སེམས་ཚོར་ལྕི་མོ།

ཉི་མ་སེར་པོས་ཕྱི་མིག་མེད་པའི་གནམ་ཡིག་སྔོན་མོ་པང་ལ་ལྷུང་།།
ཕྱེ་ལེབ་སྒེགས་མོ་བློ་བཀོད་མེད་པས་ཞུ་འབོད་གནམ་གྱི་མཐོངས་སུ་སྙེགས།།
ད་དུང་འགའ་ཞིག་ཅི་དགོས་མ་ཤེས་འབར་བའི་མེ་ལྕེ་ཀློང་དུ་བཞུད།།
ད་ཀོ་ང་ནི་སྔ་ནུབ་འདི་དག་སེམས་པ་ལྷོད་ལ་འབབ་ཀིན་མེད།།

ཁྱད་ཆོས་བཅུ་ལྡན་གྱི་བློ་སེང་།

བཀའ་ཁྲི་འདེམས་པ་གཟའ་འཁོར་གཅིག་ལས་མེད་པའི་སྐབས་སུ་ངའི་བཀའ་ཁྲི་ལ་འགྱུར་བ་འགྲོ་མ་སོང་། སྤྱིར་ན་བཀའ་བློན་དང་སྤྱི་མཐུས་དེ་དག་སུ་དང་གང་ལ་འོས་ཤོག་བླུགས་མིན་དེ་རང་གི་འདོད་པ་ཁོ་ནས་ཐག་གཅོད་ཆོག་པ་ཞིག་རེད། ད་རེས་བློ་བཟང་སེང་གེ་བཀའ་བློན་ཁྲི་པ་འདེམས་ཐོན་བྱུང་བ་ཡིན་ན་བོད་ཀྱི་གནད་དོན་འབྲེལ་བའི་དཀའ་རྙོག་ཚང་མ་ཐག་ཆོད་རྒྱུ་རེད་ཟེར་བཤད་མི་ཐུབ་སྟེ་ལས་ཀ་ཕལ་མོ་ཆེ་གཞོག་གཞན་ལ་བལྟོས་ནས་བསྡད་ཡོད་པས་སོ། འོན་ཀྱང་གནད་དོན་འགའ་ཞིག་ལ་ལན་ནན་པོ་ཞིག་དང་མིག་དཔེ་བཟང་པོ་འགའ་ཞིག་སྟོན་རྒྱུ་རེད་བསམ།

