ལྷུང་བཟེད་དང་། ཆོལ་ཟངས།

ཉེ་ཆར་བོད་ཀྱི་དུས་བབ་གསར་ཤོག་ཏུ། ཤཱཀྱ་ཐུབ་པའི་ལྷུང་བཟེད་རྙེད་པ། ཞེས་པའི་ཁ་བྱང་ཅན་གྱི་གསར་འགྱུར་ཞིག་མཐོང་། ག་ལེར་མར་བཀླག་སྐབས་རྒྱ་གར་གྱི་ཞིབ་འཇུག་པས་ཟླ་ངོ་དུ་མའི་རིང་དུ་བརྟག་དཔྱད་བྱས་ནས་སྟོན་པའི་ལྷུང་བཟེད་ཡིན་པར་ངོ་འཕྲོད་པ་དང་། དེ་ཡང་རྒྱ་ཡི་བཙུན་པ་སྔ་ཕྱིའི་ལམ་ཡིག་སོགས་ལ་ཁུངས་སུ་མཛད་པ་སོགས་ལ་བརྟེན་ནས་ངེས་ཤེས་བརྙེད་པ་སོགས་གསལ། མཉམ་དུ་འདྲ་པར་ཞིག་མཉམ་སྦྱར་བྱས་འདུག་ཅིང་། དེ་ལ་བལྟས་སྐབས་ཧ་ལས་སོང་། འདི་ནི་དབྱིབས་དང་ཆ་ཚད་གང་ལ་བལྟས་ཀྱང་། ཨུ་ཚུགས་ཇི་ལྟར་བྱས་ཀྱང་། ལྷུང་བཟེད་ཅིག་ཡིན་པའི་སྣང་བ་གཏན་ནས་བསྐྱེད་དུ་མ་བཏུབ། འདི་ནི་ཁ་ར་མེད་པའི་ཟངས་མཁར་ཞིག་མིག་ལམ་དུ་ཤར་འོང་བ་དེ་རེད། འདི་ནི་སྟོན་པའི་ལྷུང་བཟེད་ཡིན་པའི་དཔང་རྟགས་གང་ཡང་མེད་པ་མ་ཟད། དགེ་སློང་ཕ་ཡི་ལྷུང་བཟེད་ཆེ་འབྲིང་ཆུང་གསུམ་གང་ཡང་མ་ཡིན་པའི་སྟོན་པའི་ལྷུང་བཟེད་ཅིག་ཇི་ལྟར་ཡིན་ནམ་སྙམ་པའི་དོགས་པ་ཞིག་གིས་དྲངས་ནས་དེའི་སྐོར་ལ་མདོ་རྒྱུད་བསྟན་བཅོས་རྣམས་ལས་ཅུང་ཙམ་ཁུངས་ལུང་བཙལ་འཚོལ་གྱིས་རང་གི་བསམ་ཚུལ་དེ་བརྗོད་འདོད་བྱུང་།

འོ་ན། འདི་ཅི་རེད་ཅེས་འདྲི་སྲིད་པས་དེ་ལ། འདི་ནི་ཆོལ་ཟངས་ཤིག་རེད་ཅེས་སྨྲོས་ཤིག འོ་ན་ཆོལ་ཟངས་ཟེར་བ་ཅི་རེད། ཅེས་ད་དུང་འདྲི་སྲིད་པས་དེ་ལ་མདོ་རྒྱུད་བསྟན་བཅོས་འདི་དག་ཁུངས་སུ་བཅོལ་ནས་གསལ་བཤད་ནན་པོ་ཞིག་དགོས་སོ། སློབ་དཔོན་ཡོན་ཏན་འོད་ཀྱིས་འདུལ་བ་མདོ་རྩ་བ་ལས། ཆོལ་ཟངས་ས་ལས་བྱས་པ་གཞག་པར་བྱའོ། །ཞབས་གླང་པོ་ཆེའི་རྨིག་མཐིལ་འདྲ་བ་སྙིང་པོ་ཅན་ནོ། །དབུས་ན་ཡོད་པ་ཀ་དམ་པའི་མེ་ཏོག་འདྲ་ལ་རྩུབ་པ་དང་ངོ་། །བཀྲུས་ནས་ཁས་བུབ་ཏུ་གཞག་གོ །དགེ་འདུན་གྱི་ནི་ཁང་ཐོག་ཏུའོ། །གང་ཟག་གི་ནི་གནས་ཁང་གི་སྒོ་གླེགས་ཀྱི་ཕག་ཏུའོ། །

