མཐའ་བྲལ་བྱང་ཆུབ་སེམས་ཀྱི་མུ་ཁྱུད་འཁྱིལ།།
འཛིན་མེད་ལྟ་བའི་སོ་ཁ་ཕྱོགས་སུ་འཁོར།།
ཟླ་མེད་བསྟན་པའི་འཁོར་ལོ་རིན་པོ་ཆེ།།
2. ཡིད་གཉིས་ཐེ་ཚོམ་མེད་པའི་མིག་བཙུམ་ནས།།
དད་པའི་ལག་ཟུང་སྙིང་གི་ཕྱོགས་སུ་སྦྱར།།
ཅི་གསུང་བཀའ་སྒྲུབ་རྒྱལ་མཚན་རྩེར་བཀོད་ན།།
དགོས་འདོད་ཀུན་འབྱུང་ནོར་བུ་རིན་པོ་ཆེ།།
3. ཕ་མཁར་བྲག་རི་དཀར་པོ་ཐོག་ལྕེས་བཅོམ།།
ཤུལ་ལུས་འགྲོ་རྣམས་སྒྱིད་པ་འདར་ཆོམ་ཆོམ།།
ཅི་བྱ་གཏོལ་མེད་གྱུར་པའི་དྭ་ཕྲུག་ཚོགས།།
བརྩེ་ལྡན་མ་མ་བཙུན་མོ་རིན་པོ་ཆེ།།
4. བྱང་ཐང་བྱིས་པ་ལྟ་བུའི་གདོང་དམར་བ།།
ནང་དུ་འདུག་ཆོས་གྲ་སྒྲིག་སྡུག་སར་བྱེད།།
ཕྱི་ཡི་འགྲོ་ཆོས་རེ་བ་བཟང་སར་བྱེད།།
དུས་གསུམ་དཔྱོད་ལྡན་བློན་པོ་རིན་པོ་ཆེ།།
5. ཤར་གྱི་སྲིད་དོན་འདམ་བུ་ཐོང་གྱིས་བརྒལ།།
ནུབ་ཀྱི་ཚན་རིག་ཚང་ཚིང་ཧར་གྱིས་གཤགས།།
ཞི་བདེ་སྣ་ཞགས་རིང་པོ་ཕྱོགས་བཅུར་བརྐྱངས།།
མཐོ་སྒང་བོད་ཀྱི་གླང་པོ་རིན་པོ་ཆེ།།
6. སྟེང་ནས་གནམ་རལ་འོག་ནས་མཚོ་བརྡོལ་བའི།།
རེ་བ་རྨང་ནས་ཟད་པའི་ལམ་གོལ་བ།།
གང་འདོད་ཡུལ་དུ་སྐད་ཅིག་གཅིག་སྐྱལ་བ།།
ཐུགས་རྗེ་མི་གཡོལ་རྟ་མཆོག་རིན་པོ་ཆེ།།
7. སྲིད་གསུམ་འགྲོ་འདི་ད་ཀོ་ཆེར་ཁྲོས་ནས།།
སྣ་ཚོགས་མཚོན་གྱི་ཐང་ཐང་དུ་བཏབ་ཀྱང་།།
བྱམས་པའི་སེམས་ཀྱིས་ལྷག་པར་བརྩེ་བ་ཁྱོད།།
ཐུབ་པའི་རྟུལ་ཞུགས་དམག་དཔོན་རིན་པོ་ཆེ།།
8. དེ་ལྟར་རྒྱལ་སྲིད་དམ་པ་རིན་ཆེན་བདུན།།
མ་ལུས་རྫོགས་པའི་ཡོངས་འཛིན་དྲིན་ཅན་རྗེ།།
སྐུ་ཚེ་མི་ཤིག་རྡོ་རྗེ་དག་པའི་ཁམས།།
བསྐལ་པ་རྒྱ་མཚོར་གཡོ་བ་མེད་གྱུར་ཅིག། །།
ཅེས་༸ སྤྱི་ནོར་གོང་ས་མཆོག་བོད་ལུགས་དགུང་གྲངས་དོན་དྲུག་ལ་ཕེབས་པའི་འཁྲུངས་སྐར་ཏེ། ཕྱི་ལོ་༢༠༡༡ ལོའི་ཟླ་༧ པའི་ཚེས་༦་ཉིན་མི་རྐང་གླིང་བུར་འབོད་པས་གསོལ་བ་བཏབ་པ་དེ་བཞིན་དུ་འགྲུབ་པར་གྱུར་ཅིག་གུ།
མ་ལུས་རྫོགས་པའི་ཡོངས་འཛིན་དྲིན་ཅན་རྗེ།།
སྐུ་ཚེ་མི་ཤིག་རྡོ་རྗེ་དག་པའི་ཁམས།།
བསྐལ་པ་རྒྱ་མཚོར་གཡོ་བ་མེད་གྱུར་ཅིག། །།
ཅེས་༸ སྤྱི་ནོར་གོང་ས་མཆོག་བོད་ལུགས་དགུང་གྲངས་དོན་དྲུག་ལ་ཕེབས་པའི་འཁྲུངས་སྐར་ཏེ། ཕྱི་ལོ་༢༠༡༡ ལོའི་ཟླ་༧ པའི་ཚེས་༦་ཉིན་མི་རྐང་གླིང་བུར་འབོད་པས་གསོལ་བ་བཏབ་པ་དེ་བཞིན་དུ་འགྲུབ་པར་གྱུར་ཅིག་གུ།
