ཉི་མ་གཟས་ཟོས་སོང་།

གསེར་འོད་ལམ་ལམ་འཕྲོ་བའི་དགོན་པའི་ནང་དུ་མཁར་རྔ་སིལ་སིལ་གྱིས་གྲགས་སོང། མཁན་རིན་པོ་ཆེའི་ཞལ་ཁྱིམ་ལའང་སྐྱོ་ཉམས་ཤིག་བསྡུས་ནས་འདུག་པས་དེ་རིང་གནས་ཚུལ་དམིགས་བསལ་བ་ཞིག་ཡོད་པར་དཔོགས་ཐུབ། དེ་ནས་བླ་མས།
࿊ཟླ་འཛིན་དུས་སུ་བྱེ་བ་བརྒྱ་འགྱུར་དང་།། ཉི་འཛིན་དུས་སུ་བྱེ་བ་སྟོང་དུ་འགྱུར།།
མྱ་ངན་འདས་སོགས་སྟོན་པའི་དུས་ཆེན་ལ།། བྱེ་བ་འབུམ་དུ་འགྱུར་བ་མདོ་ལས་གསུངས།།
ཞེས་པ་སོགས་མདོ་རྒྱུད་ཁུངས་མ་རྣམས་ཀྱི་ལུང་ཚིགས་མང་ཙམ་སྐྱོར་ཞིང་ཉི་ཟླ་གཟས་བཟུང་བའི་སྐབས་སུ་རྣམ་དཀར་དགེ་བ་ལ་གཅིག་ཏུ་འབུངས་དགོས་པ་དང་། ད་དུང་རྒྱུ་མཚན་ནི་ལྷ་ཡི་བུ་ཉི་མ་དང་ཟླ་བ་གཟའ་འམ་ཡང་ན་འབྱུང་ཨོག་རལ་མ་ཟེར་བ་ཞིག་གིས་ཁ་ནས་མིད་འགྲོ་བ་དང་། འོན་ཀྱང་ཨོག་ཞབས་ནས་རལ་ནས་ཡོད་པས་དེའི་ནང་ནས་ཕྱིར་ཐོན་འགྲོ་བར་གསུངས་ཤིང་ཉིན་ཞག་གཅིག་དང་ལྷག་པར་ཉི་ཟླ་གཟའ་ཡི་མ་གཏང་གི་བར་དུ་དགེ་བའི་ལས་ལ་གཅིག་ཏུ་བརྩོན་དགོས་པར་བཤད་ཅིང་ཁོང་ཉིད་ཏིང་ངེ་འཛིན་སྒོམ་པའི་གྲབས་ཤོམས་བྱས།
དབང་ཕྱོགས་རི་བོའི་རྩེ་ནས་ཟླ་བའི་དཀྱིལ་འཁོར་གསལ་བ་དང་ལྷན་དུ་དུས་རྒྱུན་དང་མི་འདྲ་བར་གྲོང་མི་ཁྱིམ་མཚེས་རྣམས་ཀྱང་རང་རང་གི་ཁང་སྒོར་ཐོན་ནས་མིག་གིས་ཅེར་རེ་ལྟ་ཞིང་རྣ་བས་ཀྲོང་ངེ་ཉོན། དེ་ནས་རིམ་གྱིས་ཟླ་བ་སྒྲིབ་མགོ་རྩོམ་པ་ན་རྒན་རྒོན་རྣམས་ཀྱིས་མ་ཎི་རྒྱང་འབོད་བྱེད་ཀྱིན་ཡོང་གི་ཡོད་ལ་བྱིས་པ་སྣབས་ལུགས་རྣམས་ཀྱིས་ཀི་ཤར་རེ་བྱེད་ཙམ་བྱེད། ཕོ་གསར་དར་མ་རྣམས་ཀྱིས་མེ་མདའ་བརྡེགས་པ་དང་ཁྱི་རྦོད་པ་སོགས་བྱེད། ད་དུང་སྔགས་པ་སོགས་ཀྱིས་དུང་འབུད་པ་དང། རྔ་བརྡུང་པ་སོགས་བྱེད་ནས་ལྷིང་འཇགས་ཀྱི་ནམ་གུང་ཀུ་ཅོས་བསྐྱལ། དུས་ནམ་ཞིག་ན་སྔར་ལམ་ལྟར་ཟླ་བའི་དཀྱིལ་འཁོར་དགུང་སྔོན་དབྱིངས་སུ་ལྷམ་མེར་རྒྱུ་བ་ན་དབུགས་རིང་ཞིག་ནར་ནར་འཐེན་བཞིན་རང་ཁྱིམ་དུ་འཚུབས་སེ་འཛུལ་འགྲོ་ལ་ད་དུང་སྔ་མ་ལྟར་སེམས་ཁམས་བག་དྲོ་བོ་ཞིག་མེད་པར་སྲོག་ཆགས་གང་ཞིག་མི་བསྲུན་པ་ངར་མ་ཞིག་གིས་ཟོས་སོང་བ་དེ་བརྗེད་མེད། གླེགས་བམ་དུད་དྲེག་ཅན་དེ་དག་གི་མདུན་དུ་མར་མེ་གསལ་ཏིང་ཏིང་འགའ་ཕུལ་ནས།
ཨ་དཀོན་མཆོག་མཁྱེན། ད་དེ་འདྲ་རེད། མི་རྟག་པ། ཨོཾམཎིཔདྨེཧཱུཾ་་་་་་་་་་་་་་་་་་་་་་་ཨོཾམཎིཔདྨེཧཱུཾ་་་་་་་་་་་་་་་་་་་་་་་ཨོཾམཎིཔདྨེཧཱུཾ

࿊གོང་གི་ཚིགས་བཅད་དེ་སྔོན་མ་གཅིག་མཐོང་མྱོང་ཡོད་ནའང་ད་ལྟ་གཞུང་གང་ཡིན་ཙམ་ཡང་ཞུ་མི་ཐུབ་ཅིང་དག་མིན་ཡང་སུས་ཤེས། དྲ་གྲོགས་རྣམས་ནས་གསལ་ཆ་ཡོད་ན་བཅོས་རོགས།
༼བོད་རྒྱལ་ལོ་༢༡༣༦ས་གླང་མགོ་ཟླ་བའི་གནམ་གང་དང་། ཕྱི་ལོ་༢༠༡༠ཟླ་དང་པོའི་ཚེས་༡༥ཉིན།༽

དེ་རིང་ཉི་འཛིན་གི་གློག་བརྙན་འདི་ན་འདུག http://news.bbc.co.uk/2/hi/south_asia/8461356.stm