དེའི་འགྲེལ་བ་རྒྱ་ཆེར་འགྲེལ་ལས། བདེ་བ་ལ་རེག་པར་གནས་པར་བྱ་བའི་ཕྱིར་ཆོལ་ཟངས་ས་ལས་བྱས་པ་གཞག་པར་བྱའོ་ཞེས་བྱ་བ་སྨྲས་ཏེ། ཆོལ་ ཟངས་ཞེས་བྱ་བ་ནི་རྐང་ལག་བཀྲུ་བའི་སྣོད་དོ། །ཅི་ལས་བྱས་པ་ཞེ་ན། དེའི་ཕྱིར་ས་ལས་བྱས་པ་ཞེས་བྱ་བ་སྨྲས་ཏེ། གཞག་པར་བྱའོ་ཞེས་བྱ་བའི་ཐ་ཚིག གོ། །འདིར་གཞུང་ནི་གསེར་དང་དངུལ་དང་བཻ་ཌཱུརྱ་དང་། ཤེལ་ལས་བྱས་པའི་ཆོལ་ཟངས་དག་བཞག་པར་མི་བྱའི་ས་ལས་བྱས་པ་གཞག་པར་བྱའོ་ཞེས་གསུངས་པ་ཡིན་ནོ། །རྒྱ་ཆེར་འགྲེལ་པ་བྱེད་ པ་ལ་ལ་འདི་སྐད་ཅེས་ས་ལས་བྱས་པ་ཞེས་གཉིས་པ་སྨོས་པ་ལས་ན། ཟངས་ལས་བྱས་པ་ལ་སོགས་པ་ ཡང་བཀག་པར་ཤེས་སོ་ཞེས་ཟེར་ཏེ། དེ་ལྟ་ཡིན་ན་ཤིང་ལ་སོགས་པ ཡང་བཀག་པར་ཐལ་བར་འགྱུར་རོ། །ས་ལས་བྱས་པ་ཞེས་གཉིས་པ སྨོས་པ་ལས་ནི་དེ་ལྟར་མི་འགྱུར་ཏེ། ས་ལས་བྱས་པ་ཁོ་ནའོ་ཞེས་དམིགས་ཀྱིས་བསལ་བ་དང་བཅས་པར་བྱས་པའི་རིགས་སོ། །གསེར་ལ་སོགས་པ་ནི་བཀག་པར་གྲུབ་པ་ཡིན་ནོ། །དེ་ལྟ་བས་ན་གཙོ་བོ་གསེར་ལ་སོགས་པ་བཀག་པའི་ཚིག་གིས་ནི་ཟངས་ལས་བྱས་པ་ལ་སོགས་པ་ནི་བྱ་བར་ཤེས་པ་ཡིན་ནོ། །དབྱིབས་ཇི་ལྟར་ཞེ་ན། དེའི་ཕྱིར། ཞབས་གླང་པོ་ཆེའི རྨིག་མཐིལ་འདྲ་བ་སྙིང་པོ་ཅན་ནོ་ཞེས་བྱ་བ་སྨྲས་ཏེ། ཆོལ་ཟངས་གང་གི་ཞབས་གླ་པོ་ཆེའི་རྨིག་མཐིལ་འདྲ་བ་དེ་ནི། ཞབས་གླང་པོ ཆེའི་རྨིག་མཐིལ་འདྲ་བའོ། །དེ་ལྟར་བྱེད་དུ་གཞུག་གོ་ཞེས་བྱ་བར་སྦྱར་ཏེ། མི་ལྡེག་པར་གནས་པར་བྱ་བའི་ཕྱིར་རོ། །ཞབས་ཞེས་བྱ་བ་ནི་འོག་གི་མཐིལ་ལོ། །སྙིང་པོ་ཅན་ཞེས་བྱ་བ་ནི། ཆོལ་ཟངས་གང་ལ་སྙིང་པོ་ཡོད་པ་དེ་ནི་སྙིང