འཛམ་གླིང་ཁོར་ཡུག་སྲུང་སྐྱོབ་ཉིན་མོ་འདིར་ས་སྒང་འདིར་འཁོད་པའི་འགྲོ་བ་མིའི་རིགས་ཕལ་མོ་ཆེས་རང་ཉིད་གནས་སྡོད་བྱེད་ས་འདི་ཉིད་བདག་གཉེར་ལེགས་པོ་མ་བྱུང་བས་ཆེས་འཇིགས་སུ་རུང་བའི་གཡང་གཟར་ཞིག་ཏུ་གནས་བཅས་ཡོད་པར་ཤེས། དེའི་ཆེད་དུ་ལྗོན་ཤིང་འདེབས་འཛུགས་དང་། གད་སྙིགས་གཙང་བཟོ། ཆུ་བེད་ཉུང་སྤྱོད་སོགས་སྣོད་ཀྱི་འཇིག་རྟེན་འདིར་ཕན་པོའི་ལས་ཀ་མང་པོ་ཞིག་གཉེར་དང་གཉེར་བཞིན་འདུག དེ་དང་དུས་བསྟུན་ནས་ང་རང་ཉིད་ཀྱི་འཚོ་སྡོད་བྱེད་སའི་བོད་ཡུལ་སྣོད་བཅུད་སྤྱི་དང་། ལྷག་པར་འབྲི་ཟླ་ཟལ་མོ་སྒང་གི་ཁོར་ཡུག་དེ་དག་ཡིད་ལ་ཡང་ཡང་ཤར། ལྷག་པར་ཟལ་མོ་སྒང་གདོད་མའི་སྲོག་ཆག་དེ་དག་གི་འཚོ་གནས་དང་། རིན་ཆེན་གྱི་གཏེར་དངོས་སོགས་ལ་བསུབ་མི་ཐུབ་པའི་གོད་ཆགས་དེ་དག་དྲན། དེའི་ཆེད་དུ་རང་གི་ལུས་སྲོག་ལོངས་སྤྱོད་ཁ་རྗེ་དབང་ཐང་ཆ་ཚང་བློས་གཏོང་བྱེད་མྱོང་བའི་མི་བུ་སྐོར་ཞིག་སེམས་ངོགས་ནས་ལྷང་ངེར་ཐོན། རྒྱས་བཟང་བསོད་ནམས་དར་རྒྱས་ནི། གནའ་དུས་སུ་བཤད་སྟངས་བྱས་ན་ཡུལ་ཤུལ་དང་། རག་ཤུལ། དགེ་ཤུལ་གསུམ་ལས་ཡུལ་ཤུལ་ལུང་པར་དང་། དེང་སང་ཡུལ་ཤུལ་བོད་རིགས་རང་སྐྱོང་ཁུལ། འབྲི་སྟོད་རྫོང་། བསོད་རྒྱལ་ཞང་གི་འབྲོག་སྡེར་ཕྱི་ལོ་༡༩༥༤་ལོར་སྐྱེས།
ཆུང་དུས་ནས་སློབ་གྲྭར་འགྲིམ་པའི་གོ་སྐབས་ཕྲན་བུ་རེག་ཅིང་༡༩༧༤་ལོར་མཚོ་སྔོན་མི་རིགས་སློབ་གྲྭ་ནས་སློབ་མཐར་ཕྱིན། སྐབས་འདི་དག་དུ་མཐོ་སྒང་འདིའི་གདོད་མའི་སྲོག་ཆགས་དེ་དག་རྩ་སྟོང་དུ་གཏོང་བཞིན་པའི་གནས་སྐབས་དང་། གཏེར་རྐུན་པ་དང་། ལྐོག་རྔོན་པ་རྣམས་ཀྱིས་གཏེར་ཁ་གང་བྱུང་སྔོགས་འདོན་བྱེད་ནས་ཡུལ་མིའི