན་ཆད་དུ་བསྡད་ན་གནོད་པ་འབྱུང་སྲིད་པའི་སྔོན་བརྡ་གཏོང་ཡོད་པ་རེད། ད་དུང་ཉིང་རྡུལ་གྱི་གློག་ཁང་འཐོར་ཞིག་ཕྱིན་པ་འདི་ཧ་ཅང་ཉེས་ཚབས་ཆེ་བའི་གནད་དོན་ཞིག་ཡིནའང་མི་མང་ལ་དེ་ཙམ་གསལ་བཤད་བྱས་མེད་པ་འདིས་མི་ཤི་ཁྱིམ་བརླག་གྱི་སྐབས་སུ་མི་མང་རྣམས་བླ་འཐོར་བ་ལྟ་བུ་གནས་ཡོད་པས་སེམས་ཁམས་ལྷོད་དུ་ཡོང་རེས་སྤྱི་སྒྲགས་མ་བྱས་པ་ཡིན་སྲིད་པ་ལྟ་བུ་རེད། ཉེས་ཚབས་ཅན་གྱི་གློག་ཁང་དེ་འཐོར་ཉེ་སུ་ཡོད་མུས་ཧྥ་རན་སི་སོགས་དེང་རབས་ཉིང་རྡུལ་གྱི་གློག་ལས་ལ་ལག་རྩལ་བྱང་བའི་མི་སྣ་དང་དཔུང་པ་གཅིག་སྒྲིལ་གྱིས་མི་རིགས་དེ་དང་། རྒྱལ་ཁབ་དེ། ཡར་གླིང་གི་སྣོད་བཅུད་འདི་འཆི་ཁ་ལས་སྐྱོབས་ཐུབ་པ་བྱུང་བ་སོགས་གོད་ཆག་དེ་འདྲ་བའི་ཁྲོད་ནས་བླ་ན་མེད་པའི་འགན་ཁུར་དང་། བྱས་རྗེས་བཞག་ཡོད་པ་རེད།

སྒ་སྐྱེ་དགུ་མདོ་མི་མང་གིས་ཞུ་འབོད།

ཁ་སང་ཟླ་བཞི་པའི་ཚེས་པ་གཅིག་ཉིན་ནས་བཟུང་སྒ་སྐྱེ་དགུ་མདོ་མི་མང་གིས་གཡག་ཐང་ཆེན་དུ་འཛོམས་ནས་རྒྱ་ནག་དབུས་གཞུང་ལ་ཞུ་འབོད་བྱེད་བཞིན་ཡོད་འདུག
དེ་ཡང་སྒ་སྐྱེ་དགུ་མདོའི་བསྐྱར་འཛུགས་བྱེད་པའི་ལས་རིམ་ཁྲོད་མི་མང་གི་འདོད་བློ་དང་མ་མཐུན་པ་ས་ཞིང་སྡེབས་བཅོམ་གྱི་ལས་ཀ་འདི་ཉིད་ཀྱི་སྐོར་ཡིན་འདུག སྐྱེ་དགུ་མདོ་གོད་ཆག་ཕོག་ནས་བཟུང་མི་མང་རྣམས་གནས་བཅའ་ས་མེད་པར་གྱུར་ཡོད་པ་རེད་ལ་ཁང་པ་འགའ་ཞིག་གནས་སྐབས་རིང་བསྡད་ན་ཉེས་ཚབས་ཆེར་མེད་པ་དེ་འདྲ་བའི་རིགས་ཡོད་ཀྱང་བསྐྱར་འཛུགས་ལ་བསྙད་ནས་གྲོངས་པ་དེ་ཉིད་ཡོངས་སུ་བཤིག་སྟེ་ཐང་ཆེན་ཞིག་ཏུ་བསྒྱུར་བ་རེད། གནས་བཅའ་ས་མེད་པའི་ཡུལ་མི་ཉམ་ཆུང་དེ་དག་ས་མཐོ་ཞིང་གྲང་ངར་ཆེ་བའི་དགུན་གྱི་དུས་ཚིགས་དེའི་ཁྲོད་དུ་དཀའ་ངལ་ཚད་མེད་མྱོང་ཡོད་པ་རེད། བསྐྱར་འཛུགས་ཀྱི་ཐད་ལ་རྒྱ་ནག་གཞུང་གིས། གཙང་གསུམ་དེང་རབས་ཡུལ་སྐོར་གྲོང་ཁྱེར་ཟེར་བ་ལྟ་བུའི་དེང་རབས་ཀྱི་གྲོང་ཁྱེར་ཞིག་གསར་བཟོ་བྱེད་རྒྱུ་ཡིན་པའི་ཁྱབ་བསྒྲགས་བྱས་ཡོད་པ་རེད། དེང་རབས་ཀྱི་གྲོང་ཁྱེར་དེ་ཚུལ་ཇི་ལྟར་དུ་བཟོ་རྒྱུ་ཡིན་པའི་ཐད་ལ་རིམ་པ་གོང་མའི་མགོ་ཁྲིད་རྣམས་ཀྱིས། དེ་སྔོན་རང་གི་ས་ཞིང་རྣམས་རང་ལ་གཏན་ནས་དབང་ཚད་མེད་པར་གཞུང་ལ་འབུལ་དགོས་པ་དང་། གཞུང་གིས་ཀྱང་ཁྱིམ་ཚང་རེ་ལ་གྲུ་བཞི་ཁ་གང་མ་བརྒྱད་ཅན་གྱི་ཁང་པ་རེ་བཀོད་སྒྲིགས་བྱེད་རྒྱུ་ཡིན་པའི་འགྲེལ་བཤད་དང་བཅས་ས་བཀྲ་རེ་བཟོས་ཏེ་མང་ཚོགས་ཀྱི་མདུན་དུ་བཤམས་ཡོད་ནའང་མང་ཚོགས་ཀྱིས་དེ་ཉིད་འདོད་མོས་མེད་པའི་སྙན་ཞུ་ཡང་ཡང་ཞུས་ནས་ས་བཀྲ་ཐེངས་མ་གསུམ་མམ་བཞི་ཙམ་ཞིག་ཡར་སློགས་བྱས་ནས་བཟོ་བཅོས་བྱས་ཡོད་པ་རེད། ལས་འཆར་གྱི་ས་བཀྲ་དེ་ཐམས་ཅད་ཀྱང་མི་མང་གི་ལག་ནས་ས་ཞིང་བཀོག་སྟེ་དབུས་གཞུང་གི་དེང་རབས་ཀྱི་གྲོང་ཁྱེར་ཞིག་འཛུགས་རྒྱུ་ཐད་ལ་འབད་བརྩོན་བྱེད་པ་ལས་མི་མང་དཀྱུས་མའི་རེ་འདུན་གྱི་སྐོར་ལ་འགྱུར་བ་གཏན་ནས་གཏོང་མེད་པ་རེད།

འདི་ཟླ་ཚེས་པ་བཅུ་བཞི་སྟེ་གོད་ཆག་ཕོག་ནས་ལོ་ངོ་གཅིག་འཁོར་བའི་ཉིན་ནས་བསྐྱར་འཛུགས་ཀྱི་ལས་ཀ་དངོས་སུ་མགོ་འཛུགས་བྱེད་རྒྱུ་ཡིན་པའི་ཁྱབ་བསྒྲགས་བྱས་པས་ལས་འཆར་འདིས་མི་མང་གི་མངོན་འདོད་བསྐོང་མི་ཐུབ་པའི་བསམ་ཚུལ་བྱུང་སྟེ་རྒྱ་ཆེ་མི་སེར་རྣམས་གཡག་ཐང་ཆེན་ཟེར་བའི་ལམ་གྱི་གཞི་མདོ་ཆེ་བ་དེར་འཛོམས་ནས་འཕྲེད་དར་དཔྱངས་ཤིང་། འཕྲེད་དར་གྱི་ངོས་སུ། ཁང་ས་རང་ལ་དབང་བའི་རེ་འདུན། ཞེས་པའི་ཡིག་ཆ་བྲིས་ཡོད་པ་རེད། གཞན་ཡང་སྲིད་ཇུས་དང་མཐུན་པར་ལས་ཀ་ལག་བསྟར་བྱེད་དགོས་ཞེས་འཁོད་པའི་ཡིག་ཆ་བཀྲམ་ཏེ་མི་མང་རྣམས་ཀྱིས་མངོན་འདོད་བཤད་བཞིན་ཡོད་པ་རེད། མི་མང་ནས།  