མུ་གེ་བྱུང་དུས་རྩམ་པ་དྲན།།
མྱ་ངམ་ཐང་ནས་ཆུ་བོ་དྲན།།
སྔུག་བསྔལ་མྱོང་དུས་མགོན་སྐྱབས་དྲན།།
ངས་ནི་དེ་རིང་ཁྱོད་ཉིད་དྲན།།
ཉི་ཟླ་མེད་པའི་མཐོ་སྒང་འདིར།།
གནམ་ཕུགས་སྔར་ལས་གནག་གིན་འདུག།
སྦྲ་ནག་ཆོན་ཐག་ཤོར་ལ་ཉེ།།
ངས་ནི་དེ་རིང་ཁྱོད་ཉིད་དྲན།།
རི་ལྟར་བརྗིད་པའི་སྐུ་གཟུགས་དང་།།
མེ་ལྟར་དམར་བའི་མིག་རྩ་དང་།།
གངས་ལྟར་དཀར་པའི་ལྷག་བསམ་ཅན།།
ངས་ནི་དེ་རིང་ཁྱོད་ཉིད་དྲན།།
ཕར་ལ་འཁོར་དུས་གཤིན་རྗེའི་གཟུགས།།
ཚུར་ལ་འཁོར་དུས་ཕ་མའི་འཛུམ།།
ཞི་རྒྱས་དབང་གི་འཁོར་ལོ་ཅན།།
ངས་ནི་དེ་རིང་ཁྱོད་ཉིད་དྲན།།
ཁྱོད་ནི་དཔའ་བོ་ཁེར་འགྲོས་རེད།།
ཁྱོད་ནི་རྒོད་པོ་ཁེར་རྒྱུགས་རེད།།
གཡུལ་དུ་ཤི་ཡང་ར་མདའ་མེད།།
ངས་ནི་དེ་རིང་ཁྱོད་ཉིད་དྲན།།
ཨར་ལ་གཏད་དུས་ཁྱོད་ཉིད་དྲན།།
འོན་ཀྱང་དེ་ནི་སྤྲང་རྟགས་ཙམ།།
ཁྱོད་ཉིད་གཤེགས་པའི་ཉི་མ་འདིར།།
མིག་ཆུ་ཞིག་གིས་དགོངས་རྫོགས་ཞུ།།
ཐམས་ཅད་ཤོར་བའི་མཐོ་སྒང་འདིར།།
ཡོད་ཚད་འཐོར་བའི་མཐོ་སྒང་འདིར།།
དེ་རིང་ཕྱི་མིག་མ་གཟིགས་རོགས།།
ཞི་བར་མནོལ་དང་བདེ་བ་ཆེ།། །།