་འདི་དག་བསུན་ཚེར་ཆེས་ཆེར་བྱེད་བཞིན་པའི་དུས་རབས་ཤིག་རེད། གོང་རིམ་ནས་ཇག་རྐུན་འདི་དག་གདོང་བྱེད་ཀི་མེད་པས་ས་གནས་ཡུལ་མི་རང་རང་གིས་རང་གི་ཁོར་ཡུག་དེ་དག་སྲོག་བསྡོས་བྱེད་ནས་སྲུང་སྐྱོབ་བྱེད་བཞིན་པ་རེད། བསོད་ནམས་དར་རྒྱས་ཀྱིས་སྙིང་སྟོབས་ཞུམ་མེད་ཀྱིས་ཇག་རྐུན་རྣམས་གདོང་ལེན་ཚ་ནན་བྱས་པས་མི་མང་གིས་རིམ་གྱིས་མགོ་དཔོན་དུ་བསྐོས་ནས་མཐར་འབྲི་སྟོད་རྫོང་ཏང་གི་དྲུང་ཆེ་གཞོན་པའི་གོ་སར་སླེབས། དེ་དང་མཉམ་དུ་ཨ་ཆེན་གངས་རྒྱབ་ཀྱི་རང་བྱུང་སྐྱེས་ཁམས་ཁོར་ཡུག་སྲུང་སྐྱོབ་ཀྱི་ཆེད་དུ་གདོང་ལེན་མི་སྣ་རུ་འདེམས་ཐོན་བྱུང་། ཁོས་བཤད་དོན། "ཁོར་ཡུག་འདིའི་ཆེད་དུ་མི་བུ་འགའ་ཞིག་མ་ཤི་བར་དུ་ཐག་ཆོད་མི་ཐུབ།" ཅེས་སྔ་ནས་ཁོར་ཡུག་འདིའི་ཆེད་དུ་རང་སྲོག་བློས་གཏོང་བྱེད་ཀྱིན་ཡོད།
༡༩༩༤་ལོའི་ཟླ་བ་དང་པོའི་ནང་དུ་ཟི་ལིང་ཚོགས་འདུས་སུ་ཡོད་པའི་སྐབས་དེར། ཨ་ཆེན་གངས་རྒྱབ་ཏུ་རི་དྭགས་ལྐོག་རྔོན་པ་ཡོད་པའི་གནས་ཚུལ་ཏར་འཕྲིན་འབྱོར་རྗེས། ལས་རོགས་དང་། ལག་ཆ་མཐུས་ཚང་བྱེད་ལོང་མེད་པར་གྲང་ངར་ཧ་ཅང་ཆེ་བའི་ནམ་ཟླ་དེར་བོད་པ་རྣམས་ཀྱི་ཨ་ཆེན་གངས་རྒྱབ་དང་། སོག་སྐད་དུ་ཁི་ཁི་ཤིས་ལི་ཟེར་བའི་ས་གནས་དེར་རི་དྭགས་གཙོད་སྲུང་སྐྱོབ་ཀྱི་ཆེད་དུ་བསྐྱོད། ལམ་བར་ནས་ལྐོག་རྔོན་པ་ཚོ་ཁག་སྔ་ཕྱི་དུ་མ་གཏོར་ནས་རི་དྭགས་གཙོད་ཀྱི་པགས་པ་ཆིག་སྟོང་བརྒྱད་བརྒྱ་ལྷག་ཙམ་དང་། གཞན་ཡང་མེ་མདའ་ཆེ་ཆུང་གྲངས་བཅུ་ཕྲག་ལས་བརྒལ་བ་དང་། མདེའུ་སྟོང་ཕྲག་མང་པོ་འཕྲོག