བརྩེ་འཕྲིན

དཔྱིད་ཀ

བྱེ་ཐང་སྐྱ་མོར་སྨིག་སྒྱུ་འཕུར་ཞིང་རི་ལུང་སྨུག་པོ་རླངས་ཞག་བསྐྱིལ།།
ཁུ་བྱུག་སྔོན་མོས་དཔྱིད་དཔལ་བསུ་བའི་གདངས་སྙན་རྣ་བའི་བུ་གར་འཇགས།།
མི་ཚོགས་རྒྱ་མཚོའི་ཟུར་ནས་འཕྲད་པའི་སྤོས་ངད་ལྡན་པའི་ན་ཟླ་ཁྱོད།།
སོར་བཅུ་ལག་པས་བཏང་ན་མི་ཕོད་སེམས་ཀྱི་སུལ་གྱི་མགྲོན་པོ་ཞིག།

དབྱར་ཀ
རྩི་ཐོག་དཀར་དམར་རི་ལུང་ཁྱབ་ཅིང་འབྲུ་དྲུག་ཞིང་ལ་ན་བུན་འཐིབས།།
དབྱར་གྱི་རྒྱལ་མོའི་ལང་ཚོ་འབར་ཚེ་ཁྱོད་ཀྱི་བཞིན་ལ་མཛེས་སྡུག་རྒོད།།
དགའ་བའི་མཆུ་འདབ་ཁྱོད་ལ་བསྐྱལ་བས་དུངས་པའི་འཁུན་སྒྲ་བདག་ལ་བསྲིངས།།
མཐའ་མེད་བརྩེ་དགའི་རྒྱ་མཚོའི་ཀློང་ན་མི་ཚེ་སུམ་ཆ་ཡུད་ཀྱིས་རྫོགས།།

སྟོན་ཀ
འབྲས་ལྡན་ལྗོན་པའི་གཡུ་མདོག་ལོ་མ་སྟོན་གྱི་བ་མོས་སེར་ཐིག་ཕོག།།
འདབ་ཆགས་ངུར་པས་ངུད་མོ་བྱེད་ཅིང་རྒྱང་རིང་མཁའ་མཐར་མིང་ཟུང་གཏད།།
བདག་ཀྱང་ཁྱོད་ལ་འཁྲེང་སེམས་ཆེ་ཡང་མི་འདོད་ལམ་ཕྲན་རྡོག་པས་བརྫིས།།
རབ་རིབ་གནམ་སའི་མཐའ་རུ་བསྐྱེལ་མཁན་མ་དང་ཁྱོད་ཀྱི་མིག་ཆུ་ཙམ།།

དགུན་ཀ
མཐིང་རིང་མགྲིན་པའི་རྫ་རྔ་བརྡུང་ཞིང་ཁེར་རྐྱང་ཤྭ་བས་ཆོ་ངེ་འདོན།།
དགུན་གྱི་དུས་ཚིགས་དབུགས་ཀྱིས་བགྲང་ཞིང་རྨི་ལམ་མཇལ་འཕྲད་རེ་སྒུགས་བྱས།།
སྙིང་ནས་འཕུར་བའི་བརྩེ་འཕྲིན་འདི་ཡིས་ལོ་བརྒྱའི་གྱེས་གདུང་མཐའ་རུ་བསྐྲད།།
འདི་ནི་ནང་གི་གསང་བ་མཚོན་པའི་སྙན་ངག་སྨྱུ་གུས་རི་མོ་སྟེ།།

མི་ཚེ།
མདོར་ན་མཛེས་སྡུག་ཟླ་བར་འཁུ་ཞིང་ཕྱི་ཐག་རིང་བ་ཁྱོད་དང་ལྷན།།
བརྩེ་དགའི་ཞག་པས་དམ་དུ་བཅིངས་ཀྱང་ངང་པས་བོར་བའི་ངང་མོ་བཞིན།།
ཁྱོད་ཉིད་གཅིག་པུ་ཤུལ་དུ་བཞག་ནས་བཟློག་མེད་འཐོར་རླུང་དྲག་པོ་ཡིས།།
ལྷོ་ཕྱོགས་ཚ་བའི་ནགས་ཀློང་བདས་ཀྱང་དུངས་སེམས་མདའ་མོ་ཁྱོད་ལ་ཤོར།།