རྣམ་དཔྱོད་ལྡན་པའི་དྲ་གྲོགས་སྐོར་ཞིག་གིས་ལྕུམ་རིགས་གསུམ་གྱི་སྐོར་ལ་རྩོད་སྒྲུབ་གནང་བར་ལེགས།
ང་རང་རྩྭ་སྨན་ལ་རྒྱུས་ཕྲན་བུ་ཡོད་པ་དེ་དང་། སྨན་གཞུང་ཁུངས་མ་རྣམས་ནས་གསུངས་པ་རྣམས་བསྡོམ་ནས་ལྕུམ་རིགས་གསུམ་གྱི་ངོ་སྤྲོད་ཕྲན་བུ་བྱས་ན་དུས་ལ་བབ་འདུག་བསམ།
ལྕུམ་རིགས་དང་པོ། ལྕུམ། འདི་ལ་ལྕུམ་ནག་དང་ལྕུམ་དཀར་གཉིས་ཡོད། ལྕུམ་ནག་གི་རིགས་འདི་རོང་ས་རི་བྲག་གི་གསེབ་སོགས་ས་མཐོ་སར་སྐྱེ་བའི་རིགས་དང་། སྡོང་པོ་(ཡུལ་སྐད་དུ་ཁོག་ཕུད་ཟེར)ཡོད་པ་དེ་ཡིན། འཁྲུངས་དཔེར། ལྕུམ་ནི་རྫ་བྲག་དག་ལས་སྐྱེ།། ཆེ་འབྲིང་ཆུང་གསུམ་ཡོད་པ་ཡིན།། ལོ་མས་ས་གཞི་མནན་པ་འདྲ།། སྡོང་པོ་ཁོག་སྟོང་དམར་སྨུག་རིང་།། མེ་ཏོག་དམར་པོ་སྤུངས་པར་སྐྱེ།། འབྲས་བུ་ཟུར་གསུམ་རབ་ཏུ་མང་།། རོ་ནི་སྐར་རྩུབ་བད་ཀན་སེལ།། ཞེས་གསལ་བ་འདི་ནི་ལྕུམ་རིགས་གསུམ་ལས་ལྕུམ་ཆེན་གྱི་འཁྲུངས་དཔེ་དང་དེ་ལས་ཀྱང་ཕོ་ལྕུམ་མམ་ཡང་ན། ལྕུམ་ནག་གི་སྐྱེ་སྟངས་དང་འཁྲུངས་དཔེ་དེ་གསལ་བ་ཡིན། འདི་ནི་ང་ཚོ་གཞོན་ནུའི་དུས་སུ་ཡང་ཡང་ཟོས་ཤིང་ཡང་ཡང་སྤྱད་པའི་བོད་ཀྱི་སྔོ་ལྡུམ་དམིགས་བསལ་བ་དེ་རེད། འདིའི་ལོ་མ་ཆེ་བ་དང་། སྲ་བ་སོགས་ཀྱིས་འཕྲལ་སེལ་དུ་བེད་སྤྱོད་མང་ཙམ་ཡོད་པ་སོགས་མང་མང་ལ་ངོ་སྤྲོད་མི་དགོས་པ་རེད། ལྕུམ་ཆེན་འདིའི་རིགས་ལའང་ནང་གསེས་ཀྱི་གཉིས་སྟེ། ལྕུམ་དཀར་ལྕུམ་ནག་དང་། ཕོ་ལྕུམ་དང་མོ་ལྕུམ། ར་ལྕུམ་དང་ལུག་ལྕུམ་སོགས་མིང་གདགས་སྟངས་ཀྱང་མི་འདྲ་བ་ཡིན། གོང་དུ་བཤད་པ་དེ་ནི་ཕོ་ལྕུམ་དང་། ར་ལྕུམ། ལྕུམ་ནག་ཟེར་བ་དེ་རེད།
མོ་ལྕུམ་དང་། ར་ལྕུམ་དཀར་མོ་འདི་ནི་སྤྱིར་ལོ་མས་ས་གཞི་མནན་པ་སོགས་ལྕུམ་ཆེན་གྱི་སྐྱེ་སྟངས་མཚུངས་ནའང་སྐྱེ་ས་ཅུང་མི་འདྲ་བ་འདི་ནི་ས་ཁོད་དམའ་ས་དང་།
ནོར་ལྷས་སོགས་ཀྱི་འདབས་སུ་མཐོང་རྒྱུ་ཡོད་པ་མ་ཟད། འབྱེད་ཆོས་གཙོ་བོ་དེ་ནི་འདིའི་རིགས་ལ་ནམ་ཡང་སྡོང་པོ་(ཁོག་ཕུད།)