རྩ་ཁྲིམས་ལ་བསྙད་ནས་མི་མང་གི་འདོད་པ་རྡོག་བརྫི་གཏོང་མི་རུང་། ཟེར་བ་ལྟ་བུའི་སྲིད་བློན་ཝུན་ཅ་པའོ་ཡིས་གཏམ་བཤད་དུམ་བུ་དེ་འདྲ་དྲངས་ནས་གནས་ལུགས་བཤད་བཞིན་ཡོད་པ་རེད། ས་ཁུལ་དེའི་དཔོན་རིགས་ཁག་དེར་ཡོང་ནས་བསམ་འཆར་ཉན་གི་ཡོད་འདུག་ལ་འབྲེལ་ཡོད་ལས་ཁུང་ཁག་གིས་ཀྱང་འདོད་མོས་ཇི་ཡོད་ཐོ་འགོད་བྱེད་ནས་མིང་རྟགས་བསྡུ་བཞིན་ཡོད་འདུག མི་སེར་ཕལ་མོ་ཆེས། ང་ཚོའི་ས་ཞིང་ང་ཚོ་ལ་དགོས། ང་ཚོ་རོགས་སྐྱོར་གང་ཡང་མེད་ནའང་འགྲིག ཟེར་ནས་མིང་རྟགས་བཀོད་པ་དང་། འགའ་ཞིག་ནས། རོགས་སྐྱོར་ཡང་དགོས་ལ་ས་ཞིང་ངེས་པར་དགོས། ཞེས་འབོད་སྐུལ་དང་མིང་རྟགས་བཀོད་ཡོད་འདུག མདོར་ན་དེ་རིང་ཐང་ཆེན་དེར་འདུ་འཛོམ་བྱས་ནས་ཉིན་གསུམ་པ་དེ་འགྲོ་གི་ཡོད་འདུག་ལ་མཚོ་སྔོན་ཞིང་ཆེན་སོགས་རིམ་པ་མཐོ་བའི་དཔོན་རིགས་འགའ་ཞིག་སླེབས་རྒྱུར་ཡིན་པའི་སྐད་ཅ་ཡོད་འདུག མི་མང་གི་ཡར་ཞུ་ཁྲོད་ནས། ཆུ་ཁའི་ཀརྨ་ཟེར་བའི་ཚོང་པ་རྒན་པོ་ཞིག་གིས་སྡུག་གི་ཐོག་ལ་སྡིག་པ་ཚབས་ཆེན་འདི་འདྲ་བཟོད་ཐུབ་ཀྱིན་མི་འདུག་ཟེར་ནས་མི་མང་གི་མངོན་འདོད་ཤུགས་ཆེར་བཤད་པས་མདང་ནུབ་ཆུ་ཁའི་ཀརྨ་གཙོས་པའི་ཞུ་འབོད་བྱེད་མཁན་སྐྱ་སེར་འགའ་ཞིག་བཀག་ཉར་བྱས་སོང་བའི་སྐད་ཆ་བཤད་བཞིན་ཡོད་འདུག ད་དུང་ཡང་མུ་མཐུད་ནས་ཐང་ཆེན་དེར་ཞགས་ཉལ་བྱེད་བཞིན་ཡོད་འདུག ལམ་གཞུང་གི་རླངས་འཁོར་རིགས་ཆ་ཚང་བཀག་ཅིང་མཐའ་སྐོར་ནས་དམག་གིས་བསྐོར་ནས་ཡོད་པའི་གནས་ཚུལ་གོ་རྒྱུ་འདུག
ད་དུང་གནས་ཚུལ་ཁ་གསལ་པོ་བྱུང་ཚེ་མུ་མཐུད་དུ་འགོད་རྒྱུ་ཡིན།