མ་ཎིའི་རྫོངས་པ།

གཅེས་ཉར་ཁྱི་ཕྲུག་ཅིག་ཤི་བའི་དུར་འཇུག་སྐབས།

ཨོཾམཎིཔདྨེཧཱུཾ།

ཕྱི་ཐག་རིང་བའི་གྲུམ་ཕྲུག་ཁྱོད།།
མ་ནུ་ལྕེ་ཡིས་མ་འཇིབ་གོང་།།
མིག་ལྕེབས་གྱེན་དུ་མ་བཏེགས་གོང་།།
ང་ཡི་ཁྱིམ་དུ་བཙན་གྱིས་བླངས།།

བལ་གྱི་རྩེ་ནས་འོ་མ་ལྡུད།།
རྐན་གྱི་ཕུགས་ནས་ཟས་ཀྱིས་གསོས།།
གཅིན་དང་ཕྱི་སའི་གནོད་པ་བསལ།།
ལས་ཀྱི་ཕ་མ་ང་ཡིས་བྱས།།

ནམ་ཞིག་ཁོ་ལག་རྫོགས་པའི་དུས།།
མིག་གིས་ཟུར་ནས་ང་ལ་བལྟས།།
གདོན་དང་གནོད་པ་བསྲུང་བའི་ཕྱིར།།
གྲོང་དང་ཁྱིམ་མཚེས་ཟིང་ལ་སྦྱར།།

འདི་སྣང་དགྲ་འདུལ་གཉེན་སྐྱོང་བའི།།
ལས་གཞི་ཉིན་མཚན་ཡུག་ལ་སྦྲེལ།།
ཁྱོད་ལ་ཐོབ་ཤོེར་མེད་ན་ཡང་།།
ཁོ་བོ་མགུ་བའི་ཆེད་དུ་ལོ།།

ཤ་ཞོ་གཉིས་ལ་ངོམས་པ་མེད།།
ཇ་འོ་གཉིས་ལ་ཚིམས་པ་མེད།།
ལྟོ་བ་འགྲངས་ན་གཉིད་ལ་ཡུར།།
ཉི་མ་དྲོ་ན་འུར་ཟིང་ཆེ།།

རྡོ་རྗེ་འཁྲེག་ཅིང་ལས་རུང་ཡང་།།
གློག་ཞགས་འདྲ་བའི་ཚེ་ཐུང་འདིར།།
འགྲོ་བ་གཞན་དང་མ་འཁྲིག་པའི།།
ང་དང་ཁྱོད་གཉིས་མཚུངས་ཆོས་མང་།།

སྒོ་གསུམ་སྤྱོད་པ་ང་ལ་བསྟུན།།
བསླད་མེད་ཁྱོད་ཀྱི་སེམས་ཁམས་འདི།།
སྔོན་བྱོན་དམ་པས་རབ་བསྔགས་ཤིང་།།
བཤེས་གཉེན་བསྟེན་ལ་སྦྱར་སྐད་ལོ།།

དེ་ཡང་ཟས་དང་སྐོམ་གྱི་ཆེད།།
རྔ་མ་གཡུག་པ་ཙམ་མིན་པར།།
རང་ཤེད་མེད་པའི་བསམ་ཤེས་འདི།།
དམ་པ་རྣམས་ཀྱིས་རྟོགས་པ་འདྲ།།

དེ་ལྟར་ཕན་ཚུན་གུ་ཡངས་དང་།།
ལྷག་བསམ་ཟོལ་མེད་བྱས་པའི་མཐུས།།
ཁྱོད་ཉིད་མེད་པའི་ཁྱིམ་གཞིས་འདི།།
རེ་ཞིག་གྲང་རླུང་ཤུར་ཤུར་ལྡང་།།

རྒ་དང་ན་བའི་གནོད་པ་རྣམས།།
གྲིབ་སོ་བཞིན་དུ་འོང་བའི་དུས།།
གནའ་དེངས་གཉིས་ཀྱི་གསོ་དཔྱད་ཕལ།།
མ་བཀོལ་བྱ་བ་ཡེ་མ་དམིགས།།

སྐྱེ་རྒ་ན་འཆིའི་རྒྱལ་ཁྲིམས་འདི།།
ས་ཐོབ་སངས་རྒྱས་བྱང་སེམས་ཡང་།།
ཡུར་ཆུ་བཞིན་དུ་དྲངས་སོང་ན།།
ང་དང་ཁྱོད་འདྲ་ལྟ་ཅི་སྨོས།།

ཕྱི་མིག་སྔོན་མོ་ཅེར་བཞིན་དུ།།
སྲིད་པ་གཞན་དུ་བཞུད་པ་ཡི།།
མ་ཎི་དབྱངས་རྟ་གཉོམ་པོ་ཡིས།།
ད་རིང་ང་ཡིས་རྫོངས་པ་བྱེད།།

ཚེ་རབས་སྔོན་མའི་འབྲེལ་ཐག་གམ།།
འདི་ཞེས་ཤོད་དུ་མི་བཏུབ་པའི།།
མི་མངོན་ལྐོག་གི་ཚོར་བ་འདིས།།
མགྲིན་པ་ཡངས་མོ་མཆིལ་མས་བརྣངས།།

རིགས་དྲུག་འགྲོ་ལ་གཟིགས་པ་ཡི།།
འཕགས་མཆོག་སྤྱན་རས་གཟིགས་དབང་གིས།།
གྲུ་འཛིན་རི་བོའི་ཞིང་ཁམས་སུ།།
ད་ལྟ་འདྲེན་པར་མཛད་དུ་གསོལ།། །།

༢༠༡༡ ལོའི་ཟླ་ ༨ པའི་ཚེས་ ༧ ཉིན།