པོ་ཅན་ཏེ། དབྱིབས་དེ་ལྟ་བུ་དང་ལྡན་པ་དེ་བྱེད་དུ་གཞུག་གོ་ཞེས བྱ་བར་སྦྱར་རོ། །སྙིང་པོ་ཅན་ཞེས་སྨྲས་ན། དེ་ཕྱོགས་གང་ན་ཡོད་པའི་སྙིང་པོ་དང་ལྡན་པ་མི་ཤེས་པས་དེའི་ཕྱིར། དབུས་ན་ཡོད་པ་ཀ་དམ་པའི་མེ་ཏོག་འདྲ་ལ་རྩུབ་པའོ། དང་ངོ་ཞེས་བྱ་བ་སྨྲས་ཏེ། དེ་དབུས་ཀྱི་ཕྱོགས་ན་ཡོད པའི་སྙིང་པོ་དང་ལྡན་པར་བྱེད་དུ་གཞུག་གོ་ཞེས་བྱ་བའི་ཐ ཚིག་གོ། །རྣམ་པ་ཅི་འདྲ་ཞེ་ན། དེའི་ཕྱིར། ཀ་དམ་པའི་མེ་ཏོག་འདྲ་ལ་ཞེས་བྱ་བ་ལ་སོགས་པ་སྨྲས་ཏེ། ཤིང་ཀ་དམ་པའི་མེ་ཏོག་ལྟར་དབྱིབས་ལྕོག་ལྕོག་པོར་འདུག་ལ། རྩུབ་པ་རུད་རུད་པ་དང་ལྡན་པའི་ཆོལ་ཟངས་བཅངས་བར་བྱའོ་ཞེས་བྱ་བར་སྦྱར་རོ། །ཇི་ལྟར་གཞག་པར་བྱ་ཞེ་ན། དེའི་ཕྱིར་བཀྲུས་ནས་ཁ་བུབ་ཏུ་གཞག་གོ་ཞེས་བྱ་བ་སྨྲས་ཏེ། ཆོལ་ཟངས་ཁས་བུབ་ཏུ་གཞག་གོ། །ཇི་ལྟར་བྱས་ནས་ཤེ་ན། བཀྲུས་ནས་ཏེ་ཆུ་གཞན་གྱིས་བཀྲུའི་རྐང་པ་བཀྲུས་པའི་ཆུས་ནི་མ་ཡིན་ནོ། །འདིར་གཞུང་ནི་རྐང་པ་གཉིས་བཀྲུས་ནས་རྐང་པ་བཀྲུས་པའི་ཆུ་གཙུག་ལག་ཁང་གི་ཕྱི་རོལ་ལམ་ཝ་ཁར་འབོར་བཅུག་སྟེ། ཡང་འཁྲུར་བཅུག་ནསསོ་ཞེས་གསུངས་པ་ཡིན་ནོ། །གང་དུ་གཞག་པར་བྱ་ཞེ་ན། དེའི་ཕྱིར་དགེ་འདུན་གྱི་ནི་ཁང་ཐོག དུའོ་ཞེས་བྱ་བ་སྨྲས་ཏེ། དགེ་འདུན་གྱི་ཆོལ་ཟངས་ནི་ཁང་ཐོག་ཁང་བའི་སྟེང་དུ་གཞག་གོ། །གང་ཟག་གི་ནི་གནས་ཁང་དུ་སྒོ་ གླེགས་ཀྱི་ཕག་ཏུའོ་ཞེས་བྱ་བ་སྨྲས་ཏེ། གནས་ཁང་དེར་སྒོ གླེགས་ཀྱི་ཕག་ཏུའོ་ཞེས་བྱ་བ་ནི། གང་ཟག་གི་ཆོལ་ཟངས་ནི་སྒོ གླེགས་དང་རྩིག་པའི་བར་དེར་གཞག་པར་བྱའོ། །