༡༽ གོང་ས་རྒྱལ་བ་རིན་པོ་ཆེ་གཙོས་པའི་བོད་མི་ཕལ་མོ་ཆེས་དཀའ་བློན་ཁྲི་པ་དེ་ན་གཞོན་ཤེས་ཡོན་ཅན་གྱི་སྐྱ་བོ་ཞིག་གི་ལག་པར་སླེབས་ན་སྙམ་པའི་ཐུགས་རེ་ཡོད་པའང་ཁོང་ལ་ཚང་བ།
༢༽བོད་ཀྱི་གནད་དོན་འཐབ་རྩོད་འདི་ཏཱ་ལའི་བླ་མ་གཙོས་པའི་བཙན་བྱོལ་ནང་གི་རྒན་རབས་འགའ་ཞིག་བསམ་ཚུལ་ཙམ་ལས་དེ་དག་འདས་གྲོངས་སུ་སོང་རྗེས་རང་བཞིན་གྱིས་བོད་དོན་འདི་ཉིད་འཛམ་བུ་གླིང་འདིར་གཏན་མེད་དུ་ཆགས་རྒྱུ་ཡིན་པའི་ཚོད་དཔག་ལ་ལན་ཐེབས་པ།
༣༽སྐྱབས་བཅོལ་ནང་དུ་མི་ལོ་བཞི་བཅུ་ལྷག་གི་ཡུན་དུ་བོད་གཞུང་དམངས་གཉིས་ནས་འབད་འབུངས་ཡུན་རིང་བྱས་ཀྱང་ཤེས་ཡོན་དང་སྤོབས་པ་ཅན་གྱི་རང་རིགས་ཀྱི་རྒྱུན་འཛིན་ཕྱི་མ་ཞིག་ད་ལྟ་འཛམ་བུ་གླིང་འདིར་སྟོན་རྒྱུ་མེད་པའི་འཇིགས་དངངས་ལ་ལན་ཐེབས་པ།
༤༽དེ་རིང་བློ་བཟང་སེང་གེ་དངོས་སུ་བཀའ་བློན་ཁྲི་པར་འདེམས་ཐོན་བྱུང་བ་ཡིན་ན་ནམ་རྒྱུན་སྤྱི་ཚོགས་ཀྱི་ནང་དུ་བོད་པ་ནང་ཁུལ་དུ་ཆོལ་ཁ་དང་ཆོས་ལུགས་ཀྱི་ཕྱོགས་ཞེན་གྱིས་རྩ་དོན་ལ་རྡོག་རྩ་གཅིག་སྒྲིལ་མེད་པའི་བཤད་ཡམས་ལ་ལན་ཐེབས་པ་མ་ཟད་ལྷག་པར་དུ་ཆོལ་ཁ་དང་ཆོས་ལུགས་ཀྱི་མི་འབོར་མང་ཉུང་གིས་བཀའ་བློན་ཁྲི་པའི་མཚན་གནས་རྗེས་སུ་འགྲོ་ལྡོག་མ་ཤོར་བར་མི་མང་གོ་རྟོགས་གང་ལེགས་ཡོད་པ་དང་། དོན་དག་གལ་བོ་ཆེར་ཐུག་ན་བོད་པ་རྣམས་དངུལ་དང་། ཐོབ་ཐང་གྱིས་བསླུ་བྲིད་བྱེད་མི་ཐུབ་པའི་མང་གཙོའི་བེད་སྤྱོད་ཚད་ལྡན་འབྱུང་བཞིན་ཡོད་པར་གསལ་སྟོན་བྱས་པ།
༥༽ བཙན་བྱོལ་ནང་དུ་སྐྱེས་ནས་འཚར་ལོངས་བྱུང་བའི་ན་གཞོན་རྣམས་བོད་ཀྱི་གནམ་ས་མི་གསུམ་མ་མཐོང་ཞིང་བོད་ཡུལ་གྱི་འཚོ་བ་དངོས་ལ་རྒྱུས་ལོན་མེད་པས་བོད་དོན་དང་ལ་རྒྱ་ལ་དེ་ཙམ་གདེངས་འཇོག་མེད་པའི་ལྟ་ཚུལ་དང་བཤད་ཚུལ་ལ་ལན་འདེབས་ནན་པོ་བྱས་པ།
༦༽བཙན་བྱོལ་སྤྱི་ཚོགས་ནང་གི་ན་གཞོན་དེ་དག་ཨ་རི་སོགས་འཛམ་གླིང་ཡར་ཐོན་ཅན་གྱི་རྒྱལ་ཁབ་ཞིག་ཏུ་སླེབས་ན་རང་གི་ནང་མི་དང་ཉེ་འབྲེལ་གྱི་ཆེད་དུ་དངུལ་དངོས་ཁོ་ན་མགོ་བོ་འཁོར་ནས་སྡོད་པ་ལས་བོད་ཀྱི་རྩ་དོན་ལ་ལག་པ་འཆང་མཁན་མེད་པའི་ལྟ་ཚུལ་དང་བཤད་ཚུལ་རྣམས་ལ་དགག་པ་ཚ་ནན་རྒྱབ་པ།
༧༽ ལྷག་པར་ཨ་རི་ནང་དུ་བཙན་ས་ཟིན་པའི་ན་གཞོན་ཞིག་མི་ཚེ་སྐྱིད་པོ་གཏོང་སྟེ་དེངས་རབས་ཀྱི་འཚོ་བ་བསྐྱལ་ནས་མི་སྡོད་པར་བོད་ཀྱི་རྩ་དོན་གྱི་ཆེད་དུ་རྒྱ་གར་གྱི་ཡུལ་དུ་སླར་ཡར་ལས་དངོས་སུ་བྱེད་པ་འདིས་མ་འོངས་པའི་མི་རབས་གསར་པ་ལ་མིག་དཔེ་ཡང་དག་ཅིག་བསྟན་པ།

༨༽ བོད་རྒྱ་གཉིས་ཀྱི་དཀའ་རྙོག་འདི་སེལ་བ་ལ་དམག་དཔུང་མང་ཉུང་དང་། མཚོན་ཆ་བཟང་ཞན་ལ་བལྟ་རྒྱུ་མ་ཡིན་པར། དྲང་བདེན་ཁྲིམས་ཀྱི་ཐོག་ནས་ཐག་ཆོད་དགོས་དུས་བློ་སེང་གི་ཆེད་སྦྱོང་སློབ་ཚན་ལ་འབྲེལ་བ་དམ་པོ་ཡོད་པས་ཁྲིམས་ཀྱི་ཤེས་ཡོན་འདིས་ད་ལྟའི་བོད་རྒྱའི་ཞི་མོལ་གྱི་སྐབས་སུ་རྒྱལ་སྤྱི་ཁྲིམས་ཀྱི་སྒྲོམ་གཞི་དང་མཐུན་པའི་ཆ་རྐྱེན་གང་ལེགས་འཛོམས་པའི་མི་སྣ་ཡིན་པ།

