རྫ་རི་སྨུག་པོའི་མགུལ་ན་བརྗིད་ཅིང་འཕར་སྤྱང་གཉིས་ཀྱི་སྲོག་དབུགས་འཇོམས།།
ས་མཐའ་གནམ་མཐའ་མིག་གིས་སྲུང་ཞིང་ཁ་བ་ཅན་ལ་ཁ་འཛིན་མཛད།།
བཟོད་མེད་དཀའ་སྡུག་ཐོང་གིས་གཤགས་ཏེ་གངས་རི་མགོན་པོའི་ལ་རྒྱ་འཛིན།།
སྒང་དྲུག་རི་བོའི་སྒང་ན་འཚོ་བའི་བྲེ་སེར་འབྲོང་གི་གཏམ་རྒྱུད་རེད།།
དེ་རིང་ཁྱོད་ནི་ལས་དབང་ཉམ་ནས་གཡུང་མོ་ལུག་ལ་མི་འགྲན་མོད།།
སྦྲ་ནག་ཟུར་ནས་གཅིན་ཚྭ་ལྡག་ཅིང་ནང་ཁུལ་དམེ་བའི་ཁོག་དཔུང་མཐོ།།
སྣ་ཐག་འདོམ་གང་སྣེ་ལ་འཁྲིལ་ཏེ་ཕར་ཕར་འཐེན་ཅིང་ཚུར་ཚུར་འཁོར།།
ཕ་ཁུ་དམ་པའི་རྗེས་ཤུལ་མ་ཟིན་གཡག་རྒན་དྲེད་པོའི་གཏམ་རྒྱུད་རེད།།
No comments:
Post a Comment