༼དེང་དུས་དགོན་པ།༽དེ་ཡང་གནས་དེར་འགྲིམ་འགྲུལ་གྱི་ཆ་རྐྱེན་ཞན་པ་དང་། དགོན་ས་བདེ་མོ་ཞིག་ཀྱང་མེད་པས་དགོན་པའི་མཆོད་གཞིས་རོང་པོ་སྡེ་པའི་ནང་དུ་སྤོ་རྩིས་ཀྱིས་ད་བར་དུ་མི་ལོ་དུ་མའི་རིང་དུ་དགོན་པ་གསར་བཞེངས་བྱས་ཤིང་དེ་རིང་གི་བར་དུ་དགོན་པའི་ཚོགས་ཆེན་འདུ་ཁང་དང་། ཕྱག་མཛོད་ཁང་། གྲྭ་ཤག མཚན་ཉིད་གྲྭ་ཚང་གི་འདུ་ཁང་སོགས་འགའ་ཞིག་གྲུབ་ཅིང་འགའ་ཞིག་བཟོ་བཞིན་པའི་སྐབས་འདིར་འདི་ལྟར་གཏོར་བཤིག་ཐེབས་པ་རེད།
ད་ཐེངས་ཀྱི་ས་ཡོམ་འདི་ཐོག་མར་མགོ་ཚུགས་ས་རག་ཤུལ་འབྲོག་སྡེ་ནས་ཡིན་པ་ཨ་རི་དང་། རྒྱ་ནག་གཉིས་ཀས་བཤད་པ་བཞིན་ཡིན་འདུག་ཅིང་། རག་ཤུལ་དང་འདབས་འབྲེལ་བའི་རོང་པོ་སྡེ་པ་་དང་། རྗེས་བཟང་སྡེ་པ་སོགས་འབྲོག་ས་མང་པོ་ཞིག་གི་མི་རྒྱུ་གཉིས་ལ་གོད་ཆག་ཚབས་ཆེན་ཐེབས་འདུག འོན་ཀྱང་ལུང་པ་ཁུག་དཀྱོག་ཏུ་སོང་བ་དང། འབྲོག་ས་ཡིན་པ་སོགས་གང་ལྟར་གསར་འགྱུར་རྒྱུད་ལམ་ཁག་དུ་རྒྱ་བོད་གཉིས་ཀས་དོ་སྣང་ཆེར་མ་བྱུང་ཞིང་སྐྱོབས་གསོ་དང། རོགས་རམ་སོགས་ཀྱང་ཧ་ཅང་གི་ཉུང་ཉུང་མ་གཏོགས་རེག་གི་མེད་པ་རེད།
༼ས་འགུལ་གྱིས་གནོད་འཚེ་ཕོག་རྗེས་ཀྱི་པར།༽
སྐབས་འདིར་རོང་པོ་སྡེ་པའི་ནང་དུ་ཡོད་པའི་སྒ་རྭ་ཉག་དགོན་གསར་པ་འདིའི་གཡས་གཡོན་ནས་ས་གས་པདང་། རི་ཉིལ་བ་སོགས་ཀྱིས་གཏོར་སྐྱོན་ཚབས་ཆེན་ཕོག་པ་དང་ཉེ་འཁོར་གྱི་འབྲོག་པའི་མཆོད་སྡེ་མང་པོ་ཤི་རྨས་བཟོས་འདུག་ལ་ཁང་པ་ཕལ་མོ་ཆེར་རྡིབ་འདུག་ཅིང་རོང་པོ་སྡེ་བ་ནས་མི་གྲངས་༡༥༠ཡན་དུ་གྲོངས་ཡོད་འདུག སྒ་རྭ་ཉག་དགོན་པའི་ཁྲི་པ་ཁམས་མགྱོགས་རིན་པོ་ཆེས་སྐྱེ་དགུ་མདོ་གཙོས་པའི་ཡུལ་མི་གོད་ཆག་ཕོག་ཡོངས་ལ་གཟིགས་སྐོར་མཛད་ཅིང་རྒྱ་སྒོར་ཁྲི་ཉིས་བརྒྱ་ལྷག་གི་རོགས་རམ་གནང་ཡོད་འདུག ཁོང་ནི་དགོན་པ་འདིའི་བདག་པོ་རེད་ལ་དགོན་པ་གསར་པ་འདི་ལ་ནང་གི་རྒྱུ་ཆ་དང་། ཕྱི་ཡི་བཀོད་པ་སོགས་བོད་གཞིས་བྱེས་གཉིས་སུ་ལེགས་ཆ་བླངས་ཤིང་འགྲོ་སོང་ཧ་ཅང་ཤུགས་ཆེར་གཏོང་ནས་གསར་བཟོ་བྱེད་བཞིན་ཡོད་འདུག དེ་ཡང་དགོན་པ་འདི་ཉིད་མ་འོངས་པ་བོད་ཡུལ་སྟོད་སྨད་གང་ནས་འོངས་ཀྱང་ཆོག་པའི་མཚན་ཉིད་གཙོས་པའི་ནང་པའི་ཆོས་ཀྱི་བཤད་སྒྲུབ་གཉིས་ཀྱི་བསྟི་གནས་ཤིག་ཏུ་བསྒྱུར་རྒྱུ་དམིགས་ཡོད་འདུག
1 comment:
ཁྱོད་དངོས་གནས་དཔའ་བོ་རེད།
Post a Comment