མི་འབྱུང་བ་དེ་རེད། ད་དུང་འདབ་མ་དཀར་ཤས་དང་། ངར་བ་གཉོམ་པ་སོགས་ཀྱིས་འབྱེད་ཀྱང་རུང་བ་ཡིན།
སྨན་དུ་གཏོང་རྒྱུ་ནི། ལྕུམ་རིགས་འདི་དག་གི་རྩ་བ་དེ་ཡིན་པ་རེད། དེ་ནི་སྟོན་ཁའི་དུས་སུ་འབྱུང་བ་དང་སྐྱེ་ཁམས་ཀྱི་ནུས་པ་རྣམས་ཐུར་དུ་བསྡུ་བའི་སྐབས་སུ་རྩ་བ་བཀོག་ནས་སྐེམས་པོ་བཟོ་ནས་སྨན་དུ་བཀོལ་བ་ཡིན།
ཕན་ཡོན་ནི། ལྕུམ་རྩས་དུག་ཚད་སྣོད་ཚད་བད་ཀན་སྦྱོང་།། ཞེས་སོ།
ལྕུམ་རིགས་གཉིས་པ། ལ་ཆུ།
རྫ་ལ་ཆུ། ཨ་ཆུ་ལ་ཆུ། ཆུ་རྩ། ལྕུམ་དམར་སོགས་སུ་འབོད་པ་ཡིན། རྒྱུན་དུ་ང་ཚོས་ལོངས་སྤྱོད་མྱོང་བའི་རྩ་ལྡུམ་འདི་ནི་རྫ་མགོ་དང་བྲག་བར་སོགས་སུ་སྐྱེས་ཤིང་།
ལོ་མ་སྐྱེས་སྟངས་སོགས་ལྕུམ་ཆེན་དང་འདྲ་ནའང་། ལོ་མའི་དབྱིབས་གཟུགས་སོགས་ཅུང་ཙམ་མི་འདྲ་ཞིང་།
ལྕུམ་ཆེན་གྱི་ལོ་མ་རྣམས་མཚོན་ཆའི་འཁོར་ལོ་ལྟ་བུ་རྣོ་ངར་ཅན་དུ་ཡོད་ནའང་། འདིའི་ལོ་རྣམས་དེ་ཙམ་ལོ་མའི་མཐའ་རྣམས་རྣོ་དབལ་དེ་ཙམ་མེད་པར་ཟླུམ་གཟུགས་སུ་ཡོད་པ་ཡིན།
རྐང་པ་རྣམས་ཤིན་ཏུ་དམར་ཞིང་འདི་ལའང་སྡོང་པོ་དམར་སྐྱ་སྐྱེ་བ་ཡིན། འཁྲུངས་དཔེར། ཆུ་རྩ་ལོ་མ་སྒོར་ཆེན་རྩུབ།།
ས་གཞི་མནན་ལ་རྐང་པ་དམར།། སྡོང་པོ་ལོ་མ་མེ་ཏོག་སོགས།། ཆེ་ཆུང་མ་གཏོགས་ལྕུམ་བཞིན་སྐྱེ།།
ཞེས་སོ། འདི་ལའང་འཇམ་རྩུབ་གཉིས་ཡོད་ཅིང་། རྫ་མགོ་དང་བྲག་བར་སོགས་སུ་སྐྱེས་པ་གཅིག་དང་།
ཆུ་གཞུང་གྲམ་ཐང་། ལམ་ཟུར་སོགས་སུ་སྐྱེས་པའི་རིགས་གཉིས་ཡོད།
ལ་ཆུ་གཉིས་པ་རྙོང་མ་ལ་ཆུ་ནི།
སྐྱེ་སྟངས་སོགས་རྫ་ལ་ཆུ་སོགས་འདྲ་ནའང་འདི་ནི་ཅུང་ཙམ་ཆུང་བ་ཡིན། འདི་ལ་སྡོང་པོ་རིགས་མེད་པ་ཕལ་ཆེར་མེད་པའི་ཚོད་དུ་ཡོད།
ཕྱི་མ་འདི་རྙོང་མ་ལ་ཆུ་ཞེས་འབོད་པ་ཡིན། དེ་ལྟར་ཐོགས་དོན་ཡང་འདི་ཉིད་མང་དུ་ཟོས་ན་རྙོང་ཡོང་བས་རེད།
སྤྱིར་ན་ལྕུམ་རིགས་གང་ཡིན་ཡང་ཐུར་དུ་འདེད་པའི་ནུས་པ་ཅན་ཤ་སྟག་ཡིན་པས་ཀུན་གྱིས་སྦྱོང་བ་བྱེད་ནའང་འདི་ནི་སྦྱོང་བའི་ནུས་པ་མྱུར་དུ་སྨིན་པའི་རིགས་ཤིག་རེད།
དེས་ན་ཡུལ་མི་རྣམས་ཀྱིས་དེ་ཙམ་ཟ་གི་མ་རེད་ལ་ཟོས་ཀྱང་དེ་ཙམ་ཞིམ་པོ་མེད་པ་རེད། ཕན་ཡོན།
ཆུ་རྩས་གཉན་སྦྱོང་རྨ་ཡི་སྐོམ་རྩི་བྱེད།། ཅེས་སོ།
ལྕུམ་རིགས་གསུམ་པ། ཆུ་མ་རྩི།
མཁའ་འགྲོའི་ལ་ཕུག་སོགས་སུ་འབོད། འདི་ལའང་རིགས་གཉིས་ཡོད། རིགས་འདི་གཉིས་ཧ་ཅང་གི་དབྱེ་བག་ཆེ་བ་ཡིན།
དང་པོ་མཁའ་འགྲོ་ལ་ཕུག་ཏུ་གྲགས་པའི་ཆུ་མ་རྩི་ནི། འཁྲུངས་དཔེར། ཆུ་མ་རྩི་ཞེས་བྱ་བ་ནི།
ལྕུམ་རིགས་གསུམ་གྱི་ཆུང་བར་གཏོགས།། སྟོད་སྨད་སྐྱེ་གནས་རྒོད་གཡུང་མང་།། འོན་ཀྱང་སྐྱེ་སྟབས་གཅིག་ལས་མེད།།
སྡོང་པོ་ཕྲ་ལ་རོ་ཡང་སྐྱུར།། མེ་ཏོག་བྱ་དཀར་གདང་ཞུགས་འདྲ།། རྩ་བ་ཟངས་ཁབ་གཤིབས་པ་འདྲ།།
ཞེས་གསུངས་ཡོད། འདི་ནི་གངས་ཆགས་དང་གཡའ་རིའི་འདབས་རོལ་དུ་མ་གཏོགས་དེ་ཙམ་མི་འབྱུང་ཞིང་།
སྡོང་བུའམ་མེ་ཏོག་དཀར་སེར་ཤིན་ཏུ་མིག་ལ་མཛེས་པ་ཞིག་འབྱུང་བ་ཡིན། འདི་ཉིད་ཡོང་ཁུངས་གཙོ་བོ་བོད་ཀྱི་མངའ་རིས་སྐོར་གསུམ་གྱིས་མཚོན་པའི་བོད་ཀྱི་སྟོད་ཕྱོགས་མཁའ་དབུགས་དང་ས་གཤིས་རྩུབ་ཅིང་།
རྩི་ཤིང་རིགས་སྐྱེ་དཀོན་སའི་གངས་དང་གཡའ་མཚམས་དག་ལས་འབྱུང་བ་དེང་དུས་བལ་ཡུལ་གྱི་ས་ཁོངས་སོགས་སུ་ཡོད་པ་ཡིན། འགའ་ཞིག་འདི་ཉིད་བྱ་རྒོད་སུག་པ་འཁྲུལ་མཁན་འབྱུང་བཞིན་ཡོད་པ་རེད།
འདི་ནི་རྫ་རི་དང་སྲིད་པའི་གངས་ཆག་གི་ཐོད་དུ་སྐྱེས་པའི་ཆུ་མ་རྩི་རེད། འདི་དང་ཅུང་ཙམ་སྐྱེ་ཚུལ་མཚུངས་པར་སྤང་ཐང་དང་།
ན་ཁུགས་སོགས་སུ་ཡོད་ཀྱང་ཆེ་ཆུང་དང་། ཁ་དོག་སོགས་ཀྱི་ཆ་ནས་ཧ་ཅང་ཧེ་བག་ཆེ། ཡུལ་མིས་མིང་ལ་མྱི་རྒན་བྲང་ཀོ་ཟེར་ཞིང་སྨན་དུ་གཏོང་འོས་མིན་བཤད་པའི་གཞུང་ལུགས་མ་མཐོང་།
ཆུ་མ་རྩི། ཨ་སྐྱུར་འགྲམ་སྐྱུར།
འགྲམ་སྐྱུར་སོགས་སུ་འབོད། ཆུ་མ་རྩི་ཞེས་བྱ་བ་ནི།། སྐྱེ་གནས་འདམ་དང་ཞིང་གསེབ་སྐྱེ།།
ལོ་མ་སྔོན་པོ་རལ་གྲི་འདྲ།། སྡོང་པོ་རྩ་རིས་དམར་པོ་ཡོད།། སྙེ་མ་ཟོར་བ་དག་པ་འདྲ།། ཞེས་ཟེར་ཞིང་།
འདི་ནི་འདམ་ཁུགས་དང་ཆུ་རྒྱུད་སོགས་ལ་རྒྱུན་དུ་མཐོང་རྒྱུ་ཡོད་པ་ཡིན། འདི་ལ་སྡོང་པོ་(ཁོག་ཕུད)ཆུང་ཆུང་སྐྱེས་ཡོད་ལ་ལོ་མ་སྒོར་དབྱིབས་རྩེ་མོ་རལ་གྲི་འདྲ་བ་ཡོད།
འབྲོག་ཕྱོགས་ཀྱི་བྱིས་པ་རྣམས་ཀྱིས་ལུག་རྫིའི་ཞོར་དུ་བཤད་མ་ཐག་པའི་ལྕུམ་རིགས་གསུམ་པོ་རྒྱུན་དུ་རོལ་མྱོང་བྱེད།
ཕན་ཡོན། ཆུ་མ་རྩི་ཡིས་ཆུ་སེར་རྨུ་ཆུ་སྦྱོང་།། ཞེས་གསུངས།
སྤྱིར་ན་ལྡུམ་བུའི་རིགས་འདི་དག་ས་ཁད་མཐོ་དམན་དང་།
བྱང་རོང་གི་ཁྱད་པར་སོགས་ཀྱི་དབང་གིས་ངོ་བོ་སྨན་རྫས་དེ་དང་དེ་ཉིད་ཡིན་ནའང་། རྣམ་པ་སྐྱེས་སྟོབས་ཆེ་ཆུང་མི་འདྲ་བ་དབང་གིས་སྐབས་སྐབས་སུ་ངོས་ཟིན་དཀའ་བའི་འགྱུར་ལྡོག་འགྲོ་བཞིན་ཡོད་པ་མ་ཟད་རོ་ནུས་ཞུ་རྗེས་སོགས་ལའང་དེ་མཚུངས་གི་འགྱུར་བ་འགྲོ་བཞིན་ཡོད་པ་རེད།
སྨན་ལྡུམ་གཅིག་རང་ཡིན་ནའང་ལུང་པ་ཉིན་སྲིབ་ཁ་སྐོར་སྟངས་དབང་གིས་ཕན་ནུས་མི་འདྲ་བར་རྒྱུད་ནས་ཡང་ཡང་གསུངས་ཡོད་པ་རེད།
བོད་ཀྱི་གསོ་བ་རིག་པའི་གཞུང་ལུགས་སུ་ཇི་ལྟར་ངོས་འཛིན་བྱེད་ཚུལ་ཙམ་ལས་དེང་སང་རྒྱལ་སྤྱིའི་ངོས་འཛིན་ལྟར་ན་འདི་དག་རིགས་མི་འདྲ་ཆེས་མང་པོ་ཞིག་དབྱེ་བཞིན་ཡོད་པ་རེད།
འོན་ཀྱང་བསྡུ་ན་འདི་གསུམ་གྱི་ཁོངས་སུ་མ་འདུས་པ་ཞིག་མེད་ངེས་སུ་སྙམ། ལྕུམ་རིགས་གསུམ་པོ་འདི་དག་ལ་སྨན་གཞུང་ཁོ་ནར་སྤྱོད་པའི་མིང་གི་རྣམ་གྲངས་རྣམས་དང་།
བྱེད་ལས། རོ་ནུས། ངོ་བོ། ཞུ་རྗེས། ལག་ལེན་དུ་བཀོལ་སྟངས་སོགས་རྒྱས་པར་བསྙད་དུ་ཡོད་ཀྱང་།
དེ་རིང་ལྕུམ་རིགས་འདི་དག་ནང་ཕན་ཚུན་འཛིང་པའི་འཆིང་བ་ལས་ཐར་ཐབས་བྱེད་རྒྱུ་ནི་རྩོམ་དུམ་འདིའི་ཉིང་དགོས་ཡིན་པས་དེ་རིང་ངའི་རེས་གཟའ་ཉི་མའི་གུང་གསེང་དང་ལྷན་དུ་མཇུག་འདི་ནས་བསྡུ་རྒྱུ་ཡིན།
འཁྲུངས་དཔེའི་ཚིག་རིས་རྣམས་དེའུ་དམར་དགེ་བཤེས་ཀྱི་ཤེལ་ཕྲེང་ལས་བཤུས་པ་ཡིན།
ཞུ་དག་མ་སོང་བས་ཡིག་ནོར་ཅི་མཆིས་བཟོད་པར་གསོལ།
འདྲ་པར་རྣམས་དྲ་ངོས་གང་ཞིག་ནས་རྐུ་ཁྱེར་བྱས་ཡོང་བ་ཤ་སྟག་ཡིན་པས་དགོངས་སེལ་ཞུ། ད་དུང་བོད་ཡུལ་རང་དུ་སྐྱེས་པའི་ལྡུམ་བུ་འདི་རིགས་ཀྱི་འདྲ་པར་དངོས་མ་རྣམས་འབྱོར་ཚེ་འཁྲུངས་དཔེ་དང་མཐུན་ཚབས་ཆེ་ངེས་ཡིན། འོན་ཀྱང་་་་།