མཐའ་མ་དེར་ཇག་པ་བཅོ་བརྒྱད་ཅན་གྱི་རྔོན་ཇག་ཚོ་པ་གཅིག་དང་ཐུག་སྟེ་འཐབ་འཁྲུག་དྲག་པོ་ཇ་ཡུན་ཙམ་བྱས་པས་རྨས་སྐྱོན་འགའ་ཞིག་བྱུང་ནའང་ཕན་ཚུན་སྲོག་སྐྱོན་མ་བྱུང་བར་ཇག་པ་དེ་དག་འཛིན་བཟུང་བྱས། གཡུལ་དུ་ཞུགས་ནས་ཉིན་གྲངས་བཅོ་ལྔ་ཙམ་སོང་ཞིང་ཇག་པ་འཛིན་བཟུང་བྱས་པ་རྣམས་དེད་ཡོང་བའི་ལམ་བར་ནས་རོགས་པ་འགའ་ཞིག་གི་ལག་ནས་ཇག་པས་མེ་མདའ་འཕྲོག་རྗེས་ཕན་ཚུན་མེ་མདའ་རྒྱག་རེས་ཀྱིས་དམར་འཛིང་བྱས་ཏེ་༡༩༩༤ཟླ་བ་༡་ཚེས་༡༨ཉིན། ཕྲག་འདོམས་༥༠༠༠། ཙམ་གྱི་མཐོ་ཚད་ཡོད་པའི་ཉི་མའི་མཚེའུ་འགྲམ་ངོགས་སུ་རང་སྲོག་ཤོར།
སྐབས་དེར་ཉེ་འཁོར་བོད་མི་རྣམས་ཀྱིས་གདུང་སེམས་མཉམ་བསྐྱེད་ཀྱིས་བསྔགས་བརྗོད་ཀྱིས་མེ་ཏོག་འཐོར་དཔའ་བོ་འདི་ཉིད་ཀྱི་ཕྱོགས་སུ་ལངས། གུས་པས་ཀྱང་སེམས་ཚོར་ཁྲག་ལ་བསྲེས་ནས།༼རྟོགས་བརྗོད་ཨུདྤལ་དམར་པོའི་ཕྲེང་བ་༽ཞེས་པའི་རྗེས་བཟང་བསོད་ནམས་དར་རྒྱས་ཀྱི་མཐོ་སྒང་འདི་ཉིད་སྲུང་སྐྱོབ་ཀྱི་ཆེད་དུ་གཡུལ་ངོར་དཀྲོངས་པའི་དངོས་བྱུང་གི་ལོ་རྒྱུས་དང་སྦྱར་ནས་ཚིགས་སུ་བཅད་པའི་ལུགས་སུ་བྲིས་ཡོད་ཀྱང་རི་དྭགས་བཞིན་དུ་མི་ཡུལ་འཁྱར་སོང་བའི་ཤུལ་ནས་རྟོག་ངོ་ན་ཚིག་དུམ་འགའ་ཞིག་ལུས་པ་ཙམ་རེད། དྲན་སོས་པ་ལ། དམར་འཛིང་གི་སྐབས་དེར། "ཁ་བའི་འདབ་མས་ཡོངས་སུ་གཡོགས་པའི་ཀུན་བཟོད་སྒེགས་མོའི་དཀྱིལ་འཁོར་རུ།།
ཤུལ་ལུས་གངས་ལྗོངས་ཤེས་ལྡན་འགྲོ་ལ་རཀྟའི་རི་མོས་འདི་ལྟར་གདམས།། " སོགས་ཚིགས་བཅད་རུང་ཐུང་ཅི་རིགས་ཅན་ཞིག་ཡོད།
རྗེས་དྲན་གྱི་རྡོ་རིང་འདི་ནི་རྒྱ་མཚོ་ངོས་ནས་མཐོ་ཚད་ཕྲག་འདོམ་༤༧༦༧ཙམ་དུ་ཡོད་པའི་ཁུ་ནུ་ཉག་ཁར་རུ་བཞེངས། འོན་ཀྱང་ས་འགུལ་དང་། ཁོར་ཡུག་གྱི་གནོད་འཚེས་གས་སྐྱོན་འབྱུང་བཞིན་ཡོད་པས་སྐྱར་བཞེངས་བྱེད་རྒྱུ་ཐག་བཅད་ཡོད་སྐད་འདུག