༩༽ དེ་སྔ་བོད་ཀྱི་བཀའ་བློན་ཁྲི་གདན་ཟུར་སོགས་བོད་ཀྱི་ལས་གནས་གལ་ཆེན་མང་པོ་བཟུང་ནས་རང་གི་ལེགས་སྐྱེས་བོད་མི་རིགས་ཀྱི་ཆེད་དུ་ཕུལ་ཟིན་པ་ཁུ་བ་ཕྱུངས་པའི་ཇ་རོ་ལྟ་བུ་མ་ཡིན་པར་སྙིང་སྟོབས་དང་སྤོབས་པས་ཕྱུག་པའི་གཞོན་སྐྱེས་ཞིག་བཀའ་ཁྲིར་སླེབས་ན་འཛམ་གླིང་མི་མང་གིས་དོ་སྣང་དང་། གདེངས་འཇོག་ངེས་ཅན་ཡོང་བ། བོད་གཞིས་བྱེས་གཉིས་སུ་སེམས་ཤུགས་འཕར་བའི་ཆ་རྐྱེན་དུ་འགྲོ་ངེས་ཡིན་པ།

༡༠༽ སྤྱི་ཚོགས་ཀྱི་ནང་དུ་སློབ་གྲྭ་འགྲིམས་ཤིང་ཤེས་ཡོན་ཚད་ལྡན་ཡོད་པའི་མི་སྣ་རྣམས་ལམ་ཁ་མ་བཀག་པར་རང་གི་སྙིང་སྟོབས་དང་སྤོབས་པ་མཚུངས་པའི་ལས་གནས་ཕུལ་ན་ན་གཞོན་རྣམས་བོད་ཀྱི་ལས་ཀ་ལ་སྤྲོ་བ་ཡོང་བ་དང་། མི་རབས་གསར་རྙིང་བར་དུ་དམ་ཚིག་རྡོག་རྩ་གཅིག་སྒྲིལ་ཡོང་བའི་འགག་རྩ་ཡོད་པ་བཅས་ཞིབ་ཕྲ་བསམ་ན་གནད་འགག་མང་པོ་ཞིག་འདུག་ཀྱང་རགས་བསྡུས་བྱས་ན་དོན་ཚན་བཅུ་ཡི་ཐོག་ཏུ་ཡོང་གི་འདུག

རྒྱུ་མཚན་དེ་ལྟར་བས་ན་ངའི་བཀའ་ཁྲི་དེ་བློ་བཟང་སེང་གེ་ཁོང་ཉིད་གདམས་རྒྱུ་ཡིན། དེང་སང་སྐད་ཆ་ཕྱེད་བདེན་ལ་ཕྱེད་མི་བདེན་པ་མང་པོ་ཞིག་བཤད་བཞིན་འདུག་པས་བོད་མི་རྣམས་ཀྱི་རང་གི་མང་གཙོ་ཁེ་དབང་དེ་གཞན་གྱི་དབང་འོག་དང་གཡོ་སྒྱུའི་དྲ་བར་མ་ཚུད་པར་རེམ།

