ནུས་པ་ནི་སེམས་ལ་ཡོད།། སྟོབས་ལྡན་རྣམས་བཟོད་སྒོམ་ཐུབ།།

ནུ༷ས་པ༷་ནི༷་ངོ་མ་སེ༷མས་ཉིད་ལ༷་ཡོ༷ད་པས།། སྟོ༷བས་ལྡ༷ན་གྱི་ལས་རྣ༷མས་བཟོ༷ད་སྒོ༷མ་ནི་ཐུ༷བ་ཟེར།། ཡ་ཐོད་ན་༸རྒྱལ་བ་ཏིག་ཏིག་ཏུ་འཛིན་ཅིང་།། ཡ་ཁོག་ན་བོད་པ་ལྷེམ་ལྷེམ་དུ་ཉར་བ།། གཟུགས་པོ་ན་བོད་ཡིག་ཁྱུག་ཁྱུག་ཏུ་འཁྱུགས་ཤིང་།། དཔུང་པ་ན་དབྱངས་གསལ་ཁྲིག་ཁྲིག་ཏུ་ངོམ་པའི།། མ་འདྲིས་པའི་མཛའ་བོ་(puyol)ཕུ་ཡོལ་དུ་འབོད་པ།། འཇིག་རྟེན་གྱི་བུམ་པའི་འགྲན་བསྡུར་གྱི་དབུས་ན།། གཡས་ཕྱོགས་ཀྱི་མི་ལ་གྲུ་མདུང་འདྲ་རྒྱག་ཅིང་།། གཡོན་ཕྱོགས་གྱི་མི་ལ་སྦར་ཤད་འདྲ་བྱེད་ཅིང་།། འཇར་མན་པའི་རྩེད་འགྲན་དོམ་ཚོགས་ཀྱི་ཁྲོད་ནས།། ཁྱོད་ཉིད་ནི་རལ་བ་ཉིལ་ཉིལ་དུ་གསིག་པའི།། སེང་གེ་ནི་དར་མའི་མཆོང་སྟབས་ཤིག་ངོམ་ཞིང་།། རྡོག་ཐོ་དེ་མ་གཞུས་མགོ་ཐོ་དེ་གཞུས་ནས།། གྲུ་གུ་དེ་ཤེད་ཀྱིས་ནང་རོལ་དུ་བརྫངས་པས།། དོན་གྱིས་ནི་བུམ་པ་དེ་ག་རང་བླངས་སོང་།། ཤ་རུས་ཀྱི་འབྲེལ་ལམ་གདོད་མ་ནས་མེད་ཅིང་།། ཤར་ནུབ་ཀྱི་འཚོ་བ་དཔག་ཚད་ཀྱིས་ཆོད་ཀྱང་།། ཁྱོད་ཉིད་ཀྱིས་ང་ཚོར་དུངས་ཞེན་འདྲ་ཡོད་ན།། ང་ཡི་ནི་ཚོར་བ་ཁྱོད་ཉིད་ལ་འཁྱུད་འགྲོ།