ཆོལ་ཟངས་ཞེས་པ་ནི་ཆུ་སྣོད་དེ་ཆུ་ཟངས་ཟེར་ནའང་འགྲིག་ངེས། དེའི་གཙོ་བོ་ནི་དགེ་སློང་རྣམས་ཀྱིས་རྐང་པ་འཁྲུ་བའི་ཆེད་དུ་རྐང་ཁྲུས་ཀྱི་གཞི་བྱ་ལ་དེ་ན་ཆོལ་ཟངས་བཞག་སྟེ། དེའི་ནང་དུ་ཆུས་བཀང་ནས་ཆུ་དེ་ཡིས་རྐང་པ་འཁྲུས་དགོས་སོ། གོང་གི་རྒྱ་ཆེར་འགྲེལ་ལས། ཆོལ་ཟངས་ཞེས་བྱ་བ་ནི་རྐང་ལག་བཀྲུ་བའི་སྣོད་དོ། ། ཞེས་གསུངས་པ་ཡང་རྐང་པ་དེའི་ནང་དུ་སྣུབས་ནས་རྐང་པ་འཁྲུ་བ་མ་ཡིན་པར་དེའི་ནང་གི་ཆུ་བླངས་ནས་རྐང་པ་འཁྲུད་དགོས་པ་ཡིན་སྟེ། ལུང་ལས། དགེ་སློང་གར་བབ་བབ་ཏུ་རྐང་པ་འཁྲུ་བ་དེར་སྦྲང་བུས་གང་བ་ཁྱིམ་པ་དག་གིས་མཐོང་ནས། འཕགས་པ། སྦྲང་བུ་ཟི་ཟི་བས་གང་བའི་ཕྱོགས་འདི་ནི་ཅི་ཡིན། འདིར་རྐང་པ་བཀྲུས་སོ། དེ་དག་གིས་འཕྱ་སྟེ། དགེ་སྦྱོང་རྣམས་ནི་གཙང་སྒྲ་མེད་པ། གར་བབ་བབ་ཏུ་རྐང་པ་འཁྲུའོ། དེ་གསོལ་བ་དང་། གར་བབ་བབ་ཏུ་རྐང་པ་མི་འཁྲུ་ཡི་གཙུག་ལག་ཁང་གི་སྟེང་གི་ཤར་ལྷོའི་མཚམས་སུ་རྐང་ཁྲུས་ཀྱི་གཞི་བྱའོ། དེ་ཇི་ལྟ་བུ་བྱ་མ་ཤེས་ནས། རུས་སྦལ་ལྟ་བུར་བྱ་བའོ། རབ་ཏུ་འཇམ་པ་བྱེད་པ་དང་། རྩུབ་པར་བྱའོ། ཉམ་ཆུང་བ་དག་གིས་ཕྱོགས་དེར་འགྲོ་མ་ནུས་པ་དང་། དེ་དག་གིས་གྱོ་མོ་བཞག་གོ གྱོ་མོར་འཁྲུ་བ་ཆག་ནས་མ་རུང་པ་གྱུར་པ་དང་། ཆོལ་ཟངས་ཉེ་བར་བཞག་པར་བྱའོ། ཞེས་གསུངས་པ་ལྟར་དགེ་སློང་རྣམས་རྐང་པ་འཁྲུད་པའི་ཆེད་དུ་གཙུག་ལག་ཁང་གི་འགྲམ་དུ་རྐང་པ་འཁྲུད་ས་བཟོ་ནས་དེའི་འཁྲིས་སུ་རྐང་པའི་དྲེགས་པ་བརྡར་བྱེད་རུས་སྦལ་གྱི་རྒྱབ་ལྟ་བུ་སོ་ཕག་རྩུབ་མོའི་རིགས་དང་། རྩུབ་བདར་ཚར་རྗེས་འཇམ་པོ་བཟོ་བྱེད་དང་། དེ་ནས་གཙང་མ་བཟོ་བྱེད་ཀྱི་ཆུ་དགོས་པས་དེའི་ཆེད་དུ་ཆོལ་ཟངས་ཉེ་བར་བཞག་དགོས་པ་གསུངས་པ་ཡིན་ནོ། ད་དུང་ཆུ་ནི་འཐུང་རྒྱུ་དང་། འཁྲུད་སྤྱད་གཞན་ཡང་བེད་སྤྱོད་ངེས་ཡིན་དེ། གོང་དུ་རྒྱ་ཆེར་འགྲེལ་ལས་ཆུ་གཙང་མ་ཉར་དགོས་པ་གསུངས་པའི་ཤུགས་ཀྱིས་གོ་ནུས་སོ། འདི་ནི་རྒྱ་གར་ཚ་བ་ལུང་པ་ཆུ་རྫ་ཆེན་པོ་དེ་འདྲ་སྒོ་འགྲམ་དང་གྲིབ་བསིལ་དེ་འདྲ་བཞག་ནས་ཡོད་པ་ད་ལྟ་ཡང་མཐོང་རྒྱུ་ཡོད་པ་ཡིན་ཞིང་། བེད་སྤྱོད་ཡང་རྐང་པ་དང་། ཁ་ལག་འཁྲུད་སྤྱད་སོགས་ཅི་དགོས་བེད་སྤྱོད་བྱེད་བཞིན་ཡོད་པ་འདི་དག་གིས་གོ་བ་ཆེན་པོ་རེ་བརྙེད་རྒྱུ་ཡོད་པར་སེམས། 

མེ་ཏོག་ཀ་དམ་པའི་དཔེར་གསུངས་པ་ནི། འཇམ་རྩུབ་དང་དབྱིབས་གཟུགས་གཉིས་ཀྱི་སྒོ་ནས་མེ་ཏོག་ཀ་དམ་པ་དཔེ་རུ་མཛད་པ་གསལ་ཞིང་། ཕྱི་ངོས་སུ་ཅུང་ཙམ་རྩུབ་མོ་ཡོད་ན་འདྲེད་གདར་མི་ཤོར་བརྟན་པོ་ཡོང་བ་དང་། དབྱིབས་ཟླུམ་པོའི་ཁྱད་པར་ནི་ནང་གི་ཆུ་ཕྱི་རོལ་དུ་གང་བྱུང་དུ་མི་འབོར་བའི་གནད་ཀ་ཡིན་པར་སེམས། མདོར་ན་གོང་གི་མདོ་དང་བསྟན་བཅོས་དེ་དག་གིས་དགོངས་པ་བསྡུས་ན་ཆོལ་ཟངས་ནི་དགེ་སློང་ལ་ཉེ་བར་མཁོ་བའི་ཆུ་ཟངས་སམ་ཆུ་རྫ་ཆེན་པོ་ཞིག་ཡིན་པར་གསལ་ལོ། འོ་ན་ཆོལ་ཟངས་དང་ལྷུང་བཟེད་གཉིས་ཀྱི་འཁྲུལ་གཞི་དེ་གང་ཡིན་ཞེ་ན། འདི་ནི་ལྷུང་བཟེད་དང་། དེ་དང་འདྲ་བའི་རིགས་ཡོངས་ལ་དབྱིན་སྐད་དུ་(Bowl)ཞེས་སུ་བོས་པ་ལས་འཁྲུལ་སོང་བ་མིན་ནམ་སྙམ། (Bowl)ཞེས་པ་བོད་སྐད་དུ་ཕོར་པ་ཞེས་བྱ་བ་འགྱུར་བ་ཡིན་ཞིང་། ཞེ་ས་དང་ལྷན་དུ་ལྷུང་བཟེད་ལའང་སྦྱར་བཞིན་ཡོད་པ་རེད། སྤྱིར་ན་ལེགས་སྦྱར་རང་དུ་ལྷུང་བཟེད་ལ་(པཱཏྲཾ་)དང་། ཆོལ་ཟངས་(པྲཏིགྲཧ༔)ཞེས་འདི་གཉིས་ཀྱི་དངོས་མིང་སོ་སོ་ནས་ཡོད་འདུག་ཀྱང་། ནང་ཆོས་དང་འབྲེལ་བའི་སྲོལ་རྒྱུན་གྱི་ཅ་དངོས་འདི་དག་དབྱིན་སྐད་དུ་སོ་སོར་མེད་པས་ཕོར་པ་དབྱིབས་གཟུགས་མཚུངས་པའི་ལྷུང་བཟེད་དང་། ཆོལ་ཟངས་ཡོངས་ལ་(Bowl)ཞེས་སྦྱར་བཞག་པས་དེ་རིང་མགོ་རྙོག་གི་རྒྱུ་ཞིག་སོང་བ་མིན་ནམ་སེམས། རྒྱའི་བཙུན་པ་ཧྥ་ཤན་དང་། ཐང་ཟན་གཉིས་ཀྱི་ལམ་ཡིག་དུ་འདིའི་སྐོར་ཡིན་ནམ་སྙམ་པའི་གླང་ཆེན་གྱིས་མི་ཐེག་པའི་ལྷུང་བཟེད་ཀྱི་སྐད་ཆ་ཞིག་ཡོད་པ་རེད། དེ་དག་ཀྱང་ཐོག་མའི་རྒྱ་ནག་གི་སྐད་དུ་ལྷུང་བཟེད་དང་། ཆོལ་ཟངས་གཉིས་སོ་སོ་མེད་པར་དེ་གཉིས་ཀ་ལ་ལྷུང་བཟེད་དུ་བོས་ཡོད་སྲིད་པ་དང་། ཡང་ན། རྒྱ་སྐད་དུ་དེ་གཉིས་སོ་སོ་ནས་ཡོད་ཀྱང་། སྒྲ་སྒྱུར་གྱི་སྐབས་སུ་གཉིས་ཀ་ལྷུང་བཟེད་དུ་བསྒྱུར་བ་སོགས་ཡིན་སྲིད་པ་རེད། གང་ལྟར་ཐང་གི་བཙུན་པ་གཉིས་ཀྱིས་གཟིགས་པའི་ལྷུང་བཟེད་དེ་ཡང་ཆོལ་ཟངས་ཡིན་ངེས་སུ་སྙམ། རྒྱ་སྐད་ཀྱི་མ་ཡིག་རང་ལ་གཟིིགས་ཐུབ་ན་གནས་ཚུལ་གསལ་པོར་འབྱུང་ངེས།

འོ་ན། ད་ཐེངས་ཀྱི་རྒྱ་སྤྱི་གསར་ལམ་ཁག་ཏུ་རིག་དངོས་རྙིང་པ་འདི་ལྷུང་བཟེད་ཡིན་པར་ཞིབ་འཇུག་པ་རྣམས་ཀྱིས་ཐག་བཅད་ཟིན་པ་དོན་ལ་གནས་དགོས་ཤིང་། གལ་ཏེ་ཆུ་རྫ་དང་ཕོར་པ་གཉིས་ནོར་སོང་ན་ཧ་ཅང་གི་ཧེ་བག་ཆེན་པོ་མ་ཡིན་ནམ། དེ་གཉིས་ནོར་བ་མི་སྲིད་པས་འདི་ནི་ལྷུང་བཟེད་ཆེན་པོ་ཞིག་ཡིན་པར་བཞག་ནས་ཀླན་ཀ་ཆུང་བར་སེམས་མཁན་ཡོད་སྲིད་པས། དེ་ནི་ཁྱོད་ཀྱིས་ཅི་བདེར་མཛོད་ཅེས་གསོལ་ཞུ་འདོད་བྱུང་ཞིང་། འདི་ནི་གཞན་གྱིས་བཤད་ཚད་ལ་ལེགས་སོ་སྟེར་བ་མི་ནུས་པའི་གོམས་གཤིས་ཅན་གྱི་རྟོག་གེ་བ་ཞིག་གི་སེམས་ཀྱི་འགྱུར་འགྲོས་ཤིག་ཏུ་ངོས་འཛིན་གྱིས་གཡོལ་ཏེ་སོང་ན་འཐུས་པར་འགྱུར་རོ།