མེ་ཏོག་སྤྲུ་མའི་ཁོར་ཡུག

དེང་སང་རྒྱ་སྤྱི་གསར་ལམ་ཁག་ན་དབྱིན་མིང་དུ་(jasmine)ཞེས་མེ་ཏོག་ཞིག་གི་མིང་ལས་འཕྲོས་ནས་གསར་བརྗེའི་རྦ་རླབས་ཞིག་དཀྱིལ་ཤར་ཡར་གླིང་གི་དབུས་སུ་ཁྱབ་ནས་མེ་ལྩེ་གནམ་སྡེ་སྒོ་མོ་ཆེའི་ཐང་ཆེན་དུ་མཆེད་བཞིན་དུ་ཡོད་པ་རེད། ཞི་བའི་ལས་འགུལ་འདིས་གཉའ་ནས་གནོན་པའི་གཏེ་བོ་འགའ་ཞིག་གན་སྐྱལ་དུ་བསྒྱེལ་ནས་ཉམ་ཆུང་འགྲོ་བ་རྣམས་རང་དབང་དང་ཞི་བདེའི་ས་ཚིགས་ཤིག་ཏུ་བསྐྱེལ་བའི་ཕོ་ཉ་ཞིག་ཡིན་པ་རེད། ང་ཚོ་ཁ་བ་བོད་པ་ཚང་ལ་མཚོན་ན་ཞི་བའི་མེ་ལྕེ་འདི་འདྲ་བ་ཞིག་གང་ནས་ཐོག་མར་མགོ་འབུས་པ་དང་། བར་དུ་ཚ་རླབས་ཇི་ལྟར་ཆེ་བ། ཐ་མ་འབབ་ས་གང་ཞིག་ཏུ་ཡོང་བ་སོགས་བསམ་གཞིག་བྱེད་མཁན་ཉུང་ཉུང་ཙམ་དུ་མ་ཟད་ཉིན་ཤས་རིང་གི་སྔོན་ནས་གསར་འགྱུར་འདི་འདྲ་དྲ་ངོས་སུ་འགོད་མཁན་རྣམས་ལ་མེ་ཏོག་འདི་ཉིད་ཀྱི་བོད་མིང་རྣལ་མ་ཞིག་མ་རྙེད་ནས་བ་སྤྲུ་དང་། ཡང་འགའ་ཞིག་གིས་བ་སྤུ་ཡང་ཟེར། ཁ་ཤས་ཀྱིས་མ་ལི་ཀ་ཞེས་ལེགས་སྦྱར་གྱི་ཐ་སྙད་དེ་དག་བཀོད་པ་སོགས་གཅིག་གྱུར་བརྡ་ཆད་ཞིག་བཀོལ་ཐུབ་མེད་པ་རེད། དེ་རིང་གུང་སེང་དང་བསྟུན་ནས་མེ་ཏོག་འདི་ཡིས་དངོས་མིང་གང་ཡིན་ལ་ཞིབ་འཇུག་ཕྲན་ཙམ་བྱས་པའི་གྲུབ་དོན་འདི་ཉིད་ལོ་སར་གྱི་ལེགས་སྐྱེས་ཀྱི་ཚོད་དུ་དྲ་གྲོགས་རྣམས་ལ་འབུལ་བ་ཡིན་པས་ཧབ་ཐོབ་མེད་པར་དགྱེས་བཞེས་གནང་རོགས།
དབྱིན་མིང་དུ་གོང་དུ་གསལ་བ་བཞིན་(jasmine)དང་། འདི་ནི་་མཛམ་གླིང་ཤར་ནུབ་གང་སར་སྐྱེ་བའི་མེ་ཏོག་ཅིག་ཡིན་པས་རང་རང་གི་ཡུལ་དུ་མིང་སྣ་ཚོགས་པ་དང་། མེ་ཏོག་འདི་ཉིད་བེད་སྤྱོད་བྱེད་སྟངས་ཀྱང་སྣ་ཚོགས་པ་ཞིག་ཡོད་འདུག ནུབ་ཕྱོགས་ཀྱི་ཡུལ་གྲུ་རྣམས་སུ་ནི་མེ་ཏོག་འདི་ཉྀད་ལ་ལས་སྣོན་བྱས་ནས་སྐུད་མཉེ་བྱུགས་སྣུམ་གྱི་རིགས་དང་། དྲི་བཟང་གཏོར་ཆུ་རིན་གོང་མཐོ་བོ་ཅན་དང་། གདུག་སྤོས་རིགས་དུ་མ་བཅས་བཟོ་གིན་ཡོད་འདུག

བོད་སྐད་དུ་སྤྲུ་མ་ཞེས་འབོད། འདི་ལ་རིགས་དཀར་ནག་སེར་གསུམ་ཡོད། དེ་དག་ངོས་འཛིན་སྟངས་ནི།

ཐོག་མའི་ཁ་གཡང་།

༄༅།། བཀྲ་བ་མཁའ་ལྟར་ཡངས་པའི་འཇིག་རྟེན་ཁྱོན།།
ཤིས་པའི་སྒོ་བརྒྱ་འབྱེད་པའི་ཡིད་བཞིན་ནོར།།
བདེ་སྐྱིད་སྣང་བས་ཁྱབ་མཛད་ཐུབ་པའི་བསྟན།།
ལེགས་ཚོགས་འདོད་རྒུའི་དཔལ་དུ་འབར་གྱུར་ཅིག།

རྒྱུ་སྐར་ལྟར་བཀྲ་གཞིས་བྱེས་བོད་རིགས་ཀུན།།
མི་ཤིས་རྒུད་པའི་མུན་པ་ཡོངས་སངས་ནས།།
དགའ་བདེ་གནམ་ལོ་གསར་པ་འདི་ཡི་ནང་།།
དགེ་ལེགས་ལྷན་འཛོམས་ལག་གདང་སྦྲེལ་གྱུར་ཅིག།།

བོད་རྒྱལ་ལོ་༢༡༣༨རབ་བྱུང་བཅུ་བདུན་པའི་ལྕགས་མོ་ཡོས་ཀྱི་གནམ་ལོ་གསར་དུ་བཞད་པའི་ཐོག་མའི་བཀྲ་ཤིས་པའི་ཉིན་མོ་འདིར་གཞིས་བྱེས་བོད་རིགས་སྤུན་ཟླ་ཡོངས་ལ་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན།